ᒨᓯᓯ ᐱᖓᔪᖏᑦ 27
27
ᐱᖁᔧᑦ ᐊᑕᓂᕐᖕᒧᑦ ᑐᓂᕐᕈᑏᑦ ᐱᓪᓗᒋᑦ
1ᐊᑕᓂᐅᑉ ᒨᓯᓯ ᐅᖃᐅᑎᕚ, 2“ᐃᓴᕆᐊᓕᒥᐅᑦ ᐅᖃᐅᑎᒃᑭᑦ, ᐃᓄᒃ ᐊᖏᕈᑎᒋᔭᒥᓂᒃ ᑐᓂᕐᕈᓯᖅᐸᑦ ᐊᑕᓂᕐᖕᒧᑦ ᐃᓄᒃ ᑐᓂᔭᐅᓯᒪᑎᓪᓗᒍ, ᐃᓄᒃ ᐊᑭᓕᖅᑕᐅᔪᖅ ᕿᓚᕈᑦᔮᖅᑕᐅᔭᕆᐊᖃᖅᐳᖅ ᐊᑭᓪᓗᐊᖓᓂᒃ ᑮᓇᐅᔭᓂᒃ ᐊᑭᓕᖅᓗᒍ. 3ᐊᖑᑦ ᐊᕐᕌᒍᖃᖅᑐᖅ 20ᒥᑦ 60ᒧᑦ ᐊᑭᖃᕆᐊᖃᖅᐳᖅ ᑮᓇᐅᔭᓂᒃ 50ᓂᒃ ᓯᐅᓪᕕᕆᓂᒃ, ᐃᑦᔪᕐᖕᓁᑦᑐᕕᐅᑉ ᑮᓇᐅᔭᖏᑦ ᒪᓕᒡᓗᒋᑦ. 4ᐊᕐᖕᓇᕐᓕ ᐊᑭᖃᕆᐊᖃᖅᐳᖅ, ᑮᓇᐅᔭᓂᒃ 30ᓂᒃ ᓯᐅᓪᕕᕆᓂᒃ. 5ᐃᓅᓱᒃᑐᖅ ᐊᕐᕌᒍᓕᒃ 5ᒥᑦ 20ᒧᑦ, ᑮᓇᐅᔭᓂᒃ 20ᓂᒃ ᓯᐅᓪᕕᕆᓂᒃ, ᑍᒫᓪᓗᐊᖅ ᐊᕐᕌᒍᓕᒃ ᐊᕐᖕᓇᖅ ᐊᑭᖃᕆᐊᖃᖅᐳᖅ 10ᓂᒃ ᑮᓇᐅᔭᓂᒃ ᓯᐅᓪᕕᕆᓂᒃ. 6ᐊᖑᑦ ᑕᖅᑭᓕᒃ ᐊᑕᐅᓯᕐᖕᒥᒃ ᑕᓪᓕᒪᓂᒃ ᐊᕐᕌᒍᓕᒧᑦ ᑎᑭᓪᓗᒍ ᐊᑭᖃᕆᐊᖃᖅᐳᖅ ᑕᓪᓕᒪᓂᒃ ᑮᓇᐅᔭᓂᒃ ᓯᐅᓪᕕᕆᓂᒃ, ᐊᕐᖕᓇᖅ ᑍᒫᓪᓗᐊᖅ ᐊᕐᕌᒍᓕᒃ ᐊᑭᖃᕆᐊᖃᖅᐳᖅ ᑮᓇᐅᔭᓂᒃ ᐱᖓᓱᓂᒃ ᓯᐅᓪᕕᕆᓂᒃ. 7ᐃᓄᒃ ᐊᕐᕌᒍᖃᖅᐸᑦ 60ᓂᒃ ᐅᖓᑖᓄᓪᓗ, ᐊᖑᑕᐅᒃᐸᑦ ᐊᑭᖃᕆᐊᖃᖅᐳᖅ ᑮᓇᐅᔭᓂᒃ 15ᓂᒃ ᓯᐅᓪᕕᕆᓂᒃ, ᐊᕐᖕᓇᐅᒃᐸᓪᓕ ᑍᒫᓪᓗᐊᖅ ᐊᕐᕌᒍᓕᒃ ᐊᑭᖃᕆᐊᖃᖅᐳᖅ ᑮᓇᐅᔭᓂᒃ 10ᓂᒃ ᓯᐅᓪᕕᕆᓂᒃ.
