ᓴᒧᐃᓕ ᐂᑉᐸᖏᑦ 24
24
ᑍᕕᑎᐅᑉ ᓈᓮᑎᑦᓯᓂᖓ
ᑯᕉᓂᑲ ᓯᕗᓪᓖᑦ 21:1-27
1ᐊᑕᓂᖅ ᓂᓐᖓᒃᑎᑕᐅᓚᐅᕆᕗᖅ ᐃᓴᕆᐊᓕᒥᐅᓄᑦ, ᑍᕕᑎᓗ ᖁᕕᐊᓇᖏᑦᑐᒥᒃ ᓴᖅᑭᑎᑦᓯᑎᓚᐅᖅᐹ ᑖᒃᑯᓄᖓ, ᐅᖃᐅᑎᓪᓗᒍ, “ᐂᓕᕆᑦ ᐃᓴᕆᐊᓕᒥᐅᓪᓗ ᔫᑕᒥᐅᓪᓗ ᐃᓄᖏᑦ ᓈᓴᕆᐊᖅᑐᒃᑭᑦ.” 2ᑕᕝᕙ ᑍᕕᑎ ᐅᖃᖅᐳᖅ ᔪᐊᐱᒧᑦ ᐅᓇᑕᖅᑐᒃᓮᑦ ᐊᖓᔪᖅᑳᖓᓐᓄᑦ, “ᐂᓕᕆᑦ ᐊᖓᔪᖅᑳᖁᑎᑎᑦ ᐃᓚᒋᓗᒋᑦ ᐃᓴᕆᐊᓕᒥᐅᑉ ᑭᖑᕚᖏᓐᓄᑦ ᓄᓇᓖᑦ ᑖᓐᒥᑦ ᐱᐊᕐᓯᐸᒧᑦ ᑎᑭᓪᓗᒋᑦ, ᐃᓄᐃᑦ ᓈᓴᖅᓗᒋᑦ, ᖃᐅᔨᔪᒪᒐᒪ ᖃᑦᓯᐅᖕᒪᖔᑕ.”
3ᔪᐊᐱᓕ ᑭᐅᕗᖅ ᐊᖓᔪᖅᑳᕐᔪᐊᒧᑦ, “ᐊᖓᔪᖅᑳᕐᔪᐊᖅ, ᐊᑕᓂᐅᑉ ᒎᑎᕕᑦ ᐃᓴᕆᐊᓕᒥᐅᑦ ᐃᓄᖏᑦ ᐅᓄᖅᓯᒋᐊᖅᑎᓪᓕᒋᑦ 100ᐃᖅᓱᖅᓗᒋᑦ, ᐃᓅᓗᑎᑦ ᓱᓕ ᑕᑯᖁᓪᓗᑎᑦ; ᓱᖕᒪᓪᓕ ᐊᖓᔪᖅᑳᕐᔪᐊᕋ ᑍᒤᓕᐅᖁᔨᕚ?” 4ᐊᖓᔪᖅᑳᕐᔪᐊᓪᓕ ᔪᐊᐱᒃᑯᑦ ᐊᖓᔪᖅᑳᖁᑎᖏᓪᓗ ᐱᖁᔨᓂᕐᖕᒥᓂᒃ ᒪᓕᒃᑎᓚᐅᖅᐰᑦ. ᑕᕝᕙᓐᖓᑦ ᓇᔪᖅᑕᖓᓂᑦ ᐊᐅᓪᓚᖅᐳᑦ ᐃᓴᕆᐊᓕᒥᐅᑦ ᐃᓄᖏᑦ ᓈᓴᕆᐊᖅᑐᖅᓗᒋᑦ.
