ᒨᓯᓯ ᓯᕗᓪᓖᑦ 50
50
1ᑕᕝᕙ ᔫᓯᐱ ᐊᑖᑕᖓᑕ ᑮᓇᖓᓄᑦ ᐳᓪᓗᓂ, ᕿᐊᕕᒋᓕᖅᐹ, ᑯᓂᒃᓗᒍᓗ. 2ᔫᓯᐱᓗ ᐱᔨᒥᓂᒃ ᐋᓐᓂᐊᓯᐅᑎᓂᒃ ᑎᓕᓯᕗᖅ ᑐᖁᖓᔪᖅᓯᐅᑎᒥᒃ ᐊᑖᑕᓂ ᒥᖑᐊᖅᑕᐅᖁᓪᓗᓂᐅᒃ. ᑕᕝᕙ ᐋᓐᓂᐊᓯᐅᑏᑦ ᐃᓴᕆᐊᓕ ᑐᖁᖓᔪᖅᓯᐅᑎᒥᒃ ᒥᖑᐊᖅᐹᑦ; 3ᐅᓪᓗᓂᒃ 40ᓂᒃ ᐅᑕᖅᑭᔭᕆᐊᖃᓚᐅᖅᐳᑦ, ᑕᒪᒃᑯᐊ ᑐᖁᖓᔪᖅᓯᐅᑎᒥᒃ ᒥᖑᐊᖅᑕᐅᔪᑦ ᐅᓪᓗᓂᒃ ᑍᒤᓪᓗᐊᖅᑐᓂᒃ ᐅᑕᖅᑭᔭᕆᐊᖃᖅᐸᖕᒪᑕ. ᐄᑦᔨᑉᑎᒥᐅᓪᓗ ᕿᒃᓵᒍᑎᒋᕚᑦ ᐅᓪᓗᓂᒃ 70ᓂᒃ.
4ᐅᓪᓗᐃᓪᓕ ᕿᒃᓵᒡᕕᐅᔪᑦ ᐃᓱᓕᒻᒪᑕ, ᔫᓯᐱ ᐰᕉᑉ ᐊᖓᔪᖅᑳᖁᑎᖏᓐᓄᑦ ᐅᖃᖅᐳᖅ, “ᐃᓕᑦᓯᓐᓄᑦ ᖁᕕᐊᒋᔭᐅᒍᒪ, ᐊᖓᔪᖅᑳᑦᑎᓐᓄᑦ ᐰᕉᒧᑦ ᐅᖃᕆᐊᖅᑐᕆᑦᓯ, ᐅᖃᐅᑎᓗᒍᓗ, 5#ᒨᓯᓯ ᓯᕗᓪᓖᑦ 47:29-31.ᐊᑖᑕᒪ ᐊᖏᒻᒪᕆᒃᑎᓚᐅᕐᖕᒪᖓ, ᐅᖃᐅᑎᓪᓗᓂᖓ, ‘ᑐᖁᔭᕆᐊᒃᓯᒐᒪ: ᐃᓗᕕᖅᑕᐅᔪᒪᔪᖓ ᐃᓗᕕᖃᕐᕕᓕᐊᕆᓯᒪᔭᓐᓂ ᓄᓇᒥ ᑬᓇᓂᒥ, ᑍᑲᓂ ᐃᓗᕕᖅᑕᒃᓴᕆᕙᕐᖕᒪ.’ ᒫᓐᓇ ᑍᒤᒻᒪᑦ ᐱᔪᓐᓇᖅᑎᓚᐅᓐᖓ, ᑕᑉᐸᐅᖓ ᐊᑖᑕᒐ ᐃᓗᕕᕆᐊᖅᑐᕐᖕᓂᐊᕋᒃᑯ; ᑕᒪᐅᖓᓗ ᐅᑎᓛᕆᕗᖓ.”
