ᒨᓯᓯ ᓯᕗᓪᓖᑦ 49
49
ᔧᑰᑉ ᑭᖑᓪᓕᖅᐹᒥᒃ ᐅᖃᐅᓯᖃᕐᖕᓂᖓ
1ᑕᕝᕙ ᔧᑰᑉ ᐃᕐᖕᓂᓂ ᐃᒻᒥᓄᑦ ᕾᖁᕔᑦ, ᐅᖃᐅᑎᓪᓗᒋᓪᓗ, “ᐃᓕᑦᓯᓐᓄᑦ ᑲᑎᓚᐅᕆᑦᓯ, ᓯᕗᓂᒃᓴᑦᓯᓐᓂ ᐃᓕᑦᓯᓐᓄᑦ ᐊᑑᑎᔪᒫᖅᑐᓂᒃ ᐅᖃᐅᑎᓂᐊᕋᑦᓯ.
2ᑲᑎᓗᓯ ᓈᓚᓚᐅᖅᓯᓐᖓ, ᔧᑯᒧᑦ ᐃᕐᖕᓂᐅᔪᓯ,
ᓈᓚᑦᓯᐊᖅᓗᒍᓗ ᐃᓴᕆᐊᓕ ᐊᑖᑕᓯ.
3ᕉᐱᓃ, ᐃᕝᕕᑦ ᐊᖓᔪᒃᓯᖅᐹᖁᑎᒋᒐᒃᑭᑦ,
ᓄᑭᖃᑦᓯᐊᖅᑎᓪᓗᖓ ᐱᔪᓐᓇᑦᓯᐊᓕᖅᓗᖓᓗ ᕿᑐᕐᖓᖅᑖᕆᓚᐅᖅᐸᒋᑦ,
ᐅᐱᒪᑦᔪᑎᒋᓯᒪᕙᒋᑦ ᐊᖑᑎᕈᖅᐸᓪᓕᐊᓕᕐᖕᓂᓐᓄᑦ
ᐅᐱᒪᑦᔪᑎᒋᓯᒪᓪᓗᑎᓪᓗ ᐱᔪᓐᓇᕐᖕᓂᓐᓂᒃ.
4ᐃᒥᖅᑎᑐᑦ ᕿᑲᖏᑦᑐᑎᑐᑦ ᑍᒤᑉᐳᑎᑦ,
ᐱᓪᓚᕆᓐᖑᕐᖕᓂᕐᖕᒥ ᐃᓂᖃᕐᖕᓂᐊᓐᖏᓚᑎᑦ,
ᐊᑖᑕᕕᑦ ᐃᓐᓇᓐᖓᕕᐊᓄᑦ ᐂᓚᐅᕋᕕᑦ;
ᑕᕝᕙᓂᓗ ᐊᑖᑍᑦ ᓇᕐᕈᓇᖅᓯᑎᓚᐅᖅᐸᑦ
ᓯᓂᒡᕕᓐᓄᑦ ᐂᓚᐅᕋᕕᑦ!
5ᓯᒥᐅᓂ ᓕᕔᓗ ᓄᑲᕇᒃᐳᓯᒃ;
ᓱᒋᐅᑎᖏᑦ ᓴᕕᒡᔪᐊᑦ ᑲᑉᐱᐊᓇᖅᐳᑦ.
6ᑖᒃᑯᐊᒃ ᐃᓱᒪᒃᓴᖅᓯᐅᕐᕕᖏᖕᓄᑦ ᐃᓚᐅᔪᒪᓐᖏᓚᖓ
ᐆ ᐊᓂᕐᖕᓂᕋᓗ, ᐃᓚᒋᔭᐅᖁᖏᓐᓂᕙᕋ ᐃᓄᒋᐊᒃᑐᖁᑎᖏᓐᓂ;
ᓂᓐᖓᐅᒪᓪᓗᑎᒃ ᐊᖑᑎᓂᒃ ᑐᖁᑦᓯᕙᖕᒪᑎᒃ
ᐃᒻᒧᒃᓯᐅᒐᐅᓪᓗ ᐊᖑᓴᓪᓗᖏᓐᓂᒃ ᐱᓐᖑᐊᕈᑎᒋᓪᓗᒋᑦ ᓄᑭᖏᓐᓂᒃ ᑭᒃᑐᕋᖅᑎᑦᓯᔪᓐᓇᖅᓱᑎᒃ.
