ᐃᓗᐊᖅᓮᔩᑦ ᐊᒡᓚᖏᑦ 20
20
ᐃᓴᕆᐊᓕᒥᐅᑦ ᐅᓇᑕᕆᐊᕐᖕᓂᖏᑦ
1ᐃᓄᓕᒫᑦ ᐃᓴᕆᐊᓕᒥᐅᑦ ᐊᐅᓪᓚᖅᐳᑦ, ᓄᓇᒥᑦ ᑖᓐᒥᑦ ᐱᒋᐊᖅᓗᑎᒃ ᐱᐊᕐᓯᐸ ᑎᑭᓪᓗᒍ ᒋᓕᐊᑎᓪᓗ ᓄᓇᖓᓂᑦ, ᐃᓄᒋᐊᒃᑐᕐᔪᐊᓪᓗ ᑲᑎᓚᐅᖅᐳᑦ ᐊᑕᓂᐅᑉ ᓵᖓᓂ, ᒥᔅᐸᒥ. 2ᐃᓴᕆᐊᓕᐅᑉ ᑭᖑᕚᖏᑕ ᓯᕗᓕᖅᑎᓕᒫᖏᑦ ᐃᓚᐅᕗᑦ, ᒎᑎᐅᑉ ᐃᓄᖁᑎᖏᑦ ᑲᑎᒪᑎᓪᓗᒋᑦ, ᑕᕝᕙᓂᓗ 400,000ᐃᑦ ᐱᓱᒃᑏᑦ ᐅᓇᑕᖅᑐᒃᓮᑦ ᓴᕕᒡᔪᐊᖃᖅᑐᑦ ᑕᕝᕙᓃᓪᓗᑎᒃ. 3ᑍᒤᑎᓪᓗᒋᑦ ᐱᓐᔭᒥᓂᐅᑉ ᑭᖑᕚᖏᑦ ᑐᓴᕋᒥᒃ ᐃᓴᕆᐊᓕᒥᐅᑦ ᑲᑎᓐᓂᖏᓐᓂᒃ ᒥᔅᐸᒥ.
ᐃᓴᕆᐊᓕᒥᐅᑦ ᐊᐱᕆᓚᐅᖅᐳᑦ, “ᐅᖃᐅᑎᑎᒍᑦ, ᖃᓄᖅ ᑕᒪᓐᓇ ᐱᐅᖏᑦᑐᓕᓂᖅ ᐱᓚᐅᖅᐹ?” 4ᑍᓐᓇ ᓕᕔᑎ ᐊᕐᖕᓇᐅᑉ ᑐᖁᑕᐅᓚᐅᖅᑑᑉ ᐅᐃᖓ ᑭᐅᓕᖅᐳᖅ, “ᒋᐱᐊᒨᓚᐅᖅᐳᒍᑦ ᐱᓐᔭᒥᓂᐅᑉ ᓄᓇᖁᑎᖓᓄᑦ ᓄᓕᐊᒃᑲᓐᓂᕋᓗ ᓯᓂᒃᑕᕆᐊᖅᓗᓄᒃ. 5ᒋᐱᐊᒥᐅᑦ ᐊᖑᑎᖏᑦ ᕾᓚᐅᖅᐳᑦ ᐅᕙᓐᓂᒃ ᐂᓯᖅᓗᑎᒃ, ᐃᒡᓗᓗ ᐊᕙᑕᖏᖅᓗᒍ. ᐅᕙᓐᓂᒃ ᑐᖁᑦᓯᔪᒪᓚᐅᖅᐳᑦ; ᓄᓕᐊᒃᑲᓐᓂᕋᓕ ᖁᓄᔪᕐᖕᓂᐊᖅᑕᐅᓚᐅᖅᐳᖅ, ᑐᖁᑕᐅᓪᓗᓂᓗ. 6ᑎᒥᖓ ᐱᓚᐅᖅᐸᕋ ᐊᒡᒍᖅᓗᒍ, ᐂᑦᑐᖅᑑᑎᒋᓚᐅᖅᐸᕋᓗ ᐃᓴᕆᐊᓕᒥᐅᑦ ᑭᖑᕚᖏᓐᓄ 12ᓄᑦ; ᑖᒃᑯᐊ ᐃᓄᐃᑦ ᐱᐅᖏᑦᑐᒻᒪᕆᐊᓗᖕᒥᒃ ᐱᓇᓱᐊᕐᖕᒪᑕ ᐊᑐᕆᐊᖃᖏᒻᒪᕆᒃᑐᒥᒃ ᐊᑯᓐᓇᑦᑎᓐᓂ. 7ᑕᑯᒋᑦ ᐃᓅᖃᑎᒌᖑᔪᓯ ᐃᓴᕆᐊᓕᒥᐅᖑᓪᓗᓯ ᐃᓘᓐᓇᓯ, ᐃᓱᒪᓕᐅᖃᑎᒌᓕᕆᑦᓯ ᑲᑎᒪᓗᓯ.”
