ᑯᓘᓯᐊᒥᐅᓄᑦ 1
1
ᐅᖃᐅᓰᑦ ᐱᒋᐊᕈᑎᖏᑦ
1ᐸᐅᓗᓯᒥᑦ, ᒎᑎᐅᑉ ᐱᔪᒪᔭᖓᒍᑦ ᔩᓱᓯ ᙭ᔅᑑᓯᐅᑉ ᐋᐴᓯᑕᓕᖁᑎᖓᓂᑦ, ᑎᒧᑎᒥᓪᓗ ᐅᒃᐱᖅᑑᖃᑎᑎᓐᓂᑦ.
2ᐃᑦᔪᕐᖕᓁᑎᑕᐅᓯᒪᔪᓄᑦ ᑯᓘᓯᐊᒦᑦᑐᓄᑦ, ᐅᒃᐱᖅᑑᖃᑎᑦᑎᓐᓄᑦ ᐅᒃᐱᕐᖕᓂᕐᖕᒥᑦᓯᐊᖅᑐᓄᑦ:
ᒎᑎᐅᑉ ᐊᑖᑕᑦᑕ ᐱᑦᓯᐊᕐᖕᓂᖓᑕ ᐱᔪᓐᓇᖅᑎᑦᓯᓂᖓᑕ ᐃᓚᒋᓕᓯ ᖃᓄᐃᖏᑦᓯᐊᖅᑎᓪᓕᓯᓗ.
ᑐᒃᓯᐊᕐᖕᓂᖅ ᖁᔭᓕᓂᕐᖕᒧᑦ
3ᑍᒪᓐᖓᑦ ᒎᑎᒧᑦ ᖁᔭᓕᖃᑦᑕᖅᐳᒍᑦ, ᔩᓱᓯ ᙭ᔅᑑᓯᐅᑉ ᐊᑖᑕᖓᓄᑦ, ᐃᓕᑦᓯᓐᓂᒃ ᑐᒃᓯᐅᑦᔨᓕᕌᖓᑦᑕ. 4ᑐᓴᖅᑎᑕᐅᓯᒪᓕᕋᑦᑕ ᐅᒃᐱᕐᓂᑦᓯᓐᓂᒃ ᙭ᔅᑑᓯ ᔩᓱᓯᒥ, ᓇᒡᓕᒍᓱᖕᓂᑦᓯᓐᓂᒡᓗ ᐃᑦᔪᕐᖕᓁᑎᑕᐅᓯᒪᔪᓕᒫᓂᒃ. 5ᓂᕆᐅᒋᔭᒃᓴᖅ ᐱᑦᔪᑎᒋᓪᓗᒍ ᐃᓕᑦᓯᓐᓄᑦ ᖁᒥᐅᑕᐅᓯᒪᔪᒧᑦ ᕿᓚᖕᒥ. ᑕᒪᓐᓇ ᓯᕗᓂᖓᒍᑦ ᑐᓴᓚᐅᖅᑕᓯ ᐅᖃᐅᓯᒃᑯᑦ ᓱᓕᔪᒃᑯᑦ, ᐅᖃᐅᓯᖅᑎᒍᑦ ᑐᓴᕈᒥᓇᖅᑐᑎᒍᑦ. 6ᐅᖃᐅᓰᑦ ᑐᓴᕈᒥᓇᖅᑐᑦ ᑎᑭᐅᑎᓯᒪᖕᒪᑕ ᐃᓕᑦᓯᓐᓄᑦ, ᓯᓚᕐᔪᐊᕐᖕᒥᐅᓕᒫᓄᓪᓗ ᓯᐊᒻᒪᓕᕐᖕᒪᑕ ᐱᕈᖅᑎᑦᓯᓪᓗᑎᒃ ᐊᖏᓕᕙᓪᓕᐊᑎᑦᓯᓪᓗᑎᒡᓗ, ᑍᒫᒃᑕᐅᖅ ᐃᓕᑦᓯᓐᓂ ᐱᒋᐊᖅᓯᒪᒋᕗᑦ, ᑍᒪᓐᖓᓂᑦ ᑐᓴᕋᑦᓯᐅᒃ ᒎᑎᐅᑉ ᐱᑦᓯᐊᕐᖕᓂᖓᑕ ᐱᔪᓐᓇᖅᑎᑦᓯᓂᖓ ᓱᓕᓂᖓᓗ ᑐᑭᓯᓪᓗᒍ. 