ᒫᑎᐅᓯᐅᑉ ᐊᒡᓚᖏᑦ 27
27
ᔩᓱᓯᐅᑉ ᐰᓛᑑᓯᒧᐊᕈᑦᔭᐅᓂᖓ
ᒫᑯᓯ 15:1; ᓘᑲᓯ 23:1-2; ᔪᐊᓇᓯ 18:28-32
1ᖃᐅᓕᖅᑎᓪᓗᒍ ᐅᓪᓛᒻᒪᕆᒃᑯᑦ, ᑐᓂᕐᕈᓯᖅᑎᑦᓯᔩᑦ ᐊᖓᔪᖅᑳᖏᑦ, ᔫᑎᓄᓪᓗ ᐊᖓᔪᖅᑲᐅᔪᓕᒫᑦ ᐊᖏᖃᑎᒌᒃᐳᑦ ᔩᓱᓯ ᑐᖁᑕᐅᖁᓪᓗᒍ; 2ᐊᑦᓱᖏᕐᓗᒍ ᐰᓛᑑᓯᒧᐊᕈᑎᕚᑦ, ᕉᒪᒥᐅᑦ ᓄᓇᓕᖕᓂ ᐊᐅᓚᑦᓯᔨᖁᑎᖓᓄᑦ.
ᔫᑕᓯᐅᑉ ᑐᖁᓂᖓ
ᐋᐴᓯᑕᓖᑦ 1:18-19
3 #
ᐋᐴᓯᑕᓖᑦ 1:18,19. ᔫᑕᓯ ᐱᔭᐅᑎᑦᓯᓯᒪᔪᖅ, ᖃᐅᔨᓕᕋᒥ ᔩᓱᓯᐅᑉ ᑐᖁᑕᒃᓴᓐᖑᖅᑎᑕᐅᓂᖓᓂᒃ, ᕿᒃᓵᒻᒪᕆᒃᓗᓂ ᖃᕿᐊᓕᖅᐳᖅ, ᑮᓇᐅᔭᐃᑦ ᓯᐅᓪᕕᕇᑦ 30 ᐅᑎᖅᑎᑉᐰᑦ ᑐᓂᕐᕈᓯᖅᑎᑦᓯᔩᑦ ᐊᖓᔪᖅᑳᖏᓐᓄᑦ ᔫᑎᓄᓪᓗ ᐊᖓᔪᖅᑲᐅᔪᓄᑦ. 4ᐅᖃᕐᓗᓂ, “ᐊᔪᖅᑐᓕᓯᒪᕗᖓ ᐸᓯᔭᒃᓴᐅᖏᑦᑐᒥᒃ ᐊᖑᒻᒥᒃ ᐱᔭᐅᑎᑦᓯᒐᒪ ᑐᖁᑕᐅᖁᓪᓗᒍ.”
ᑖᒃᑯᐊ ᑭᐅᕚᑦ, “ᑕᒪᓐᓇ ᑍᒤᑎᓐᖏᓚᕗᑦ, ᐃᕝᕕᑦ ᑍᒤᑎᑕᑐᐊᕆᕙᑦ!”
5ᔫᑕᓯᐅᑉ ᑮᓇᐅᔧᑦ ᑐᒃᓯᐊᕐᕕᒃᔪᐊᕐᖕᒧᑦ ᐃᒋᓪᓗᒋᑦ; ᑕᕝᕙᓐᖓᑦ ᐊᓂᕗᖅ; ᐃᒻᒥᓂᒃ ᕿᒥᑦᑕᖅᑐᕐᓗᓂ.
6ᑐᓂᕐᕈᓯᖅᑎᑦᓯᔩᓪᓕ ᐊᖓᔪᖅᑳᖏᑕ ᑮᓇᐅᔧᑦ ᑎᒍᓪᓗᒋᑦ ᐅᖃᖅᐳᑦ, “ᐅᑯᐊ ᑮᓇᐅᔧᑦ ᐊᐅᖕᒥᒃ ᐊᑭᖃᕐᖕᒪᑕ, ᐱᖁᔭᑦᑎᓐᓂ ᑍᒤᑦᑐᑦ ᑮᓇᐅᔧᑦ ᑐᒃᓯᐊᕐᕕᒡᔪᐊᑉ ᑮᓇᐅᔭᒃᑯᕕᖓᓄᑦ ᐃᓕᔭᐅᖁᔭᐅᓐᖏᓚᑦ.” 7ᐊᖏᖃᑎᒌᒃᑲᒥᒃ, ᑖᒃᑯᐊ ᑮᓇᐅᔧᑦ ᐊᑐᖅᑕᐅᓕᖅᐳᑦ ᒪᕐᕋᓕᕆᔨᐅᑉ ᐱᕈᖅᓰᕕᖁᑎᖓᓂᒃ ᓂᐅᕕᐅᑎᒋᓪᓗᒋᑦ, ᐃᓗᕕᖅᓯᕕᒃᓴᐅᖁᓪᓗᒍ ᓄᓇᓕᑐᖃᐅᖏᑦᑐᓄᑦ. 8ᑍᒤᒻᒪᑦ ᑖᓐᓇ ᐱᕈᖅᓰᕕᒃ ᓱᓕ ᑍᔭᐅᕙᒃᐳᖅ “ᐱᕈᖅᓰᕕᒃ ᐊᐅᒃᑕᓕᒃ” ᐅᓪᓗᒥᒧᑦ ᑎᑭᓪᓗᒍ.