5ᔪᐊᕐᑕᓂᐅᑉ ᑰᖓᓂᒃ ᐃᑳᕋᒥᒃ ᑕᖕᒫᓚᐅᖅᐳᑦ ᐊᕈᐃᕆᐅᑉ ᓯᕿᓂᖓᓂ, ᐃᒡᓗᒐᓴᒡᔪᐊᓂ ᓇᖅᓴᐅᑉ ᕿᑎᐊᓃᑦᑐᒥ, ᒑᑦ ᓄᓇᖓᓂᑦ ᑍᑲᓐᖓᑦ ᐱᓪᓗᑎᒃ ᔧᔨᕆᒧᐊᓚᐅᖅᐳᑦ. 6ᑲᔪᓯᓪᓗᑎᒡᓗ ᒋᓕᐊᑎᒧᑦ, ᑲᑎᓯᒧᑦ ᕼᐃᑍᑎᒥᐅᑦ ᓄᓇᖓᓄᑦ; ᑕᕝᕙᓐᖓᑦ ᑖᓐᒨᓚᐅᖅᐳᑦ, ᑖᓐᒥᓪᓗ ᓴᖑᓪᓗᑎᒃ ᓮᑐᓂᒧᐊᓚᐅᖅᐳᑦ. 7ᑕᕝᕙᓐᖔᖅᓗᑎᒃ ᐃᒡᓗᒐᓴᖕᓄᑦ ᓴᐴᓗᑕᓕᖕᒧᑦ ᑍᕆᒧᐊᓚᐅᖅᐳᑦ, ᑲᔪᓯᓪᓗᑎᒃ ᐃᒡᓗᒐᓴᖕᓄᑦ ᕼᐃᕔᑎᒥᐅᓄᑦ ᑬᓇᓂᒥᐅᓄᓪᓗ; ᑭᖑᓪᓕᖅᐹᒥᒡᓗ ᓂᒋᑉᒧᑦ, ᔫᑕᐅᑉ ᓄᓇᖓᓄᐊᓚᐅᖅᐳᑦ ᐱᐊᕐᓯᐸᒧᑦ. 8ᓄᓇᓕᓕᒫᓂᒃ ᐅᐸᒍᑎᔭᕇᕋᒥᒃ, ᐅᑎᓚᐅᖅᐳᑦ ᔨᕉᓴᓕᒧᑦ ᑕᖅᑮᑦ 9 ᐅᓪᓗᐃᓪᓗ 20 ᐊᓂᒍᖅᑎᓪᓗᒋᑦ. 9ᑕᕝᕙ ᔪᐊᐱ ᐊᖓᔪᖅᑳᕐᔪᐊᕐᖕᒧᑦ ᐅᖃᕆᐊᖅᑐᖅᐳᖅ ᐊᖑᑏᑦ ᐅᓇᑕᕈᓐᓇᖅᑐᑦ ᐅᓄᕐᖕᓂᖏᓐᓂᒃ: 800,000ᐃᑦ ᐃᓴᕆᐊᓕᒥ ᐅᓇᑕᕈᓐᓇᖅᐳᑦ, 500,000ᐃᓪᓗ ᔫᑕᒥ ᐅᓇᑕᕈᓐᓇᕆᓪᓗᑎᒃ.
10ᑍᕕᑎᓕ ᓈᓮᑎᑦᓯᔭᕇᕋᒥ ᐃᓗᒥᒍᑦ ᐋᓐᓂᐊᓂᕐᖕᒥᒃ ᐃᒃᐱᖕᓂᐊᓕᓚᐅᖅᐳᖅ, ᐊᑕᓂᕐᖕᒧᓪᓗ ᐅᖃᖅᓗᓂ, “ᐱᐅᖏᑦᑐᐊᓗᖕᒥᒃ ᐊᔪᖅᑐᓕᓯᒪᕗᖓ ᑍᒤᓕᐅᖅᑎᑦᓯᓂᓐᓄᑦ. ᒫᓐᓇᓕ ᐊᑕᓃᖅ ᐃᓱᒪᒋᔪᓐᓁᕐᕕᒋᓚᐅᓐᖓ ᐱᐅᖏᑦᑐᓕᓯᒪᓂᓐᓂᑦ; ᓯᓔᑦᑐᐊᓗᖕᒥᒃ ᐱᓇᓱᐊᖅᓯᒪᒐᒪ.”