7#ᑯᓘᓯ 4:12; ᐰᓕᒨ 1:23.ᒎᑎᐅᑉ ᐱᑦᓯᐊᕐᖕᓂᖓᑕ ᐱᔪᒡᓇᖅᑎᑦᑎᓂᖓᓂᒃ ᐃᓕᑦᓯᑎᑕᐅᓚᐅᕋᑦᓯ ᐃᐸᐳᕌᓯᒧᑦ, ᑖᓐᓇ ᓇᒡᓕᖕᓇᕐᓗᓂ ᐱᔨᑦᓯᖃᑎᒋᔭᕗᑦ, ᐅᒃᐱᕐᖕᓂᕆᔭᒥᓂᒃ ᓱᕐᕋᔪᐃᑦᑑᓪᓗᓂ ᙭ᔅᑑᓯᒧᑦ ᐱᓇᓱᐊᖅᑎᒋᔭᐅᒋᔪᖅ ᐱᑦᔪᔨᓪᓗᓂ ᐅᕙᑦᑎᓐᓂᒃ. 8ᐅᕙᑦᑎᓐᓄᑦ ᐅᓂᒃᑳᓚᐅᕐᖕᒪᑦ ᓇᒡᓕᖕᓂᖃᕐᖕᓂᕋᕐᓗᓯ ᐊᓂᕐᖕᓂᒃᑯᑦ ᑐᓂᔭᐅᓯᒪᔪᒥᒃ.
9ᑍᒤᒻᒪᑦ ᐅᓪᓗᒥᑦ ᑍᑦᓱᒪᓂ ᑐᓴᓚᐅᕐᖕᓂᑦᑎᓂᑦ, ᑐᒃᓯᐅᑦᔩᓐᓇᖅᐳᒍᑦ ᐃᓕᑦᓯᓐᓂᒃ, ᖃᐅᔨᑎᑕᐅᖁᓪᓗᓯ ᑖᑦᓱᒪ ᐱᔪᒪᔭᖓᓂᒃ ᑕᒤᓐᓂᒡᓗ ᐊᓂᕐᖕᓂᒃᑯᑦ ᓯᓚᑐᓂᕐᖕᒥᒃ ᑐᑭᓯᓂᕐᖕᒥᒡᓗ, 10ᐃᓅᓯᖃᕈᓐᓇᖁᓪᓗᓯ ᐊᑕᓂᐅᑉ ᓈᒻᒪᒋᔭᖓᒍᑦ, ᖁᕕᐊᒋᔭᐅᓗᓯᓗ ᑖᑦᓱᒧᖓ, ᐃᓅᓯᑦᓯᒍᓪᓗ ᐱᐅᔪᓂᒃ ᐱᕈᖅᑎᑦᓯᖁᓪᓗᓯ ᐊᑦᔨᒌᖏᑦᑐᓂᒃ ᖃᐅᔨᕙᓪᓕᐊᓗᓯᓗ ᒎᑎᒥᒃ. 11ᓲᖑᓯᑎᑕᐅᖁᓪᓗᓯᓗ ᐱᔪᓐᓇᕐᖕᓂᕐᖕᓄᑦ ᑕᒤᓐᓄᑦ, ᒎᑎᐅᑉ ᐊᔪᒐᖃᖏᓐᓂᖓᓄᑦ ᐱᓐᓇᕐᖕᓇᖅᑐᒧᑦ, ᓱᖁᓯᖅᑍᓕᔪᓐᓇᖅᓯᖁᓪᓗᓯ ᕿᓄᐃᓵᕈᓐᓇᖅᓯᓗᓯ ᖁᕕᐊᓱᖕᓂᖃᕐᓗᓯᓗ. 12ᖁᔭᓕᖁᓪᓗᓯ ᐊᑖᑕᒧᑦ, ᑖᑦᓱᒪ ᐊᔪᕈᓐᓃᖅᑎᒻᒪᑎᒍᑦ ᑭᖑᕐᖑᑦᔨᖃᑕᐅᖁᓪᓗᑕ ᐃᑦᔪᕐᖕᓁᑦᑐᖁᑎᖏᑕ ᐱᒃᓴᖏᓐᓂᒃ ᖃᐅᒪᔪᒥ. 