ᓘᑲᓯᐅᑉ ᐊᒡᓚᖏᑦ 4
4
ᔩᓱᓯᐅᑉ ᐱᔪᒥᓵᖅᑕᐅᓂᖓ
ᒫᑎᐅᓯ 4:1-11; ᒫᑯᓯ 1:12-13
1ᔩᓱᓯ ᔪᐊᕐᑕᓂᒥᑦ ᐅᑎᓕᖅᑎᓪᓗᒍ, ᐊᓂᕐᖕᓂᕐᖕᒥᒃ ᐃᑦᔪᕐᖕᓁᑦᑐᒥᒃ ᐃᓗᒻᒥᖅᑕᐅᓯᒪᓪᓗᓂ, ᐊᓂᕐᖕᓂᐅᑉ ᐃᑦᔪᕐᖕᓁᑦᑑᑉ ᑕᓯᐅᖅᐹ ᐃᓄᖃᖏᑦᑐᒧᑦ, 2ᐅᓪᓗᓂᒃ 40ᓂᒃ ᐃᓄᖃᖏᑦᑐᒥ ᓵᑖᓇᓯᐅᑉ ᐆᒃᑐᕐᓗᒍ ᐱᔪᒥᓵᖅᐹ. ᑖᒃᑯᓇᓂ ᐅᓪᓗᓂ ᓂᕆᓚᐅᓐᖏᓚᖅ; ᐅᓪᓗᐃᑦ ᑖᒃᑯᐊ ᓈᖕᒪᑕ, ᑳᓕᖅᐳᖅ.
3ᑕᕝᕙ ᓵᑖᓇᓯᐅᑉ ᐅᖃᐅᑎᕚ, “ᒎᑎᐅᑉ ᐃᕐᖕᓂᕆᒃᐸᑎᑦ, ᐅᓇ ᐅᔭᕋᒃ ᓂᐊᖂᔭᓐᖑᖁᓚᐅᕈᒃ.”
4 #
ᒨᓯᓯ ᑕᓪᓕᒪᖏᑦ 8:3. ᔩᓱᓯᐅᑉ ᑭᐅᕚ, “ᐊᒡᓚᖕᓂ ᑎᑎᕋᖅᓯᒪᕗᖅ, ‘ᐃᓄᒃ ᓂᐊᖂᔭᒥᑐᐃᓐᓇᖅ ᐃᓅᑦᔪᑎᖃᓐᖏᓚᖅ.’”
5ᑕᕝᕙ ᓵᑖᓇᓯᐅᑉ ᐳᖅᑐᔪᒧᐊᖅᑎᑉᐹ, ᑕᑯᑎᓪᓗᒍ ᓯᓚᕐᔪᐊᕐᖕᒥ ᐊᖓᔪᖅᑲᐅᕕᓕᒫᓂᒃ ᐃᔨᐅᑉ ᓯᑯᓐᖏᓪᓚᖕᓂᖓᑐᑦ ᕿᓚᒻᒥᐅᑎᒋᔪᒥᒃ, 6ᓵᑖᓇᓯᐅᑉ ᐅᖃᐅᑎᕚ, “ᐊᖓᔪᖅᑲᐅᓂᓕᒫᑦ ᑕᒪᒃᑯᐊ ᓂᖅᑐᕐᖕᓇᕐᖕᓂᖏᓪᓗ ᐃᓕᖕᓄᑦ ᑐᓂᓂᐊᖅᐸᒃᑲ, ᐅᕙᓐᓄᑦ ᑐᓂᔭᐅᓯᒪᔪᑦ, ᐃᓱᒪᓐᓂᒃ ᑐᓂᔪᓐᓇᖅᐸᒃᑲ ᑐᓂᓯᕕᒋᔪᒪᔭᓐᓄᑦ. 7ᑕᒪᒃᑯᐊ ᑕᒪᕐᖕᒥᒃ ᐱᑖᕆᓂᐊᖅᐸᑎᑦ, ᑐᒃᓯᐊᕐᕕᒋᒍᕕᖓ.”