11ᖃᐅᑎᓪᓗᒍ ᐅᓪᓛᒃᑯᑦ ᑍᕕᑎ ᒪᑭᒻᒪᑦ, ᐊᑕᓂᖅ ᐅᖃᖅᐳᖅ ᒑᑦᒧᑦ, ᑍᕕᑎᐅᑉ ᐅᖃᖅᑎᖓᓄᑦ ᐅᖃᖅᓗᓂ, 12“ᑍᕕᑎᒧᐊᖅᓗᑎᑦ ᐅᖃᐅᑎᔭᖅᑐᓚᐅᕈᒃ, ‘ᐊᑕᓂᖅ ᐃᒫᒃ ᐅᖃᖅᐳᖅ, ᐱᖓᓱᓂᒃ ᓇᓖᕌᖅᑎᓐᓂᐊᕋᒃᑭᑦ; ᐊᑕᐅᓯᕐᖕᒥᒃ ᓂᕈᐊᕐᖕᓂᐊᖅᐳᑎᑦ, ᐱᓇᓱᐊᕐᖕᓂᐊᕋᒪ ᓂᕈᐊᖅᑕᕐᖕᓂᒃ.’” 13ᑕᕝᕙ ᒑᑦ ᑍᕕᑎᒧᐊᖅᐳᖅ ᐅᖃᐅᑎᓪᓗᒍᓗ, “ᐊᕐᕌᒍᑦ ᐱᖓᓱᑦ ᑳᖕᓇᑐᕐᔪᐊᑦ ᑎᑭᑦᑐᒃᓴᐅᕚᑦ ᐃᓕᖕᓄᑦ ᓄᓇᖕᓄᓪᓗ? ᐅᕝᕙᓗ ᑕᖅᑭᓂᒃ ᐱᖓᓱᓂᒃ ᕿᒫᓯᒪᓗᑎᑦ ᐊᑭᕋᕐᖕᓂᑦ ᐱᔭᐅᓇᓱᐊᖅᑎᓪᓗᑎᑦ? ᐅᕝᕙᓗ ᐅᓪᓗᓂᒃ ᐱᖓᓱᓂᒃ ᖃᓂᒪᓐᓇᖅᑐᒧᑦ ᑎᑭᑕᐅᓗᑎᑦ ᓄᓇᖕᓂ? ᑖᒃᑯᐊ ᐃᓱᒪᒃᓴᖅᓯᐅᕈᑎᒋᓕᒃᑭᑦ, ᐅᖃᐅᑎᓂᐊᖅᐸᕐᖕᒪ ᑭᐅᒍᑎᖕᓂᒃ ᐊᑕᓂᕐᖕᒧᑦ ᐅᕙᓐᓂᒃ ᑎᓕᓯᓚᐅᕐᑐᒧᑦ ᐅᖃᐅᓯᕆᓂᐊᕋᒃᑯ.”
14ᑕᕝᕙ ᑍᕕᑎ ᑭᐅᕗᖅ ᒑᑦᒧᑦ, “ᐊᖏᔪᒥᒃ ᐊᒃᓱᕈᕐᖕᓇᖅᑐᒦᓕᖅᐳᖓ; ᐊᑕᓂᐅᑉ ᓇᖕᒥᓂᖅ ᓱᒋᐊᓕᖅᓕᑎᒍᑦ, ᑖᓐᓇ ᓈᒃᑭᒍᓱᖕᓂᕐᔪᐊᖃᕐᖕᒪᑦ; ᑭᓯᐊᓂᓕ ᐃᓄᖕᓄᑦ ᓱᒋᐊᖅᑕᐅᔪᒪᓐᖏᓚᖓ.” 15ᑍᒤᒻᒪᑦ ᐊᑕᓂᖅ ᖃᓂᒪᓇᖅᑐᒥᒃ ᑎᑭᑎᑦᓯᓚᐅᖅᐳᖅ ᐃᓴᕆᐊᓕᒥᐅᓄᑦ, ᑕᕝᕙᓐᖓᑦ ᐅᓪᓛᒥᑦ ᐱᒋᐊᖅᓗᓂ ᓄᖅᑲᕐᕕᒋᖁᓚᐅᖅᑕᒥᓄᑦ ᑎᑭᓪᓗᒍ; ᑖᓐᒥᑦ ᐱᐊᕐᓯᐸᒧᑦ ᑎᑭᓪᓗᒋᑦ 70,000ᐃᑦ ᐃᓴᕆᐊᓕᒥᐅᑦ ᑐᖁᓚᐅᖅᐳᑦ. 16ᐊᑕᓂᐅᓪᓕ ᐂᖏᓕᖓ ᐊᓯᕈᐃᒋᐊᕐᖕᓂᐊᓕᖅᑎᓪᓗᒍ ᔨᕉᓴᓕᒥᒃ, ᐊᑕᓂᐅᑉ ᐃᓱᒪᓂ ᓴᖑᑎᓚᐅᖅᐹ ᓱᒋᐊᖅᓯᔪᒪᓂᓂ ᐃᓄᖕᓂᒃ, ᐂᖏᓕᓗ ᑐᖁᕅᔪᖅ ᐅᖃᐅᑎᕚ, “ᓄᖅᑲᕆᑦ! ᑍᒪ ᓈᒻᒪᒃᓯᕗᖅ.” ᐂᖏᓕᓗ ᐊᕋᐅᓇᐅᑉ ᓂᐊᑰᔭᒃᓴᓂᒃ ᐃᕖᔧᕕᖓᓃᓚᐅᖅᐳᖅ ᔨᐳᓮᑎᒥᐅᑕᐅᑉ.
