ᐱᓕᐱᒥᐅᓄᑦ 4
4
ᐃᓅᓯᑦᓯᐊᒥᒃ ᐃᓕᓮᓃᑦ
1ᑍᒤᒻᒪᑦ ᐅᒃᐱᖅᑑᖃᑎᒃᑲ, ᓇᒡᓕᒋᕙᑦᓯ ᐅᖓᒋᓪᓗᓯᓗ, ᐃᓕᑦᓯᓐᓄᑦ ᖁᕕᐊᓱᒃᑎᑕᐅᓯᒪᕗᖓ ᐅᐱᒋᒻᒪᕆᒃᐸᑦᓯᓗ, ᑍᒫᒃ ᓱᖁᓯᖅᑍᓕᒋᑦᓯ ᐃᓅᓯᑦᓯᓐᓂ ᐊᑕᓂᕐᖕᒥ, ᓇᒡᓕᒋᔭᒃᑳ.
2ᐃᐅᑎᐊᓗ ᓯᓐᑍᑭᓗ ᐊᒃᓱᕈᕐᓗᖓ ᕿᓄᕕᒋᕙᑦᓯᒃ, ᐊᖏᖃᑎᒌᖁᓪᓗᓯᒃ ᐊᑕᓂᕐᖕᒥ. 3ᐃᕝᕕᓪᓗᑦᑕᐅᖅ ᑲᔪᓯᑦᓯᐊᖅᑐᒥᒃ ᐱᓇᓱᐊᖃᑎᒐ, ᕿᓄᕕᒋᕙᒋᑦ ᑖᒃᑯᐊᒃ ᐊᕐᖕᓈᒃ ᐃᑲᔪᖅᑕᐅᖁᓪᓗᒋᒃ, ᐊᒃᓱᕈᒻᒪᕆᒃᓗᑎᒃ ᐱᓇᓱᐊᖃᑎᒋᓯᒪᒐᒃᑭᒃ ᐅᖃᐅᓯᕐᖕᓂᒃ ᑐᓴᕈᒥᓇᖅᑐᓂᒃ ᓯᐊᒻᒪᖅᑎᑦᓯᖃᑎᒋᓪᓗᒋᒃ, ᒃᓕᒥᓐᑎ ᐃᓚᒋᓪᓗᒍ ᐊᓯᖏᓪᓗ ᐱᓇᓱᐊᖃᑎᒃᑲ ᐃᓚᒋᓪᓗᒋᑦ, ᐊᑎᖏᑦ ᑎᑎᕋᖅᓯᒪᔪᑦ ᐃᓅᓯᕾᓐᓇᕈᒫᖅᑐᑦ ᐊᑎᖃᕐᕕᖓᓐᓂ.
4ᖁᕕᐊᓱᑦᓮᓐᓇᕆᑦᓯ ᐊᑕᓂᕐᖕᒥ; ᐅᖃᒃᑲᓐᓂᖅᐳᖓ ᖁᕕᐊᓱᒋᑦᓯ.
5ᐃᓅᖃᑎᓕᒫᑦᓯᓐᓄᑦ ᓂᑲᒍᓱᖕᓂᓯ ᖃᐅᔨᔭᐅᓕ. ᐊᑕᓂᖅ ᖃᓂᒻᒪᑦ. 6ᓱᓇᒥᒡᓘᓐᓃᑦ ᐃᓱᒪᔮᕈᑎᖃᕐᖕᓂᐊᕋᓯ, ᑐᒃᓯᐊᕐᓗᓯᓕ ᒎᑎᒧᑦ ᓴᖅᑭᑎᑦᓯᓕᕆᑦᓯ ᐱᔭᕆᐊᖃᖅᑕᑦᓯᓐᓂᒃ, ᕿᓄᕕᒋᓕᕌᖓᑦᓯᐅᒃ ᖁᔭᓕᓂᖃᖃᑦᑕᕆᑦᓯ ᐆᒻᒪᑎᑦᓯᒍᑦ. 7ᒎᑎᐅᑉ ᓮᒻᒪᖅᑎᑦᓯᓂᖓᑕ, ᑐᑭᓯᔭᐅᔪᓐᓇᖅᑐᓂᑦ ᐊᖏᓂᖅᓴᐅᔫᑉ, ᐆᒻᒪᑎᓯ ᐃᓱᒪᓯᓗ ᓴᐳᑎᓯᒪᓂᐊᖅᐰᑦ ᙭ᔅᑑᓯ ᔩᓱᓯᒥ.