8ᐃᓄᓕᒫᑦ ᓂᑯᕕᓚᐅᖅᐳᑦ ᐅᖃᖅᓗᑎᒡᓗ, “ᓇᓕᖅᐳᑦ ᑐᐱᕐᖕᒥᓄᑦ ᐅᑎᕐᖕᓂᐊᓐᖏᓚᖅ, ᐃᒡᓗᒥᓄᓪᓘᓐᓃᑦ ᐊᖏᕐᕋᕐᖕᓂᐊᓐᖏᓚᖅ. 9ᐃᒫᒃ ᐱᓇᓱᐊᕐᖕᓂᐊᖅᐳᒍᑦ ᒋᐱᐊᒥᐅᓄᑦ: ᓇᓚᐅᑦᑖᕈᑎᒃᑯᑦ ᓂᕈᐊᕐᖕᓂᐅᖅᐳᒍᑦ ᐊᖑᑎᓂᒃ ᐅᓇᑕᕆᐊᖁᓗᒋᑦ ᒋᐱᐊᒥᒃ. 10ᐃᓚᖏᑦ 100ᐃᑦ ᑕᓪᓕᒪᐅᔪᖅᑐᖏᑦ ᐃᓴᕆᐊᓕᒥᐅᑦ ᑭᖑᕚᓕᒫᖏᓐᓂᑦ, 100ᐃᓪᓗ 1,000ᓂᑦ, 1,000ᓗ 10,000ᓂᑦ ᓂᕈᐊᕐᖕᓂᐊᖅᐸᕗᑦ ᓂᕿᖃᖅᑎᑦᓯᓂᐊᖅᐳᑦ ᐅᓇᑕᖅᑐᒃᓴᓂᒃ, ᐊᓯᖏᓪᓗ ᓱᒋᐊᕆᐊᖅᑐᕐᖕᓂᐊᖅᐳᑦ ᒋᐱᐊᒥᒃ ᐱᓐᔭᒥᓂᐅᑉ ᑭᖑᕚᖏᓐᓂᒃ; ᐱᐅᖏᑦᑐᒥᒃ ᐱᓂᐊᕐᖕᓂᕆᓚᐅᖅᑕᖏᑦ ᐱᓪᓗᒋᑦ ᐃᓴᕆᐊᓕᐅᑦ ᐃᓗᐊᓂ.” 11ᑍᒤᒻᒪᑦ ᐃᓴᕆᐊᓕᒥᐅᓕᒫᑦ ᑲᑎᓚᐅᖅᐳᑦ ᐊᑕᐅᓯᕐᖕᒥᒃ ᐱᑦᔪᑎᖃᖅᓗᑎᒃ ᐅᓇᑕᕆᐊᕈᒪᓪᓗᑎᒃ ᓄᓇᓕᖕᒥᒃ.