13ᑖᑦᓱᒪ ᐱᐅᓕᓯᒪᖕᒪᑎᒍᑦ ᑖᕐᔪᐊᑉ ᐱᔪᓐᓇᕐᖕᓂᖓᓂᑦ ᓄᒃᑎᖅᑎᓪᓗᑕᓗ ᐃᕐᖕᓂᒥ ᓇᒡᓕᒋᒻᒪᕆᒃᑕᒥ ᐊᑕᓂᐅᕕᐊᓄᑦ, 14#ᐃᐱᓯ 1:7.ᑖᑦᓱᒨᓇ ᐱᐅᓕᔭᐅᒐᑦᑕ, ᑕᕝᕙ ᐊᔪᕐᖕᓂᕐᖕᓂᑦ ᐃᓱᒪᒋᔪᓐᓁᖅᑕᐅᓂᕐᖕᒥᑦ.
᙭ᔅᑑᓯᐅᑉ ᐃᓅᓯᖓ ᐱᓇᓱᐊᕐᖕᓂᖓᓗ
15ᔩᓱᓯ ᑕᑯᒃᓴᐅᓪᓗᓂ ᐊᑦᔨᒋᔭᐅᖕᒪᑦ ᒎᑎᒧᑦ ᑕᑯᒃᓴᐅᖏᑦᑐᒧᑦ, ᐃᕐᓂᐊᖑᖅᑳᖅᓯᒪᕗᖅ ᐱᓐᖑᖅᑎᑕᐅᓯᒪᔪᓕᒫᓂᑦ; 16ᑖᑦᓱᒨᓇ ᐱᓐᖑᖅᑎᑕᐅᓯᒪᕗᑦ ᓱᓇᓕᒫᑦᓯᐊᑦ ᕿᓚᖕᒥ ᓄᓇᒥᓗ, ᑕᑯᒃᓴᐅᔪᑦ ᑕᑯᒃᓴᐅᖏᑦᑐᓪᓗ, ᐊᑕᓂᐅᕖᑦ ᐱᔪᓐᓇᕐᖕᓃᑦ ᐊᖓᔪᖅᑲᐅᓃᑦ ᐊᐅᓚᑦᓯᔩᓪᓗ; ᑖᑦᓱᒨᓇ ᐱᓐᖑᖅᑎᑕᐅᓯᒪᕗᑦ ᑖᑦᓱᒧᖓᓗ. 17ᓱᓇᑐᐃᓐᓁᑦ ᐱᑕᖃᓚᐅᖅᑎᓐᓇᒋᑦ ᑖᓐᓇ ᐱᑕᖃᓚᐅᖅᐳᖅ, ᑖᑦᓱᒨᓇᓗ ᓱᓇᓕᒫᑦ ᑲᑎᓐᖓᑎᑕᐅᕗᑦ. 18#ᐃᐱᓯ 1:22,23.ᑖᓐᓇ ᑎᒥᐅᑉ ᓂᐊᖁᕆᕚ, ᑕᕝᕙ ᐅᒃᐱᖅᑑᖃᑎᒌᑦ; ᑖᓐᓇ ᐱᒋᐊᕐᖕᓂᐅᕗᖅ, ᐊᖓᔪᒃᖠᖅᐹᒍᕗᕐᓗ ᑐᖁᖓᔪᓂᑦ ᒪᑭᑎᑕᐅᔪᓂᑦ, ᓱᓇᑐᐃᓐᓇᕐᖕᓄᑦ ᓯᕗᓪᓕᖅᐹᖑᓗᓂ ᐊᖓᔪᖅᑳᖑᖁᓪᓗᒍ. 19ᑖᑦᓱᒪᓂ ᒎᑎᐅᓂᓂ ᐊᑕᖏᕐᓗᒍ ᖁᕕᐊᒋᓚᐅᖅᐹ ᐃᓂᒋᓗᒍ, 20#ᐃᐱᓯ 2:16.ᑖᑦᓱᒨᓇᓗ ᓱᓇᓕᒫᑦᓯᐊᑦ ᐃᒻᒥᓄᑦ ᐅᑎᖅᑎᓚᐅᖅᐰᑦ, ᓄᓇᒦᑦᑐᑦ ᕿᓚᖕᒦᑦᑐᓪᓗ, ᓮᒻᒪᖅᑎᓚᐅᖅᐰᑦ ᓴᓐᓂᖓᔪᓕᖕᒥ ᐊᐅᖓᒍᑦ.