8 #
ᒨᓯᓯ ᑕᓪᓕᒪᖏᑦ 6:13. ᔩᓱᓯᐅᑉ ᑭᐅᕚ, “ᐊᒡᓚᖕᓂ ᑎᑎᕋᖅᓯᒪᕗᖅ, ‘ᐊᑕᓂᖅ ᒎᑎᒋᔧᑦ ᑐᒃᓯᐊᕐᕕᒋᔭᒃᓴᕆᕙᑦ, ᑖᓐᓇᑐᐊᕐᓗ ᐱᔨᑦᓯᖅᑕᒃᓴᕆᕙᑦ.’”
9ᓵᑖᓇᓯᐅᑉ ᔩᓱᓯ ᔨᕉᓴᓕᒻᒧᐊᕈᑎᕚ, ᑐᒃᓯᐊᕐᕕᒡᔪᐊᑉ ᐳᖅᑐᓂᖅᐹᖓᓄᐊᖅᑎᐹ, ᐅᖃᐅᑎᓪᓗᒍ, “ᒎᑎᐅᑉ ᐃᕐᖕᓂᕆᒃᐸᑎᑦ, ᑕᒫᓐᖓᑦ ᐃᓕᖕᓂᒃ ᑲᑕᒃᑎᓚᐅᕆᑦ ᐅᓄᖓ; 10#ᐃᓐᖏᕈᑦ 91:11,12.ᐊᒡᓚᖕᓂ ᑎᑎᕋᖅᓯᒪᖕᒪᑦ, ‘ᒎᑎᐅᑉ ᐂᖏᓕᖁᑎᓂ ᑎᓕᔪᒫᖅᐰᑦ, ᓴᐳᑎᔭᐅᖁᓪᓗᑎᑦ,’ 11ᐊᒻᒪᓗ, ‘ᑎᒍᒥᐊᖅᑕᐅᓂᐊᖅᐳᑎᑦ ᐃᑎᒐᑎᑦ ᐋᓐᓂᖁᓇᒋᑦ ᐅᔭᖅᑲᓄᑦ.’”
12 #
ᒨᓯᓯ ᑕᓪᓕᒪᖏᑦ 6:16. ᔩᓱᓯᐅᑉ ᑭᐅᕚ, “ᐊᒡᓚᖕᓂ ᐅᖃᖅᓯᒪᕗᖅ, ‘ᒎᑎᖕᓂᒃ ᐊᑕᓂᕐᖕᓂᒃ ᐱᔪᒥᓵᕆᔪᒃᓴᐅᓐᖏᓚᑎᑦ.’”
13ᓵᑖᓇᓯᐅᑉ ᐱᔪᒥᓵᕆᑦᔪᑎᓂ ᐃᓱᓕᒃᑲᒥᒋᑦ, ᔩᓱᓯᒥᑦ ᕿᒪᕉᑎᕗᖅ ᐱᕕᒃᓴᒥᓂᒃ ᐅᑕᖅᑭᓕᕆᓪᓗᓂ.
ᔩᓱᓯᐅᑉ ᐱᓇᓱᐊᓯᒋᐊᕐᖕᓂᖓ ᒐᓕᓕᐊᒥ
ᒫᑎᐅᓯ 4:12-17; ᒫᑯᓯ 1:14-15
14ᔩᓱᓯ ᐅᑎᖅᐳᖅ ᒐᓕᓕᐊᒧᑦ ᐊᓂᕐᖕᓂᐅᑉ ᐃᑦᔪᕐᖕᓁᑦᑑᑉ ᐱᔪᓐᓇᕐᖕᓂᖓᑕ ᓇᔪᕐᓗᓂᐅᒃ, ᐅᖃᐅᓯᐅᓂᖓ ᒐᓕᓕᐊᑉ ᖃᓂᒋᔭᖓᓃᑦᑐᓕᒫᓄᑦ ᑐᓴᐅᒪᔭᐅᓕᖅᐳᖅ. 15ᐊᔪᕆᖅᑐᐃᓪᓗᓂ ᔫᑎᑦ ᐅᒃᐱᕐᖕᓂᕐᖕᒧᑦ ᑲᑎᒪᕕᖏᓐᓂ, ᖁᕕᐊᒋᔭᐅᒻᒪᕆᒃᐳᖅ ᐃᓄᓕᒫᓄᑦ.
