ᓴᒧᐃᓕ ᐂᑉᐸᖏᑦ 23
23
ᑍᕕᑎᐅᑉ ᐅᖃᐅᓯᖏᑦ ᑭᖑᓪᓕᖅᐹᑦ
1ᑍᕕᑎ ᔨᓯᐅᑉ ᐃᕐᖕᓂᖓ ᑖᓐᓇ ᒎᑎᐅᑉ ᐊᖏᔪᕈᖅᑎᓚᐅᖅᐹ, ᔧᑰᑉ ᒎᑎᖓᑕ ᓂᕈᐊᓚᐅᖅᑕᖓ ᐊᖓᔪᖅᑳᕐᔪᐊᓐᖑᖁᓪᓗᒍ, ᐃᓐᖏᐅᓯᓕᐅᖅᑎᐅᓚᐅᖅᑐᖅ ᐱᐅᔪᐊᓗᖕᓂᒃ ᐃᓴᕆᐊᓕᒥᐅᓄᑦ. ᐅᑯᐊ ᑕᕝᕙ ᑍᕕᑎᐅᑉ ᐅᖃᐅᓯᖏᑦ ᑭᖑᓪᓕᖅᐹᑦ:
2“ᐊᑕᓂᐅᑉ ᐊᓂᕐᖕᓂᖓ ᐅᕙᒃᑯᑦ ᐅᖃᓪᓚᒃᐳᖅ,
ᐅᖃᐅᓯᖏᓪᓗ ᖃᓂᓐᓃᑉᐳᑦ.
3ᐃᓴᕆᐊᓕᐅᑉ ᒎᑎᖓ ᐅᖃᓚᐅᖅᐳᖅ;
ᐃᓴᕆᐊᓕᐅᑉ ᓴᐳᑦᔨᔨᖓ ᐅᕙᓐᓄᑦ ᐅᖃᓚᐅᖅᐳᖅ:
ᐊᖓᔪᖅᑳᕐᔪᐊᖅ ᐊᐅᓚᑦᓯᔪᖅ ᓱᓕᑦᓯᐊᖅᑐᒥᒃ,
ᐊᐅᓚᑦᓯᔪᖅ ᓈᓚᑦᓯᐊᖅᓗᓂ ᒎᑎᒥᒃ,
4ᐅᓪᓛᒻᒪᕆᒃᑯᑦ ᓄᕗᔭᖃᖏᑦᑐᒥ ᓯᕿᓂᕐᖕᒧᑦ ᓄᐃᕕᐅᔪᑐᑦ ᑍᒤᑉᐳᖅ,
ᓯᕿᓂᕐᖕᒧᑦ ᐃᕕᒃᓱᒃᒊᑦ ᕿᓪᓛᒡᒋᖅᑕᖅᑎᑕᐅᔪᑎᑐᑦ ᓯᓚᓗᕋᑖᖅᑎᓪᓗᒍ.
5ᑍᒫᒃ ᒎᑎᐅᑉ ᑭᖑᕚᒃᑲ ᓮᒻᒪᖅᑎᑦᓱᒫᖅᐰᑦ,
ᑍᒫᒃ ᐃᓱᖃᖏᑦᑐᒧᑦ ᐊᖏᕐᕕᒋᓯᒪᖕᒪᖓ,
ᐱᖁᔨᑦᔪᑎᖓ ᑕᒤᑎᒍᑦ ᓱᖁᓯᔪᐃᑦᑑᕗᖅ.
ᑕᒪᓐᓇ ᐱᕙᓪᓕᐊᑎᓯᒪᓐᖏᓚᐅᒃ
ᐃᑲᔪᖅᑕᐅᓂᓕᒫᒃᑲ ᐱᔪᒪᔭᕆᔭᒃᑲᓗ?