9 #
ᓴᑲᕅᐊ 11:12,13. ᑕᕝᕙ ᓇᓚᐅᑦᑍᔫᑉ ᔨᕆᒤᐊᐅᑉ ᐅᖃᐅᓯᕆᓚᐅᖅᑕᖏᑦ ᓇᓚᐅᑦᓯᕗᑦ ᐃᒤᓕᔪᑦ, “ᑮᓇᐅᔧᑦ ᓯᐅᓪᕕᕇᑦ 30 ᑎᒍᕔᑦ, ᐃᓴᕆᐊᓕᒥᐅᑦ ᐃᓄᖏᑕ ᐊᖏᖃᑎᒌᒍᑎᒋᓚᐅᖅᑕᖏᑦ ᑖᑦᓱᒧᖓ ᐊᑭᓕᐅᑕᐅᖁᓪᓗᒋᑦ, 10ᑮᓇᐅᔧᑦ ᐊᑐᖅᑕᐅᕗᑦ ᒪᕐᕋᓕᕆᔨᐅᑉ ᐱᕈᖅᓰᕕᖁᑎᖓᓂᒃ ᓂᐅᕕᕈᑎᒋᔭᐅᓪᓗᑎᒃ, ᓲᕐᓗ ᐊᑕᓂᐅᑉ ᑍᒫᒃ ᐱᖁᓚᐅᕐᖕᒪᖓ.”
ᐰᓛᑑᓯᐅᑉ ᐊᐱᖅᓱᕐᖕᓂᖓ ᔩᓱᓯᒥᒃ
ᒫᑯᓯ 15:2-5; ᓘᑲᓯ 23:3-5; ᔪᐊᓇᓯ 18:33-38
11ᔩᓱᓯ ᓇᖏᖅᐳᖅ ᕉᒪᒥᐅᑦ ᓄᓇᓕᖕᓂ ᐊᐅᓚᑦᓯᔨᖓᑕ ᓵᖓᓂ, ᑖᑦᓱᒪ ᐊᐱᕆᕚ, “ᔫᑎᓄᑦ ᐊᖓᔪᖅᑳᕐᔪᐊᖑᕖᑦ?”
ᔩᓱᓯᐅᑉ ᑭᐅᕚ, “ᑕᕝᕙ ᐅᖃᕇᖅᐳᑎᑦ.” 12ᑐᓂᕐᕈᓯᖅᑎᑦᓯᔩᑦ ᐊᖓᔪᖅᑳᖏᓐᓄᑦ ᔫᑎᓄᓪᓗ ᐊᖓᔪᖅᑲᐅᔪᓄᑦ ᐸᓯᒃᓯᕋᓱᒃᑐᓄᑦ ᐊᑕᐅᓯᐊᕐᓗᓂᓘᓐᓃᑦ ᑭᐅᓚᐅᓐᖏᓚᖅ.
13ᑕᕝᕙ ᐰᓛᑑᓯᐅᑉ ᐅᖃᐅᑎᕚ, “ᐅᑯᐊ ᑐᓵᓐᖏᑕᑏᑦ ᐃᓕᖕᓄᑦ ᐸᓯᒃᓯᕈᑎᒋᔭᖏᑦ ᐊᑦᔨᒌᖏᑦᑐᑦ?”
14ᔩᓱᓯᓕ ᑭᐅᓐᖏᓚᖅ, ᐸᓯᒃᓯᕈᑕᐅᔪᓄᑦ ᐊᑕᐅᓯᕐᖕᒧᓪᓘᓐᓃᑦ ᑭᐅᓚᐅᖏᓐᓂᕗᖅ; ᑕᒪᑐᒧᖓ ᐊᐅᓚᑦᓯᔨᐅᔪᖅ ᐊᖏᔪᒥᒃ ᑲᒪᓂᐊᖅᐳᖅ.