17ᑍᕕᑎᐅᓪᓕ ᐂᖏᓕ ᐃᓄᖕᓂᒃ ᑐᖁᕅᔪᖅ ᑕᑯᒐᒥᐅᒃ, ᐊᑕᓂᕐᖕᒧᑦ ᐅᖃᖅᐳᖅ, “ᐅᕙᖓ ᐊᔪᖅᑐᓕᓯᒪᕗᖓ, ᐅᕙᖓ ᐱᐅᖏᑦᑐᓕᓚᐅᖅᐳᖓ; ᐅᑯᐊᓕ ᐃᓄᐃᑦ ᖃᓄᐃᓕᐅᓚᐅᖅᐹ? ᑐᒃᓯᐊᕐᕕᒋᕙᒋᑦ ᐅᕙᓐᓂᒃ ᐃᓚᓐᓂᒡᓗ ᓱᒋᐊᖅᓯᖔᖅᑐᒃᓴᐅᕗᑎᑦ.”
18ᑍᑦᓱᒪᓂᑦᓮᓐᓇᖅ ᒑᑦ ᑍᕕᑎᒧᐊᖅᐳᖅ ᐅᖃᐅᑎᓪᓗᒍᓗ, “ᒪᔪᕋᓚᐅᕆᑦ, ᐊᕋᐅᓇᐅᑉ ᐃᕖᔧᕕᖓᓄᑦ ᔨᐳᓮᑎᒦᑦᑐᒧᑦ, ᑍᑲᓂ ᑐᓂᕐᕈᓯᕐᕕᓕᐅᓕᕆᑦ ᐊᑕᓂᕐᖕᒧᑦ.” 19ᑕᕝᕙ ᑍᕕᑎ ᐂᓚᐅᖅᐳᖅ ᒑᑦ ᐅᖃᐅᓯᖏᑦ ᒪᓕᒡᓗᒋᑦ, ᐊᑕᓂᐅᑉ ᑎᓕᓯᑦᔪᑎᒋᔭᖓᓂᒃ. 20ᐊᕋᐅᓇᓕ ᑕᑯᒐᒥ ᐊᖓᔪᖅᑳᕐᔪᐊᒥᒃ ᐊᖓᔪᖅᑳᖁᑎᖏᓐᓂᒡᓗ ᕾᓕᖅᑐᓂᒃ ᐃᒻᒥᓄᑦ; ᐊᕋᐅᓇ ᐸᕐᕆᐊᓚᐅᖅᐳᖅ, ᐹᒻᒪᒃᓗᓂᓗ ᒪᓂᖅᑲᒧᑦ ᑍᕕᑎᐅᑉ ᓵᖓᓄᑦ. 21ᐊᕋᐅᓇᐅᓪᓗ ᐊᐱᕆᕚ, “ᐊᖓᔪᖅᑳᖅ, ᓱᖕᒪᑦ ᑕᒪᐅᓐᖓᖅᐲᑦ?”
ᑍᕕᑎ ᑭᐅᕗᖅ, “ᓂᐊᖂᔭᒃᓴᓂᒃ ᐃᕖᔧᕕᖕᓂᒃ ᓂᐅᕕᕆᐊᖅᐳᖓ, ᑐᓂᕐᕈᓯᕐᕕᖕᒥᒃ ᓴᓇᔪᒪᓪᓗᖓ ᐊᑕᓂᕐᖕᒧᑦ, ᖃᓂᒻᒪᓯᖅ ᑕᒪᓐᓇ ᐃᓄᖕᓂᑦ ᓄᖅᑲᖅᑎᑕᐅᖁᓪᓗᒍ.”