6ᒎᑎᖃᖏᑦᑐᓕᒫᓪᓕ ᑲᑭᓪᓚᕐᖕᓇᖅᑎᑐᑦ ᐃᒋᑕᐅᕗᑦ;
ᐊᒃᑐᖅᑕᐅᔪᓐᓇᕐᖕᓂᐊᓐᖏᓚᓪᓗ ᐊᒡᒐᑐᐃᓐᓇᕐᖕᓄᑦ;
7ᐃᓄᖕᒧᑦ ᐊᒃᑐᖅᑕᐅᓂᐊᕈᑎᒃ ᐊᑐᖅᑐᒃᓴᐅᕗᑦ
ᓴᕕᕋᔭᖕᒥᒃ ᓴᓇᕐᕈᑎᒥᒃ ᖃᓗᒋᐊᕐᖕᒥᒡᓗ,
ᐃᑭᑕᐅᓂᐊᕐᖕᒪᑕ ᓄᖑᑕᐅᑦᓯᐊᖅᓗᑎᒃ.”
ᑍᕕᑎᐅᑉ ᐅᓇᑕᖅᑐᒃᓴᖁᑎᖏᑦ ᖃᐅᔨᒪᔭᐅᑦᓯᐊᖅᑐᑦ
ᑯᕉᓂᑲ ᓯᕗᓪᓖᑦ 11:10-41
8ᐅᑯᐊ ᑕᕝᕙ ᑍᕕᑎᐅᑉ ᐅᓇᑕᖅᑐᒃᓴᖁᑎᖏᑦ ᐊᔪᖏᑦᑐᕐᔪᐊᖑᓚᐅᖅᑐᑦ; ᓯᕗᓪᓕᖅᐹᖅ ᔫᓯᑉ-ᐹᔅᓰᐸᔅ ᑖᓐᓇ ᑕ-ᑭᒧᓁᑎᒥᐅᑕᖅ; ᐊᖓᔪᖅᑳᖑᓚᐅᖅᑐᖅ ᐱᖓᓱᓄᑦ; ᐅᓈᕐᖕᒥᓄᑦ ᐅᓇᑕᓚᐅᖅᑐᖅ 800ᓂᒃ ᐊᖑᑎᓂᒃ, ᑐᖁᓪᓗᒋᓪᓗ ᐅᓇᑕᕐᖕᓂᕐᖕᒥ ᐊᑕᐅᓯᕐᖕᒥ.
9ᑖᑦᓱᒪ ᑐᖓᓕᕆᔭᖓ ᑖᒃᑯᓇᓐᖓᑦ ᐊᔪᖏᑦᑐᕐᔪᐊᖑᓚᐅᖅᑐᓂᑦ ᐱᖓᓱᓂᑦ ᐃᓕᓯᕆᐅᕗᖅ ᑐᑑᑉ ᐃᕐᖕᓂᖓ ᐊᕼᐅᕼᐂᒥᐅᑕᖅ. ᑖᓐᓇ ᑍᕕᑎᒥᒃ ᐃᓚᖃᓚᐅᖅᐳᖅ ᐱᓕᔅᑍᓂᒥᐅᓂᒃ ᓵᓐᖓᓯᓪᓗᑎᒃ ᐅᓇᑕᕆᐊᖅᑎᓪᓗᒋᑦ, ᐃᓴᕆᐊᓕᒥᐅᓪᓗ ᐃᓄᖏᑦ ᕿᒫᒃᓯᓚᐅᖅᐳᑦ. 10ᑖᓐᓇ ᕿᒪᒃᓯᓇᓂ ᐃᓂᒥᓂ ᓂᑯᕕᓚᐅᖅᐳᖅ ᐱᓕᔅᑍᓂᒥᐅᓪᓗ ᑐᖁᕋᓚᐅᖅᐰᑦ ᐊᒡᒐᖏᑦ ᑕᖃᓚᐅᖏᓐᓂᖏᓐᓂ, ᓴᕕᒡᔪᐊᖓ ᓂᐱᓐᖓᓕᓚᐅᖅᐳᖅ ᐊᒡᒐᖓᓄᑦ; ᐊᑕᓂᕐᓗ ᐊᖏᔪᒥᒃ ᓵᓚᒃᓴᖅᑎᑦᓯᓚᐅᖅᐳᖅ ᑍᑦᓱᒪᓂ ᐅᓪᓗᒥ; ᐅᓇᑕᖅᑐᒃᓮᓪᓕ ᐅᑎᓚᐅᖅᐳᑦ ᐃᓕᓯᕆᒧᑦ ᐊᓐᓄᕅᔭᖅᓯᔭᖅᑐᑐᐃᓐᓇᓕᖅᓗᑎᒃ ᑐᖁᖓᔪᓂᒃ.
