ᒫᑎᐅᓯᐅᑉ ᐊᒡᓚᖏᑦ 28
28
ᔩᓱᓯᐅᑉ ᒪᑭᓐᓂᖓ
ᒫᑯᓯ 16:1-10; ᓘᑲᓯ 24:1-12; ᔪᐊᓇᓯ 20:1-10
1ᓴᐸᑎ ᐊᓂᒍᕐᖕᒪᑦ, ᐱᓇᓱᐊᕈᓯᐅᑉ ᓯᕗᓪᓕᖅᐹᖓᑕ ᐅᓪᓛᖓᓂ ᖃᐅᒻᒪᓕᓵᖅᑎᓪᓗᒍ, ᒥᐊᕆ ᒫᒃᑕᓖᓂ ᑖᑦᓱᒪᓗ ᐊᓯᐊ ᒥᐊᕆ ᐃᓗᕕᕐᖕᒥᒃ ᑕᑯᔭᖅᑐᖅᐳᒃ. 2ᑕᑯᒋᑦ, ᓄᓇ ᓴᔪᒃᐱᓪᓚᒃᑐᐊᓘᕗᖅ; ᐊᑕᓂᐅᑉ ᐂᖏᓖᖓ ᕿᓚᖕᒥᑦ ᐊᖅᑲᖅᐳᖅ, ᐃᓗᕕᐅᑉ ᒪᑐᖓ ᐅᔭᕋᒃᔪᐊᖅ ᐊᒃᓴᑲᖅᑎᑉᐹ, ᖃᖓᓄᑦ ᐃᖏᓪᓗᓂ. 3ᑖᑦᓱᒪ ᓴᖅᑭᓐᓂᖓ ᖃᐅᒻᒪᓚᒃᑎᑐᑦ ᑕᐅᑦᑐᖃᓚᐅᖅᐳᖅ, ᐊᓐᓄᕌᖏᑦ ᐊᐳᑎᑐᑦ ᖃᑯᖅᑎᒋᓪᓗᑎᒃ. 4ᐅᓇᑕᖅᑐᒃᓮᑦ ᖃᐅᔨᒪᓇᓱᐊᖅᑎᑕᐅᔪᑦ ᑲᑉᐱᐊᓱᖕᓂᕐᖕᒧᑦ ᓄᑭᖏᕈᑎᕗᑦ ᑐᖁᖓᔪᑎᑐᑦ ᑍᒤᓕᕐᓗᑎᒃ.
5ᐂᖏᓕ ᐊᕐᖕᓈᖕᓄᑦ ᐅᖃᖅᐳᖅ, “ᑲᑉᐱᐊᓱᖏᓪᓗᓯᒃ; ᖃᐅᔨᒪᕗᖓ ᔩᓱᓯᒥᒃ ᕿᓂᕆᐊᕋᑦᓯᒃ ᑭᑭᐊᒃᑐᖅᑕᐅᓚᐅᖅᑐᒥᒃ. 6ᑕᕝᕙᓃᑦᑐᓐᓃᖅᐳᖅ; ᒪᑭᓯᒪᓕᕐᖕᒪᑦ, ᓲᕐᓗ ᐃᓕᑦᓯᓐᓄᑦ ᐅᖃᓚᐅᕋᒥ. ᐊᑏ ᕾᓗᓯᒃ ᑕᑯᖅᓯᐅᒃ ᓇᓪᓚᖓᕕᒋᓚᐅᖅᑕᖓ. 7ᒫᓐᓇ ᑐᐊᕕᕐᓗᓯᒃ ᐃᓕᓐᓂᐊᖅᑎᖏᑦ ᐅᖃᐅᑎᔭᖅᑐᓕᖅᓯᒃᑯᒃ ᑐᖁᖓᔪᓂᑦ ᒪᑭᓯᒪᓕᕐᖕᒪᑦ, ᑕᑯᒋᑦ, ᓯᕗᓂᑦᓯᓐᓂ ᒐᓕᓕᐊᒧᐊᕐᖕᓂᐊᖅᐳᖅ; ᑍᑲᓂ ᑕᑯᓂᐊᖅᐸᓯ! ᐃᖅᑲᐅᒪᒋᑦᓯ ᑕᒪᒃᑯᓂᖓ ᐅᖃᐅᓯᕆᔭᓐᓂᒃ.”