ᔩᓱᓯᐅᑉ ᓇᕐᕈᒋᔭᐅᓂᖓ ᓈᓴᕇᑎᒥ
ᒫᑎᐅᓯ 13:53-58; ᒫᑯᓯ 6:1-6
16ᑭᖑᕐᖓᒍᑦ ᔩᓱᓯ ᓈᓴᕇᑎᒧᐊᖅᐳᖅ, ᐱᕈᖅᓴᕕᒋᓚᐅᖅᑕᒥᓄᑦ; ᔫᑎᑦ ᐅᒃᐱᕐᖕᓂᕐᖕᒧᑦ ᑲᑎᒪᕕᖓᓐᓄᐊᖅᐳᖅ, ᐃᓕᖅᑯᓯᕆᕙᒃᑕᒥᑐᑦ ᓴᐸᑎᐅᑎᓪᓗᒍ, ᓂᑯᕕᑉᐳᖅ ᐊᑐᐊᖅᓯᓂᐊᓕᕋᒥ ᐊᒡᓚᖕᓂᒃ; 17ᑐᓂᓯᕕᐅᒐᒥ ᓇᓚᐅᑦᑍᔪᑉ ᐂᓮᐊᓯᐅᑉ ᐊᒡᓚᖏᓐᓂᒃ. ᒪᒃᐱᕋᒥᒋᑦ ᐃᒫᒃ ᐊᒡᓚᒃᓯᒪᔪᑦ ᐅᖃᓕᒫᖅᐰᑦ,
18 #
ᐂᓮᐊᓯ 61:1,2. “ᐊᑕᓂᐅᑉ ᐊᓂᕐᖕᓂᖓᑕ ᓇᔪᖅᐹᖓ,
ᓂᕈᐊᓚᐅᖅᐹᖓ ᐊᔪᕆᖅᑐᐃᖁᓪᓗᖓ
ᐅᖃᐅᓯᕐᖕᓂᒃ ᑐᓴᕈᒥᓇᖅᑐᓂᒃ ᐊᒃᖢᔪᓄᑦ.
ᑎᓕᕚᖓᓗ ᐅᖃᐅᑦᔨᖁᓪᓗᖓ ᑎᒍᔭᐅᓯᒪᔪᑦ ᐊᓂᑎᑕᐅᖁᓪᓗᒋᑦ,
ᑕᐅᑐᖏᑦᑐᑦ ᑕᐅᑐᓕᖅᑎᑕᐅᖁᓪᓗᒋᑦ,
ᓵᓚᒋᔭᐅᓯᒪᔪᓪᓗ ᕿᓚᕈᑦᔮᖅᑕᐅᖁᓪᓗᒋᑦ,
19ᐅᖃᐅᑦᔨᖁᓪᓗᖓ ᐊᑕᓂᐅᑉ ᐱᐅᓕᓯᕕᒋᔪᒪᔭᓐᖓᑕ ᐊᕐᕌᒍᖓ ᓇᓪᓕᐅᑎᖕᒪᑦ.”
20ᔩᓱᓯᐅᑉ ᐅᖃᓕᒫᖅᑕᓂ ᐃᒧᒐᒥᒋᑦ, ᐅᑎᖅᑎᑉᐰᑦ ᑲᒪᔨᒧᑦ, ᐊᔪᕆᖅᑐᐃᕕᖕᒧᑦ ᐃᖏᓪᓗᓂ; ᑕᕝᕙᓃᑦᑐᓕᒫᑦ ᑕᑯᓐᓇᓕᖅᐹᑦ. 21ᐅᖃᕐᕕᒋᓕᖅᐰᑦ, “ᐅᓪᓗᒥ ᐅᑯᐊ ᐊᒡᓔᑦ ᑐᓴᖅᑕᓯ ᓇᓪᓕᐅᑎᕗᑦ.”