12ᐃᓴᕆᐊᓕᒥᐅᑦ ᑭᖑᕚᖏᑦ ᑎᓕᓯᓚᐅᖅᐳᑦ ᐊᖑᑎᓂᒃ, ᐱᓐᔭᒥᓂᐅᑉ ᑭᖑᕚᖏᑕ ᓄᓇᖁᑎᖓᓃᑦᑐᓕᒫᓄᑦ, ᐃᒫᒃ ᐅᖃᐅᑎᓪᓗᒋᑦ, “ᓱᓇᒦᒃ ᐱᐅᖏᑦᑐᒥᒃ ᐊᑯᓐᓇᑦᓯᓐᓂ ᐱᔪᖃᓚᐅᖅᐸ? 13ᑍᒃᑯᐊ ᐃᓄᐃᑦ ᒋᐱᐊᒥ ᕾᓚᐅᖅᓯᐅᒃ, ᐱᐅᖏᑦᑐᐊᓗᖕᒥᒃ ᐱᓂᐊᕐᖕᓂᖃᖅᑐᕕᓃᑦ, ᑐᖁᓐᓂᐊᕋᑦᑎᒍ, ᐱᐅᖏᑦᑐᕐᓗ ᐲᕐᖕᓂᐊᕋᑦᑎᒍ ᐃᓴᕆᐊᓕᒥᑦ.” ᐱᓐᔭᒥᓂᐅᓪᓕ ᑭᖑᕚᖏᑦ ᓈᓚᓚᐅᓐᖏᓚᑦ, ᖃᑕᓐᖑᑎᒥᖕᓂᒃ ᐃᓴᕆᐊᓕᒥᐅᑦ ᐃᓄᖏᓐᓂᒃ. 14ᐱᓐᔭᒥᓂᐅᑉ ᑭᖑᕚᖏᑦ ᐃᒡᓗᒐᓴᓕᒫᖏᓐᓂᑦ ᐱᔪᑦ ᑲᑎᓚᐅᖅᐳᑦ ᒋᐱᐊᒥ ᐅᓇᑕᕆᐊᖅᓗᑎᒃ ᐃᓴᕆᐊᓕᒥᐅᓂᒃ. 15ᐱᓐᔭᒥᓂᐅᑉ ᑭᖑᕚᖏᑦ ᕾᖁᔨᓚᐅᖅᐳᑦ 26,000ᓂᒃ ᐅᓇᑕᖅᑐᒃᓴᓂᒃ ᓴᕕᒡᔪᐊᖃᖅᑐᓂᒃ, ᐃᒡᓗᒐᓴᓕᒫᒥᖕᓂᑦ, ᐅᓪᓗᒥ ᑍᑦᓱᒪᓂ ᐊᓯᐊᒍᓪᓗ ᒋᐱᐊᒥᐅᓂᒃ, ᕾᖁᔨᓚᐅᕆᕗᑦ 700ᓂᒃ ᓂᕈᐊᖅᑕᒥᖕᓂᒃ. 16ᑖᒃᑯᐊ 700 ᓂᕈᐊᖅᑕᐅᔪᓕᒫᑦ ᓴᐅᒥᐅᓚᐅᖅᐳᑦ; ᐃᓪᓘᕆᐊᕈᓐᓇᖅᑐᑦ ᓄᔭᕐᖕᒥᒃ ᐅᔭᕋᖕᒧᑦ ᓴᓂᖅᑯᖏᓪᓗᒍ. 17ᐱᓐᔭᒥᓂᐅᑉ ᑭᖑᕚᖏᑦ ᐃᓚᐅᑎᓐᓇᒋᑦ, ᐃᓴᕆᐊᓕᒥᐅᑦ ᕾᖁᔨᓚᐅᖅᐳᑦ 400,000ᓂᒃ ᐅᓇᑕᖅᑐᒃᓴᓂᒃ ᓴᕕᒡᔪᐊᖃᖅᑐᓂᒃ; ᐃᓕᓐᓂᐊᖅᓯᒪᔪᓂᒃ ᐅᓇᑕᕐᖕᓂᕐᖕᒥᒃ.
ᐅᓇᑕᕐᖕᓃᑦ ᐱᓐᔭᒥᓂᐅᑉ ᑭᖑᕚᖏᓐᓂᒃ
18ᐃᓴᕆᐊᓕᒥᐅᑦ ᑐᒃᓯᐊᕆᐊᖅᑐᓚᐅᖅᐳᑦ ᐱᑎᓕᒧᑦ, ᑍᑲᓂᓗ ᒎᑎ ᐊᐱᖅᓱᖅᐹᑦ, “ᓇᓪᓕᕗᑦ ᑭᖑᕚᖑᖃᑎᒌᓂᑦ ᓯᕗᓪᓕᖅᐸᐅᓗᑎᒃ ᐅᓇᑕᕆᐊᖅᑐᒃᓴᐅᕚᑦ ᐱᓐᔭᒥᓂᐅᑉ ᑭᖑᕚᖏᓐᓂᒃ?”
ᐊᑕᓂᐅᑉ ᑭᐅᕔᑦ, “ᔫᑕᐅᑉ ᑭᖑᕚᖏᑦ.”