ᔩᓱᓯᐅᑉ ᑐᖁᑕᒃᓴᓐᖑᖅᑎᑕᐅᓂᖓ
ᒫᑯᓯ 15:6-15; ᓘᑲᓯ 23:13-25; ᔪᐊᓇᓯ 18:39—19:16
15ᖄᖏᖅᑕᐅᕕᖕᒥᒡᓕ ᓇᓪᓕᐅᓐᓂᖅᓯᐅᕐᕕᐅᓕᕌᖓᑦ ᕉᒪᒥᐅᑦ ᐊᐅᓚᑦᓯᔨᖏᑦ ᐱᐅᓯᖃᖅᐸᒃᐳᑦ ᑎᒍᔭᐅᓯᒪᔪᑦ ᐃᓚᖓᓐᓂᒃ ᐊᑕᐅᓯᕐᖕᒥᒃ ᐊᓂᑎᑦᓯᖃᑦᑕᕐᓗᑎᒃ ᐃᓄᐃᑦ ᐊᓂᑎᑕᐅᖁᔭᖓᓂᒃ. 16ᑍᑦᓱᒪᓂ ᖃᐅᔨᒪᔭᐅᓪᓚᕆᒃᑐᒥᒃ ᑎᒍᔭᐅᓯᒪᔪᖃᓚᐅᖅᐳᖅ ᔩᓱᓯ ᐸᕋᐹᓯᒥᒃ ᐊᑎᓕᖕᒥᒃ.#27:16 ᐃᓚᖏᓐᓂᑦ ᑍᔭᐅᔪᖅ ᔩᓱᓯ ᐸᕋᐹᓯᒥᒃ 17ᐃᓄᒐᓴᒡᔪᐊᑦ ᑲᑎᖕᒪᑕ, ᐰᓛᑑᓯᐅᑉ ᐊᐱᕆᕔᑦ, “ᓇᓪᓕᐊᓐᓂᒃ ᐊᓂᑎᑦᓯᖁᕕᓯᓐᖔ ᐸᕋᐹᓯᒥᒃ ᐅᕝᕙᓗ ᔩᓱᓯᒥᒃ ᑍᔭᐅᔪᒥᒃ ᙭ᔅᑑᓯᒥᒃ?” 18ᖃᐅᔨᒪᒐᒥ ᔫᑎᑦ ᐊᖓᔪᖅᑳᖏᑕ ᔩᓱᓯ ᑕᕝᕗᓐᖓᐅᑎᓯᒪᖕᒪᑦᔪᒃ ᐃᓄᖕᓄᑦ ᓵᓐᖓᔭᐅᓂᖅᓴᐅᓂᖓᓂᒃ ᐊᑲᐅᒃᓴᕋᑎᒃ.#27:18 ᐊᑲᐅᒃᓴᕋᑎᒃ ᐅᕝᕙᓗ ᓯᒡᒐᑦᔨᓪᓗᑎᒃ
19ᐰᓛᑑᓯ ᐃᖅᑲᖅᑐᐃᕕᖕᒥ ᐃᒃᓯᕚᖅᑎᓪᓗᒍ, ᓄᓕᐊᖓᑕ ᐅᖃᐅᑦᔭᐅᔭᖅᑐᖅᑎᑉᐹ: “ᐅᓇ ᐊᖑᑦ ᐸᓯᔭᒃᓴᐅᖏᑦᑐᖅ ᑲᒪᒋᔭᕆᐊᖃᓐᖏᑍᑦ, ᐅᓐᓄᐊᖅ ᓯᓐᓇᒃᑑᒪᓪᓗᖓ ᐊᖏᔪᒥᒃ ᐅᖁᒤᒃᓴᕈᑎᖃᖅᑲᐅᒐᒪ ᑖᓐᓇ ᐱᓪᓗᒍ.”
20ᑐᓂᕐᕈᓯᖅᑎᑦᓯᔨᑦ ᐊᖓᔪᖅᑳᖏᑦ ᔫᑎᓄᓪᓗ ᐊᖓᔪᖅᑲᐅᔪᑦ ᐃᓄᖕᓂᒃ ᐃᓱᒪᓕᐅᕆᕗᑦ ᐸᕋᐹᓯᒥᒃ ᕿᓄᖁᓪᓗᒋᑦ, ᔩᓱᓯ ᑐᖁᑕᐅᖁᓪᓗᒍ. 21ᑕᕝᕙ ᐰᓛᑑᓯ ᐊᐱᕆᒃᑲᓐᓂᖅᐳᖅ ᐃᓄᒋᐊᖅᑐᕐᔪᐊᓂᒃ, “ᐅᑯᐊᒃ ᒪᕐᕉᒃ ᓇᓪᓕᐊᓐᓂᒃ ᐊᓂᑎᑦᓯᖁᕕᓯᓐᖔ?”
ᐃᓄᒋᐊᒃᑐᕐᔪᐊᑦ ᐅᖃᖅᐳᑦ, “ᐸᕋᐹᓯᒥᒃ!”
22ᐰᓛᑑᓯᐅᑉ ᐅᖃᐅᑎᕔᑦ, “ᐅᓇᓕ ᖃᓄᖅ ᐱᓂᐊᕐᕕᒋᓂᐊᖅᑕᕋ ᔩᓱᓯ ᙭ᔅᑑᓯᒥᒃ ᑍᔭᐅᔪᖅ?”
ᐃᓄᒋᐊᖅᑐᕐᔪᐊᑦ ᑭᐅᕗᑦ, “ᑭᑭᐊᒃᑐᖅᑕᐅᓕ!”
23ᐰᓛᑑᓯᓗ ᐅᖃᖅᐳᖅ, “ᓱᓇᒥᒃ ᑐᖁᑕᐅᑦᔪᑎᒃᓴᒥᒃ ᐱᓯᒪᖕᒫᑦ?”
ᑕᕝᕙ ᕾᒐᓛᓕᖅᐳᑦ ᓂᐱᖅᑯᖅᑐᓪᓗᑎᒃ, “ᑭᑭᐊᒃᑐᖅᑕᐅᓕ!”