22ᐊᔪᖏᓐᓂᖓ ᐅᖃᐅᓯᕆᕚᑦ, ᑲᒪᓪᓗᑎᒃ ᐅᖃᕈᓐᓇᑦᓯᐊᕐᖕᓂᖓᓂᒃ; ᐅᖃᕐᓗᑎᒃ, “ᐅᓇ ᔫᓯᐱᐅᑉ ᐃᕐᖕᓂᕆᓐᖏᓚᐅᒃ?”
23ᔩᓱᓯᐅᑉ ᐅᖃᐅᑎᕔᑦ, “ᓇᓗᓇᓐᖏᓚᖅ ᐃᒫᒃ ᐅᖃᐅᓯᑐᖃᕐᖕᒥᒃ ᐅᖃᐅᑎᔪᒪᓂᐊᕋᑦᓯᓐᖓ, ‘ᐋᓐᓂᐊᓯᐅᖅᑏ ᐃᓕᖕᓂᒃ ᐋᖅᑭᓚᐅᕆᑦ; ᑐᓴᖅᓯᒪᔭᑦᑎᓐᓂᒃ ᑲᐲᕐᓂᐊᒥ ᐱᓂᐊᕐᖕᓂᕆᓚᐅᖅᑕᕐᖕᓂᒃ, ᐅᕙᓂ ᓈᓴᕇᑎᒥ ᐱᓇᓱᐊᓚᐅᕆᑦᑕᐅᖅ.’” 24#ᔪᐊᓇᓯ 4:44.ᐃᒫᒡᓗ ᐅᖃᕆᕗᖅ, “ᓱᓕᔪᒥᒃ ᐅᖃᐅᑎᕙᑦᓯ, ᓇᓚᐅᑦᑍᔪᒥᒃ ᐃᓚᓕᐅᖅᑕᐅᔪᖃᓚᐅᖅᓯᒪᓐᖏᓚᖅ ᐱᕈᖅᓴᕕᕕᓂᕐᖕᒥᓂ. 25#ᐊᑕᓃᑦ ᓯᕗᓪᓖᑦ 17:1.ᓱᓕᔪᒥᒃ ᐅᖃᐅᑎᕙᑦᓯ, ᐊᒥᓱᓂᒃ ᐅᐃᒡᒐᕐᖕᓂᖅᑕᖃᓚᐅᖅᐳᖅ ᐃᓴᕆᐊᓕᒥᐅᓂ ᐃᓔᑦᔭ ᐃᓅᑎᓪᓗᒍ, ᑍᑦᓱᒪᓂ ᓯᓚᓗᓚᐅᖏᒻᒪᑦ ᐊᕐᕌᒍᓂᒃ ᐱᖓᓱᓂᒃ, ᑕᖅᑭᓂᒡᓗ ᐱᖓᓲᔪᖅᑐᓂᒃ, ᑳᖕᓇᖅᑐᕐᔪᐊᖃᓕᓚᐅᖅᐳᖅ ᓄᓇᓕᒫᒥ; 26#ᐊᑕᓃᑦ ᓯᕗᓪᓖᑦ 17:8-16.ᐃᓔᑦᔭ ᐃᓴᕆᐊᓕᒥᐅᑦ ᓇᓪᓕᐊᓐᓄᑦ ᑎᓕᔭᐅᓚᐅᓐᖏᓚᖅ ᓄᓇᓕᖕᒧᓪᓕ ᐊᑕᐅᓯᕐᖕᒧᑦ ᑎᓕᔭᐅᓚᐅᖅᐳᖅ ᔨᕆᐹᑎᒧᑦ, ᓮᑐᓂᒦᑦᑐᒧᑦ, ᐊᕐᖕᓇᒧᑦ ᐅᐃᒡᒐᕐᖕᓂᕐᖕᒧᑦ. 27#ᐊᑕᓃᑦ ᐂᑉᐸᖏᑦ 5:1-14.ᐊᒥᓱᑦ ᑲᑉᐱᐊᒋᔭᐅᔪᒥᒃ ᐸᖅᑎᓚᐅᖅᐳᑦ ᐃᓴᕆᐊᓕᒥᐅᑦ ᓄᓇᖓᓂ ᓇᓚᐅᑦᑍᔪᖅ ᐃᓔᓴ ᐃᓅᑎᓪᓗᒍ; ᓇᓪᓕᐊᓐᓂᒡᓘᓐᓃᑦ ᐋᖅᑭᒃᑕᐅᔪᖃᓚᐅᓐᖏᓚᖅ, ᓁᒪᓐᓕ ᓯᕆᐊᒥᐅᖅ ᑭᓯᒥ ᐋᖅᑭᒃᑕᐅᔪᑑᓚᐅᖅᐳᖅ.”