19ᐃᓴᕆᐊᓕᒥᐅᑦ ᐊᓱᐃᓛᒃ ᐊᐅᓪᓚᓚᐅᖅᐳᑦ ᐅᓪᓛᒃᑯᑦ ᖃᐅᒻᒪᒃᑎᓪᓗᒍ, ᑕᖕᒫᖅᓗᑎᒡᓗ ᐃᒡᓗᒐᓮᑦ ᒋᐱᐊᑉ ᖃᓂᒋᔮᓐᓄᑦ. 20ᐃᓄᐃᑦ ᐃᓴᕆᐊᓕᒥᐅᑦ ᐅᓇᑕᕆᐊᓚᐅᖅᐳᑦ ᐱᓐᔭᒥᓂᐅᑉ ᑭᖑᕚᖏᑕ ᐅᓇᑕᖅᑐᒃᓴᖂᑎᖏᓐᓂᒃ, ᐅᓇᑕᖅᑐᒃᓮᓪᓗ ᒋᐱᐊᒧᑦ ᓵᓐᖓᓪᓗᑎᒃ ᓴᓂᓕᕇᓚᐅᖅᐳᑦ. 21ᐱᓐᔭᒥᓂᐅᑉ ᑭᖑᕚᖏᑕ ᐅᓇᑕᖅᑐᒃᓴᖁᑎᖏᑦ ᐃᒡᓗᒐᓴᖕᓂᑦ ᒋᐱᐊᒥᑦ ᐊᓂᓚᐅᖅᐳᑦ, ᐅᓪᓗᕐᓗ ᓈᓚᐅᖅᑎᓐᓇᒍ ᑐᖁᑦᓯᓚᐅᖅᐳᑦ 22,000ᓂᒃ ᐃᓴᕆᐊᓕᒥᐅᓂᒃ. 22ᐃᓄᒋᐊᒃᑐᕐᔪᐊᓪᓕ ᐊᖑᑎᑦ ᐃᓴᕆᐊᓕᒥᐅᑦ, ᓯᕘᕋᓇᑎᒃ ᓱᓕ ᐅᓇᑕᕐᖕᓂᕐᖕᒧᑦ ᓴᓂᓕᕇᓕᓚᐅᕆᕗᑦ ᑕᒫᓂᑦᓮᓐᓇᖅ ᓴᓂᓕᕇᒡᕕᒋᓚᐅᖅᑕᒥᖕᓂ ᐅᓪᓗᐃᑦ ᓯᕗᓪᓕᖅᐹᖓᓂ. 23ᐃᓄᒋᐊᒃᑐᕐᔪᐊᓪᓗ ᐃᓴᕆᐊᓕᒥᐅᑦ ᐂᓚᐅᖅᐳᑦ ᐊᑕᓂᐅᑉ ᓵᖓᓄᑦ ᕿᐊᓪᓗᑎᒡᓗ ᐅᓐᓄᒧᑦ ᑎᑭᓪᓗᒍ; ᐊᑕᓂᕐᖕᒧᓪᓗ ᐊᐱᕆᓪᓗᑎᒃ, “ᐅᓇᑕᕆᐊᒃᑲᓐᓂᕆᐊᖃᖅᐱᑖ ᖃᑕᓐᖑᑎᑦᑎᓐᓂᒃ ᐱᓐᔭᒥᓂᐅᑉ ᑭᖑᕚᖏᓐᓂᒃ?”