6ᐰᕉᑉ ᑭᐅᕚ, “ᑕᑉᐸᐅᖓ ᒪᔪᐊᓕᕆᑦ, ᐊᑖᑍᑦ ᐃᓗᕕᕆᐊᖅᑐᖅᓗᒍ, ᑍᒫᒃ ᐊᖏᒻᒪᕆᒃᑎᓯᒪᖕᒪᑎᑦ.”
7ᑕᕝᕙ ᔫᓯᐱ ᒪᔪᐊᓕᖅᐳᖅ ᐊᑖᑕᓂ ᐃᓗᕕᕆᐊᖅᑐᖅᓗᒍ; ᐃᓚᖃᓚᐅᖅᐳᕐᓗ ᐰᕉᑉ ᐱᔨᖏᓐᓂᒃ ᑕᒤᓐᓂᒃ, ᐊᖓᔪᖅᑳᖁᑎᖏᓐᓂᒡᓗ ᐃᒡᓗᒥᐅᑕᖏᓐᓂᒃ, ᐄᑦᔨᑉᑎᐅᓪᓗ ᓄᓇᖓᑕ ᐊᖓᔪᖅᑳᖁᑎᓕᒫᖏᓐᓂᒃ ᑕᒤᓐᓂᒃ, 8ᔫᓯᐱᐅᓪᓗ ᐃᒡᓗᒥᐅᖃᑎᓕᒫᖏᑦ ᑕᒪᕐᖕᒥᒃ, ᖃᑕᓐᖑᑎᖏᓪᓗ, ᐊᑖᑕᖓᑕᓗ ᐃᒡᓗᒥᐅᖃᑎᓕᒫᖏᑦ ᐱᖃᑕᐅᓚᐅᖅᐳᑦ; ᕿᑐᕐᖓᖏᑕᓕ ᒥᑭᔫᑕᐅᓂᖏᑦ, ᓰᐱᖁᑎᖏᓪᓗ, ᐆᒪᔪᖁᑎᖏᓪᓗ ᕿᒪᒃᑕᐅᓚᐅᖅᐳᑦ ᓄᓇᒧᑦ ᒎᓯᓂᒧᑦ. 9ᑕᑉᐸᐅᖓ ᒪᔪᐊᖃᑕᐅᓚᐅᕆᕗᑦ ᐊᖓᔪᖅᑳᖅᓯᐅᑏᑦ ᐊᒃᓴᓗᐊᓖᑦ ᕿᒻᒥᕐᔪᐊᕐᖕᒦᑦᑐᓪᓗ; ᐃᖏᕐᕋᖃᑎᓕᒫᖏᑦ ᑲᑎᓪᓗᒋᑦ ᐃᓄᒐᓴᒡᔪᐊᖑᓚᐅᖅᐳᑦ.
10ᓇᑎᕐᖕᓇᒧᓪᓕ ᑎᑭᓐᓇᒥᒃ ᑍᔭᐅᔪᒧᑦ ᐊᑖᑎᐅᑉ ᓂᐊᖂᔭᒃᓴᓕᐅᕐᕕᖓᓂᒃ, ᔪᐊᕐᑕᓂᐅᑉ ᐅᖓᑖᓃᑦᑐᒧᑦ, ᑕᕝᕙᓂ ᕿᐊᔪᐊᓘᕗᑦ ᕿᒃᓵᖕᓂᕐᖕᒧᓪᓗ ᐅᒡᒍᐊᖅᑐᐊᓘᓪᓗᑎᒃ; ᑕᕝᕙᓂᓗ ᔫᓯᐱ ᐅᓪᓗᓂᒃ 7ᓂᒃ ᓄᖅᑲᖓᑎᑦᓯᓚᐅᖅᐳᖅ ᕿᒃᓵᒍᑎᖃᖅᓗᑎᒃ ᐊᑖᑕᒥᖕᓂᒃ. 11ᑬᓇᓂᒥᐅᓪᓕ ᓄᓇᖃᖅᑐᑦ, ᑕᑯᒐᒥᒃ ᕿᒃᓵᒃᑐᓂᒃ ᓇᑎᕐᖕᓇᒥ ᑍᔭᐅᔪᒥ ᐊᑖᑎᐅᑉ ᓂᐊᖂᔭᒃᓴᓕᐅᕐᕕᖓᓂ, ᐅᖃᖅᐳᑦ, “ᑕᕝᕙᓂ ᐄᑦᔨᑉᑎᒥᐅᓄᑦ ᕿᒃᓵᕕᒡᔪᐊᕐᕕᐅᕗᖅ.” ᑍᒤᒻᒪᑦ ᓄᓇ ᐊᑦᓯᖅᑕᐅᕗᖅ ᐊᐱᐅᓪ-ᒥᔅᕅᒥᒥᒃ; ᑖᓐᓇ ᔪᐊᕐᑕᓂᐅᑉ ᐅᖓᑖᓃᑦᑐᖅ.