28ᐃᓄᐃᑦ ᔫᑎᑦ ᐅᒃᐱᕐᖕᓂᕐᖕᒧᑦ ᑲᑎᒪᕕᖓᓃᑦᑐᑦ ᑕᒪᑐᒥᖓ ᑐᓴᕋᒥᒃ ᓂᓐᖓᒃᐳᑦ. 29ᓂᑯᕕᓐᓇᒥᒃ ᔩᓱᓯ ᑎᒍᓪᓗᒍ ᑕᓯᐅᖅᐹᑦ, ᓄᓇᓕᖕᓂᑦ ᑕᕝᕙᓐᖓᑦ ᐃᓐᓈᕈᕐᖕᒧᐊᕈᑎᓪᓗᒍ, ᑕᕝᕙᓐᖓᑦ ᐃᔪᒃᑲᖅᑎᑦᓱᒪᓪᓗᒍ, ᐃᒡᓗᒐᓴᖃᕐᕕᐅᑉ ᐃᓐᓈᕈᖓᒍᑦ. 30ᔩᓱᓯᓕ ᐃᓄᒋᐊᒃᑐᑦ ᐊᑯᕐᖓᑦᑎᒍᑦ ᑖᒃᑯᓇᓐᖓᑦ ᐊᐅᓪᓚᖅᐳᖅ.
ᐊᖑᑦ ᐊᓂᕐᖕᓂᕐᓗᖕᒥᒃ ᐃᑎᖅᑕᐅᓯᒪᔪᖅ
ᒫᑯᓯ 1:21-28
31ᑕᕝᕙᓐᖓᑦ ᔩᓱᓯ ᑲᐲᕐᓂᐊᒧᐊᖅᐳᖅ, ᒐᓕᓕᐊᒦᑦᑐᒧᑦ. ᓴᐸᑎᐅᓕᕐᖕᒪᑦ ᑕᕝᕙᓂ ᐊᔪᕆᖅᑐᐃᕗᖅ. 32#ᒫᑎᐅᓯ 7:28,29.ᐊᔪᕆᖅᑐᐃᑦᔪᑎᒋᔭᖏᑦ ᐃᓄᐃᑦ ᑲᒪᓂᐊᕈᑎᒋᕔᑦ, ᐱᔪᓐᓇᕐᖕᓂᖃᖅᑎᑕᐅᓪᓗᓂ ᐊᔪᕆᖅᑐᐃᖕᒪᑦ. 33ᔫᑎᑦ ᐅᒃᐱᕐᖕᓂᕐᖕᒧᑦ ᑲᑎᒪᕕᖓᓃᑦᑐᖃᖅᐳᖅ ᐊᖑᒻᒥᒃ ᐊᓂᕐᖕᓂᕐᓗᖕᒧᑦ ᐃᑎᖅᑕᐅᓯᒪᔪᒥᒃ; ᑖᓐᓇ ᓂᓪᓕᐊᓕᖅᐳᖅ ᓂᐱᖅᑯᖅᑐᓪᓗᓂ, 34“ᐋᖅ! ᔩᓱᓯ ᓈᓴᕇᑎᒥᐅᖅ, ᖃᓄᐃᓕᐅᕆᐊᖅᑐᖅᐱᑎᒎᑦ, ᑐᖁᕋᕆᐊᖅᑐᖅᐱᑎᒎᑦ? ᑭᓇᐅᖕᒪᖔᖅᐱᑦ ᖃᐅᔨᒪᒐᒃᑭᑦ, ᒎᑎᐅᑉ ᐃᑦᔪᕐᖕᓁᑦᑐᖁᑎᒋᖕᒪᑎᑦ.”