7ᑖᒃᑯᐊᒃ ᓂᓐᖓᖕᓂᖏᒃ ᓯᕗᓂᖅᓗᓕᖅᓕᒃ, ᑲᑉᐱᐊᓇᖅᑐᐊᓘᖕᒪᑦ;
ᓂᓐᖓᐅᒪᓂᖏᒡᓗ ᐃᓖᔭᖅᓱᐃᓂᐅᓪᓗᑎᒃ!
ᑖᒃᑯᐊᒃ ᐊᒡᒍᕐᖕᓂᐊᖅᐹᒃᑲᒃ ᔧᑰᑉ ᓄᓇᖓᓂ
ᓯᐊᒻᒪᖅᑎᓪᓗᒋᒡᓗ ᐃᓴᕆᐊᓕᐅᑉ ᓄᓇᖓᓂ.
8ᔫᑖ, ᖃᑕᓐᖑᑎᖕᓂᑦ ᓂᖅᑐᖅᑕᐅᔪᒫᖅᐳᑎᑦ;
ᐊᒡᒐᑎᓪᓗ ᐆᒥᒋᔨᕕᑦ ᖁᖓᓯᖏᓐᓂᒃ ᑎᒍᒥᐊᕈᒫᖅᐳᑦ;
ᐊᑖᑕᕕᓪᓗ ᐃᕐᖕᓂᖏᑦ ᓵᖕᓂ ᐹᒻᒪᒃᑎᕈᒫᖅᐳᑦ.
9 #
ᒨᓯᓯ ᓯᑕᒪᖏᑦ 24:9; ᑕᑯᑎ 5:5. ᔫᑕ ᓛᔭᐅᑉ ᕿᑐᕐᖓᖏᑎᑐᑦ ᑍᒤᑉᐳᖅ;
ᓂᕆᔭᒃᓴᕐᖕᓂᒃ ᑐᖁᑦᓯᓚᐅᖅᓗᑎᑦ, ᐃᕐᖕᓃᒃ ᐊᖏᔪᕈᖅᐳᑎᑦ,
ᓛᔭᐅᑉ ᐊᕐᖕᓇᓪᓗᖓᑐᑦ; ᑭᓇᒧᓪᓘᓐᓃᑦ ᑐᐹᖅᑕᐅᓂᐊᓐᖏᓚᑎᑦ.
10ᐊᖓᔪᖅᑳᕐᔪᐊᑉ ᐱᔪᓐᓇᐅᑎᖓᑕ ᓇᓗᓁᒃᑯᑕᖓ ᔫᑕᒥᑦ ᕿᒪᕉᑎᓂᐊᓐᖏᓚᖅ,
ᐊᐅᓚᑦᓯᔨᐅᓪᓗ ᐊᔭᐅᑉᐱᐊᖓ ᐃᑎᒐᖏᑕ ᐊᑯᕐᖓᓐᓂᑦ ᐲᖅᑕᐅᓂᐊᖏᓐᓂᕗᖅ,
ᐊᖓᔪᖅᑳᕐᔪᐊᖅ ᐱᖁᑎᓕᒃ ᑎᑭᓚᐅᖅᑳᖅᑎᓐᓇᒍ;
ᑖᓐᓇ ᐃᓄᖕᓄᑦ ᐅᐱᒋᔭᐅᔪᒫᖅᐳᖅ ᓈᓚᒃᑕᐅᔪᒫᖅᓗᓂᓗ.
11ᑖᑦᓱᒪ ᓄᕐᕋᖅ ᓯᐅᑎᖅᑯᑐᔪᖁᑎᓂ ᕔᓂᒃᓴᓕᖕᒧᑦ ᐃᐱᕈᒫᖅᐹ,
ᓯᐅᑎᖅᑯᑐᔪᖁᑎᖓᑕᓕ ᓄᕐᕋᖓ ᕔᓂᒃᓴᓂᑦ ᐱᐅᓂᖅᐹᖑᔪᒧᑦ ᐱᑎᑦᓱᒫᖅᐹ,
ᑖᑦᓱᒪ ᐊᓐᓄᕌᓂ ᐃᕐᕈᖅᑐᕈᒫᖅᐰᑦ ᕔᓂᒧᑦ
ᐊᓐᓄᕌᓂᓗ ᐃᕐᕈᖅᑐᕈᒫᖅᐰᑦ ᕔᓂᐅᑉ ᐊᐅᖓᓄᑦ;
12ᑖᑦᓱᒪ ᐃᔨᖏᒃ ᐊᐅᐸᖅᓯᔪᒫᖅᐴᒃ ᕔᓂᒧᑦ,
ᑭᒍᑎᖏᓪᓗ ᖃᑯᖅᓯᔪᒫᖅᐳᑦ ᐃᒻᒧᖕᒥᑦ.