ᐊᑕᓂᐅᑉ ᑭᐅᕔᑦ, “ᐅᓇᑕᕆᐊᓕᖅᓯᐅᒃ.” 24ᐃᓴᕆᐊᓕᒥᐅᑦ ᐅᓇᑕᖅᑐᒃᓴᖁᑎᖏᑦ ᐅᓇᑕᕆᐊᓕᓚᐅᕆᕗᑦ ᐱᓐᔭᒥᓂᐅᑉ ᑭᖑᕚᖏᓐᓂᒃ ᐅᓪᓘᑉ ᐂᑉᐸᖓᓂᒃ. 25ᐱᓐᔭᒥᓂᐅᑉ ᑭᖑᕚᖏᑦ ᑖᒃᑯᓂᖓ ᐅᓇᑕᕆᐊᓕᓚᐅᕆᕗᑦ ᐊᓂᓪᓗᑎᒃ ᒋᐱᐊᒥᑦ, ᑕᒪᑐᒪᓂ ᑐᖁᑦᓯᓚᐅᖅᐳᑦ 18,000ᓂᒃ ᐃᓴᕆᐊᓕᒥᐅᑦ ᐅᓇᑕᖅᑐᒃᓴᖁᑎᖏᓐᓂᒃ; ᑖᒃᑯᐊ ᐃᓄᓕᒫᑦ ᓴᕕᒡᔪᐊᓕᔭᖅᑐᑦ. 26ᑕᕝᕙ ᐃᓄᒋᐊᒃᑐᕐᔪᐊᑦ ᐃᓴᕆᐊᓕᒥᐅᓕᒫᑦ ᐅᓇᑕᖅᑐᒃᓮᑦ ᐂᕗᑦ ᐱᑎᓕᒧᑦ ᕿᐊᓪᓗᑎᒡᓗ; ᑍᑲᓂ ᐃᒃᓯᕙᕗᑦ ᐊᑕᓂᐅᑉ ᓵᖓᓂ ᓂᕆᑦᑍᓕᓪᓗᑎᒃ ᐅᓐᓄᒃ ᑎᑭᓪᓗᒍ. ᑐᓂᕐᕈᓯᓚᐅᖅᐳᑦ ᐃᑯᐊᓚᑎᑕᒃᓴᓂᒃ ᑐᓂᕐᕈᑎᓂᒡᓗ ᐃᑯᐊᓚᒋᐊᓕᖕᓂᒃ ᐃᓚᒌᑦᓯᐊᕐᖕᓂᕐᖕᒧᓪᓗ ᑐᓂᕐᕈᑎᓂᒃ ᐊᑕᓂᐅᑉ ᓵᖓᓂ. 27ᐃᓄᒋᐊᒃᑐᕐᔪᐊᑦ ᐊᐱᕆᓚᐅᖅᐳᑦ ᐊᑕᓂᕐᖕᒥᒃ, (ᑍᑦᓱᒪᓂ ᐃᒃᓯᕐᕕᒃ ᐊᖏᖃᑎᒌᒍᑎᑕᓕᒃ ᒎᑎᐅᑉ ᐱᖓ ᑕᕝᕙᓃᓚᐅᕐᖕᒪᑦ ᐅᓪᓗᓂ ᑍᒃᑯᓇᓂ. 28ᐱᓂᕼᐋᓯᓗ, ᐃᓕᓯᕆᐅᑉ ᐃᕐᖕᓂᖓ ᐂᕉᓂᐅᑉ ᐃᕐᖑᑕᖓ, ᑲᒪᔨᐅᓚᐅᖅᐳᖅ ᐅᓪᓗᓂ ᑍᒃᑯᓇᓂ), ᐅᖃᖅᓗᓂ, “ᐅᓇᑕᕆᐊᒃᑲᓐᓂᕆᐊᖃᖅᐱᑖ ᖃᑕᓐᖑᑎᑦᑎᓐᓂᒃ ᐱᓐᔭᒥᓂᐅᑉ ᑭᖑᕚᖏᓐᓂᒃ, ᐅᕝᕙᓘᓐᓃᑦ ᓄᖅᑲᕆᐊᖃᓕᖅᐱᑖ?”
ᐊᑕᓂᐅᑉ ᑭᐅᕔᑦ, “ᐅᓇᑕᕆᐊᓕᕆᑦᓯ, ᖃᐅᒃᐸᑦ ᓵᓚᖃᖅᑎᓐᓂᐊᖅᐸᑦᓯ.”
