ᐂᒨᓯᐅᑉ ᐊᒡᓚᖏᑦ 9
9
ᐊᑕᓂᐅᑉ ᐃᖅᑲᖅᑐᐃᓂᖓ
1ᐊᑕᓂᖅ ᑕᑯᓚᐅᖅᐸᕋ ᓇᖏᖅᑐᖅ ᑐᓂᕐᕈᓯᕐᕕᐅᑉ ᓴᓂᐊᓂ, ᐅᖃᖅᓗᓂᓗ, “ᑐᒃᓯᐊᕐᕕᒡᔪᐊᑉ ᓱᑲᖏᑕ ᓄᕗᖏᑦ ᐊᓇᐅᒃᑭᑦ ᑐᓐᖓᕕᖓ ᓴᔪᖁᓪᓗᒍ, ᑖᒃᑯᓄᖓᓗ ᐃᓄᓕᒫᑦ ᓂᐊᖁᖏᑦ ᓯᖁᒥᑕᐅᖁᓪᓗᒋᑦ, ᐊᒥᐊᒃᑯᖏᓪᓗ ᑐᖁᑦᓱᒫᖅᐸᒃᑲ ᓴᕕᒡᔪᐊᒧᑦ; ᐊᑕᐅᓯᕐᖕᒥᒡᓘᓐᓃᑦ ᕿᒫᔪᖃᕐᖕᓂᐊᓐᖏᓚᑦ, ᓇᓪᓕᐊᓐᓂᒡᓘᓐᓃᑦ ᐊᓐᓇᒃᑐᖃᕐᖕᓂᐊᕋᓂ. 2ᐃᑎᖅᓴᓕᐅᕋᓗᐊᖅᐸᑕᓗ ᑐᖁᖓᔪᑦ ᐃᓂᖓᓐᓄᑦ, ᑍᑲᓐᖓᑦ ᑎᒍᔪᒫᖅᐸᒃᑲ; ᒪᔪᕋᓗᐊᖅᐸᑕᓗ ᕿᓚᖕᒧᑦ ᑕᕝᕙᓐᖓᑦ ᐊᖅᑲᖅᑎᑦᓱᒫᖅᐸᒃᑲ. 3ᐃᔨᕆᐊᖅᑐᕋᓗᐊᖅᐸᑕᓗ ᖃᖅᑲᐅᑉ ᑳᕐᒥᐅᓕᐅᑉ ᖄᖓᓄᑦ, ᕿᓂᖅᓗᒋᑦ ᓇᓂᔪᒫᖅᐸᒃᑲ ᑎᒍᓗᒋᓪᓗ; ᐃᔨᕋᓗᐊᖅᐸᑕᓗ ᐃᒪᕕᐅᑉ ᐃᖅᑲᖓᓄᑦ, ᑍᑯᖓ ᖁᒡᓗᒋᐊᖅ ᑎᓕᔪᒫᖅᐸᕋ, ᑖᑦᓱᒪᓗ ᑮᔪᒫᖅᐰᑦ. 4ᑎᒍᔭᐅᒐᓗᐊᖅᐸᑕᓗ ᐊᑭᕋᒥᖕᓄᑦ, ᐱᖁᔨᔪᒫᖅᐳᖓ ᓴᕕᒡᔪᐊᒥᒃ, ᑖᑦᓱᒪᓗ ᑐᖁᑦᓱᒫᖅᐰᑦ; ᑕᑯᓐᓇᕈᒫᖅᐸᒃᑲᓗ ᐱᐅᖏᑦᑐᒧᑦ ᐱᒋᐊᕈᒪᓗᒋᑦ ᐱᐅᔪᒨᖏᑦᑐᖅ.”
5ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑕ ᒎᑎᐅᑉ,
ᓄᓇᕐᔪᐊᖅ ᐊᒃᑐᕐᖕᒪᒍ ᐊᐅᒃᐳᖅ,
ᓄᓇᖃᖅᑐᓪᓗ ᑕᕝᕙᓂ ᑕᒪᕐᖕᒥᒃ ᐃᓚᓐᖓᖅᑐᑐᑦ ᕿᐊᓕᖅᐳᑦ,
ᓄᓇᓕᒫᖅ ᑰᒃᑐᑦ ᓁᓕᑐᑦ ᖄᒥᑦᑐᑐᑦ ᑍᒤᓕᖅᐳᖅ;
ᐃᒤᕐᖕᒥᓗᓂᓗ ᐄᑦᔨᑉᑎᐅ ᑰᖓᑐᑦ ᓁᓕᑐᑦ.