8“ᓇᓪᓕᐊᑦ ᐊᖏᕈᑎᖃᕋᓱᐊᖅᑐᖅ ᐊᔪᖅᓴᓗᐊᖅᐸᑦ, ᐃᓅᓪᓗ ᐊᑭᒋᔭᕆᐊᖃᖅᑕᖓᓂᒃ ᐊᑭᓖᔪᓐᓇᕋᓂ, ᐃᓄᒃ ᐊᑭᓕᕈᒪᔭᓂ ᑐᓂᕐᕈᓯᖅᑎᑦᓯᔨᒧᑦ ᐱᑎᑕᒃᓴᕆᕚ, ᑐᓂᕐᕈᓯᖅᑎᑦᓯᔨ ᐊᑭᖓᓂᒃ ᐋᖅᑭᒃᓯᒐᔭᕐᖕᒪᑦ ᑖᑦᓱᒪ ᐊᑭᓕᕈᓐᓇᖅᑕᖓᓂᒃ.
9“ᐃᓅᑉ ᐊᖏᕈᑎᒋᔭᖓ ᓂᕐᔪᑎᐅᒃᐸᑦ, ᑐᓂᕐᕈᑎᒃᓴᐅᓗᓂ ᓈᒻᒪᑦᓯᐊᖅᓗᓂ ᐊᑕᓂᕐᖕᒧᑦ, ᑍᒤᑦᑐᖅ ᐃᑦᔪᕐᖕᓁᓕᕗᖅ ᐊᑕᓂᕐᖕᒧᑦ. 10ᑕᕝᕙ ᑕᐅᖅᓰᑎᑦᓴᕆᐊᖃᕈᓐᓃᖅᐹ ᐊᓯᐊᓂᒡᓘᓐᓃᑦ ᑭᖑᕝᕕᕆᐊᖃᕐᖕᓇᒍ ᐱᐅᓂᖅᓴᒥᒃ ᐱᐅᖏᓐᓂᖅᓴᒥᒡᓘᓐᓂᑦ ᐱᖔᕈᒪᓗᓂ, ᑕᐅᖅᓰᑦᔪᑎᒋᒍᓂᐅᒃ ᓂᕐᔪᑎᒧᑦ ᐊᓯᐊᓄᑦ ᓂᕐᔪᑏᒃ ᑕᕝᕙ ᑕᒪᖏᒃ ᐃᑦᔪᕐᖕᓁᓕᕘᒃ. 11ᐊᖏᕈᑎᒋᔭᐅᔪᖅ ᐆᒪᔪᖅ ᑐᓂᕐᕈᑎᒋᔭᐅᓂᕐᖕᒧᑦ ᓴᓗᒤᑦᑑᒃᐸᑦ, ᐊᑕᓂᕐᖕᒧᓪᓗ ᑐᓂᕐᕈᑕᐅᓇᓱᐊᖅᓗᓂ ᐃᓚᓕᐅᖅᑕᐅᒐᔭᖏᑉᐸᑦ, ᓂᕐᔪᑎ ᐋᑕᐅᔭᕆᐊᖃᖅᐳᖅ ᑐᓂᕐᕈᓯᖅᑎᑦᓯᔨᒧᑦ, 12ᑐᓂᕐᕈᓯᖅᑎᑦᓯᔨᐅᑉ ᖃᐅᔨᓴᖅᓗᓂᐅᒃ ᐅᖃᕆᐊᖃᖅᐳᖅ ᑐᓂᕐᕈᑎᒋᔭᐅᔪᓐᓇᕐᖕᒪᖔᑦ ᑐᓂᕐᕈᑎᒃᓴᐅᖏᒻᒪᖔᓪᓘᓐᓃᑦ, ᑐᓂᕐᕈᓯᖅᑎᑦᓯᔨ ᖃᓄᖅ ᐅᖃᖅᐸᑦ ᑕᕝᕙ ᑍᒤᑦᓴᕆᐊᖃᖅᐳᖅ. 13ᓂᕐᔪᑎᐅᑉ ᐃᓄᐊ ᐅᑎᖅᑎᑦᓯᔪᒪᒃᐸᑦ ᑖᑦᓱᒥᖓ, ᐊᑭᓖᔭᕆᐊᖃᖅᐳᖅ ᐊᑭᖓᑕ 20ᐳᓴᖓᓂᒃ.