29ᑍᒤᒻᒪᑦ ᐃᓴᕆᐊᓕᒥᐅᑦ ᐅᓇᑕᖅᑐᒃᓴᓂᒃ ᐃᔨᖅᓯᓚᐅᖅᐳᑦ ᒋᐱᐊᒥᐅᑦ ᐊᕙᑖᓄᑦ. 30ᐃᓄᖏᐊᒃᑐᕐᔪᐊᓪᓗ ᐃᓴᕆᐊᓕᒥᐅᑦ ᐅᓇᑕᕆᐊᓚᐅᖅᐳᑦ ᐱᓐᔭᒥᓂᐅᑉ ᑭᖑᕚᖏᓐᓂᒃ ᐅᓪᓗᐃᑦ ᐱᖓᔪᒋᓕᖅᑕᖓᓂᒃ ᐅᓇᑕᖅᑐᒃᓴᖁᑎᑎᒡᓗ ᐋᖅᑭᒃᓱᖅᓗᒋᑦ ᓵᓐᖓᓪᓗᑎᒃ ᒋᐱᐊᒧᑦ, ᑍᒫᑦᓮᓐᓇᖅ ᐱᖃᑦᑕᕋᒥᒃ. 31ᐱᓐᔭᒥᓂᐅᑉ ᑭᖑᕚᖏᑦ ᐊᓂᓚᐅᖅᐳᑦ ᐅᓇᑕᕆᐊᖅᓗᑎᒃ ᐃᓄᒋᐊᒃᑐᕐᔪᐊᓂᒃ, ᕿᒤᑎᑕᐅᓪᓗᑎᒡᓗ ᐃᒡᓗᒐᓴᖕᓂᒃ. ᑍᒤᓕᐅᓚᐅᕐᖕᒥᒐᒥᒃ ᑐᖁᕅᓕᓚᐅᖅᐳᑦ ᐃᓴᕆᐊᓕᒥᐅᑦ ᐃᓚᖏᓐᓂᒃ, ᓄᓇᓖᑦ ᐊᓯᖏᓐᓅᖓᔪᑦ ᐊᖅᑯᑎᖏᓐᓂ, ᐊᖅᑯᒻᒥ ᐱᑎᓕᒨᖓᔪᒥ ᐊᖅᑯᑎᒥᓗ ᒋᐱᐊᒨᖓᔪᒥ. ᑐᖁᑦᓯᓚᐅᖅᐳᑦ ᐃᒻᒪᖄ ᐃᓴᕆᐊᓕᓂᒃ 30ᓂᒃ. 32ᐱᓐᔭᒥᓂᐅᑉ ᑭᖑᕚᖏᑦ ᐅᖃᓚᐅᖅᐳᑦ, “ᕿᒫᑎᓐᓂᐊᖅᐸᕗᑦ ᑍᒫᒃ ᐱᕙᒃᑲᑦᑎᒍᑦ.”
ᐃᓴᕆᐊᓕᒥᐅᓪᓕ ᐅᖃᖅᐳᑦ ᕿᒫᓚᐅᖅᑕ, ᐅᖓᓯᒃᓯᑎᓐᓂᐊᕋᑦᑎᒍ ᐃᒡᓗᒐᓴᖕᓂᑦ ᐊᖅᑯᑎᓄᑦ. 33ᐃᓴᕆᐊᓕᒥᐅᑦ ᐅᓇᑕᖅᑐᒃᓴᓪᓚᕆᖁᑎᖏᑦ ᐅᑎᓚᐅᖅᐳᑦ ᐅᑕᖅᑭᓕᖅᓗᑎᒡᓗ ᐰᓕ-ᑕᒪᕆᒥ, ᐃᓄᐃᑦ ᐃᓴᕆᐊᓕᒥᐅᑦ ᑍᒃᑯᐊ ᒋᐱᐊᑉ ᓴᓂᐊᓃᑦᑐᑦ ᐃᔨᖅᓯᒪᕕᖕᒥᓂᑦ ᒪᑭᑉᐳᑦ ᒋᐸᒥᑦ. 34ᐅᓇᑕᕆᐊᓚᐅᖅᐳᑦ ᒋᐱᐊᒧᑦ 10,000ᐃᑦ ᐊᖑᑏᑦ ᓂᕈᐊᖅᑕᐅᓯᒪᔪᑦ ᐃᓴᕆᐊᓕᓂᑦ, ᐅᓇᑕᖅᑐᓪᓗ ᐊᒃᓱᕈᒻᒪᕆᓚᐅᖅᐳᑦ; ᐱᓐᔭᒥᓂᐅᑉ ᑭᖑᕚᖏᑦ ᑲᐅᔨᒪᓚᖏᒻᒪᑕ ᓵᓚᐅᓂᐊᕐᖕᓂᕐᖕᒥᓂᒃ. 35ᐊᑕᓂᐅᑉ ᐃᓴᕆᐊᓕᒥᐅᑉ ᓵᓚᖃᖅᑎᑉᐰᑦ ᐱᓐᔭᒥᓂᐅᑉ ᑭᖑᕚᖏᑕ ᐅᓇᑕᖅᑐᒃᓴᖁᑎᖏᓐᓂᒃ; ᐃᓴᕆᐊᓕᒥᐅᑦ ᑐᖁᑦᓯᓚᐅᖅᐳᑦ 25,100ᓂᒃ ᐱᓐᔭᒥᓂᐅᑉ ᑭᖑᕚᖏᓐᓂᒃ ᑍᑦᓱᒪᓂ ᐅᓪᓗᒥ; ᑍᒃᑯᐊᓕᒫᑦ ᓴᕕᒡᔪᐊᓕᔭᖅᑎᐅᕗᑦ. 36ᐱᓐᔭᒥᓂᐅᑉ ᑭᖑᕚᖏᑦ ᖃᐅᔨᓚᐅᖅᐳᑦ ᓵᓚᐅᓂᕐᖕᒥᖕᓂᒃ.