6ᑖᓐᓇ ᖁᑦᓯᖕᓂᖅᓴᒥ ᐃᓂᒃᓴᒥᓂᒃ ᐃᒡᓗᕈᓯᓕᐅᖅᑐᖅ ᕿᓚᖕᒥ,
ᓄᓇᕐᔪᐊᕐᖕᒥᒃ ᑐᓐᖓᕕᓕᐅᖅᐹ;
ᕾᖁᔨᕗᖅ ᐃᒪᕐᖕᒥᒃ ᐃᒪᕕᖕᒥᑦ,
ᑯᕕᓪᓗᒍᓗ ᓄᓇᕐᔪᐊᑉ ᖄᖓᓄᑦ.
ᑖᓐᓇ ᐊᑕᓂᕐᖕᒥᒃ ᐊᑎᖃᖅᐳᖅ!
7ᐊᑕᓂᖅ ᐅᖃᖅᐳᖅ, “ᐃᓴᕆᐊᓕᒥᐅᑦ, ᐃᑎᐅᐱᐊᒥᐅᓄᑦ ᐊᑦᔨᐅᓐᖏᑎᑕᐅᓇᓱᒋᕕᓰ ᐅᕙᓐᓄᑦ? ᐊᐅᓪᓚᖅᑎᓚᐅᓐᖏᓚᑦᓰ ᐄᑦᔨᑉᑎᒥᑦ, ᑍᒫᒃᑕᐅᖅ ᐱᓕᔅᑍᓂᒥᐅᑦ ᑲᑉᕼᐊᑐᐊᕆᒥᑦ, ᓯᕆᐊᒥᐅᓪᓗ ᑭᕆᒥᑦ?” 8ᑕᑯᒋᑦ, ᐊᑕᓂᐅᑉ ᒎᑎᐅᑉ ᐊᖓᔪᖅᑳᐅᕕᒃ ᐊᔪᖅᑐᓕᔪᖅ ᑕᑯᓐᓇᖅᐹ, “ᓄᖑᑎᑦᓱᒫᖅᐸᕋᓗ ᐊᖓᔪᖅᑲᐅᕕᒃ ᓄᓇᕐᔪᐊᒥᑦ; ᔧᑰᓪᓕ ᑭᖑᕚᖏᓐᓂᒃ ᓄᖑᑎᑦᓯᑦᓯᐊᒻᒪᕆᖕᓂᐊᓐᖏᓚᖓ,” ᐊᑕᓂᖅ ᐅᖃᖅᐳᖅ.
9“ᓱᓕᓗᖓ ᐱᖁᔨᓂᐊᖅᐳᖓ, ᐃᓴᕆᐊᓕᒥᐅᑦ ᐊᐅᓚᑎᑦᓱᒫᖅᐸᒃᑲ ᐃᓅᖃᑎᒌᒡᔪᐊᑦ ᐊᑯᕐᖓᓐᓂ ᓂᐊᖂᔭᒃᓴᑎᑐᑦ ᓴᓃᔭᖅᑕᐅᔪᑎᑐᑦ ᐃᕕᒃᓱᒐᕐᖕᓂᑦ, ᐊᒡᓛᑦ ᓴᓃᑦ ᒥᑭᓐᓂᖅᐹᖓ ᑲᑕᖕᓂᐊᓐᖏᓚᖅ ᒪᓂᖅᑲᒧᑦ. 10ᐃᓄᖁᑎᓐᓂ ᐊᔪᖅᑐᓕᔪᓕᒫᑦ ᑐᖁᔪᒫᖅᐳᑦ ᓴᕕᒡᔪᐊᒧᑦ, ᐃᒫᒃ ᐅᖃᖅᑐᑦ, ‘ᐱᐅᖏᑦᑐᒧᑦ ᐊᖑᔭᐅᓂᐊᓐᖏᓚᒍᑦ ᑎᑭᑕᐅᓂᐊᓐᖏᓚᒍᓪᓘᓐᓃᑦ.’”