14“ᓇᓪᓕᐊᑦ ᐃᒡᓗᒥᓂᒃ ᑐᓂᓯᔪᒪᒃᐸᑦ ᐊᑕᓂᕐᖕᒧᑦ, ᑐᓂᕐᕈᓯᖅᑎᑦᓯᔨ ᖃᐅᔨᓴᕆᐊᖃᖅᐳᖅ ᐃᒡᓗ ᐱᐅᖕᒪᖔᑦ ᐱᐅᖏᒻᒪᖔᓪᓘᓐᓃᑦ, ᑐᓂᕐᕈᓯᖅᑎᑦᓯᔨ ᑕᕝᕙ ᐊᑭᖓᓂᒃ ᐋᖅᑭᒃᓯᔭᕆᐊᖃᕋᔭᖅᐳᖅ, ᐊᑭᖃᖅᑎᑕᖓᑐᓪᓗ ᑍᒤᓕᖅᓗᓂ. 15ᓇᓪᓕᐊᓪᓕ ᐃᒡᓗᒥᓂᒃ ᑐᓂᕐᕈᑎᖃᓚᐅᖅᓗᓂ, ᐅᑎᖅᑎᑦᓯᔪᒪᒃᐸᑦ 20ᐳᓴᖓᓂᒃ ᐊᑭᓕᒃᑲᓐᓂᖅᓗᓂᐅᒃ ᐅᑎᖅᑎᑦᓱᓐᓇᖅᐹ ᓇᖕᒥᓂᕆᓕᕐᖕᒥᓗᓂᐅᒃ.
16“ᐃᓄᒃ ᓄᓇᖁᑎᒥ ᐃᓚᖓᓂᒃ ᑐᓂᕐᕈᑎᖃᖅᐸᑦ ᐊᑕᓂᕐᖕᒧᑦ, ᐊᑭᖓ ᐋᖅᑭᒃᑕᐅᔭᕆᐊᖃᖅᐳᖅ ᖃᓄᖅ ᐊᖏᑎᒋᔪᓂᒃ ᐱᕈᖅᓰᕕᐅᔪᓐᓇᕐᖕᒪᖔᑦ, ᖁᓕᓂᒃ ᑮᓇᐅᔭᓂᒃ ᓯᐅᓪᕕᕆᓂᒃ 20ᑭᓗᒍᕌᒻᒥᒃ ᐅᖁᒤᓐᓂᓕᒃ ᓂᐊᖂᔭᒃᓴᖅ ᒪᓕᒡᓗᒍ. 17ᓄᓇᖁᑎᒋᔭᐅᔪᖅ ᑐᓂᕐᕈᑎᒋᔭᐅᒃᐸᑦ ᐊᕐᕌᒍ ᓴᑐᖅᓯᕕᒃ ᓇᓪᓕᐅᑎᓚᐅᖅᑎᓪᓗᒍ, ᐊᑭᒋᓚᐅᖅᑕᖓ ᑍᒫᒃ ᓱᓕ ᓱᖁᓯᕋᔭᓐᖏᓚᖅ. 18ᓄᓇ ᑐᓂᕐᕈᑎᒋᔭᐅᒃᐸᑦ ᐊᕐᕌᒎᑉ ᓴᑐᖅᓯᕕᐅᑉ ᑭᖑᓂᖓᓂ, ᑐᓂᕐᕈᓯᖅᑎᑦᓯᔨᐅᑉ ᐊᑭᖓ ᐋᖅᑭᖅᑳᕋᔭᖅᐹ ᐊᕐᕌᒍᑦ ᐅᓄᕐᖕᓂᖏᑦ ᓴᑐᖅᓯᕕᖕᒧᑦ ᑎᑭᓪᓗᒋᑦ, ᐊᕐᕌᒍᑦ ᑖᒃᑯᐊ ᒪᓕᒡᓗᒋᑦ ᐊᑭᖃᓕᕋᔭᖅᐳᖅ. 