21ᐃᓕᑦᓯᓗ, ᐅᖓᓯᒃᑐᒦᓚᐅᖅᑐᓯ ᐊᑭᕋᖅᑐᖅᑎᐅᓪᓗᓯᓗ ᑖᑦᓱᒧᖓ ᐃᓱᒪᑦᓯᒍᑦ ᐊᔪᖅᑐᓕᓂᑦᓯᓐᓄᓪᓗ, 22ᒫᓐᓇᓕ ᐃᕐᖕᓂᖓᑕ ᑐᖁᓂᖓᒍᑦ ᐅᑎᖅᑎᓯᒪᕚᓯ, ᐃᑦᔪᕐᖕᓁᓕᖁᓪᓗᓯ ᓴᓗᒪᑦᓯᐊᓕᕐᓗᓯᓗ ᐸᓯᔭᒃᓴᐅᔪᓐᓃᕐᓗᓯᓗ ᑖᑦᓱᒪ ᓵᖓᓂ, 23ᑲᔪᓯᓂᐊᕈᑦᓯ ᐅᒃᐱᕐᖕᓂᑦᓯᓐᓂ, ᑐᓐᖓᕕᖃᑦᓯᐊᕐᓗᓯ ᐊᐅᓚᖏᑦᓯᐊᖅᑐᒥᒃ, ᓴᖑᑎᑕᐅᔪᓐᓃᕐᓗᓯ ᐅᖃᐅᓯᕐᖕᓂᒃ ᑐᓴᕈᒥᓇᖅᑐᓂᑦ ᑐᓴᓚᐅᖅᑕᑦᓯᓐᓂᑦ, ᑕᒪᓐᓇ ᐅᖃᐅᓯᖅ ᑐᓴᕈᒥᓇᖅᑐᖅ ᐱᑦᔪᑎᒋᓪᓗᒍ ᐅᕙᖓ ᐸᐅᓗᓯ, ᐱᔨᓐᖑᖅᑎᑕᐅᓯᒪᕗᖓ; ᑕᒪᓐᓇᓗ ᐅᖃᐅᓯᖅ ᑐᓴᕈᒥᓇᖅᑐᖅ ᐊᔪᕆᖅᑐᐃᑦᔪᑕᐅᓯᒪᓕᖅᐳᖅ ᓯᓚᕐᔪᐊᕐᖕᒥᐅᓕᒫᓄᑦ.
