ᓘᑲᓯᐅᑉ ᐊᒡᓚᖏᑦ 2
2
ᔩᓱᓯᐅᑉ ᐃᕐᖕᓂᐊᖑᓂᖓ
ᒫᑎᐅᓯ 1:18-25
1ᐅᓪᓗᓂ ᑍᒃᑯᓇᓂ ᕉᒪᒥᐅᑦ ᐊᖓᔪᖅᑳᕐᔪᐊᖓᑦ ᓰᓴᕆ ᐋᒐᔅᑕᓯ ᐊᖓᔪᖅᑲᐅᕕᖕᒥᓃᑦᑐᑦ ᐃᓄᓕᒫᑦ ᓈᓴᖅᑕᐅᖁᓚᐅᖅᐰᑦ ᐱᖁᑎᖏᑦ ᐱᖃᓯᐅᑎᓗᒋᑦ. 2ᑕᒪᓐᓇ ᓈᓴᖅᑕᐅᓂᖅ ᓯᕗᓪᓕᖅᐹᖑᓚᐅᖅᐳᖅ ᑯᐃᕆᓂᐊᓯ ᐊᐅᓚᑦᓯᔨᐅᑎᓪᓗᒍ ᓯᕆᐊᒥ. 3ᐃᓄᓕᒫᑦ ᑎᑎᕋᖅᑕᐅᔭᖅᑐᓚᐅᖅᐳᑦ ᓯᕗᓕᕕᓂᖏᑕ ᓄᓇᕕᓂᖏᓐᓄᑦ ᐂᓪᓗᑎᒃ.
4ᔫᓯᐱᑦᑕᐅᖅ ᓈᓴᕇᑎᒥᑦ ᐱᓪᓗᓂ ᒐᓕᓕᐊᒦᑦᑐᒥᑦ ᐱᑦᓕᐊᒧᐊᕆᕗᖅ ᔫᑎᐊᒦᑦᑐᒧᑦ, ᑍᕕᑎᐅᑉ ᐃᒡᓗᒐᓴᖏᓐᓄᑦ, ᐱᑦᓕᐊᒥᒃ ᐊᑎᓕᖕᒧᑦ, ᑕᕝᕗᓐᖓᓚᐅᖅᐳᖅ ᑍᕕᑎᐅᑉ ᑭᖑᕚᕆᖕᒪᒍ. 5ᑎᑎᕋᖅᑕᐅᔭᖅᑐᓚᐅᖅᐳᖅ ᒥᐊᕆ ᐱᖃᑎᒋᓪᓗᒍ, ᑖᓐᓇ ᓄᓕᐊᒃᓴᕇᖕᓂᕐᖕᒧᑦ ᐊᖏᖃᑎᒋᓯᒪᔭᓂ, ᓄᑕᕋᒃᓴᓕᒃ. 6ᐱᑦᓕᐊᒦᓕᖅᑎᓪᓗᒋᒃ, ᒥᐊᕆᐅᑉ ᐃᕐᖕᓂᕕᒃᓴᖓ ᓇᓪᓕᐅᑎᕗᖅ, 7ᑕᕝᕙᓂ ᓄᑕᕋᖅᑖᕆᐅᕈᑎᒥᓂᒃ ᐃᕐᖕᓂᖅᑖᖅᐳᖅ, ᐊᓐᓄᕌᓂᒃ ᐃᒻᒧᓯᖅᐹ, ᐆᒪᔪᐃᑦ ᓂᕆᕕᖓᓄᑦ ᐃᓕᓪᓗᒍ, ᓯᓂᒃᑕᕐᕕᖕᒥ ᐃᓂᒃᓴᖃᖏᓐᓇᒥᒃ.