13ᓯᐳᓗᓂ ᓄᓇᖃᕈᒫᖅᐳᖅ ᑕᕆᐅᑉ ᑭᒡᓕᖓᓂ;
ᐅᒥᐊᕐᔪᐊᓄᑦ ᑭᓴᕐᕕᑦᓯᐊᖑᔪᒫᖅᐳᖅ,
ᓄᓇᖓᑕᓗ ᑭᒡᓕᖓ ᓮᑐᓂᒧᑦ ᑎᑭᐅᑎᓯᒪᔪᒫᖅᐳᖅ.
14ᐃᓴᑳᕆ ᓯᐅᑎᖅᑯᖅᑐᔫᕗᖅ ᓴᓐᖏᔪᖅ,
ᐹᒻᒪᖓᕗᖅ ᓰᐲᑦ ᐅᓄᖅᑐᑦ ᑲᑎᓐᖓᔪᑦ ᐊᑯᕐᖓᓐᓂ;
15ᑕᑯᓚᐅᕋᒥᐅᒃ ᑕᕾᖅᓯᕐᕕᐅᑉ ᐱᐅᓂᖓ, ᓄᓇᓗ ᓮᓕᓇᖅᓗᓂ;
ᑕᕝᕙ ᐅᑯᕗᖅ ᓇᖕᒥᖅᑕᐅᔪᒪᓪᓗᓂ,
ᓯᐊᓛᖅᑕᕆᔭᐅᓪᓗᓂᓗ ᐊᒃᓱᕉᑦᔭᐅᓪᓗᓂ ᐱᓇᓱᐊᖅᑎᑕᐅᓕᖅᐳᖅ.
16ᑖᓐ ᐃᓄᖁᑎᒥᓂᒃ ᐊᐅᓚᑦᓯᔪᒫᖅᐳᖅ
ᐃᓴᕆᐊᓕᐅᑉ ᑭᖑᕚᖏᓐᓄᑦ ᐃᓚᒋᔭᐅᔪᑎᑐᑦ.
17ᑖᓐ ᖁᒡᓗᒋᐊᑎᑐᑦ ᑍᒤᑦᓱᒫᖅᐳᖅ ᐊᖅᑯᑎᒥ,
ᐊᖅᑯᑎᐅᑉ ᓴᓂᐊᓂ ᖁᒡᓗᒋᐊᑎᑐᑦ ᑐᖁᓐᓇᖅᑐᓕᒃᑎᑐᑦ,
ᕿᒻᒥᕐᔪᐊᑦ ᑭᖕᒥᖏᑎᒍᑦ ᑮᖃᑦᑕᕈᒫᖅᐰᑦ,
ᐃᑭᒪᔪᑦ ᓂᕕᖅᓗᑎᒃ ᑲᑕᖃᑦᑕᖁᓪᓗᒋᑦ.
18ᐊᑕᓃᖅ, ᐱᐅᓕᒃᓯᓃᑦ ᐅᑕᖅᑭᕙᕋ.
19ᒑᑎ ᕿᒻᒥᕐᔪᐊᒦᑦᑐᓄᑦ ᓵᓚᖃᕆᐊᖅᑐᖅᑐᓄᑦ ᑎᑭᑕᐅᔪᒫᖅᐳᖅ,
ᑖᑦᓱᒪᓕ ᑭᖕᒥᖏᑎᒍᑦ ᐱᒋᐊᖅᓗᓂᒋᑦ ᓵᓚᒋᔪᒫᖅᐰᑦ.
20ᐋᓱᕆᒥᑦ ᓂᕿᒃᓴᑦ ᒪᒪᖅᑐᐊᓘᔪᒫᖅᐳᑦ,
ᓂᕿᒃᓴᓕᐅᕈᒫᖅᐳᕐᓗ ᐊᖓᔪᖅᑳᕐᔪᐊᑉ ᒪᒪᕆᔭᖏᓐᓂᒃ.
21ᓈᑉᑕᓕ ᑐᒃᑑᔭᑎᑐᑦ ᐊᕐᖕᓇᓪᓗᒃᑎᑐᑦ ᐸᖓᓕᒃᑐᑐᑦ ᑍᒤᑉᐳᖅ,
ᕿᑐᕐᖏᐅᖅᓗᓂᓗ ᓄᕐᕋᕐᖕᓂᒃ ᓇᒡᓕᖕᓇᖅᑐᓂᒃ.