8ᑭᖑᓪᓕᖅᐹᒥᓪᓕ ᐅᒃᐱᖅᑑᖃᑎᒃᑲ, ᓱᓇᑐᐃᓐᓇᖅ ᓱᓕᔫᒃᐸᑦ, ᐅᐱᓐᓇᖅᐸᑦ, ᓈᒻᒪᓈᑦᓯᐊᕐᖕᓂᐅᒃᐸᑦ, ᐃᑦᔪᕐᖕᓁᑉᐸᑦ, ᓇᒡᓕᖕᓇᖅᐸᑦ, ᐱᑦᓯᐊᕐᖕᓂᐅᒃᐸᑦ, ᓈᒻᒪᓈᖅᓯᒪᑦᓯᐊᕐᖕᓂᖃᖅᐸᓪᓗ, ᓂᖅᑐᕐᖕᓇᖅᑐᖃᖅᐸᓪᓗ, ᑕᒪᒃᑯᐊ ᐃᓱᒪᒃᓴᖅᓯᐅᕈᑎᒋᓯᒋᒃ. 9ᐃᓕᓐᓂᐊᓚᐅᖅᑕᓯ ᐃᓕᓚᐅᖅᑕᐅᓯᓗ ᑐᓴᓚᐅᖅᑕᓯᓗ ᑕᑯᓚᐅᖅᑕᓯᓗ ᐅᕙᓐᓂᑦ ᐱᓂᐊᕐᖕᓂᒃᑯᑦ, ᑕᒪᒃᑯᐊ ᐱᓇᓱᐊᖅᓯᒋᒃ; ᒎᑎᐅᓪᓗ ᓮᒻᒪᖅᑎᑦᓯᔫᑉ ᑕᕝᕙ ᐃᓚᒋᓂᐊᖅᐹᓯ.
ᖁᔭᓕᓂᖅ ᑐᓂᕐᕈᑕᐅᔪᓄᑦ
10ᐊᖏᔪᒥᒃ ᖁᕕᐊᓱᒃᐳᖓ ᐊᑕᓂᕐᖕᒥ ᓱᓕ ᐃᖅᑲᐅᒪᒐᑦᓯᓐᖓ ᐅᕙᓐᓂᒡᓗ ᐃᑲᔪᕈᒪᓂᓯ ᓴᖅᑭᑎᓐᓇᑦᓯᐅᒃ; ᐅᕙᓐᓂᒡᓕ ᐃᑲᔪᕈᒤᓐᓇᓚᐅᕋᓗᐊᖅᑐᓯ, ᐱᕕᒃᓴᖃᓚᐅᓐᖏᓚᓯᓕ. 11ᑕᒪᑐᒥᖓ ᐅᖃᓐᖏᓚᖓ ᖁᔭᓈᖅᑕᐅᓇᓱᒋᓂᕐᖕᒧᑦ; ᑐᑭᓯᓯᒪᒐᒪ ᖃᖓᓕᒫᖅ ᖃᓄᐃᑦᑐᒦᒃᑲᓗᐊᕈᒪ ᐱᒋᔭᓐᓂᒃ ᓈᒻᒪᒃᓴᕆᐊᖃᕐᖕᓂᓐᓂᒃ. 12ᐊᔪᖅᓴᕐᖕᓂᕐᖕᒥᒃ ᖃᐅᔨᓯᒪᕗᖓ, ᐱᖃᓗᐊᕐᖕᓂᕐᖕᒥᒡᓗ ᖃᐅᔨᓯᒪᒋᕗᖓ; ᐱᔭᕐᖕᓂᖏᑦᑐᒃᑯᑦ ᖃᐅᔨᓯᒪᒐᒪ ᓇᓂᑐᐃᓐᓈᕋᓗᐊᕈᒪ ᖃᖓᓕᒫᖅ ᓈᒻᒪᒃᓴᕆᐊᖃᕐᖕᓂᓐᓂᒃ ᐊᕿᐊᑦᑐᓱᒃᑯᒪᓘᓐᓃᑦ ᑳᒃᑲᓗᐊᕈᒪᓘᓐᓃᑦ, ᐱᖃᓗᐊᕈᒪᓘᓐᓃᑦ ᐊᔪᖅᓴᕈᒪᓘᓐᓃᑦ. 13ᓱᓇᓕᒫᓂᒃ ᐱᔪᓐᓇᖅᐳᖓ ᙭ᔅᑑᓯᒥ ᐱᔪᓐᓇᖅᑎᑦᓯᔨᓐᓂ.