8ᑕᕝᕙ ᑐᐊᕕᕐᓗᑎᒃ ᐃᓗᕕᕐᖕᒥᑦ ᕿᒪᕉᑎᕘᒃ, ᑲᑉᐱᐊᓱᒃᓗᑎᒃ ᖁᕕᐊᓱᒻᒪᕆᒃᓗᑎᒡᓗ, ᐅᓪᓚᒃᓯᕘᒃ ᐃᓕᓐᓂᐊᖅᑎᖏᓐᓄᑦ ᐅᖃᕆᐊᖅᑐᕐᓗᑎᒃ.
9ᑕᑯᒋᑦ, ᔩᓱᓯᐅᑉ ᑲᑎᕔᑦ ᐅᖃᐅᑎᓪᓗᒋᒃ, “ᓮᒪᓂᐅᑉ ᓇᔪᕐᓕᓯᒃ.” ᑖᒃᑯᐊᒃ ᐅᐸᒍᑎᕘᒃ, ᐃᑎᒐᖏᑦ ᐊᒃᑐᕐᓗᒋᑦ, ᑐᒃᓯᐊᕐᕕᒋᕚᒃ, 10ᑕᕝᕙ ᔩᓱᓯᐅᑉ ᐅᖃᐅᑎᕚᒃ, “ᑲᑉᐱᐊᓱᖏᓪᓗᓯᒃ; ᖃᑕᓐᖑᑎᒃᑲ ᐅᖃᐅᑎᔭᖅᑐᖅᓯᒃᑯᒃ ᒐᓕᓕᐊᒧᐊᖁᓗᒋᑦ, ᑕᕝᕙᓂ ᑕᑯᓂᐊᖅᐹᖓ.”
ᐃᓗᕕᕐᖕᒥ ᖃᐅᔨᓴᖅᑐᕕᓃᑦ ᐅᖃᕆᐊᖅᑐᕐᖕᓂᖏᑦ
11ᐊᕐᖕᓈᒃ ᐃᓚᒥᖕᓄᐊᓕᖅᑎᓪᓗᒋᒃ, ᑕᑯᒋᑦ, ᐅᓇᑕᖅᑐᒃᓮᑦ ᐃᓚᖏᑦ ᖃᐅᔨᒪᓇᓱᐊᖅᑎᐅᓚᐅᖅᑐᑦ ᐃᓗᕕᕐᖕᒥᒃ ᐃᒡᓗᒐᓴᖕᓄᑦ ᐅᑎᖅᐳᑦ ᑐᓂᕐᕈᓯᖅᑎᑦᓯᔨᑦ ᐊᖓᔪᖅᑳᖏᓐᓄᑦ ᐅᓂᒃᑳᕐᓗᑎᒃ ᑕᒤᓐᓂᒃ ᐱᓂᐊᕐᖕᓂᐅᓚᐅᖅᑐᓂᒃ. 12ᑐᓂᕐᕈᓯᖅᑎᑦᓯᔩᓪᓕ ᐊᖓᔪᖅᑳᖏᑦ, ᔫᑎᓗ ᐊᖓᔪᖅᑳᖏᑦ ᑲᑎᒪᓪᓗᑎᒃ ᐊᖏᖃᑎᒌᒃᑲᒥᒃ, ᐅᓇᑕᖅᑐᒃᓮᑦ ᑮᓇᐅᔭᓂᒃ ᐊᒥᓱᓂᒃ ᐊᑭᓕᖅᐰᑦ, 13ᐅᖃᕐᓗᑎᒃ, “ᐅᖃᖃᑦᑕᕐᖕᓂᐊᖅᐳᓯ ᐅᓐᓄᐊᒃᑯᑦ ᓯᓂᒃᑎᓪᓗᓯ ᔩᓱᓯᐅᑉ ᑎᒥᖓ ᐃᓕᓐᓂᐊᖅᑎᖏᓐᓄᑦ ᑎᒡᓕᒋᐊᖅᑐᖅᑕᐅᓚᐅᕐᖕᓂᕋᕐᓗᒍ. 14ᐊᐅᓚᑦᓯᔨᐅᔪᖅ ᓄᓇᑦᑎᓐᓂᒃ ᑕᒪᑐᒥᖓ ᑐᓴᖅᑎᑕᐅᒃᐸᑦ, ᐅᖃᐅᑎᓂᐊᖅᐸᕗᑦ ᐸᓯᔭᒃᓴᐅᖏᓐᓂᑦᓯᓐᓂᒃ ᑕᒪᑐᒧᖓ, ᑕᒪᑐᒥᖓ ᐃᓱᒪᔮᕈᑎᖃᕆᐊᖃᕐᖕᓂᐊᖏᓚᓯ.”