ᓰᐱᓕᕆᔩᑦ ᐂᖏᓖᓪᓗ
8ᐱᑦᓕᐊᒻᓗ ᖃᓂᒋᔮᓂ ᐰᖅᓯᔨᑕᖃᓚᐅᖅᐳᖅ ᓰᐱᖁᑎᒥᖕᓂᒃ ᒥᐊᓂᖅᓯᔪᓂᒃ ᐅᓐᓄᐊᒃᑯᑦ. 9ᐊᑕᓂᐅᑉ ᐂᖏᓕᖓᑕ ᓴᖅᑭᕝᕕᒋᕔᑦ, ᐊᑕᓂᐅᓪᓗ ᓂᖅᑐᕐᖕᓇᕐᖕᓂᖓᑕ ᖃᐅᒻᒪᒡᕕᒋᕔᑦ, ᑲᑉᐱᐊᓱᓕᕐᓗᑎᒃ. 10ᐂᖏᓕᐅᑉ ᐅᖃᐅᑎᕔᑦ, “ᑲᑉᐱᐊᓱᖏᓪᓗᓯ; ᑕᑯᒋᑦ, ᑐᓴᕈᒥᓇᖅᑐᒥᒃ ᐅᖃᐅᑎᔭᖅᑐᖅᐸᑦᓯ ᖁᕕᐊᓇᖅᑐᕐᔪᐊᒥᒃ ᐃᓄᓕᒫᓄᑦ ᑎᑭᓐᓂᐊᖅᑐᒥᒃ; 11ᐅᓪᓗᒥ ᑕᕝᕙ ᐱᐅᓕᔨ ᐊᑕᓂᖅ ᙭ᔅᑑᓯ ᐃᕐᖕᓂᐊᖑᖕᒪᑦ ᑍᕕᑎᐅᑉ ᐃᒡᓗᒐᓴᖏᓐᓂ. 12ᐃᒫᒃ ᖃᐅᔨᒪᑦᔪᑎᖃᕐᖕᓂᐊᖅᐳᓯ; ᓄᑕᕋᑯᓗᒃ ᑕᑯᓂᐊᖅᐸᓯ ᐊᓐᓄᕌᕕᓂᕐᖕᓂᒃ ᐃᒻᒧᓯᖅᓯᒪᔪᖅ ᐆᒪᔪᐃᓪᓗ ᓂᕐᕆᕕᐊᓂ ᐃᓕᓯᒪᔪᖅ.”
13ᑕᕝᕔᓐᓇᖅ ᐂᖏᓖᒐᓴᒡᔪᐊᑦ ᕿᓚᖕᒥᑦ ᐱᔪᑦ ᐂᖏᓕ ᑖᓐᓇ ᐃᓚᒋᓕᖅᐹᑦ, ᐃᓐᖏᕐᓗᑎᒃ ᒎᑎ ᓂᖅᑐᖅᐹᑦ, ᐅᖃᕐᓗᑎᒃ,
14“ᒎᑎ ᓂᖅᑐᖅᑕᐅᓕ ᖁᑦᓯᖕᓂᖅᐹᖑᔪᖅ,
ᓮᒪᓇᕐᖕᓂᖃᕐᓗᓂᓗ ᓄᓇᕐᔪᐊᕐᖕᒥ ᐃᓄᖕᓄᑦ, ᒎᑎᒧᑦ ᖁᕕᐊᒋᔭᐅᔪᓄᑦ!”
15ᐂᖏᓖᑦ ᕿᓚᓕᐊᕐᖕᒪᑕ, ᓰᐱᓕᕆᔩᑦ ᐃᒻᒥᖕᓄᑦ ᐅᖃᖅᐳᑦ, “ᐱᑦᓕᐊᒧᐊᓚᐅᖅᑕ ᑍᓐᓇ ᐅᖃᐅᓯᐅᕋᑖᖅᑐᖅ ᑕᑯᔭᖅᑐᕐᓗᒍ, ᐊᑕᓂᐅᑉ ᖃᐅᔨᑎᑦᓯᑦᔪᑎᒋᔭᖓ ᐅᕙᑦᑎᓐᓄᑦ.”