24 #
ᒨᓯᓯ ᑕᓪᓕᒪᖏᑦ 21:6-9. ᐰᓛᑑᓯᓕ ᑐᑭᓯᓕᕋᒥ ᐱᕙᓪᓕᐊᑎᑦᓯᖏᓐᓂᕐᖕᒥᓂᒃ, ᐃᓄᒐᓴᒡᔪᐊᑦ ᐱᕋᔭᑐᐃᓐᓇᕆᐊᖃᖅᑑᔮᓕᕐᖕᒪᑕ, ᐃᒥᕐᖕᒥᒃ ᑯᕕᓯᓪᓗᓂ ᐊᒡᒐᓂ ᐅᐊᓴᖅᐰᑦ ᐃᓄᒐᓴᒡᔪᐊᑦ ᓵᖏᓐᓂ, ᐅᖃᕐᓗᓂ, “ᑖᑦᓱᒪ ᑐᖁᑕᐅᓂᖓᓄᑦ ᐸᓯᔭᒃᓴᐅᓐᖏᓚᖓ; ᐃᓕᑦᓯ ᑐᖁᑕᐅᑎᑉᐸᓯ.”
25ᐃᓄᒐᓴᒡᔪᐊᑦ ᑭᐅᕗᑦ, “ᑖᑦᓱᒪ ᑐᖁᑕᒃᓴᓐᖑᖅᑎᑕᐅᓂᖓ ᐅᕙᑦᑎᓐᓄᑦ ᕿᑐᕐᖓᑦᑎᓐᓄᓪᓗ ᐸᓯᔭᒃᓴᐅᑦᔪᑕᐅᓕᕐᓕ!” 26ᑕᕝᕙ ᐰᓛᑑᓯᐅᑉ ᐸᕋᐹᓯ ᐊᓂᑎᑉᐹ ᑖᒃᑯᓄᖓ; ᔩᓱᓯ ᑏᒐᖅᑐᖅᑕᐅᑎᑦᑕᕇᕋᒥᐅᒃ, ᐂᑦᑑᑎᒋᕚ ᑭᑭᐊᒃᑐᖅᑕᐅᖁᓪᓗᒍ.
ᐅᓇᑕᖅᑐᒃᓮᑦ ᔩᓱᓯᒥᒃ ᒥᑕᐅᑎᖃᕐᖕᓂᖓᑦ
ᒫᑯᓯ 15:16-20; ᔪᐊᓇᓯ 19:2-3
27ᑕᕝᕙ ᐰᓛᑑᓯᐅᑉ ᐅᓇᑕᖅᑐᒃᓴᖁᑎᖏᑕ ᔩᓱᓯ ᐊᖓᔪᖅᑳᑉ ᐃᖅᑲᖅᑐᐃᕕᖓᓄᐊᕈᑎᕚᑦ, ᐅᓇᑕᖅᑐᒃᓮᓪᓗ ᐅᓄᖅᑐᖅ ᑕᕝᕗᓐᖓᖅᑎᑕᐅᒋᕗᑦ. 28ᔩᓱᓯ ᐊᓐᓄᕅᔭᖅᐹᑦ ᐅᓕᒡᔪᐊᒥᒃ ᐊᐅᐸᓪᓚᕆᒃᑐᒥᒃ ᐊᑎᑎᓪᓗᒍ. 29ᐅᖅᐱᐅᔭᓂᒃ ᑲᑭᓪᓚᕐᖕᓇᖅᑐᓂᒃ#27:29 ᑲᐱᓐᓇᖅᑐᓕᕐᖕᓂ ᓂᐊᖂᑎᓕᐅᕐᓗᑎᒃ ᓂᐊᖁᐊᓄᑦ ᐃᓕᕚᑦ, ᓱᓪᓗᓕᖕᒥᒃ ᐊᔭᐅᑉᐱᐊᓕᕐᓗᒍ; ᓵᖓᓄᑦ ᓰᖅᑯᕐᓗᑎᒃ ᒥᑕᐅᑎᒋᓪᓗᒍ ᐅᖃᖅᐳᑦ, “ᓂᖅᑐᖅᑕᐅᓕ ᔫᑎᑦ ᐊᖓᔪᖅᑳᕐᔪᐊᖓᑦ!” 30ᑎᕝᕗᓗᒃᐹᑦ, ᐊᔭᐅᐱᐊᒧᑦ ᓱᓪᓗᓕᖕᒧᑦ ᓂᐊᖁᐊᒍᑦ ᐊᓇᐅᓕᖅᐹᑦ. 31ᒥᑕᐅᑎᒋᔭᕇᕋᒥᑦᔪᒃ, ᐅᓕᒡᔪᐊᖓ ᐲᖅᐹᑦ ᐊᓐᓄᕌᑐᖃᖏᓐᓂᒃ ᐊᑎᑎᓪᓗᒍ, ᐊᐅᓚᕈᑎᓕᖅᐹᑦ ᑭᑭᐊᒃᑐᕆᐊᖅᑐᖅᖢᒍ.