ᖃᓄᖅ ᐃᓴᕆᐊᓕᒥᐅᑉ ᓵᓚᖃᕐᖕᓂᕐᖕᒪᖔᑕ
ᐃᓴᕆᐊᓕᒥᐅᑦ ᐅᓇᑕᖅᑎᒻᒪᕆᖏᑦ ᕿᒫᓚᐅᖅᐳᑦ ᐱᓐᔭᒥᓂᐅᑉ ᑭᖑᕚᖏᓐᓂᒃ, ᑕᑎᖃᓚᐅᕋᒥᒃ ᐊᖑᑎᓂᒃ ᐃᔨᖅᓯᒪᔪᓂᒃ ᒋᐱᐊᑉ ᓴᓂᐊᓂ. 37ᑖᒃᑯᐊ ᐊᖑᑏᑦ ᐃᔨᖅᓯᒪᕕᖕᒥᖕᓂᑦ ᑐᐊᕕᖅᓗᑎᒃ ᒋᐱᐊᒧᐊᖅᐳᑦ, ᐊᖑᑏᑦ ᐃᔨᖅᓯᒪᔪᕕᓃᑦ ᐃᒡᓗᒐᓴᖕᓃᑦᑐᑦ ᑐᖁᑉᐰᑦ ᓴᕕᒡᔪᐊᓄᑦ. 38ᓇᓗᓁᒃᑯᑕᖃᖅᑎᑦᓯᓚᐅᖅᐳᑦ ᐃᓴᕆᐊᓕᐅᑉ ᐅᓇᑕᖅᑐᒃᓴᖏᑦ ᐅᓇᑕᖅᑐᒃᓮᓪᓗ ᐃᔨᖅᓯᒪᔪᑦ ᐃᓯᖅᓗᐊᓗᖕᒥᒃ ᑕᑯᒍᑎᒃ ᐃᒡᓗᒐᓴᒡᔪᐊᓂᑦ ᐱᔪᒥᒃ, 39ᐃᓴᕆᐊᓕᒥᐅᑦ ᐅᓇᑕᕐᕕᖕᒦᑦᑐᑦ ᐅᑎᕆᐊᖃᓚᐅᖅᐳᑦ, ᐱᓐᔭᒥᓂᐅᓪᓕ ᑭᖑᕚᖏᑦ ᑐᖁᕅᓕᖅᑎᓪᓗᒋᑦ ᐃᓴᕆᐊᓕᓂᒃ 30ᓂᒃ; ᐃᒻᒥᖕᓄᓪᓗ ᐅᖃᖃᑎᒌᓚᐅᖅᐳᑦ, “ᐃᓛᒃ, ᓵᓚᒋᓕᖅᐸᕗᑦ ᑍᒫᒃ ᓵᓚᒋᓚᐅᕋᑦᑎᒍ.” 40ᑕᕝᕙᓂᓗ ᓇᓗᓁᒃᑯᑕᖅ ᓴᖅᑭᑉᐳᖅ, ᐃᓯᖅᓗᒃ ᑕᑯᒃᓴᐅᓕᖅᐳᖅ ᐃᒡᓗᒐᓴᒡᔪᐊᓂᑦ, ᐱᓐᔭᒥᓂᐅᑉ ᑭᖑᕚᖏᑦ ᐅᑎᒧᑦ ᑕᑯᓴᕋᒥᒃ; ᑕᑯᓕᖅᐳᑦ ᐃᒡᓗᒐᓴᖕᓂᒃ ᐃᑯᐊᓚᔪᓂᒃ ᕿᓚᖕᒧᑦ ᐳᔫᖅᑐᓂᒃ. 41ᐃᓴᕆᐊᓕᓪᓗ ᐅᑎᒧ ᓵᓚᐅᖅᐳᑦ, ᐱᓐᔭᒥᓂᐅᑉ ᑭᖑᕚᖏᑦ ᐅᐃᒻᒪᒃᑎᑕᐅᓪᓗᑎᒃ, ᖃᐅᔨᒐᒥᒃ ᓵᓚᐅᓂᐊᕐᖕᓂᕐᖕᒥᓂᒃ. 42ᕿᒪᒃᓯᓚᐅᓐᐳᓪᓗ ᐃᓴᕆᐊᓕᓂᒃ ᐅᓚᒃᓯᓪᓗᑎᒃ ᐃᓄᖃᖏᑦᑐᒧᑦ, ᐅᓇᑕᖅᑐᒃᓴᓂᓪᓕ ᐊᖑᔭᐅᓪᓗᑎᒃ ᐃᒡᓗᒐᓴᒡᔪᐊᓂᑦ ᐱᔪᓂᑦ ᓄᖑᑕᐅᕗᑦ. 