ᓴᑲᕅᐊᐅᑉ ᐊᒡᓚᖏᑦ 2
2
ᑕᑯᑎᑕᐅᓂᖅ ᐆᒃᑐᑎᒥᒃ ᐃᓯᕕᓯᒪᔪᒥᒃ
1ᐊᒻᒪ ᓱᓕ ᑕᑯᑎᑦᔪᑎᐅᑉ ᐊᓯᐊᓂᒃ ᑕᑯᒋᕗᖓ, ᐊᖑᒻᒥᒃ ᐆᒃᑑᑎᒥᒃ ᑎᒍᒥᐊᖅᑐᒥᒃ. 2ᐊᐱᕆᕙᕋᓗ “ᓇᒧᖓᐅᕕᑦ?” ᑖᓐᓇᓗ ᑭᐅᕗᖅ, “ᔨᕉᓴᓕᒥᒃ ᐆᒃᑐᕆᐊᖅᑐᖅᐳᖓ, ᖃᓄᖅ ᑕᑭᑎᒋᖕᒪᖔᑦ ᖃᓄᕐᓗ ᓴᓂᒧᑐᑎᒋᖕᒪᖔᑦ.”
3ᐂᖏᓕᓗ ᐅᖃᖃᑎᒋᓚᐅᖅᑕᕋ ᑕᑯᕙᕋ ᓯᕗᒧᑦ ᐱᓱᓯᔪᖅ, ᐊᓯᐊᑕᑦᑕᐅᖅ ᐂᖏᓕᐅᑉ ᐹᕆᐊᖅᑐᖅᐹ. 4ᐹᖅᑕᒥᓄᓪᓗ ᐅᖃᖅᐳᖅ, “ᐅᓪᓚᒡᓗᑎᑦ ᐃᓅᓱᒃᑐᖅ ᑍᓐᓇ ᐅᖃᐅᑎᔭᖅᑐᕈᒃ ᐃᒫᒃ, ‘ᔨᕉᓴᓕᒻ ᓄᓇᓕᒡᔪᐊᖓ ᐊᕙᓗᕐᔪᐊᖃᕈᓐᓁᕈᒫᖅᐳᖅ ᐃᓄᖃᓗᐊᓕᕐᖕᓂᖓᓄᑦ ᐆᒪᔪᖁᑎᖃᓗᐊᓕᕐᖕᓂᖏᓐᓄᓪᓗ. 5ᐊᑕᓂᖅ ᐅᖃᕐᖕᒪᑦ, ᐅᕙᖓ ᓇᖕᒥᓂᖅ ᐃᑯᒪᐅᓗᖓ ᐊᕙᓗᕐᔪᐊᕆᔭᐅᔪᒫᖅᐳᖓ, ᐃᒡᓗᒐᓴᒡᔪᐊᓂᒡᓗ ᑖᒃᑯᓂᖓᑦ ᑲᑦᔮᕐᖕᓇᖅᑎᑦᓯᔪᒫᖅᐳᖓ.’”