35ᔩᓱᓯᐅᑉ ᐊᓂᕐᖕᓂᕐᓗᒃ ᐃᓂᖅᑎᖅᐹ, ᐅᖃᐅᑎᓪᓗᒍ, “ᓂᐸᖏᕐᓗᑎᑦ, ᐃᓄᖕᒥᑦ ᐆᒪᓐᖓᑦ ᐊᓂᒋᑦ!” ᐊᓂᕐᖕᓂᕐᓘᑉ ᐃᓄᒃ ᐅᕐᕈᑎᑉᐹ ᐃᓄᐃᑦ ᓵᖏᓐᓂ, ᖃᓄᐃᓕᓇᒍ ᑖᑦᓱᒪᖓᑦ ᐊᓂᕗᖅ.
36ᐃᓄᓕᒫᑦ ᑲᒪᔪᐊᓘᕗᑦ ᐃᒻᒥᖕᓄᑦ ᐅᖃᓗᑎᒃ, “ᖃᓄᐃᑦᑐᒥᖑᓇ ᐅᖃᐅᓯᓕᒃ ᐊᐅᓚᑦᓯᔪᓐᓇᖅᑐᖅ ᐱᔪᓐᓇᕐᖕᓂᖃᕐᓗᓂ ᐊᓂᕐᖕᓂᕐᓗᖕᓂᒃ ᐊᓂᖁᔨᔪᓐᓇᖅᑐᖅ, ᓈᓚᒃᑕᐅᓪᓗᓂ ᑖᒃᑯᓇᓐᖓᑦ?” 37ᔩᓱᓯᐅᑉ ᐅᓂᒃᑲᐅᓯᐅᓂᖓ ᑐᓴᐅᒪᔭᐅᓕᖅᐳᖅ ᑲᐱᕐᓂᐊᒥᐅᑦ ᖃᓂᒋᔭᖓᓃᑦᑐᓕᒫᓄᑦ.
ᔩᓱᓯᐅᑉ ᐋᖅᑭᒃᓯᓂᖓ ᐃᓄᖕᓂᒃ ᐊᒥᓱᓂᒃ
ᒫᑎᐅᓯ 8:14-17; ᒫᑯᓯ 1:29-34
38ᔩᓱᓯ ᐊᓂᕗᖅ ᔫᑎᑦ ᐅᒃᐱᕐᖕᓂᕐᖕᒧᑦ ᑲᑎᒪᕕᖓᓐᓂᑦ ᓮᒨᓂᐅᑉ ᐃᒡᓗᖓᓄᐊᕐᓗᓂ. ᓮᒧᓂᐅᓪᓕ ᓴᑭᖓ ᐊᕐᖕᓇᖅ ᐋᓐᓂᐊᕗᖅ ᐆᑎᕐᖕᓇᕐᓗᓂ, ᑖᓐᓇ ᐅᖃᐅᓯᕆᕚᑦ ᔩᓱᓯᒧᑦ. 39ᔩᓱᓯᐅᑉ ᐅᐸᒃᑲᒥᐅᒃ ᐃᒡᓕᖓᑕ ᓴᓂᐊᓂ ᓇᖏᕐᓗᓂ, ᐋᓐᓂᐊᖓ ᐆᑎᕐᖕᓇᖅᑐᖅ ᐊᓂᖁᕚ, ᑕᕝᕙᓐᖓᑦ ᐊᓂᕗᖅ; ᐊᕐᖕᓇᖅ ᑕᕝᕔᓐᓇᖅ ᒪᑭᓐᓇᒥ ᑕᕝᕙᓃᑦᑐᑦ ᐱᔨᑦᓯᕋᓕᖅᐰᑦ.