ᐸᐅᓗᓯᐅᑉ ᐱᓇᓱᐊᕐᖕᓂᖓ ᐅᒃᐱᖅᑑᖃᑎᒌᓄᑦ
24ᒫᓐᓇ ᖁᕕᐊᓲᑎᒋᕙᕋ ᐅᖁᒤᒃᓴᕐᓇᖅᑐᑰᖅᑎᑕᐅᓂᒃᑲ ᐃᓕᑦᓯ ᐱᑦᔪᑎᒋᓪᓗᓯ, ᑎᒥᒃᑯᑦ ᐋᓐᓂᐊᓇᑐᑰᑎᑕᐅᓂᒃᑲ ᐱᔭᕇᓯᖃᑕᐅᑦᔪᑎᒋᒐᒃᑭᑦ ᙭ᔅᑑᓯᐅᑉ ᑎᒥᖁᑎᒥᓂ ᐋᓐᓂᐊᕈᑎᒋᒐᔭᖅᑕᖏᓐᓂ, ᐅᒃᐱᖅᑑᖃᑎᒌᑦ ᐱᓪᓗᒋᑦ. 25ᑕᕝᕙ ᐱᔨᓐᖑᖅᑎᑕᐅᓯᒪᕗᖓ ᑖᑦᓱᒪ ᑐᓂᓚᐅᕐᖕᒪᖓ ᐅᖃᐅᓯᖃᖁᓪᓗᖓ ᐃᓕᑦᓯᓐᓄᑦ, ᒎᑎᐅᑉ ᐅᖃᐅᓯᖏᑦ ᖃᐅᔨᔭᐅᑎᑦᓯᐊᖁᓪᓗᒋᑦ, 26ᑕᒪᓐᓇ ᓇᓗᓇᖅᑐᖅ ᐃᔨᖅᓯᒪᓚᐅᖅᐳᖅ ᐊᕐᕌᒍᓂ ᐊᓂᒍᖅᑐᓂ ᑭᖑᕚᖑᖃᑎᒌᓄᓪᓗ, ᒫᓐᓇᓕ ᓴᖅᑭᑎᑕᐅᓯᒪᓕᖅᐳᖅ ᐃᑦᔪᕐᖕᓁᑦᑐᖁᑎᖏᓐᓄᑦ. 27ᒎᑎᐅᑉ ᑕᒪᓐᓇ ᐃᔨᖅᓯᒪᔪᖅ ᖃᐅᔨᔭᐅᑎᑦᓱᒪᓚᐅᖅᐹ ᔫᑎᐅᖏᑦᑐᓄᑦ ᐊᒥᒐᖏᑦᑐᕐᔪᐊᖅ ᓂᖅᑐᕐᖕᓇᖅᑐᕐᔪᐊᕐᓗ ᐃᔨᖅᓯᒪᓚᐅᖅᑐᖅ ᐃᓄᓕᒫᓄᑦ, ᑕᕝᕙ ᙭ᔅᑑᓯ ᐃᓗᑦᓯᓐᓃᑦᑐᖅ, ᓂᕆᐅᒍᑎᒃᓴᐅᖁᓪᓗᒍ ᐱᓐᓇᕐᖕᓇᖅᑐᕐᔪᐊᒥᒃ. 28ᑍᒤᒻᒪᑦ ᙭ᔅᑑᓯ ᐊᔪᕆᖅᑐᐃᑦᔪᑎᒋᕙᕗᑦ ᐃᓄᓕᒫᓄᑦ, ᓯᕘᕋᒋᔭᒃᓴᖏᓐᓂᒃ ᐅᖃᐅᑦᔪᐃᑦᔪᑎᒋᓪᓗᒍ ᐊᔪᕆᖅᑐᐃᑦᔪᑎᒋᕙᕗᓪᓗ ᑕᒤᓐᓄᑦ ᓯᓚᑐᓂᖃᕐᓗᑕ, ᑕᒪᕐᖕᒥᒃ ᐱᕈᕇᖅᓯᒪᓗᑎ ᐅᒃᐱᕐᖕᓂᒃᑯᑦ ᓴᖅᑭᑎᑦᓱᒪᓪᓗᑎᒍ ᙭ᔅᑑᓯᒥ. 29ᑕᒪᓐᓇ ᐱᔭᕇᕈᒪᓪᓗᒍ ᐊᒃᓱᕉᑎᒋᕙᕋ ᐃᓗᖏᖅᑐᕐᓗᖓ, ᐱᔪᓐᓇᕐᖕᓂᕐᖕᒥᒃ ᐊᖏᔪᒥᒃ ᐊᑐᖅᑎᑕᐅᓪᓗᖓ ᑖᑦᓱᒪ ᐅᕙᓐᓄᑦ ᕾᓯᒪᔭᖓᓂᒃ.
Currently Selected:
ᑯᓘᓯᐊᒥᐅᓄᑦ 1: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.