12ᑕᕝᕙᓂ ᔧᑰᑉ ᐃᕐᖕᓂᖏᑦ ᐱᓇᓱᐊᓚᐅᖅᐳᑦ ᐊᑖᑕᖓᑕ ᐱᓇᓱᐊᖅᑕᐅᖁᓚᐅᖅᑕᖏᓐᓂᒃ ᑖᑦᓱᒧᖓ; 13#ᐋᐴᓯᑕᓖᑦ 7:16.ᐃᕐᖕᓂᖏᑕᓗ ᐊᒡᔭᖅᐹᑦ ᓄᓇᒧᑦ ᑬᓇᓂᒧᑦ, ᐃᓗᕕᖅᓗᒍᓗ ᕾᕈᓱᖕᒧᑦ ᓇᑎᕐᖕᓇᒥ ᒪᒃ-ᐲᓚᒦᑦᑐᒧᑦ, ᒪᒻᕆᐅᑉ ᐅᖓᑖᓃᑦᑐᒧᑦ, ᑖᓐᓇ ᐂᑉᕋᕼᐋᒻ ᓂᐅᕕᐊᕆᓚᐅᖅᑕᖓ ᐱᕈᖅᓰᕕᒃ ᐱᖃᓯᐅᑎᓪᓗᒍ ᐃᐸᕋᓐᒥᑦ ᕼᐃᑍᑎᒥᐅᑕᕐᖕᒥᑦ, ᐃᓗᕕᖅᓯᕕᒃᓴᐅᖁᓪᓗᒍ. 14ᔫᓯᐱᐅᑉ ᐊᑖᑕᓂ ᐃᓗᕕᕇᕋᒥᐅᒃ, ᐅᑎᓚᐅᖅᐳᖅ ᐄᑦᔨᑉᑎᒧᑦ ᖃᑕᓐᖑᑎᓂ ᐃᓚᒋᓪᓗᒋᑦ ᑕᒪᕐᖕᒥᒡᓗ ᐃᓗᕕᖅᓯᔭᖅᑐᖅᑎᓪᓗᒋᑦ ᐊᑖᑕᒥᓂᒃ ᒪᓕᓚᐅᖅᑐᓕᒫᑦ ᐃᓚᒋᓪᓗᒋᑦ.