ᔩᓱᓯᐅᑉ ᑭᑭᐊᒃᑐᖅᑕᐅᓂᖓ
ᒫᑯᓯ 15:21-32; ᓘᑲᓯ 23:26-43; ᔪᐊᓇᓯ 19:17-27
32ᑕᕝᕙᓐᖓᑦ ᐊᓂᓪᓗᑎᒃ, ᐊᖑᒻᒥᒃ ᑲᑎᓯᕗᑦ ᓮᕆᓂᒥᐅᑕᕐᖕᒥᒃ, ᓮᒨᓂᒥᒃ ᐊᑎᓕᖕᒥᒃ; ᑖᓐᓇ ᐅᓇᑕᖅᑐᒃᓴᓂᑦ ᐊᒃᓱᕉᑦᔭᐅᓪᓗᓂ ᐊᒡᔭᖅᓯᑎᑕᐅᕗᖅ ᔩᓱᓯᐅᑉ ᓴᓐᓂᖓᔪᓕᒃᓴᖓᓂᒃ. 33ᒎᓪᒑᑕᒧᐊᕋᒥᒃ, ᐊᑎᖓ ᑐᑭᖃᖅᑐᖅ “ᓂᐊᖁᕕᓂᖅᑕᓕᖕᒥᒃ.” 34#ᐃᓐᖏᕈᑦ 69:21.ᑕᕝᕙᓂ ᔩᓱᓯ ᐅᐂᓂᒥᒃ ᖃᓯᓕᓇᖅᑐᒥᒃ ᐃᓚᓕᖕᒥᒃ ᐃᒥᖅᑎᓐᓇᓱᐊᖅᐹᑦ; ᔩᓱᓯᐅᑉ ᐆᒃᑐᕋᒥᐅᒃ, ᐃᒥᕈᒪᓐᖏᓛ.
35 #
ᐃᓐᖏᕈᑦ 22:18. ᑕᕝᕙᓂ ᑭᑭᐊᒃᑐᕇᕋᒥᑦᔪᒃ; ᐊᓐᓄᕌᖏᑦ ᐱᑖᕆᓇᓱᐊᕐᐰᑦ ᓇᓚᐅᑦᑖᕈᑎᓂᒃ ᐊᑐᖅᖢᑎᒃ. 36ᑕᕝᕙᓂ ᐃᒃᓯᕚᓕᖅᐳᑦ ᔩᓱᓯ ᖃᐅᔨᓴᕐᓗᒍ. 37ᓂᐊᖁᖓᑕ ᖁᓛᒍᑦ ᑎᑎᕋᖅᓯᒪᔪᓂᒃ ᐃᓕᓯᕕᐅᕗᖅ ᑭᑭᐊᒃᑐᖅᑕᐅᑦᔪᑎᖓᓂᒃ ᓇᓗᓁᖅᓯᔪᓂᒃ, ᐃᒤᓕᔪᓂᒃ, “ᑖᓐᓇ ᔩᓱᓯ, ᔫᑎᑦ ᐊᖓᔪᖅᑳᕐᔪᐊᖓᑦ.” 38ᐊᖑᑏᖕᓂᒃ ᒪᕐᕉᓂᒃ ᐱᕋᔭᒃᑏᖕᓂᒃ ᑭᑭᐊᒃᑐᖅᑕᐅᖃᑎᖃᖅᐳᖅ, ᐂᑉᐸᖓ ᑕᓕᖅᐱᐊᓂ, ᐂᑉᐸᖓᓕ ᓴᐅᒥᐊᓂ.
39 #
ᐃᓐᖏᕈᑦ 22:7; 109:25. ᑕᕝᕘᓇ ᐊᖅᑯᓵᖅᑐᑦ ᐃᓕᕿᑕᒫᕐᓗᑎᒃ ᐅᖃᕐᖕᓂᕐᓗᐊᖃᑦᑕᖅᐳᑦ ᔩᓱᓯᒧᑦ: ᐅᖃᕐᓗᑎᒃ; 40#ᒫᑎᐅᓯ 26:61; ᔪᐊᓇᓯ 2:19.“ᑐᒃᓯᐊᕐᕕᒡᔪᐊᕐᖕᒥᒃ ᓱᕋᒃᑎᕆᓂᐊᓚᐅᖅᑐᑎᑦ ᐅᓪᓗᓪᓗ ᐱᖓᔪᐊᓐᓂ ᒪᑭᑎᒃᑲᓐᓂᕐᖕᒥᓗᒍ, ᐃᓕᖕᓂᒃ ᐱᐅᓕᓕᕆᑦ! ᒎᑎᐅᑉ ᐃᕐᖕᓂᕆᒃᐸᑎᑦ, ᓴᓐᓂᖓᔪᓕᖕᒥᑦ ᐊᖅᑲᓕᕆᑦ!”