40ᐅᓐᓄᓕᖅᑎᓪᓗᒍ ᓯᕿᓂᖅ ᓂᐱᖕᒪᑦ, ᐃᓄᓕᒫᑦ ᐃᓚᖃᖅᑐᑦ ᖃᓂᒪᔪᓂᒃ ᖃᓄᑐᐃᓐᓇᖅ ᐋᓐᓂᐊᖃᖅᑐᓂᒃ ᔩᓱᓯᒧᑦ ᐋᑦᓯᕗᑦ; ᑕᒪᕐᖕᒥᒃ ᐸᑎᒻᒥᕔᑦ ᐋᖅᑭᒡᓗᒋᑦ. 41ᐊᓂᕐᖕᓂᕐᓗᐃᓪᓗ ᐃᓄᖕᓂᑦ ᐅᓄᖅᑐᓂᑦ ᐊᓂᕗᑦ, ᓂᓪᓕᐊᓪᓗᑎᒃ ᐃᒫᒃ, “ᒎᑎᐅᑉ ᐃᕐᖕᓂᕆᕚᑎᑦ!”
ᐃᓂᖅᑎᖅᐰᑦ, ᐅᖃᓪᓚᖁᓇᒋᑦ, ᖃᐅᔨᒪᖕᒪᑕ ᙭ᔅᑑᓯᐅᓂᖓᓂᒃ.
ᔩᓱᓯᐅᑉ ᐊᔪᕆᖅᑐᐃᓂᖓ ᔫᑎᑦ ᐅᒃᐱᕐᖕᓂᕐᖕᒧᑦ ᑲᑎᒪᕕᖏᓐᓂ
ᒫᑯᓯ 1:35-39
42ᐅᓪᓛᓐᖑᖅᑎᓪᓗᒍ ᖃᐅᒻᒪᖕᒪᑦ ᔩᓱᓯ ᓄᓇᓕᖕᓂᑦ ᐊᐅᓪᓚᖅᐳᖅ ᐃᓄᖃᖏᑦᑐᒧᐊᕐᓗᓂ, ᐃᓄᐃᑦ ᕿᓂᓕᖅᐹᑦ, ᓇᓂᒐᒥᑦᔪᒃ ᐃᓂᖅᑎᖅᐹᑦ ᐊᐅᓪᓚᖁᓇᒍ ᓄᓇᒥᖕᓂᑦ; 43ᔩᓱᓯᐅᑉ ᐅᖃᐅᑎᕔᑦ, “ᓄᓇᓕᖕᓂ ᐊᓯᑦᓯᓐᓂᑦᑕᐅᖅ ᐅᖃᐅᓯᕐᖕᓂᒃ ᑐᓴᕈᒥᓇᖅᑐᓂᒃ ᐅᖃᐅᓯᖃᕆᐊᖃᖅᐳᖓ ᒎᑎᐅᑉ ᐊᑕᓂᐅᕕᖓᓂᒃ; ᑕᒪᓐᓇ ᑎᓕᔭᐅᑦᔪᑎᒋᓯᒪᒐᒃᑯ.”
44ᑍᒤᒻᒪᑦ ᐊᔪᕆᖅᑐᐃᓚᐅᖅᐳᖅ ᔫᑎᑦ ᐅᒃᐱᕐᖕᓂᕐᖕᒧᑦ ᑲᑎᒪᕕᖏᓐᓂ ᔫᑎᐊᒦᑦᑐᓂ.
Currently Selected:
ᓘᑲᓯᐅᑉ ᐊᒡᓚᖏᑦ 4: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.