11ᑖᑦᓱᒪ ᑐᖓᓕᒃᑲᓐᓂᐊ ᓵᒻᒪᐅᕗᖅ ᐊᒌᑉ ᐃᕐᖕᓂᖓ ᕼᐊᕋᕅᑎᒥᐅᑕᖅ. ᑍᑦᓱᒪᓂ ᐱᓕᔅᑏᓐᒥᐅᑦ ᑲᑎᖕᒪᑕ ᐱᕈᖅᓰᕕᖕᒧᑦ ᐱᕈᖅᑐᓕᖕᒧᑦ ᓕᕼᐃᒧᑦ; ᐃᓴᕆᐊᓕᒥᐅᑦ ᕿᒫᓚᐅᕐᖕᒪᑕ ᐱᓕᔅᑍᓂᒥᐅᓂᑦ. 12ᑖᓐᓇᓕ ᐃᓂᒥᓂᑦ ᓂᑯᕕᓚᐅᖅᐳᖅ, ᓴᐳᓐᓂᐊᓕᖅᓗᓂᓗ, ᐱᓕᔅᑍᓂᒥᐅᓪᓗ ᑐᖁᕋᓚᐅᖅᐰᑦ; ᐊᑕᓂᕐᓗ ᐊᖏᔪᒥᒃ ᓵᓚᒃᓴᕕᒃᔪᐊᖅᑎᑦᓯᓚᐅᖅᐳᖅ.
13ᑲᑎᖅᓱᐃᕕᒃ ᓇᓪᓕᐅᑎᑎᓪᓗᒍ, ᐱᖓᓱᑦ ᐊᖓᔪᖅᑳᖑᔪᑦ 30ᓂᑦ ᐱᓯᒪᔪᑦ ᑕᐅᓄᖓ ᑍᕕᑎᒧᐊᓚᐅᖅᐳᑦ ᕾᕈᓱᖕᒧᑦ ᐊᑑᓚᒻᒧᑦ, ᐱᓕᔅᑍᓂᒥᐅᑦ ᑕᖕᒫᖅᓯᒪᑎᓪᓗᒋᑦ ᓇᖅᓴᒥ ᕆᐰᒻᒥ. 14ᑍᕕᑎ ᑍᑦᓱᒪᓂ ᖃᖅᑲᒥ ᓴᐴᓗᑕᓕᖕᒦᓚᐅᖅᐳᖅ, ᐱᓕᔅᑍᓂᒥᐅᑦ ᐅᓇᑕᖅᑐᒃᓴᖃᕐᕕᖕᒥᓃᑎᓪᓗᒋᑦ ᐱᑦᓕᐊᒥ. 15ᑍᕕᑎᓗ ᐃᒥᕈᒃᑐᐊᓘᓕᕋᒥ, ᐅᖃᓚᐅᖅᐳᖅ, “ᐃᒥᖅᑎᑕᐅᑦᓴᓚᐅᖅᓚᖓᑐᖅ ᐃᒥᖅᑕᕐᕕᖕᒥᑦ ᐱᑦᓕᐊᑉ ᐃᑎᖅᑕᕐᕕᐊᑕ ᓴᓂᐊᓃᑦᑐᒥᑦ!” 