ᓄᓇᒥᖕᓂᑦ ᐊᐅᓪᓚᖅᑎᑕᐅᓯᒪᔪᑦ ᐊᖏᕐᕋᒥᖕᓄᑦ ᐅᑎᖁᔭᐅᕗᑦ
6“ᐊᐅᓪᓚᓕᕆᑦᓯ! ᐊᐅᓪᓚᓕᕆᑦᓯ! ᕿᒫᓕᕆᑦᓯ ᓯᕿᓂᐅᑉ ᑕᕐᕋᖓᑕ ᓄᓇᖏᓐᓂᑦ,” ᑍᒫᒃ ᐊᑕᓂᖅ ᐅᖃᖅᐳᖅ, “ᓄᓇᓄᑦ ᐅᖓᓯᒃᑐᓄᑦ ᓇᒧᑐᐃᓐᓇᖅ ᐊᐅᓪᓚᖅᑎᓯᒪᒐᑦᓯ. 7ᐊᐅᓪᓚᓕᕆᑦ ᓮᐅᓃ! ᕿᒫᓗᑎᓪᓗ, ᐹᐱᓘᓂᐅᑉ ᓄᓇᖓᓂ ᓄᓇᖃᖃᑕᐅᔪᓯ!” 8ᑕᒪᓐᓇ ᐱᓪᓗᒍ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᖅᐳᖅ, “ᐅᐱᒋᓚᐅᖅᑳᖅᓗᓂᖓ ᑎᓕᕚᖓ, ᐃᓅᖃᑎᒌᒡᔪᐊᓄᑦ ᔫᑎᐅᖏᑦᑐᓄᑦ ᐃᓕᑦᓯᓐᓂᒃ ᓵᓚᖃᖅᑳᖅᓯᒪᔪᓄᑦ, ᐃᓕᑦᓯᓐᓂᒡᓗ ᐊᒃᑐᐃᓯᒪᔪᑦ, ᑕᕝᕙ ᐊᑕᓂᐅᑉ ᐱᓐᓇᕆᔭᖓᓂᒃ ᐊᒃᑐᐃᓯᒪᕗᑦ. 9ᑖᒃᑯᐊ ᐊᑕᓂᐅᑉ ᓇᖕᒥᓂᖅ ᓱᒋᐊᕐᖕᓂᐊᖅᐰᑦ, ᓯᐊᓛᕆᓚᐅᖅᑕᖏᓐᓂᓪᓘᓐᓃᑦ ᐊᒡᓛᑦ ᓵᓚᐅᔪᓐᓇᓕᖅᓗᑎᒃ ᑍᒤᓕᖅᐸᑦ ᑕᕝᕙ ᐃᓄᐃᑦ ᖃᐅᔨᔪᒫᖅᐳᑦ ᐊᑕᓂᐅᑉ ᐊᔪᒐᖃᖏᑦᑑᑉ ᑎᓕᓯᒪᖕᒪᖓ.” 10ᐊᑕᓂᖅ ᐅᖃᖅᐳᖅ, “ᐃᓐᖏᕆᑦᓯ ᖁᕕᐊᓱᒡᓗᓯ ᓮᐅᓂᒥᐅᖑᔪᓯ! ᕾᓂᐊᕋᒪ ᐃᓂᑦᓯᓐᓂ ᐃᓂᖃᖃᑕᐅᔭᖅᑐᖅᓗᖓ! 11ᑍᑦᓱᒪᓂᐅᓕᖅᐸᑦ ᐃᓅᖃᑎᒌᒡᔪᐊᑦ ᐅᓄᖅᑐᑦ ᐊᑕᓂᕐᖕᒧᑦ ᕾᔪᒫᖅᐳᑦ ᐅᕙᖓᓗ ᐃᓄᖁᑎᒋᔪᒫᖅᐸᒃᑲ, ᐊᑯᓐᓂᖓᓐᓂ ᐃᓂᖃᕈᒫᖅᐳᖓ, ᖃᐅᔨᔪᒫᖅᐳᓪᓗ ᐊᑕᓂᐅᑉ ᐊᔪᒐᖃᖏᑦᑑᑉ ᑎᓕᓚᐅᕐᖕᒪᖓ ᐃᓕᑦᓯᓐᓄᑦ. 12ᐊᑕᓂᐅᑉ ᓱᓕ ᔫᑕ ᐱᑖᕆᒃᑲᓐᓂᕈᒫᕆᕚ ᓄᓇᖁᑎᒥᓄᑦ ᐃᑦᔪᕐᖕᓁᑦᑐᒧᑦ ᐃᓚᓕᐅᑎᓗᒍ, ᔨᕉᓴᓕᓗ ᓂᕈᐊᖅᓯᒪᔭᒥᓂᒃ ᑍᒃᑲᓐᓂᓕᕈᒫᕆᕚ. 13ᐃᓄᓕᒫᖑᔪᓯ ᓂᐸᖏᓕᕆᑦᓯ, ᐊᑕᓂᐅᑉ ᓇᔪᒐᖓᓂ, ᑖᓐᓇ ᐊᓂᓕᕐᖕᒪᓐ ᐃᓂᒋᔭᒥᓂᑦ ᐃᑦᔪᕐᖕᓁᑐᒥᑦ.”
Currently Selected:
ᓴᑲᕅᐊᐅᑉ ᐊᒡᓚᖏᑦ 2: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.