14ᐱᐅᔪᒥᒡᓕ ᐱᓇᓱᐊᓚᐅᖅᐳᓯ ᐅᖁᒤᑦᑐᒦᑎᓪᓗᖓ ᐃᑲᔪᓚᐅᕋᑦᓯᓐᖓ. 15ᐃᓕᑦᓯ ᐱᓕᐱᒥᐅᖑᔪᓯ ᓇᖕᒥᓂᖅ ᖃᐅᔨᒪᑦᓯᐊᖅᐳᓯ ᐅᖃᐅᓰᑦ ᑐᓴᕈᒥᓇᖅᑐᑦ ᐅᖃᐅᓯᐅᓕᓵᖅᑎᓪᓗᒋᑦ, ᒫᓯᑑᓂᐊᒥᑦ ᐊᐅᓪᓚᓚᐅᕋᒪ, ᐅᒃᐱᖅᑑᖃᑎᒌᓂᑦ ᐃᑲᔪᖅᑐᑐᐊᖑᓚᐅᖅᐳᓯ ᐅᕙᓐᓂᒃ; ᑐᓂᓯᓂᑦᓯᒍᑦ ᐃᓚᓕᐅᖅᓯᓂᑦᓯᒍᓪᓗ; 16#ᐋᐴᓯᑕᓖᑦ 17:1.#2 ᑯᕆᓐᑎ 11:9.ᐊᑕᐅᓯᐊᕋᓯ ᐊᒡᓛᑦ ᑎᓴᓗᓁᑲᒦᑎᓪᓗᖓ ᐃᑲᔪᖃᑦᑕᓚᐅᖅᐸᑦᓯᓐᖓ ᐃᑲᔪᖅᑕᐅᔭᕆᐊᖃᓕᖅᑎᓪᓗᖓ. 17ᑐᓂᓯᕕᐅᔪᒪᓗᖓ ᐱᓐᖏᓚᖓ; ᐊᑭᓕᖅᑕᐅᓂᒃᓴᓯᓕ ᐱᓂᐊᕐᖕᓂᕕᓂᑦᓯᓐᓄᑦ ᑕᒪᓐᓇ ᐱᔪᒪᕙᕋ. 18#ᒨᓯᓯ ᐂᑉᐸᖏᑦ 29:18.ᒫᓐᓇ ᑕᒤᓐᓂᒃ ᑭᓐᖒᒪᔭᖃᕈᓐᓃᖅᐳᖓ, ᐱᖃᓗᐊᕐᓗᖓ ᐊᒡᓛᑦ; ᐃᐸᐳᕈᑍᑕᓯᐅᑉ ᓇᒃᓴᕐᕕᒋᖕᒪᖓ ᑐᔫᑎᑦᓯᓐᓂᒃ, ᑕᒪᒃᑯᐊ ᑎᐱᑦᓯᐊᕆᒃᓴᐅᑎᑎᑐᑦ ᑐᓂᕐᕈᑕᐅᔪᑎᑐᑦ ᑍᒤᑉᐳᑦ ᒎᑎᒧᑦ, ᑐᓂᕐᕈᑎᒃᓴᖅ ᓈᒻᒪᒋᔭᐅᔪᖅ ᒎᑎᒧᓪᓗ ᖁᕕᐊᒋᔭᐅᔪᖅ. 19ᒎᑎᒪᓗ ᑐᓂᓯᕕᒋᓂᐊᖅᐹᓯ ᑭᓐᖒᒪᒋᔭᓕᒫᑦᓯᓐᓂᒃ ᐊᔪᖅᓴᓐᖏᖅᑐᔪᐊᖑᓂᕐᖕᒥᓂᑦ ᐱᓐᓇᕐᖕᓇᖅᑐᕐᔪᐊᒥᑦ ᙭ᔅᑑᓯ ᔩᓱᓯᒥ. 20ᒎᑎᕗᑦ ᐊᑖᑕᕗᓪᓗ ᓂᖅᑐᖅᑕᐅᓕ ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ. ᐋᒥᓐ.
ᑕᕝᕙᐅᕗᑏᕈᑏᑦ ᒎᑎᐅᑉ ᐃᓄᖁᑎᖏᓐᓄᑦ
21ᑕᕝᕙᐅᕗᑏᖅᐸᒃᑲ ᐃᑦᔪᕐᖕᓁᑎᑕᐅᓯᒪᔪᓕᒫᑦ ᙭ᔅᑑᓯ ᔩᓱᓯᒥ. ᓇᔪᖅᑎᒋᔭᒪ ᐅᒃᐱᖅᑑᖃᑎᒌᑦ ᑕᕝᕙᐅᕗᑏᖅᐹᓯ. 22ᐃᑦᔪᕐᖕᓁᑎᑕᐅᓯᒪᔪᓕᒫᑦ ᑕᕝᕙᓃᑦᑐᑦ ᑕᕝᕙᐅᕗᑏᖅᐹᓯ, ᐱᓗᐊᕐᓗᑎᒡᓕ ᓰᓴᕆᐅᑉ ᐃᒡᓗᒥᐅᖃᑎᖏᑦ.
23ᐊᑕᓂᑦᑕ ᔩᓱᓯ ᙭ᔅᑑᓯᐅᑉ ᐱᑦᓯᐊᕐᖕᓂᖓᑕ ᐱᔪᓐᓇᖅᑎᑦᓯᓂᖓᑕ ᐃᓚᒋᓕᒋᑦ ᐊᓂᕐᖕᓂᓯ. ᐋᒥᓐ.
Currently Selected:
ᐱᓕᐱᒥᐅᓄᑦ 4: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.