22ᔫᓯᐱ ᐊᑭᕉᕗᖅ ᐸᐅᕐᖓᖃᑦᓯᐊᖅᑐᖅ,
ᐊᕙᓚᖓᔪᖅ ᐸᐅᕐᖓᖃᑦᓯᐊᖅᑐᖅ ᐃᒥᖅᑕᕐᕕᐅᑉ ᓵᓂᐊᓂ;
ᑖᑦᓱᒪ ᐊᕙᓚᖓᔪᖏᑦ ᓴᓂᕋᕐᔪᐊᑉ ᐅᖓᑖᓄᐊᖓᕗᑦ.
23ᐱᓯᒃᓴᖅᑏᑦ ᓂᑲᒍᓱᒐᑎᒃ ᑖᑦᓱᒥᖓ ᐱᒋᐊᖅᐳᑦ,
ᐱᓯᒃᑖᖅᐹᑦ, ᐊᒃᓱᕉᑎᓪᓗᒍ;
24ᑖᑦᓱᒪᓕ ᐱᑎᒃᓯᖓᑕ ᓴᓐᖏᓂᖓ ᓱᕐᕋᒃᑕᐅᓐᖏᓚᖅ,
ᑖᑦᓱᒪ ᑕᓕᖏᒃ ᐃᕾᓕᑎᑕᐅᓯᒪᖕᒪᑎᒃ ᐊᔪᒐᖃᖏᑦᑑᑉ ᐊᒡᒐᖏᓐᓄᑦ ᔧᑰᑉ ᒎᑎᖓᓄᑦ
ᓰᐱᓕᕆᔨᐅᑉ ᐊᑎᖓᓂᑦ, ᐃᓴᕆᐊᓕᐅᑉ ᕾᖅᑐᖓᓂᑦ,
25ᐊᑖᑕᕕᑦ ᒎᑎᖓᑕ ᐃᑲᔪᕈᒫᖅᐹᑎᑦ,
ᐊᔪᒐᖃᖏᑦᑑᓪᓗ ᑖᑦᓱᒪ ᒎᑎᐅᑉ ᓮᒻᒪᖅᑎᑦᓱᒫᖅᐹᑎᑦ
ᓮᒻᒪᖅᑎᑦᓯᓂᕐᖕᒧᑦ ᕿᓚᖕᒥᑦ ᖁᑦᓯᒃᑐᒥᑦ ᐱᔪᒧᑦ,
ᓮᒻᒪᖅᑎᑦᓯᓂᕐᖕᒧᑦ ᐃᑎᔪᒧᑦ ᐃᓗᐊᓂ ᐃᑎᔪᒥ ᐃᓂᖃᖅᑐᒧᑦ,
ᓮᒻᒪᖅᑎᑦᓯᓂᕐᖕᒧᑦ ᐃᕕᐊᖏᕐᖕᓂᑦ ᐃᒡᓕᐊᕐᖕᓂᓪᓗ ᐱᔪᒧᑦ.
26ᐊᑖᑕᕕᑦ ᓮᒻᒪᖅᑎᑦᓯᓂᖓ ᐊᔪᖏᓐᓂᖅᓴᐅᕗᖅ ᖃᖅᑲᑐᖄᓗᐃᑦ ᐃᓱᖃᖏᑦᑐᒧᑦ ᓮᒻᒪᖅᑎᑦᓯᓂᖓᓂᑦ,
ᐃᓱᖃᖏᑦᑐᒧᑦ ᐱᖑᐊᓗᐃᑦ ᐱᒃᓴᖃᕐᖕᓂᐊᓗᖏᓐᓂᑦ;
ᑖᒃᑯᐊ ᔫᓯᐱᐅᑉ ᓂᐊᖁᖓᓃᑦᓴᕆᐊᖃᖅᐳᑦ,
ᖃᐅᖓᓃᓪᓗᑎᒡᓗ ᖃᑕᓐᖑᑎᒥᓂᑦ ᐊᕕᓯᒪᓚᐅᖅᑐᒥᑦ.
27ᐱᓐᔭᒥᓂ ᐊᒪᕉᕗᖅ ᐃᖅᓯᓇᖅᑐᖅ,
ᐅᓪᓛᒃᑯᑦ ᑐᖁᑕᒥᓂᒃ ᓂᕆᔪᑐᑦ,
ᐅᓐᓄᖕᒪᑦ ᐱᔭᕕᓂᕐᖕᒥᓂᒃ ᑐᓂᐅᖅᑬᔪᑐᑦ.”