ᔫᓯᐱᐅᑉ ᖃᑕᓐᖑᑎᒥᓂᒃ ᐃᓱᒫᓗᖁᔨᖏᓐᓂᖓ
15ᔫᓯᐱᐅᓪᓕ ᖃᑕᓐᖑᑎᖏᑦ ᖃᐅᔨᒪᓕᕋᒥᒃ ᐊᑖᑕᖓ ᑐᖁᖓᓕᕐᖕᒪᑦ, ᐅᖃᖅᐳᑦ, “ᔫᓯᐱᐅᑉ ᐆᒥᒋᓂᐊᓕᖅᐹᑎᒍᑦ ᐊᑭᒋᐊᕐᖕᓂᐊᓕᖅᐹᑎᒍᓪᓗ ᐱᐅᖏᑦᑐᒥᒃ ᐱᓂᐊᕐᖕᓂᕆᓚᐅᖅᑕᕗᑦ ᒪᓕᒡᓗᒍ.” 16ᑍᒤᒻᒪᑦ ᔫᓯᐱᒧᑦ ᑎᓕᓯᓚᐅᖅᐳᑦ ᐅᖃᐅᑦᔭᐅᖁᓪᓗᒍ, ᐅᖃᖅᓗᑎᒃ, “ᐊᑖᑕᕕᑦ ᑐᖁᓚᐅᖅᑳᕋᓂ ᐱᖁᓚᐅᖅᐹᑎᒍᑦ, ᐅᖃᖅᓗᓂ, 17‘ᔫᓯᐱ ᐅᖃᐅᑦᔭᐅᔪᒫᖅᐳᖅ, ᕿᓄᕕᒋᕙᒋᑦ ᐃᓱᒪᒋᔪᓐᓁᕕᖃᖁᓪᓗᑎᑦ ᐊᖓᔪᕕᑦ ᐊᔪᖅᑐᓕᓂᕆᓚᐅᖅᑕᖏᓐᓂᒃ, ᐃᓕᖕᓄᑦ ᐱᐅᖏᑦᑐᒥᒃ ᐱᓇᓱᐊᓚᐅᕐᖕᒪᑕ.’ ᒫᓐᓇᓗ ᕿᓄᕕᒋᕙᑦᑎᒋᑦ, ᐃᓱᒪᒋᔪᓐᓁᕐᕕᒋᓚᐅᒃᑭᑦ ᐊᔪᖅᑐᓕᓂᕆᓚᐅᖅᑕᖏᓐᓂᒃ ᐊᑖᑕᕕᑦ ᒎᑎᖓᑕ ᐱᔨᖏᑦ.” ᔫᓯᐱᓗ ᕿᐊᕗᖅ ᑖᑦᓱᒧᖓ ᐅᖃᓪᓚᒃᑎᓪᓗᒋᑦ.
18ᐊᖓᔪᖏᑕᑦᑕᐅᖅ ᐅᐸᒃᓗᒍ ᓵᖓᓄᑦ ᐹᒻᒪᒡᕕᒋᕚᑦ, ᐅᖃᖅᓗᑎᒡᓗ, “ᑕᑯᒋᑦ ᐃᓕᖕᓄᑦ ᐱᔨᐅᕗᒍᑦ.”
19ᔫᓯᐱᐅᓪᓕ ᐅᖃᐅᑎᕔᑦ, “ᓯᕘᕋᖏᓪᓗᓯ ᐅᕙᓐᓂᒃ, ᒎᑎᐅᑉ ᐃᓂᖓᓃᓐᖏᓐᓇᒪ, 20ᐃᓕᑦᓯᓕ ᐃᓱᒪᖃᓚᐅᕋᓗᐊᖅᐳᓯ ᐱᐅᖏᑦᑐᒥᒃ ᐅᕙᓐᓄᑦ ᐱᓇᓱᐊᕈᒪᓪᓗᓯ; ᒎᑎᐅᓪᓕ ᑕᒪᓐᓇ ᐱᐅᔪᒧᑦ ᐋᖅᑭᒃᓯᒪᓚᐅᖅᐹ, ᐃᓄᐃᑦ ᐅᓄᖅᑐᕐᔪᐊᑦ ᐃᓅᑎᑕᐅᖁᓪᓗᒋᑦ, ᓲᕐᓗ ᐅᓪᓗᒥ ᑍᒤᒻᒪᑦ. 21ᑍᒤᒻᒪᑦ, ᓯᕘᕋᖏᓪᓗᓯ; ᐅᕙᖓ ᓂᕿᒃᓴᖃᖅᑎᓐᓂᐊᖅᐸᑦᓯ ᕿᑐᕐᖓᓯᓗ.” ᑍᒤᓕᐅᖅᓗᓂ ᑐᓐᖓᓇᖅᑐᒥᒃ ᐅᖃᐅᑎᒃᑲᓐᓂᖅᐰᑦ ᒪᓂᒍᖅᑎᓪᓗᒋᓪᓗ.