16ᑕᕝᕙ ᐊᖑᑏᑦ ᑖᒃᑯᐊ ᐱᖓᓱᑦ ᐊᔪᖏᑦᑐᐊᓗᐃᑦ ᐱᓕᔅᑍᓂᒥᐅᑎᒎᓚᐅᖅᐳᖅ, ᐃᒥᖅᑕᓚᐅᖅᐳᓪᓗ ᐃᒥᖅᑕᕐᕕᖕᒥᑦ ᐱᑦᓕᐊᒥᑦ ᐃᑎᖅᑕᕐᕕᐅᑉ ᓴᓂᐊᓃᑦᑐᒥᑦ, ᑐᓂᓚᐅᖅᐹᓪᓗ ᑍᕕᑎᒧᑦ. ᑍᕕᑎᐅᓪᓕ ᐃᒥᕈᒪᓚᐅᓐᖏᓛ, ᑯᕕᓚᐅᖅᐹᓕ ᐊᑕᓂᕐᖕᒧᑦ ᑐᓂᕐᕈᑎᒋᓪᓗᒍ. 17ᐅᖃᖅᓗᓂᓗ, “ᐃᒥᕈᓐᓇᓐᖏᑕᕋᐅᓇ ᐊᑕᓃᖅ! ᐃᒥᕋᔭᖅᑑᔮᕋᒪ ᑖᒃᑯᐊ ᐊᖑᑏᑦ ᐊᐅᖏᓐᓂᒃ ᑐᖁᓐᓇᖅᑐᒃᑰᓚᐅᕐᖕᓂᖏᑦ ᐱᓪᓗᒋᑦ!” ᑍᒤᒻᒪᑦ ᐃᒥᕈᒪᓚᐅᓐᖏᓛ. ᑕᒪᒃᑯᐊ ᑕᒪᑦᔭ ᐊᖑᑏᑦ ᑖᒃᑯᐊ ᐊᔪᖏᑦᑐᐊᓗᐃᑦ ᐱᓂᐊᕐᖕᓂᕆᓚᐅᖅᑕᖏᑦ. 18ᐊᐱᓮ ᔪᐊᐱᐅᑉ ᓄᑲᖓ ᔨᕈᐃᐊᐅᑉ ᐃᕐᖕᓂᖓ, ᐊᖓᔪᖅᑳᕆᔭᐅᓛᐅᖅᐳᖅ ᑖᒃᑯᓄᖓ 30ᓄᑦ. ᐅᓈᓂ ᐊᑐᖅᓗᒍ 300ᓂᒃ ᑐᖁᑦᓯᓚᐅᖅᐳᖅ, ᑍᒤᒻᒪᑦ ᖃᐅᔨᒪᔭᐅᒻᒪᕆᓕᓚᐅᖅᐳᖅ ᑖᒃᑯᑎᑐᓇᖅ ᐱᖓᓱᑎᑐᑦ. 19ᐅᐱᒋᔭᐅᓂᖅᓴᐅᓚᐅᖅᐳᖅ ᑖᒃᑯᓇᓐᖓᑦ 30ᓂᑦ, ᑖᒃᑯᓄᖓᓗ ᐊᖓᔪᖅᑳᖅᑖᕆᔭᐅᓚᐅᖅᐳᖅ, ᑭᓯᐊᓂᓕ ᑖᒃᑯᑎᑐᓇᖅ ᐱᖓᓱᑎᑐᑦ ᖃᐅᔨᒪᔭᐅᑦᓯᐊᖅᑎᒋᓚᐅᓐᖏᓚᖅ.