16ᑐᐊᕕᕐᓗᑎᒃ ᐂᓕᖅᐳᑦ, ᓇᓂᓯᓪᓗᑎᒃ ᒥᐊᕆᒥᒃ ᔫᓯᐱᒥᒡᓗ, ᓄᑕᕋᑯᓗᖕᒥᒡᓗ ᐆᒪᔪᑦ ᓂᕆᕕᖓᓂ ᓇᓚᔪᒥᒃ. 17ᑕᑯᔭᕇᕋᒥᑦᔪᒃ ᐅᓂᒃᑳᓕᖅᐳᑦ ᐅᖃᐅᑦᔭᐅᓚᐅᕐᖕᓂᕐᖕᒥᖕᓂᒃ ᓄᑕᕋᑯᓗᒃ ᑖᓐᓇ ᐱᓪᓗᒍ; 18ᑐᓴᖅᑐᓕᒫᑦ ᑲᒪᓂᐊᖅᐳᑦ ᓰᐱᓕᕆᔩᑦ ᐅᖃᐅᓯᖏᓐᓂᒃ. 19ᒥᐊᕆᐅᓪᓕ ᑕᒪᒃᑯᐊᓕᒫᑦ ᐃᓱᒪᒥᐅᑕᕆᓕᖅᐰᑦ, ᐃᓱᒪᒃᓴᖅᓯᐅᕈᑎᒋᓪᓗᒋᓪᓗ. 20ᓰᐱᓕᕆᔨᑦ ᑕᕝᕙ ᐅᑎᕆᕗᑦ, ᒎᑎ ᓂᖅᑐᖅᐹᑦ ᖁᕕᐊᓲᑎᒋᓪᓗᒍ ᑐᓴᓚᐅᖅᑕᑎᒃ ᑕᑯᓚᐅᖅᑕᑎᒡᓗ ᐱᑦᔪᑎᒋᓪᓗᒋᑦ, ᐅᖃᐅᑦᔭᐅᓚᐅᕐᖕᓂᑎᒃ ᐂᖏᓖᒧᑦ ᓇᓚᐅᑦᓯᑦᓯᐊᕐᖕᒪᑕ.
ᔩᓱᓯᐅᑉ ᐊᑎᖅᑖᕐᖕᓂᖓ
21 #
ᒨᓯᓯ ᐱᖓᔪᖏᑦ 12:3;
ᓘᑲᓯ 1:31. ᐅᓪᓗᐃᑦ ᓯᑕᒪᐅᔪᖅᑐᑦ ᐊᓂᒍᕐᖕᒪᑕ, ᑭᐱᔭᐅᕕᒃᓴᖓ ᓇᓪᓕᐅᑎᖕᒪᑦ, ᐊᑦᑎᖅᑕᐅᕗᖅ ᔩᓱᓯᒥᒃ, ᐂᖏᓕᐅᑦ ᑍᒫᒃ ᐊᑎᖃᖁᓚᐅᕐᖕᒪᒍ ᓄᑕᕋᒃᓴᕆᔭᐅᓚᐅᖅᑎᓐᓇᒍ ᓱᓕ.
ᔩᓱᓯᐅᑉ ᑐᓂᕐᕈᑕᐅᓂᖓ ᑐᒃᓯᐊᕐᕕᒡᔪᐊᕐᖕᒥ
22ᔫᓯᐱᐅᑉ ᒥᐊᕆᐅᓪᓗ ᐅᒃᐱᕐᖕᓂᒃᑯᑦ ᓴᓗᒻᒪᖅᑎᑕᐅᕕᒃᓴᖓᑦ#2:22 ᔫᑎᑦ ᐱᑦᔪᓯᖃᓚᐅᕐᖕᒪᑕ ᓄᑕᕋᖅᑖᖅᑐᑦ ᓴᓗᒤᓐᓂᕋᖅᑕᐅᓪᓗᑎᒃ ᒨᓯᓯᐅᑉ ᐱᖁᔭᖏᑎᒍᑦ ᓴᓗᒻᒪᖅᑎᑕᐅᔭᕆᐊᖃᕐᓗᑎᒃ ᑐᒃᓯᐊᕐᕕᒡᔪᐊᒥ ᑐᓂᕐᕈᓯᕐᓗᑎᒡᓗ ᓇᓪᓕᐅᑎᖕᒪᑦ ᒨᓯᓯᐅᑉ ᐱᖁᔭᖏᑦ ᒪᓕᒡᓗᒋᑦ, ᔩᓱᓯ ᑐᒃᓯᐊᕐᕕᒡᔪᐊᕐᖕᒧᑦ ᐱᑎᑉᐹᑦ ᔨᕉᓴᓕᒻᒧᑦ, ᐊᑕᓂᕐᖕᒧᑦ ᑐᓂᔭᖅᑐᕐᓗᒍ. 23#ᒨᓯᓯ ᐂᑉᐸᖏᑦ 13:2,12.ᐃᒫᒃ ᐅᖃᖅᓯᒪᖕᒪᑦ ᐊᑕᓂᐅᑉ ᐱᖁᔭᖏᓐᓂ, “ᓄᑕᕋᑯᓗᐃᑦ ᐊᖑᑕᐅᒃᐸᑕ ᓯᕗᓪᓕᖅᐹᒥᒃ ᓄᑕᕋᖅᑖᕆᔭᐅᔪᑦ ᑐᓂᔭᐅᔪᒃᓴᐅᕗᑦ ᐊᑕᓂᕐᖕᒧᑦ.” 