ᔫᓯᐱᐅᑉ ᑐᖁᓂᖓ
22ᔫᓯᐱ ᐄᑦᔨᑉᑎᒦᖏᓐᓇᓚᐅᖅᐳᖅ, ᐃᓚᓂ ᐊᑖᑕᖓᑕᓗ ᐃᒡᓗᒥᐅᖃᑎᖏᑦ; ᔫᓯᐱᓗ ᐊᕐᕌᒍᓂᒃ 110ᓂᒃ ᐃᓅᓚᐅᖅᐳᖅ. 23ᔫᓯᐱᓗ ᑕᑯᓚᐅᖅᐳᖅ ᐃᕗᕅᒥᐅᑉ ᕿᑐᕐᖓᖏᓐᓂᒃ ᐃᕐᖑᑕᒥᓂᒃ; ᒫᓇᓯᐅᓪᓗ ᐃᕐᖕᓂᖓᑕ ᒪᑬᕆᐅᑉ ᕿᑐᕐᖓᖏᓐᓂᒃ ᐃᕐᖕᓂᐊᖑᑎᓪᓗᒋᑦ ᑕᑯᓚᐅᕆᕗᖅ. 24ᔫᓯᐱᓗ ᖃᑕᓐᖑᑎᒥᓄᑦ ᐅᖃᖅᐳᖅ, “ᑐᖁᔭᕆᐊᒃᓯᒐᒪ; ᒎᑎᐅᓪᓕ ᑎᑭᕝᕕᒋᔪᒫᖅᐹᓯ, ᑕᕝᕙᓐᖓᓪᓗ ᓄᓇᒥᑦ ᐊᐅᓪᓚᖅᑎᑦᓱᒫᖅᐹᓯ ᓄᓇᒧᑦ ᐂᑉᕋᕼᐋᒧᑦ, ᐂᓴᑭᒧᓪᓗ, ᔧᑯᒧᓪᓗ ᐊᖏᕈᑎᒋᓚᐅᖅᑕᖓᓂ ᓄᓇᑖᖁᓪᓗᓯ.” 25#ᒨᓯᓯ ᐂᑉᐸᖏᑦ 13:19; ᔮᓱᐊ 24:32; ᐄᑉᕈᐃᓄᑦ 11:22.ᑕᕝᕙ ᔫᓯᐱ ᐅᖃᕕᖁᔨᕗᖅ ᐃᓴᕆᐊᓕᐅᑉ ᑭᖑᕚᖏᓐᓂᒃ, ᐅᖃᖅᓗᓂ, “ᒎᑎᐅᑉ ᑎᑭᕝᕕᒋᔪᒫᕐᖕᒪᓯ, ᑕᕝᕙ ᓴᐅᓂᒃᑲ ᓇᒃᓴᕆᐊᖃᕈᒫᖅᐸᓯ ᑕᒫᓐᖓᑦ ᐊᐅᓪᓚᓕᕈᑦᓯ.” 26ᑕᕝᕙ ᔫᓯᐱ ᑐᖁᕗᖅ, ᐊᕐᕌᒍᖃᓕᖅᓗᓂ 110ᓂᒃ; ᑐᖁᖓᔪᖅᓯᐅᑎᒧᓪᓗ ᒥᖑᐊᖅᐹᑦ, ᐃᒃᓕᕐᕕᖕᒧᓪᓗ ᐃᓕᓪᓗᒍ ᐄᑦᔨᑉᑎᒥ.
Currently Selected:
ᒨᓯᓯ ᓯᕗᓪᓖᑦ 50: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.