20ᐱᓁᐊᓗ ᔨᕼᐅᐃᐊᑕᐅᑉ ᐃᕐᖕᓂᖓ, ᐃᕐᖕᓂᕆᔭᐅᓚᐅᖅᐳᖅ ᐊᔪᖏᑦᑐᐊᓗᖕᒧᑦ, ᑲᑉᔨᐅᓪᒥᑦ ᐱᓯᒪᔪᖅ, ᐱᓂᐊᕐᖕᓂᖃᓚᐅᖅᐳᖅ ᓯᕘᕋᖏᑦᓯᐊᖅᓗᓂ, ᑐᖁᑦᓯᓚᐅᖅᑐᖅ ᐊᖑᑏᖕᓂᒃ ᒪᕐᕉᖕᓂᒃ ᓛᔭᑎᑑᖅᑑᖕᓂᒃ ᒧᐊᐱᒥᐅᑖᖕᓂᒃ, ᑐᖁᑦᓯᓚᐅᖅᑐᕐᓗ ᓛᔭᒥᒃ ᐃᑎᖅᓴᒦᑦᑐᒥᒃ ᖃᓐᓂᖅᑎᓪᓗᒍ. 21ᐄᑦᔨᑉᑎᒥᐅᑕᒥᒡᓗ ᑐᖁᑦᓯᓚᐅᖅᐳᖅ, ᐊᖑᒻᒥᒃ ᐊᖏᔪᐊᓗᖕᒥᒃ. ᐄᑦᔨᑉᑎᒥᐅᑕᖅ ᖃᓗᒋᐊᕐᖕᒥᓂᒃ ᑎᒍᒥᐊᓚᐅᖅᐳᖅ; ᑖᑦᓱᒪᓕ ᐅᐸᓚᐅᖅᐹ ᐊᔭᐅᑉᐱᐊᓕᔭᖅᓗᓂ, ᐅᓇᑕᖅᓗᓂᐅᒃ ᐄᑦᔨᑉᑎᒥᐅᑕᖅ ᐊᖅᓵᓚᐅᖅᐹ ᖃᓗᒋᐊᖓᓂᒃ, ᑐᖁᓪᓗᒍᓗ ᐅᓈᖓᓄᑦ. 22ᑕᒪᒃᑯᐊ ᐱᓁᐊᐅᑉ ᔨᕼᐅᐃᐊᑕᐅᑉ ᐃᕐᖕᓂᖓᑕ ᐱᓂᐊᕐᖕᓂᕆᓚᐅᖅᐰᑦ, ᑖᓐᓇᑦᑕᐅᖅ ᖃᐅᔨᒪᔭᐅᑦᓯᓚᐅᖅᐳᖅ ᑖᒃᑯᑎᑐᓇᖅ ᐱᖓᓱᑎᑐᑦ ᐊᔪᖏᑦᑐᕐᔪᐊᑎᑐᑦ. 23ᐅᐱᒋᔭᐅᓂᖅᓴᐅᓚᐅᖅᐳᖅ ᑖᒃᑯᓇᓐᖓᑦ 30ᓂᑦ, ᑭᓯᐊᓂᓕ ᑖᒃᑯᓄᖓ ᐱᖓᓱᓄᑦ ᑍᒫᓪᓗᐊᖃᑕᐅᓚᐅᓐᖏᓚᖅ. ᑍᕕᑎᐅᓪᓗ ᓂᕈᐊᓚᐅᖅᐹ ᓴᐳᓐᓂᐊᖅᑎᒥᓄᑦ ᐊᖓᔪᖅᑳᖑᖁᓪᓗᒍ. 24ᐅᑯᐊ 30ᓄᑦ ᐃᓚᒋᔭᐅᓚᐅᖅᐳᑦ; ᐊᓴᕼᐃᐅᓪ ᔪᐊᐱᐅᑉ ᖃᑕᓐᖑᑎᖓ, ᐃᐅᓪᕼᐊᓇᓐ ᑐᑑᑉ ᐱᑦᓕᐊᒥᐅᑕᐅᑉ ᐃᕐᖕᓂᖓ, 25ᓴᒪ ᐃᓕᑲᓗ ᕼᐊᕉᑎᒥᐅᑖᒃ, 26ᕼᐃᓕᔾ ᐱᐅᓪᑍᑎᒥᐅᑕᖅ, ᐂᕋ ᐃᒃᑭᓴᐅᑉ ᐃᕐᖕᓂᖓ ᑎᑯᐊᒥᐅᑕᖅ, 