19ᑐᓂᕐᕈᓯᖅᑐᕕᓂᐅᓪᓕ ᓄᓇ ᐅᑎᖅᑎᑦᓱᒪᓕᕈᓂᐅᒃ, ᐊᑭᓪᓗᐊᖓᓂᒃ ᐊᒻᒪᓗ 20ᐳᓴᓐᒥᒃ ᐃᓚᓗᒍ ᓂᐅᕕᐊᕆᒃᑲᓐᓂᕈᓐᓇᖅᐹ ᓇᖕᒥᓂᕆᓕᕐᖕᒥᓗᓂᐅᒡᓗ. 20ᐱᖃᖅᑐᕕᓂᐅᑉ ᓄᓇ ᐅᑎᖅᑎᖏᑉᐸᒍ, ᐅᕝᕙᓘᓐᓃᑦ ᐊᓯᐊᓄᑦ ᓂᐅᕕᐊᕆᔭᐅᒃᐸᑦ, ᐱᖃᖅᑐᕕᓂᐅᑉ ᓴᑐᕈᓐᓁᓪᓕᒐᔭᖅᐹ. 21ᓄᓇ ᑍᒫᒃ ᑐᓂᕐᕈᑎᕕᓂᖅ ᓴᑐᖅᑕᐅᓯᒪᖏᑦᑐᖅ ᐊᕐᕌᒍ ᓴᑐᖅᓯᕕᒃ ᓇᓪᓕᐅᑎᒃᐸᑦ, ᓄᓇ ᑖᓐᓇ ᐃᑦᔪᕐᖕᓁᑦᑑᓕᖅᐳᖅ, ᐊᑕᓂᕐᖕᒧᓪᓗ ᑐᕌᓕᖅᓗᓂ; ᑐᓂᕐᕈᓯᖅᑎᑦᓯᔨᓂᑦ ᐱᒋᔭᐅᔭᕆᐊᖃᓕᖅᐳᖅ.
22“ᐃᓄᒃ ᓄᓇᒥᒃ ᐱᕈᖅᓰᕕᖕᒥᒃ ᓂᐅᕕᐊᕆᕋᑖᖅᑕᒥᓂᒃ ᑐᓂᕐᕈᓯᖅᐸᑦ ᐊᑕᓂᕐᖕᒧᑦ, ᐃᓚᒋᔭᖏᑕ ᓄᓇᖁᑎᖓᑕ ᐊᓯᐊᒍᑦ, 23ᑐᓂᕐᕈᓯᖅᑎᑦᓯᔨᐅᑉ ᐊᑭᖓ ᐋᖅᑭᒋᐊᖃᖅᐹ ᐊᕐᕌᒍ ᓴᑐᖅᓯᕕᒃ ᑎᑭᓪᓗᒍ, ᐃᓄᒃ ᑖᓐᓇ ᐊᑭᓖᔭᕆᐊᖃᖅᐳᖅ ᐅᓪᓗᒥ ᑕᕝᕙᓂ ᓄᓇᐅᑉ ᐊᑭᓪᓗᐊᖓᓂᒃ, ᑮᓇᐅᔭᓪᓗ ᐊᑕᓂᐅᑉ ᐱᖁᑎᒋᕔᑦ. 24ᐊᕐᕌᒍ ᓴᑐᖅᓯᕕᒃ ᓇᓪᓕᐅᑎᒃᐸᑦ, ᓄᓇ ᐱᕈᖅᓰᕕᒃ ᐅᑎᖅᑎᑕᐅᔭᕆᐊᖃᓕᖅᐳᖅ ᐱᖃᖅᑳᖅᑐᕕᓂᕐᖕᒧᑦ, ᑭᖑᕚᖓᓄᓪᓘᓐᓂᑦ.