28ᑖᒃᑯᐊ ᑕᕝᕙ ᐃᓴᕆᐊᓕᐅᑉ ᑭᖑᕚᖏᑦ 12, ᐊᑖᑕᖓᑕᓗ ᑍᒫᒃ ᐅᖃᓪᓚᒡᕕᒋᓚᐅᖅᐰᑦ ᓮᒻᒪᖅᑎᓐᓇᒥᒋᑦ; ᑕᒪᕐᖕᒥᒡᓗ ᓮᒻᒪᖅᑎᓚᐅᖅᐰᑦ ᐊᑐᓂᑦ ᐃᒻᒥᒃᑯᑦ ᐊᑐᒐᒃᓴᖏᓐᓂᒃ.
ᔧᑰᑉ ᑐᖁᓂᖓ ᐃᓗᕕᖅᑕᐅᓂᖓᓗ
29ᑕᕝᕙ ᐱᖁᓪᓗᒋᑦ ᐅᖃᐅᑎᕔᑦ, “ᐃᓕᔭᐅᔭᕆᐊᖃᖅᐳᖓ ᐃᓅᖃᑎᒋᓚᐅᖅᑕᑦᑎᓐᓄᑦ; ᐃᓗᕕᓛᖅᐸᑦᓯᓐᖓ ᓯᕗᓕᕆᓚᐅᖅᑕᒪ ᐃᓗᕕᖅᑕᐅᕕᒋᓯᒪᔭᖓᓄᑦ ᕾᕈᓱᖕᒧᑦ ᐃᐸᕋᓂᐅᑉ ᕼᐃᑍᑎᒥᐅᑦ ᐱᕈᖅᓰᕕᖓᓄᑦ. 30#ᒨᓯᓯ ᓯᕗᓪᓖᑦ 23:3-20.ᕾᕈᓱᖕᒧᑦ ᐱᕈᖅᓰᕕᖕᒧᑦ ᒪᒃ-ᐲᓚᒦᑦᑐᒧᑦ, ᓄᓇᐅᑉ ᒪᒻᕆᐅᑉ ᖃᓂᒋᔭᖓᓃᑦᑐᒧᑦ, ᑬᓇᓂᐅᑉ ᓄᓇᖓᓃᑦᑐᒧᑦ, ᐂᑉᕋᕼᐋᒻ ᓂᐅᕕᐊᕆᓚᐅᖅᑕᖓᓄᑦ ᐃᓗᕕᖃᕐᕕᒃᓴᐅᖁᓪᓗᒍ ᑭᖑᕚᒥᓄᓪᓗ ᐃᐸᕋᓂᐅᑉ ᕼᐃᑍᑎᒥᐅᑦ ᐱᕈᖅᓰᕕᖓᓂ. 31#ᒨᓯᓯ ᓯᕗᓪᓖᑦ 25:9,10; ᒨᓯᓯ ᓯᕗᓪᓖᑦ 35:29.ᑕᕝᕙᓂ ᐂᑉᕋᕼᐋᒻ ᐃᓗᕕᖅᑕᐅᓯᒪᖕᒪᑦ ᓵᕋᓗ ᑖᑦᓱᒪ ᓄᓕᐊᖓ; ᑕᕝᕙᓂᓗ ᐂᓴᑭ ᐃᓗᕕᖅᑕᐅᓯᒪᒋᓪᓗᓂ ᓄᓕᐊᖓᓗ ᕇᐱᑲ; ᑕᕝᕙᓂᓗ ᐃᓗᕕᓚᐅᕆᕙᕋ ᓕᐊ. 32ᑖᓐᓇ ᐱᕈᖅᓰᕕᑦ ᕾᕈᓱᖓᓗ ᑕᕝᕙᓃᑦᑐᖅ ᓂᐅᕕᖅᑕᐅᓯᒪᖕᒪᑦ ᕼᐃᑍᑎᒥᐅᓂᑦ.” 33#ᐋᐴᓯᑕᓖᑦ 7:15.ᔧᑰᓪᓗ ᐃᕐᖕᓂᓂ ᐱᖁᔨᓂᕆᔭᒥᓂᒃ ᐅᖃᐅᑎᔭᕇᕋᒥᒋᑦ, ᐃᑎᒐᓂ ᐃᒡᓕᕐᖕᒧᐊᖅᑎᑉᐰᑦ, ᐊᓂᕐᖕᓇᒋᖅᓗᓂᓗ, ᐃᓚᓕᐅᑎᓪᓗᓂᓗ ᐃᓅᖃᑎᕕᓂᕐᖕᒥᓄᑦ.
Currently Selected:
ᒨᓯᓯ ᓯᕗᓪᓖᑦ 49: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.