27ᐊᐰᔨᕆ ᐊᓇᑑᑎᒥᐅᑕᖅ, ᒥᐳᓐᓁ ᕼᐅᓴᑍᑎᒥᐅᑕᖅ, 28ᔭᓪᒧᓐ ᐊᕼᐅᕼᐂᒥᐅᑕᖅ, ᒪᕼᐊᕅ ᓂᑐᐸᕼᐊᒥᐅᑕᖅ, 29ᕼᐃᓕᑉ ᐹᓇᐅᑉ ᐃᕐᖕᓂᖓ ᓂᑐᐸᕼᐊᒥᐅᑕᖅ, ᐃᑍ ᕆᐰᑉ ᐃᕐᖕᓂᖓ ᒋᐱᐊᒥᐅᑕᖅ ᐱᓐᔭᒥᓂᐅᑉ ᑭᖑᕚᖏᓐᓂᑦ, 30ᐱᓁᐊ ᐱᕋᑐᓁᒥᐅᑕᖅ, ᕼᐃᑍ ᒑᔅ ᑰᖓᓂᒥᐅᑕᖅ, 31ᐊᐰ-ᐊᐅᓪᐹᓐ, ᐋᕐᐸᑍᑎᒥᐅᑕᖅ, ᐊᔾᒪᕕᑎ ᐸᕼᐅᕆᒻᒥᐅᑕᖅ, 32ᐃᓔᕼᐊᐸ ᓵ-ᐊᓪᐳᓁᒥᐅᑕᖅ, ᔮᓯᓐ ᐃᕐᖕᓂᖏᑕ ᐃᓚᖓᑦ, ᔫᓇᑕᓂ, 33ᓴᒪ ᕼᐊᕋᕅᑎᒥᐅᑕᖅ, ᐊᕼᐂᐊᒻ ᓵᕋᕆᐅᑉ ᕼᐊᕋᕅᑎᒥᐅᑕᐅᑉ ᐃᕐᖕᓂᖓ, 34ᐃᓕᕕᓕᑦ ᐊᕼᐊᔅᐰᑉ ᐃᕐᖕᓂᖓ ᒫᑲᑍᑎᒥᐅᑕᖅ, ᐃᓕᐊᒻ ᐊᕼᐃᑐᐱᓕᐅᑉ ᐃᕐᖕᓂᖓ ᒋᓗᓁᑎᒥᐅᑕᖅ, 35ᕼᐃᔪᕈ ᑳᕐᒥᐅᓪᒥᐅᑕᖅ, ᐹᕅ ᐊᕐᐰᒥᐅᑕᖅ, 36ᐃᒐᐅᓪ ᓁᑕᓂᑉ ᔪᐹᒥᐅᑕᐅᑉ ᐃᕐᖕᓂᖓ, ᐹᓂ ᒐᑍᑎᒥᐅᑕᖅ, 37ᔨᓕᒃ ᐊᒧᓁᑎᒥᐅᑕᖅ, ᓇᕼᐊᕅ ᐱ-ᐊᕌᔅᑕᒥᐅᑕᖅ, ᔪᐊᐱᐅᑉ ᐅᓇᑕᐅᑎᖏᓐᓂᒃ ᑲᒪᔨᐅᓚᐅᖅᑐᖅ ᔨᕈᐃᐊᐅᑉ ᐃᕐᖕᓂᖓ, 38ᐂᕋ ᐃᑕᕅᑎᒥᐅᑕᖅ, ᒐᕆᑉ ᐃᑕᕅᑎᒥᐅᑕᖅ, 39ᔪᕅᐊ ᕼᐃᑍᑎᒥᐅᑕᖅ: ᑖᒃᑯᐊ ᑲᑎᓪᓗᒋᑦ 37ᐅᓚᐅᖅᐳᑦ.
Currently Selected:
ᓴᒧᐃᓕ ᐂᑉᐸᖏᑦ 23: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.