25“ᑮᓇᐅᔧᑦ ᒪᓕᒋᐊᖃᖅᐳᑦ ᐃᑦᔪᕐᖕᓁᑦᑐᕕᐅᑉ ᑮᓇᐅᔭᖓ ᒪᓕᒡᓗᒍ.
26“ᓂᕐᔪᑎᐅᑉ ᕿᑐᕐᖓᖅᑖᕆᐅᕈᑎᖓ, ᐃᑦᔪᕐᖕᓁᓕᑎᑕᐅᔪᓐᓇᓐᖏᓚᖅ, ᕿᑐᕐᖓᖅᑖᕐᖓᐅᑎᑦ ᐊᑕᓂᐅᑉ ᐱᒋᔭᕇᕐᖕᒪᒍ, ᐃᒻᒧᒃᓯᐅᒐᖅᓘᓐᓃᑦ ᓰᐱᐅᒃᐸᓪᓘᓐᓃᑦ. 27ᓂᕐᔪᑎ ᓴᓗᒤᑦᑑᒃᐸᑦ ᐃᓄᐊᑕ ᐅᑎᖅᑎᑦᓱᓐᓇᖅᐹ ᐊᑭᒋᖁᔭᐅᓯᒪᔪᒥᒃ ᐊᑭᖃᖅᓗᓂ ᐃᓚᓗᒍᓗ 20ᐳᓴᓐᒥᒃ, ᐃᓄᐊᑕ ᐅᑎᖅᑎᑦᓱᒪᖏᑉᐸᒍ, ᓂᐅᕕᐊᖑᔪᓐᓇᖅᐳᖅ ᐊᑭᒋᖁᔭᐅᓯᒪᔪᒥᒃ ᐊᑭᖃᖅᓗᓂ.
28 #
ᒨᓯᓯ ᓯᑕᒪᖏᑦ 18:14. “ᐃᓄᒃ ᐱᖁᑎᒥᓂᒃ ᑐᓂᕐᕈᑎᖃᖅᐸ ᐊᑕᓂᕐᖕᒧᑦ, ᐃᓄᖕᒥᒡᓘᓐᓃᑦ ᓂᕐᔪᑎᒥᒡᓘᓐᓃᑦ, ᓄᓇᒥᒡᓘᓐᓃᑦ, ᑕᒪᒃᑯᐊ ᓂᐅᕕᐊᖑᔪᓐᓇᓐᖏᓚᑦ ᐅᑎᖅᑎᑕᐅᔪᓐᓇᕋᑎᒡᓗ, ᑍᒤᑦᑐᑦ ᐃᑦᔪᕐᖕᓁᑦᑑᓕᖃᑦᑕᕐᖕᒪᑕ ᐊᑕᓂᐅᑉ ᐱᒋᓕᕐᖕᒪᒋᑦ. 29ᐃᓄᒃ ᐊᑕᓂᕐᖕᒧᑦ ᓱᓕᑦᓯᐊᖅᓗᓂ ᑐᓂᕐᕈᑎᒋᔭᐅᔪᖅ ᐅᑎᖅᑎᑕᐅᔪᓐᓇᓐᖏᓚᖅ, ᑖᓐᓇ ᑐᖁᑕᐅᔭᕆᐊᖃᖅᐳᖅ.