41ᑐᓂᕐᕈᓯᖅᑎᑦᓯᔩᑦᑕᐅᖅ ᐊᖓᔪᖅᑳᖏᑦ, ᐱᖁᔭᓂᒡᓗ ᐃᓕᓮᔩᑦ, ᔫᑎᓪᓗ ᐊᖓᔪᖅᑳᖏᑦ, ᒥᑕᐅᑎᖃᕆᕗᑦ ᐅᖃᕐᓗᑎᒃ: 42“ᐊᓯᓂ ᐱᐅᓕᓚᐅᖅᐰᑦ; ᐃᒻᒥᓂᒃ ᐱᐅᓕᔪᓐᓇᓐᖏᓚᖅ. ᐃᓴᕆᐊᓕᒥᐅᓄᑦ ᐊᖓᔪᖅᑳᕐᔪᐊᖑᒍᓂ ᒫᓐᓇ ᓴᓐᓂᖓᔪᓕᖕᒥᑦ ᐊᖅᑲᓕᕐᓕ, ᑕᕝᕙ ᐅᒃᐱᕆᓕᕐᖕᓂᐊᖅᐸᕗᑦ. 43#ᐃᓐᖏᕈᑦ 22:8.ᒎᑎᒥᒃ ᑕᑎᖃᕐᖕᒪᑦ; ᒫᓐᓇ, ᑕᑯᓐᓇᓕᖅᑕ ᒎᑎᒧᑦ ᐱᐅᓕᔭᐅᑎᓪᓗᒍ, ᓴᐳᑎᔪᒪᒍᓂᐅᒃ; ᐅᖃᓚᐅᕐᖕᒪᑦ, ‘ᒎᑎᒧᑦ ᐃᕐᖕᓂᐅᕗᖓ.’”
44ᑖᒃᑯᐊᒃᑕᐅᖅ ᐱᕋᔭᒃᑏᒃ ᑭᑭᐊᒃᑐᖅᑕᐅᖃᑎᒋᓯᒪᔭᖏᒃᑕ ᑍᒫᑦᓮᓐᓇᖅ ᐅᖃᕐᖕᓂᕐᓘᑎᒋᒋᕚᒃ.
ᔩᓱᓯᐅᑉ ᑐᖁᓂᖓ
ᒫᑯᓯ 15:33-41; ᓘᑲᓯ 23:44-49; ᔪᐊᓇᓯ 19:28-30
45ᐅᓪᓗᖅ ᕿᑎᕋᓕᖅᑎᓪᓗᒍ ᓄᓇᕐᔪᐊᖅ ᑖᖅᓯᓚᐅᖅᐳᖅ, ᐃᑲᕐᕋᓂᒃ ᐱᖓᓱᓂᒃ ᑖᓚᐅᖅᐳᖅ. 46#ᐃᓐᖏᕈᑦ 22:1.3ᒧᐊᖅᑎᓪᓗᒍ, ᔩᓱᓯ ᕾᒐᓛᓕᖅᐳᖅ ᓂᐱᖅᑯᖅᑐᓪᓗᓂ, “ᐃᓔ, ᐃᓔ, ᓛᒪ ᓴᐸᖅᑖᓃ?” ᐃᒫᒃ ᑐᑭᓕᒃ, “ᒎᑎᒐ, ᒎᑎᒐ, ᓲᖅ ᕿᒪᒃᐱᖔ?”
47ᐃᓄᐃᑦ ᑕᕝᕙᓃᑦᑐᑦ ᐃᓚᖏᑕ ᑐᓴᕋᒥᑦᔪᒃ ᐅᖃᖅᐳᑦ, “ᐅᓇ ᐃᓔᑦᔭᒥᒃ ᕾᖁᔨᓕᖅᑐᖅ!” 48#ᐃᓐᖏᕈᑦ 69:21.ᐃᓚᖓᑦ ᑕᕝᕔᓐᓇᖅ ᐅᓪᓚᒃᓗᓂ ᐳᕙᐅᔭᒥᒃ ᑎᒍᓯᕗᖅ ᐅᐂᓂᒥᒃ ᐃᓚᓯᒪᔪᒧᑦ ᐃᑦᓴᒃᑎᕐᓗᓂᐅᒃ, ᐊᔭᐅᑉᐱᐊᒧᑦ ᑲᐳᒻᒥᑖᕐᓗᒍ, ᔩᓱᓯ ᐃᒥᖅᑎᑉᐹ.
49ᐃᓚᖏᑦ ᐅᖃᖅᐳᑦ, “ᐅᑕᖅᑭᑬᓐᓇᖅᑕ, ᐃᓔᑦᔭᐅᑉ ᐱᐅᓕᔭᖅᑐᕐᖕᓂᐊᖕᒪᖔᒍ!”
50ᔩᓱᓯ ᓂᐱᖅᑯᖅᑐᓪᓗᓂ ᕾᒐᓛᒃᑲᓐᓂᕋᒥ ᐊᓂᕐᖕᓂᖃᕈᓐᓃᖅᐳᖅ.