22ᑕᕝᕙ ᐊᕋᐅᓇ ᑍᕕᑎᒧᑦ ᐅᖃᖅᐳᖅ, “ᐱᒋᓕᕈᖅ ᐊᖓᔪᖅᑳᒃ, ᐃᓱᒪᖅᓱᑎᒋᓗᒍ ᐊᑕᓂᕐᖕᒧᑦ ᑐᓂᕐᕈᓯᓕᕆᑦ ᐃᓱᐊᖅᑑᔪᕆᔭᕐᖕᓂᒃ; ᐅᑯᐊ ᑕᕝᕙ ᐆᒪᔪᐃᑦ ᐃᒻᒧᒃᓯᐅᒊᑦ ᐃᑯᐊᓪᓚᒡᓗᒋᑦ ᑐᓂᕐᕈᑎᒃᓮᑦ; ᐅᑯᐊᓗ ᑕᕝᕙ ᓇᖕᒪᐅᑕᖏᑦ ᓯᖃᓕᑦᓯᕕᐅᓪᓗ ᕿᔪᒃᓴᖏᑦ ᐃᑯᐊᓪᓚᖅᑯᑎᒃᓮᑦ.” 23ᐊᕋᐅᓇᐅᑉ ᑕᒪᕐᖕᒥᒃ ᑕᒪᒃᑯᐊ ᑐᓂᓚᐅᖅᐰᑦ ᐊᖓᔪᖅᑳᕐᔪᐊᕐᖕᒧᑦ ᐅᖃᐅᑎᓪᓗᒍᓗ, “ᐊᑕᓂᐅᑉ ᒎᑎᕕᑦ ᑐᓂᕐᕈᑎᑎᑦ ᓈᒻᒪᒋᓕᒋᑦ.”
24ᐊᖓᔪᖅᑳᕐᔪᐊᕐᓕ ᐊᕋᐅᓇᒧᑦ ᑭᐅᕗᖅ, “ᐊᑭᓕᕐᖕᓂᐊᖅᐸᒃᑲ ᑐᓂᕐᕈᓯᕈᒪᖏᓐᓇᒪ ᐊᑕᓂᕐᖕᒧᑦ ᒎᑎᓐᓄᑦ ᑐᓂᕐᕈᑎᓂᒃ ᐊᑭᖃᖏᑦᑐᓂᒃ.” ᑕᕝᕙ ᑍᕕᑎᐅᑉ ᓂᐅᕕᓚᐅᖅᐹ ᓂᐊᖂᔭᒃᓴᓂᒥᒃ ᐃᕖᔧᕕᒃ ᐃᒻᒧᒃᓯᐅᒊᓪᓗ 50ᓄᑦ ᓯᐅᕕᕆᓄᑦ. 25ᑕᕝᕙᓂᓗ ᑍᕕᑎ ᑐᓂᕐᕈᓯᕐᕕᖕᒥᒃ ᐊᑕᓂᕐᖕᒧᑦ ᓴᓇᕗᖅ, ᑐᓂᕐᕈᓯᖅᓗᓂᓗ ᐃᑯᐊᓪᓚᑎᑦᓯᓂᕐᖕᒧᑦ ᑐᓂᕐᕈᑎᓂᒃ ᐃᓚᒌᑦᓯᐊᓕᕐᖕᓂᕐᖕᒧᓪᓗ ᑐᓂᕐᕈᑎᒥᒃ. ᐊᑕᓂᐅᓪᓗ ᑐᓂᕐᕈᓯᕈᑎᐅᔪᑦ ᓄᓇ ᐱᓪᓗᒍ ᐃᓚᓕᐅᓚᐅᖅᐰᑦ, ᖃᓂᒻᒪᓯᕐᓗ ᐃᓴᕆᐊᓕᒥᐅᓂ ᓄᖅᑲᖅᑎᓚᐅᖅᐹ.
Currently Selected:
ᓴᒧᐃᓕ ᐂᑉᐸᖏᑦ 24: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.