24#ᒨᓯᓯ ᐱᖓᔪᖏᑦ 12:6-8.ᔫᓯᐱᒃᑯᒃ ᑐᓂᓯᔭᕆᐊᖃᓚᐅᖅᐴᒃ ᐊᑕᓂᐅᑉ ᐱᖁᔭᖏᑦ ᒪᓕᒡᓗᒋᑦ ᑎᖕᒥᐊᖕᓂᒃ ᒪᕐᕉᖕᓂᒃ, ᑑᕕᖕᓂᒡᓘᓐᓃᑦ ᒪᕐᕉᖕᓂᒃ ᐊᕿᒡᒋᐅᔮᖅᑑᖕᓂᒃ, ᐊᑭᒡᒋᐅᔮᖅᑑᖕᓂᒡᓗ ᒪᕐᕉᖕᓂᒃ ᖃᑯᖅᑕᐅᖏᑦᑑᖕᓂᒃ.
25ᑍᑦᓱᒪᓂ ᐊᖑᑎᑕᖃᓚᐅᖅᐳᖅ ᔨᕉᓴᓕᒻᒥ, ᓯᒥᐅᓂᒥᒃ ᐊᑎᓕᖕᒥᒃ, ᐃᓅᓯᖃᖅᑐᒥᒃ ᒎᑎᒧᑦ ᓈᒻᒪᒋᔭᐅᔪᒥᒃ ᑐᓂᓯᒪᑦᓯᐊᖅᑑᓪᓗᓂ, ᑖᓐᓇ ᐅᑕᖅᑭᓚᐅᖅᐳᖅ ᐃᓴᕆᐊᓕᒥᐅᑦ ᐱᐅᓕᔭᐅᕕᒃᓴᖓᓐᓂᒃ, ᐊᓂᕐᖕᓂᐅᑉ ᐃᑦᔪᕐᖕᓁᑦᑑᑉ ᓇᔪᖅᐹ. 26ᑖᓐᓇ ᓇᓗᔪᓐᓃᖅᑎᑕᐅᓚᐅᖅᐳᖅ ᐊᓂᕐᖕᓂᒃᑯᑦ ᐃᑦᔪᕐᖕᓁᑦᑐᒃᑯᑦ ᑐᖁᓂᐊᖏᓐᓂᕐᖕᒥᓂᒃ ᐊᑕᓂᐅᑉ ᙭ᔅᑑᓯᖓᓂᒃ ᑕᑯᓚᐅᖏᓐᓂᕐᖕᒥᓂ. 27ᐊᓂᕐᖕᓂᕐᖕᒧᑦ ᐃᑦᔪᕐᖕᓁᑦᑐᒧᑦ ᑕᓯᐅᖅᑕᐅᓪᓗᓂ ᑐᒃᓯᐊᕐᕕᒡᔪᐊᕐᖕᒧᐊᖅᐳᖅ; ᓄᑕᕋᑯᓗᒃ ᔩᓱᓯ ᐊᖓᔪᖅᑳᖏᖕᓂᑦ ᑐᒃᓯᐊᕐᕕᒡᔪᐊᒧᑦ ᐱᑎᑕᐅᑎᓪᓗᒍ, ᐱᖁᔭᑦ ᒪᓕᒃᑕᐅᔭᕆᐊᖃᕐᖕᓂᖏᑦ ᒪᓕᒡᓗᒋᑦ, 28ᓯᒥᐅᓂᐅᑉ ᓄᑕᕋᑯᓗᒃ ᑎᒍᕚ, ᒎᑎ ᓂᖅᑐᕐᓗᒍ ᐅᖃᖅᐳᖅ:
29“ᐊᑕᓃᖅ ᒫᓐᓇ ᐱᔩᑦ ᓮᒪᓂᕐᖕᒥ ᐊᖏᕐᕋᖅᑎᓕᕈᒃ,
ᐅᖃᐅᓯᕆᓚᐅᖅᑍᑦ ᒪᓕᒡᓗᒍ;
30ᐱᐅᓕᔨᒃᓴᐅᑎᑍᑦ ᓇᖕᒥᓂᖅ ᐃᔨᓐᓄᑦ ᑕᑯᒐᒃᑯ,
31ᑖᓐᓇ ᐅᐸᓗᖕᒊᕈᑎᒋᓯᒪᒐᕕᐅᒃ ᐃᓄᓕᒪᑦ ᖃᐅᔨᖁᓪᓗᒋᑦ,
32 #
ᐂᓮᐊᓯ 42:6; 49:6; 52:10. ᖃᐅᒪᔪᖅ ᖃᐅᒻᒪᒃᓮᖁᓪᓗᒍ ᔫᑎᐅᖏᑦᑐᓂᒃ,
ᐃᓄᖁᑎᕕᓪᓗ ᐃᓴᕆᐊᓕᒥᐅᑦ ᓂᖅᑐᕐᖕᓇᕈᑎᒃᓴᖓᑦ.”