51 #
ᒨᓯᓯ ᐂᑉᐸᖏᑦ 26:31-33. ᑕᑯᒋᑦ, ᑖᓗᑕᕐᔪᐊᖅ ᑐᒃᓯᐊᕐᕕᒡᔪᐊᕐᖕᒦᑦᑐᖅ ᖁᐱᕗᖅ ᒪᕐᕉᓕᓪᓗᓂ, ᖁᓛᓂᑦ ᐊᑖᓄᑦ ᑎᑭᓪᓗᓂ; ᓄᓇᕐᔪᐊᕐᓗ ᓴᔪᒃᐱᓗᒃᐳᖅ, ᐅᔭᕅᓪᓗ ᓯᖁᑦᑎᖅᖢᑎᒃ. 52ᐃᓗᕖᑦ ᒪᑐᐃᖅᐳᑦ, ᐅᓄᖅᑐᓪᓗ ᒎᑎᐅᑉ ᐃᓄᖁᑎᖏᑦ ᑐᖁᖓᔪᑦ ᒪᑭᑉᐳᑦ ᐃᓅᓕᕐᓗᑎᒃ. 53ᐃᓗᕕᕐᖕᓂᑦ ᐊᓂᓪᓗᑎᒃ; ᔩᓱᓯᐅᑉ ᑐᖁᖓᔪᓂᑦ ᒪᑭᓐᓂᖓᑕ ᑭᖑᓂᖓᒍᑦ, ᐃᒡᓗᒐᓴᖕᓄᐊᖅᐳᑦ ᐃᑦᔪᕐᖕᓁᑦᑐᒧᑦ; ᑕᕝᕙᓂ ᐃᓄᖕᓂᑦ ᐅᓄᖅᑐᓂᑦ ᑕᑯᔭᐅᖃᑦᑕᓚᐅᖅᐳᑦ.
54ᐅᓇᑕᖅᑐᒃᓮᑦ ᐊᖓᔪᖅᑳᖓᑦᑕ ᐅᓇᑕᖅᑐᒃᓮᓪᓗ ᑕᕝᕙᓃᖃᑦᑎᒋᔭᖏᑕ ᔩᓱᓯᒥᒃ ᖃᐅᔨᓴᖅᑐᑦ, ᓄᓇᐅᑉ ᓴᔪᒃᐱᓪᓚᖕᓂᖓ ᐊᓯᖏᓪᓗ ᑕᒪᒃᑯᐊ ᐱᓂᐊᕐᖕᓂᕆᔭᐅᔪᑦ ᑕᑯᒐᒥᒋᑦ, ᐊᖏᔪᒥᒃ ᑲᒪᓕᕐᓗᑎᒃ ᐅᖃᖅᐳᑦ, “ᐅᓇ ᐃᓛᒃ ᒎᑎᐅᑉ ᓱᓕᔪᒥᒃ ᐃᕐᖕᓂᕆᕚ!”
55 #
ᓘᑲᓯ 8:2,3. ᑕᕝᕙᓂᑦᑕᐅᖅ ᐊᕐᖕᓇᖅᑕᖃᓚᐅᕆᕗᖅ ᐊᒥᓱᓂᒃ, ᐅᖓᓯᒋᔭᖓᓂ ᑕᑯᓐᓈᖅᑐᓂᒃ, ᔩᓱᓯᒥᒃ ᒪᓕᒃᓯᒪᔪᑦ ᒐᓕᓕᐊᒥᓐᖔᖅᑎᓪᓗᒍ, ᐃᑲᔪᓚᐅᖅᑐᓂᒃ ᔩᓱᓯᒥᒃ; 56ᑖᒃᑯᐊ ᐃᓚᖏᑦ ᐅᑯᐊᖑᕗᑦ; ᒥᐊᕆ ᒫᒃᑕᓖᓂ, ᒥᐊᕆᓗ ᔧᒥᓯᐅᑉ ᔫᓯᐱᐅᓪᓗ ᐊᓈᓇᖓ, ᓯᐱᑎᐅᓪᓗ ᓄᓕᐊᖓ.
ᔩᓱᓯᐅᑉ ᐃᓗᕕᖅᑕᐅᓂᖓ
ᒫᑯᓯ 15:42-47; ᓘᑲᓯ 23:50-56; ᔪᐊᓇᓯ 19:38-42
57ᐅᓐᓄᖕᒪᑦ, ᐊᖑᑦ ᐊᔪᖅᓴᖏᑦᑐᖅ ᐊᕆᒪᑎᐊᒥᐅᑕᖅ ᑕᕝᕗᓐᖓᖅᐳᖅ; ᔫᓯᐱᒥᒃ ᐊᑎᓕᒃ, ᑖᓐᓇᑦᑕᐅᖅ ᔩᓱᓯᒥᒃ ᒪᓕᒃᑎᓄᑦ ᐃᓚᒋᔭᐅᕗᖅ. 58ᑖᓐᓇ ᐰᓛᑑᓯᒧᐊᓚᐅᖅᐳᖅ ᔩᓱᓯᐅᑉ ᑎᒥᖓᓂᒃ ᐱᑎᑕᐅᔪᒪᓪᓗᓂ. ᐰᓛᑑᓯ ᑎᓕᓯᕗᖅ ᔩᓱᓯᐅᑉ ᑎᒥᖓ ᔫᓯᐱᒧᑦ ᑐᓂᔭᐅᖁᓪᓗᒍ. 59ᔫᓯᐱᐅᑉ ᔩᓱᓯᐅᑉ ᑎᒥᖓ ᐱᒐᒥᐅᒃ, ᖃᓪᓗᓈᖅᑕᒧᑦ ᓄᑖᒧᑦ ᖃᑯᖅᑕᒧᑦ ᐃᒻᒧᓯᖅᐹ, 60ᐃᓗᕕᒃᓴᒥᓄᑦ ᓇᖕᒥᓂᕐᖕᒥᓄᑦ ᐃᓕᕚ, ᕾᖅᑐᒥ ᐃᓗᓕᐅᖅᓯᒪᔭᒥᓄᑦ; ᒪᑐᒃᓴᖓᓂᒡᓗ ᐅᔭᕋᒃᔪᐊᕐᖕᒥᒃ ᐊᒃᓴᑳᑦᓯᓪᓗᓂ ᒪᑐᓪᓗᒍ, ᕿᒪᒃᐹ. 61ᒥᐊᕆ ᒫᒃᑕᓖᓂ ᑖᑦᓱᒪᓗ ᐊᓯᐊ ᒥᐊᕆ ᑕᕝᕙᓂ ᐃᒃᓯᕙᕘᒃ, ᐃᓗᕕᕐᖕᒧᑦ ᓵᓐᖓᓪᓗᑎᒃ.