ᐃᓴᕆᐊᓕᐅᑉ ᐋᖅᑭᒃᑕᐅᓛᕐᖕᓂᖓ
11 #
ᐋᐴᓯᑕᓖᑦ 15:16-18. ᐊᑕᓂᖅ ᐅᖃᖅᐳᖅ, “ᐅᓪᓗᒥ ᑍᑲᓂ ᑍᕕᑎᐅᑉ ᐊᖓᔪᖅᑲᐅᕕᖓ ᑲᑕᒃᓯᒪᔪᖅ ᖃᕝᕕᖅᑎᑦᓱᒫᖅᐸᕋ, ᓱᕋᒃᓯᒪᔪᓪᓗ ᐊᖅᑭᒃᓲᖅᓗᒋᑦ, ᐅᕐᕈᓯᒪᔪᓪᓗ ᒪᑭᑎᓪᓗᒋᑦ, ᐱᐅᓯᕆᓚᐅᖅᓯᒪᔭᖏᑎᑐᓪᓗ ᐅᑎᖅᑎᓪᓗᒋᑦ. 12ᓄᓇᑖᖁᓪᓗᒋᑦ ᐄᑐᒥᐅᑉ ᓄᓇᖓᑕ ᐊᒥᐊᒃᑯᖓᓂᒃ, ᐃᓅᖃᑎᒌᒡᔪᐊᓕᒫᓪᓗ ᐊᑎᒃᑯᑦ ᕾᖁᔭᐅᓯᒪᔪᑦ,” ᐊᑕᓂᖅ ᐅᖃᖅᐳᖅ ᑕᒪᑐᒥᖓ ᑍᒤᑎᑦᓯᔪᖅ.
13ᐊᑕᓂᖅ ᐅᖃᖅᐳᖅ, “ᑕᑯᒋᑦ ᐅᓪᓗᐃᑦ ᕾᕗᑦ,
ᐱᕈᖅᓰᕕᖕᒥᒃ ᒪᒃᐱᖅᑎᕆᔪᖅ ᑲᑎᖅᓱᐃᔪᒥᒃ ᐊᖑᓯᔪᒫᖅᐳᖅ.
ᐸᐅᕐᖓᓂᒡᓗ ᑐᓪᓕᕋᖅᓗᒋᑦ ᕔᓂᓕᐅᖅᑐᖅ ᐊᖑᒻᒪᑎᓕᖅᓗᓂ ᐱᕈᖅᓯᐊᒃᓴᓂᒃ ᑲᓐᖓᖅᓱᐃᔪᒥᒃ.
ᖃᖅᑬᓪᓗ ᑰᒐᕈᒫᖅᐳᑦ ᕔᓂᒥᒃ ᓰᕐᖕᓇᖅᑐᒥᒃ, ᐱᖑᓕᒫᓪᓗ ᑰᖃᓯᐅᑎᓕᖅᓗᑎᒃ.
14ᐃᓴᕆᐊᓕᒥᐅᑦ ᐃᓄᖁᑎᒃᑲ ᐅᑎᖅᑎᑦᓱᒫᖅᐸᒃᑲ ᓄᓇᖏᓐᓄᑦ,
ᐃᒡᓗᒐᓮᓪᓗ ᓱᕋᒃᓯᒪᔪᑦ ᐋᖅᑭᒃᓱᕈᒫᖅᐰᑦ ᐃᓂᒋᓕᖅᓗᒋᓪᓗ;
ᐱᕈᖅᓰᔪᒫᖅᐳᓪᓗ ᕔᓂᒃᓴᓂᒃ ᐃᑦᓯᖏᓐᓂᒡᓗ ᐃᒥᖅᓗᑎᒃ,
ᐱᕈᖅᓰᕕᓕᐅᕈᒫᖅᐳᑦ ᐱᕈᖅᑐᖏᓐᓂᒡᓗ ᓂᕿᖃᖅᓗᑎᒃ.
15ᓄᓇᖏᓐᓄᑦ ᐃᓕᔪᒫᖅᐸᒃᑲ ᑕᕝᕙᓐᖓᓪᓗ ᐊᒧᔭᐅᓂᐊᕈᓐᓃᖅᓗᑎᒃ,
ᓄᓇᒥᑦ ᑐᓂᔭᓐᓂᑦ ᑖᒃᑯᓄᖓ,” ᐊᑕᓂᖅ ᒎᑎᓯ ᐅᖃᖅᐳᖅ.
Currently Selected:
ᐂᒨᓯᐅᑉ ᐊᒡᓚᖏᑦ 9: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.