15ᑕᕝᕙ ᐃᓗᕕᕐᖕᒥ ᖃᐅᔨᓴᓚᐅᖅᑐᑦ ᑮᓇᐅᔧᑦ ᑎᒍᕔᑦ ᐱᓂᐊᖁᔭᐅᓂᕆᔭᒥᑐᑦ ᐱᓇᓱᐊᓕᕐᓗᑎᒃ; ᑕᒪᓐᓇ ᐅᖃᐅᓯᐅᓚᐅᖅᑐᖅ ᓱᓕ ᔫᑎᓂᑦ ᐅᖃᐅᓯᐅᖃᑦᑕᖅᐳᖅ, ᐅᓪᓗᒥᒧᑦ ᑎᑭᓪᓗᒍ.
ᔩᓱᓯᐅᑉ ᓴᖅᑭᓐᓂᖓ ᐃᓕᓐᓂᐊᖅᑎᒥᓄᑦ
ᒫᑯᓯ 16:14-18; ᓘᑲᓯ 24:36-49; ᔪᐊᓇᓯ 20:19-23; ᐋᐴᓯᑕᓖᑦ 1:6-8
16 #
ᒫᑎᐅᓯ 26:32; ᒫᑯᓯ 14:28. ᑕᕝᕙ ᐃᓕᓐᓂᐊᖅᑎᑦ 11 ᒐᓕᓕᐊᒧᐊᖅᐳᑦ, ᖃᖅᑲᒧᐊᓗᑎᒃ ᔩᓱᓯᐅᑉ ᐅᐸᒃᑕᐅᖁᓚᐅᖅᑕᖓᓄᑦ. 17ᔩᓱᓯ ᑕᑯᒐᒥᑦᔪᑦ ᐹᒻᒪᒃᑎᕐᕕᒋᕚᑦ; ᐃᓚᖏᓪᓕ ᖁᓚᖅᐳᑦ. 18ᔩᓱᓯᐅᑉ ᐅᐸᒃᓗᒋᑦ ᐅᖃᐅᑎᕔᑦ, “ᐱᔪᓐᓇᕐᖕᓂᕐᖕᓂᒃ ᑕᒤᓐᓂᒃ ᑐᓂᓯᕕᐅᕗᖓ ᕿᓚᖕᒥ ᓄᓇᕐᔪᐊᒥᓗ. 19#ᐋᐴᓯᑕᓖᑦ 1:8.ᑍᒤᒻᒪᑦ ᐃᓅᖃᑎᒌᒡᔪᐊᓄᑦ ᐂᓕᕆᑦᓯ, ᐃᓕᓐᓂᐊᖅᑎᓐᖑᖅᑎᑦᓯᒋᐊᖅᑐᕐᓗᓯ: ᐹᑉᑎᓪᓗᒋᓪᓗ ᐊᑖᑕᐅᑉ ᐃᕐᖕᓂᐅᓪᓗ ᐊᓂᕐᖕᓂᐅᓪᓗ ᐃᑦᔪᕐᖕᓁᑦᑑᑉ ᐊᑎᖓᓂ, 20ᐊᔪᕆᖅᑐᕐᓗᒋᓪᓗ ᒪᓕᖁᓪᓗᒋᑦ ᐃᓕᑦᓯᓐᓄᑦ ᐱᖁᔨᓂᕆᓚᐅᖅᑕᓐᓂᒃ ᑕᒤᓐᓂᒃ; ᑕᑯᒋᑦ ᑍᒪᓐᖓᓕᒫᖅ ᐃᓚᒋᓂᐊᖅᐸᑦᓯ, ᓯᓚᕐᔪᐊᑉ ᓇᒡᒐᑖ ᑎᑭᓪᓗᒍ.”
Currently Selected:
ᒫᑎᐅᓯᐅᑉ ᐊᒡᓚᖏᑦ 28: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.