43ᐱᓐᔭᒥᓂᐅᑉ ᑭᖑᕚᖏᑦ ᐃᓴᕆᐊᓕᒥᐅᑦ ᒪᓕᓚᐅᖅᐰᑦ, ᓄᖅᑲᓚᐅᕋᑎᒃ ᓅᕼᐊᒥᑦ ᒋᐱᐊᑉ ᐊᑭᐊᓄᑦ ᑎᑭᓪᓗᒍ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᒧᑦ. 4418,000ᐃᑦ ᐱᓐᔭᒥᓂᐅᑉ ᑭᖑᕚᖏᑦ ᐱᓯᑎᐅᓂᖅᐹᖏᑦ ᐅᓇᑕᖅᑐᒃᓮᑦ ᑐᖁᑕᐅᓚᐅᖅᐳᑦ. 45ᐊᓯᖏᓪᓗ ᕿᒫᕗᑦ ᓄᓇᑐᐃᓐᓇᒧᑦ ᕆᒪᓐ ᖃᖅᑲᖏᓐᓄᑦ. 5,000ᐃᑦ ᑐᖁᑕᐅᓚᐅᖅᐳᑦ ᐊᖅᑯᑎᒥ. ᐃᓴᕆᐊᓕᒥᐅᑦ ᑲᔪᓯᓚᐅᖅᐳᑦ ᒪᓕᒡᓗᑎᒃ ᐃᓚᖏᓐᓂᒃ ᒋᑑᒻᒧᑦ, ᑕᒫᓂ 2,000ᐃᑦ ᑐᖁᑕᐅᓚᐅᕆᕗᑦ. 46ᑲᑎᓕᒫᖅᓗᑎᒃ 25,000ᐃᑦ ᐱᓐᔭᒥᓂᐅᑉ ᑭᖑᕚᖏᑦ ᑐᖁᑕᐅᓚᐅᖅᐳᑦ ᐅᓪᓗᒥᒃ ᑍᑦᓱᒪᓂ ᓴᕕᒡᔪᐊᖃᖅᑐᓕᒫᑦ ᓯᕘᕋᖏᑦᑑᓪᓗᑎᒃ ᐅᓇᑕᖅᑐᒃᓴᐅᓚᐅᖅᐳᑦ.
47ᑭᓯᐊᓂ 600ᐃᑦ ᐊᖑᑏᑦ ᕿᒪᒃᓯᓚᐅᖅᐳᑦ ᐃᓄᖃᖏᑦᑐᒧᑦ ᕆᒪᓐ ᖃᖅᑲᖏᓐᓄᑦ, ᕾᖅᑐᓂ ᐃᓂᖃᓚᐅᖅᐳᑦ ᕆᒪᒥ ᑕᖅᑭᓂᒃ ᓯᑕᒪᓂᒃ. 48ᐃᓴᕆᐊᓕᒥᐅᑦ ᐅᑎᓚᐅᖅᐳᑦ ᐱᓐᔭᒥᓂᐅᑉ ᑭᖑᕚᖏᑦ ᐅᑎᓕᖅᓗᑎᒃ ᐊᒥᐊᒃᑯᑦ ᑕᑯᔭᑎᒃ ᑐᖁᓚᐅᖅᐰᑦ ᓴᕕᒡᔪᐊᒧᑦ ᐃᓄᐃᑦ ᐆᒪᔪᖁᑎᖏᑦ ᐊᒡᓛᑦ, ᓄᓇᓕᓕᒫᓪᓗ ᖃᓂᒋᔮᓃᑦᑐᑦ ᐃᑯᐊᓪᓚᒃᓗᒋᑦ.
Currently Selected:
ᐃᓗᐊᖅᓮᔩᑦ ᐊᒡᓚᖏᑦ 20: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.