33ᐊᑖᑕᖓᑕ ᐊᓈᓇᖓᑕᓗ ᓄᑕᕋᑯᓘᑉ ᑍᒫᒃ ᐅᖃᐅᑦᔭᐅᓂᖓ ᑲᒪᒋᒻᒪᕆᒃᐹᒃ; 34ᓯᒥᐅᓂᐅᑉ ᓮᒻᒪᖅᑎᑉᐰᑦ ᐊᓈᓇᖓᓄᑦ ᒥᐊᕆᒧᑦ ᐅᖃᕐᓗᓂ, “ᑕᑯᒋᑦ, ᐅᓇ ᓄᑕᕋᑯᓗᒃ ᐅᓄᖅᑐᓄᑦ ᐃᓴᕆᐊᓕᒥᐅᓄᑦ ᑲᑕᒍᑕᐅᔪᒫᖅᐳᖅ ᒪᑭᑦᔪᑕᐅᔪᒫᕐᓗᓂᓗ, ᓇᓗᓁᒃᑯᑕᐅᔪᒫᖅᐳᖅ ᐊᑭᕋᖅᑐᑕᐅᓗᓂ. 35ᐃᕝᕕᑦ ᒥᐊᕆ ᐆᒻᒪᑏᑦ ᑭᓪᓕᒃᑕᐅᔪᒫᖅᐳᖅ ᓴᕕᒡᔪᐊᑎᑐᑦ, ᐃᓄᐃᑦ ᐊᒥᓱᑦ ᐃᓱᒪᖏᑦ ᓴᖅᑭᑎᑦᓱᒫᖅᐰᑦ.”
36ᑕᕝᕙᓃᑦᑐᖃᓚᐅᕆᕗᖅ ᓇᓚᐅᑦᑍᔪᒥᒃ ᐊᕐᖕᓇᕐᖕᒥ ᐋᓇᒥᒃ ᐊᑎᓕᖕᒥᒃ, ᐸᓄᐃᓕᐅᑉ ᐸᓂᖓᓂᒃ, ᐋᓱᕆᐅᑉ ᑭᖑᕚᖏᓐᓄᑦ ᐃᓚᒋᔭᐅᔪᒥᒃ; ᑖᓐᓇ ᓂᖏᐅᖑᓕᓚᐅᖅᐳᖅ, ᓯᕗᓂᖓᒍᑦ ᐅᐃᖃᓚᐅᖅᑐᖅ ᐊᕐᕌᒍᓂᒃ 7ᓂᒃ, 37ᐅᐃᒡᒐᕐᖕᓂᐅᓕᖅᑐᖅ ᐊᕐᕌᒍᖃᓕᕐᓗᓂ 84ᓂᒃ.#2:37 ᐅᕝᕙᓘᓐᓃᑦ ᐅᐃᒡᒐᕐᖕᓂᐅᓕᖅᑐᖅ ᐊᕐᕌᒍᓂᒃ 84ᓂᒃ ᓇᓕᐊᓐᓂᑐᐃᓐᓇᖅ ᑐᑭᖃᖅᑐᖅ ᑖᓐᓇ ᖃᐅᑕᒫᑦ ᑐᒃᓯᐊᕐᕕᒡᔪᐊᕐᖕᒦᖃᑦᑕᓚᐅᖅᐳᖅ ᑐᒃᓯᐊᕐᓗᓂ ᓂᕆᑦᑍᓕᕙᒡᓗᓂᓗ. 38ᐃᑲᕐᕋᒥ ᑕᕝᕙᓂᑦᓮᓐᓇᖅ ᐃᑎᖅᐳᖅ ᒎᑎ ᓂᖅᑐᓕᕐᓗᒍ, ᓄᑕᕋᑯᓗᒃ ᐅᖃᐅᓯᕆᕚ ᐅᑕᖅᑭᔪᓕᒫᓄᑦ ᔨᕉᓴᓕᒻᒥᐅᓄᑦ ᐱᐅᓕᔭᐅᕕᒃᓴᐅᓂᖓᓂᒃ.