30 #
ᒨᓯᓯ ᓯᑕᒪᖏᑦ 18:21; ᒨᓯᓯ ᑕᓪᓕᒪᖏᑦ 14:22-29. “ᓱᓇᑐᐃᓐᓁᑦ ᓄᓇᒥᑦ ᐱᕈᖅᑐᑦ, ᓂᐊᖂᔭᒃᓮᑦ ᓱᓇᑐᐃᓐᓁᑦ, ᐸᐅᕐᖎᓪᓗ ᓇᐹᖅᑐᓂᑦ ᐱᔪᑦ ᑕᓪᓕᒪᐅᔪᖏᑦ ᐊᑕᓂᐅᑉ ᐱᒋᕔᑦ, ᑕᒪᒃᑯᐊ ᐃᑦᔪᕐᖕᓁᑦᑑᕘᑦ ᐊᑕᓂᕐᖕᒧᑦ. 31ᐃᓄᒃ ᑕᓪᓕᒪᐅᔪᐃᕈᑎᒥᓂᒃ ᐅᑎᖅᑎᑦᓯᔪᒪᒃᐸᑦ ᐊᑭᒋᖁᔭᐅᓯᒪᔪᖅ ᒪᓕᒡᓗᒍ ᐊᑭᖃᕆᐊᖃᖅᐳᑦ ᐃᓚᒃᑲᓐᓂᖅᓗᒍᓗ 20ᐳᓴᓐᖓᓂᒃ. 32ᓂᕐᔪᑎᑦ ᐆᒪᔪᑎᖁᑎᒋᔭᐅᔪᑦ ᓱᓇᑐᐃᓐᓇᐅᒃᐸᑕ ᑕᓪᓕᒪᐅᔪᖏᑦ ᐊᑕᓂᐅᑉ ᐱᒋᕔᑦ. ᓂᕐᔪᑎᑦ ᓈᓴᖅᑕᐅᒃᐸᑕ ᖁᓕᐅᓕᕌᖓᑕ ᐊᑕᐅᓯᖅ ᐃᑦᔪᕐᖕᓁᑦᑑᓪᓗᓂ ᐊᑕᓂᐅᑉ ᐱᒋᕚ. 33ᓂᕐᔪᑎᖁᑎᖃᖅᑐᖅ ᐱᐅᓂᖅᓴᒥᒃ ᐱᐅᖏᓐᓂᖅᓴᒥᒡᓘᓐᓃᑦ ᓂᕈᐊᖅᑐᒃᓴᐅᓐᖏᓚᖅ ᐊᑕᓂᕐᖕᒧᑦ ᑐᓂᕐᕈᑎᒃᓴᒥᒃ ᑕᐅᖅᓯᐅᑦᔨᒃᐸᓪᓕ, ᑕᒪᖏᒃ ᓂᕐᔪᑏᒃ ᐃᑦᔪᕐᖕᓁᑦᑑᓕᖅᐴᒃ ᐅᑎᖅᑎᑕᐅᔭᕆᐊᖃᕈᓐᓁᖅᓗᑎᒡᓗ.”
34ᑕᒪᒃᑯᐊ ᑕᕝᕙ ᐱᖁᔧᑦ ᐊᑕᓂᐅᑉ ᒨᓯᓯᒧᑦ ᑐᓂᓚᐅᖅᑕᖏᑦ ᖃᖅᑲᒥ ᓮᓁᒥ ᐃᓴᕆᐊᓕᓄᑦ ᐃᓕᖓᖁᓪᓗᒋᑦ.
Currently Selected:
ᒨᓯᓯ ᐱᖓᔪᖏᑦ 27: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.