ᖃᐅᔨᓴᖅᑏᑦ ᐃᓗᕕᕐᖕᒥ
62ᖃᐅᑎᓪᓗᒍ, ᓴᐸᑎᐅᓕᖅᑎᓪᓗᒍ, ᑐᓂᕐᕈᓯᖅᑎᑦᓯᔩᑦ ᐊᖓᔪᖅᑳᖏᑦ ᐹᕆᓯᓪᓗ ᐰᓛᑑᓯᒥᒃ ᑲᑎᒪᖃᑎᖃᓕᖅᐳᑦ, 63#ᒫᑎᐅᓯ 16:21; 17:23; 20:19; ᒫᑯᓯ 8:31; 9:31; 10:33,34; ᓘᑲᓯ 9:22; 18:31-33.ᐅᖃᕐᓗᑎᒃ, “ᐊᖓᔪᖅᑳᖅ, ᐃᖅᑬᒐᑦᑕ ᑍᓐᓇ ᓴᒡᓗᑐᔪᐊᓗᒃ ᓱᓕ ᐃᓅᓪᓗᓂ ᐅᖃᓚᐅᕐᖕᒪᑦ, ‘ᐅᓪᓗᑦ ᐱᖓᔪᐊᓐᓂ ᒪᑭᑦᓱᒫᖅᐳᖓ ᐃᓅᓕᕐᖕᒥᓗᖓ.’ 64ᑍᒤᒻᒪᑦ ᑎᓕᓯᓚᐅᕆᑦ ᑖᑦᓱᒪ ᐃᓗᕕᖓ ᖃᐅᔨᒪᔭᐅᓇᓱᐊᖅᑕᐅᖁᓗᒍ ᐅᓪᓗᑦ ᐱᖓᓱᑦ ᓈᓚᐅᖏᓐᓂᖏᓐᓂ, ᑖᑦᓱᒪ ᐃᓕᓐᓂᐊᖅᑎᖏᑦ ᑎᒥᖓᓂᒃ ᑎᒡᓕᒋᐊᖅᑐᖁᓇᒋᑦ, ᐃᓄᖕᓄᓪᓗ ᐅᖃᖃᑦᑕᓕᖁᓇᒋᑦ, ᑐᖁᖓᔪᓂᑦ ᒪᑭᓯᒪᓂᕋᕐᓗᒍ, ᑕᒪᓐᓇ ᐅᐃᕕᕆᒃᓯᓂᖅ ᓯᕗᓂᖓᓂᑦ ᐱᐅᖏᓐᓂᖅᓴᐅᓕᖁᓇᒍ.”
65ᐰᓛᑑᓯᐅᑉ ᐅᖃᐅᑎᕔᑦ, “ᖃᐅᔨᓴᖅᑎᖁᑎᖃᕋᑦᓯ ᐅᓇᑕᖅᑐᒃᓴᓂᒃ; ᑎᓕᓯᓕᕆᑦᓯ, ᐃᓗᕕᖅ ᑲᒪᒋᑦᓯᐊᕐᓗᒍ ᖃᐅᔨᒪᓇᓱᐊᖅᑕᐅᑎᓕᖅᓯᐅᒃ.”
66ᑕᕝᕙᓐᖓᑦ ᐊᓂᒐᒥᒃ, ᐃᓗᕕᕐᖕᒧᐊᕐᓗᑎᒃ ᐃᓗᕕᖅ ᐊᑦᑐᖏᖅᓱᖅᐹᑦ ᓇᓗᓁᒃᑯᓯᕐᓗᒍ ᓇᕿᑦᔪᑎᒥᒃ ᑖᓐᓇ ᐅᔭᕋᒃ, ᖃᐅᔨᓴᖅᑎᑦ ᖃᐅᔨᒪᓇᓱᐊᕐᖕᓂᐊᓕᖅᑎᓪᓗᒋᑦ ᕿᒪᒃᑕᐅᕗᑦ.
Currently Selected:
ᒫᑎᐅᓯᐅᑉ ᐊᒡᓚᖏᑦ 27: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.