ᔫᓯᐱᒃᑯᑦ ᐅᑎᕐᖕᓂᖓᑦ ᓈᓴᕇᑎᒧᑦ
39 #
ᒫᑎᐅᓯ 2:23. ᐊᑕᓂᐅᑉ ᐱᖁᔭᖏᑎᒍᑦ ᐊᑐᕆᐊᖃᖅᑕᒥᖕᓂᒃ ᐱᔭᕆᕋᒥᒃ, ᐊᖏᕐᕋᒥᖕᓄᑦ ᐅᑎᖅᐳᒃ ᓈᓴᕇᑎᒧᑦ ᒐᓕᓕᐊᒦᑦᑐᒧᑦ. 40ᓄᑕᕋᑯᓗᒃ ᐱᕈᖅᐸᓪᓕᐊᓕᖅᐳᖅ ᓴᓐᖏᔫᓕᕐᓗᓂ, ᓯᓚᑐᔫᓕᕐᓗᓂᓗ; ᒎᑎᐅᑉ ᓮᒻᒪᓂᖓᑕ ᓇᔪᖅᐹ.
ᔩᓱᓯᐅᑉ ᓱᕈᓯᐅᓪᓗᓂ ᑐᒃᓯᐊᕐᕕᒡᔪᐊᕐᖕᒧᐊᕐᖕᓂᖓ
41 #
ᒨᓯᓯ ᐂᑉᐸᖏᑦ 12:1-27; ᒨᓯᓯ ᑕᓪᓕᒪᖏᑦ 16:1-8. ᐊᕐᕌᒍᑕᒫᑦ ᔩᓱᓯᐅᑉ ᐊᖓᔪᖅᑳᖏᒃ ᔨᕉᓴᓕᒻᒧᐊᖃᑦᑕᓚᐅᖅᐴᒃ ᓇᓪᓕᐅᓐᓂᖅᓯᐅᕆᐊᖅᑐᕐᓗᑎᒃ ᖄᖏᖅᑕᐅᕕᖕᒥᒃ. 42ᔩᓱᓯ 12ᓂᒃ ᐊᕐᕌᒍᖃᓕᖅᑎᓪᓗᒍ, ᐊᖓᔪᖅᑳᖏᒃᑕ ᐃᓚᒋᓪᓗᒍ ᔨᕉᓴᓕᒻᒧᐊᖅᐳᑦ ᓇᓪᓕᐅᓐᓂᖅᓯᐅᕆᐊᖅᑐᕐᓗᑎᒃ ᐃᓕᖅᑯᓯᕆᕙᒃᑕᒥᒃᑎᑐᑦ; 43ᓇᓪᓕᐅᓐᓂᖅᓯᐅᕐᕕᒃ ᐃᓱᓕᒻᒪᑦ, ᐅᑎᓕᓚᐅᖅᐳᑦ, ᔩᓱᓯᓕ ᔨᕉᓴᓕᒻᒥᑦ ᓅᓚᐅᓐᖏᓚᖅ. ᐊᖓᔪᖅᑳᖏᒃ ᖃᐅᔨᓚᐅᓐᖏᓛᒃ ᓅᓚᐅᖏᑦᑐᒥᒃ, 44ᐃᓱᒪᓚᐅᕐᖕᒪᑎᒃ ᐃᓚᒋᔭᒥᖕᓄᑦ ᐃᓚᐅᓇᓱᒋᓪᓗᒍ ᐅᓪᓗᓕᒫᖅ ᐱᓱᓚᐅᖅᐳᑦ, ᑭᖑᓂᖓᒍᑦ ᕿᓂᓕᖅᐹᒃ ᐃᓚᒥᖕᓂ ᐃᓚᓐᓇᕆᔭᒥᖕᓂᓗ; 45ᓇᓂᖏᓐᓇᒥᑦᔪᒃ, ᔨᕉᓴᓕᒻᒧᑦ ᐅᑎᖅᐳᒃ, ᕿᓂᕆᐊᕐᓗᒍ. 46ᐅᓪᓗᐃᑦ ᐱᖓᔪᖓᓐᓂ ᓇᓂᕚᒃ ᑐᒃᓯᐊᕐᕕᒡᔪᐊᕐᖕᒥ, ᔫᑎᑦ ᐃᓕᓮᔨᖏᓐᓂᑦ ᐃᒃᓯᕙᖃᑕᐅᔪᖅ, ᓈᓚᓚᐅᕐᓗᒋᑦ ᐊᐱᖅᓱᖃᑦᑕᖅᐰᑦ. 47ᑐᓵᔪᓕᒫᑦ ᑖᑦᓱᒥᖓ ᑲᒪᓂᐊᖅᐳᑦ ᖃᐅᔨᒪᓂᖓᓂᒃ ᑭᒡᒍᓯᖏᓐᓂᒡᓗ. 48ᐊᖓᔪᖅᑳᖏᒃᑕ ᑕᑯᒐᒥᑦᔪᒃ ᖁᐊᖅᓵᕈᑎᒋᕚᒃ; ᐊᓈᓇᖓᑕ ᐅᖃᐅᑎᕚ, “ᐃᕐᖕᓃᒃ, ᓱᖕᒪᑦ ᑍᒤᓕᐅᖅᐱᑎᒎᒃ? ᑕᑯᒋᑦ, ᐊᑖᑍᓪᓗ ᕿᓂᓚᐅᖅᐸᑦᑎᒋᑦ ᐱᖏᒐᒻᒪᕆᒃᓗᓄᒃ.”
49ᔩᓱᓯᐅᑉ ᑭᐅᕚ, “ᓱᖕᒪᑦ ᐅᕙᓐᓂᒃ ᕿᓂᖅᐱᓯᒃ? ᖃᐅᔨᒪᓐᖏᓚᓰᒃ ᐊᑖᑕᒪ ᐃᒡᓗᖓᓃᑦᓴᕆᐊᖃᕐᖕᓂᓐᓂᒃ?” 50ᐊᖓᔪᖅᑳᖏᒃ ᑐᑭᓯᓐᖏᓛᒃ ᑭᒡᒍᓯᕆᔭᖏᓐᓂᒃ.
51ᔩᓱᓯᐅᑉ ᐊᖓᔪᖅᑳᖕᓂ ᐊᖏᕐᕋᐅᖃᑎᒋᓕᖅᐹᒃ ᓈᓴᕇᑎᒧᑦ, ᓈᓚᑦᓯᐊᕐᓗᒋᒃ; ᐊᓈᓇᖓᑕᓕ ᑕᒪᒃᑯᐊ ᐅᖃᐅᓯᓕᒫᖏᑦ ᐃᓱᒪᒥᐅᑕᕆᓕᖅᐰᑦ. 52#ᓴᒧᐃᓕ ᓯᕗᓪᓖᑦ 2:26; ᓲᓗᒨᓂ 3:4.ᔩᓱᓯ ᐱᕈᖅᐸᓪᓕᐊᓚᐅᖅᐳᖅ ᑎᒥᒥᒍᑦ ᓯᓚᑐᓕᖅᐸᓪᓕᐊᓪᓗᓂ, ᖁᕕᐊᒋᔭᐅᓪᓗᓂᓗ ᒎᑎᒧᑦ ᐃᓄᖕᓄᓪᓗ.
Currently Selected:
ᓘᑲᓯᐅᑉ ᐊᒡᓚᖏᑦ 2: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.