ᓴᒧᐃᓕ ᓯᕗᓪᓖᑦ 1
1
ᐃᐅᓪᑳᓇᐅᑉ ᐃᓚᖏᑕᓗ ᓮᓗᐊᒦᓐᓂᖏᑦ
1ᐊᖑᑎᑕᖃᓚᐅᖅᐳᖅ ᐃᐅᓪᑳᓇᒥᒃ ᐊᑎᓕᖕᒥᒃ, ᐃᕗᕅᑎᐅᑉ ᑭᖑᕚᖏᓐᓂᑦ ᐱᓯᒪᔪᒥᒃ, ᓄᓇᖃᖅᐳᖅ ᓄᓇᓕᖕᓂ ᕋᒪᑍᒻ-ᔫᐱᒻᒥ ᖃᖅᑲᓂ ᐃᕗᕅᑎᒥ, ᔨᕈᕼᐋᒻ ᐃᕐᖕᓂᖓ ᐃᕐᖑᑕᕆᔭᐅᓪᓗᓂᓗ ᐃᓕᕼᐅᒧᑦ, ᑐᕼᐆᑉ ᐃᓚᖏᓐᓄᑦ ᐃᓚᒋᔭᐅᓪᓗᓂ, ᔪᐸᒃᑯᑦ ᐃᓚᖏᑕ ᐃᓚᖏᓐᓄᑦ ᐃᕗᕅᒥᐅᓄᑦ. 2ᐃᐅᓪᑳᓇᓕ ᓄᓕᐊᖃᖅᐳᖅ ᒪᕐᕉᖕᓂᒃ; ᕼᐋᓇᒥᒃ ᐱᓃᓇᒥᒡᓗ. ᐱᓃᓇ ᕿᑐᕐᖓᖃᖅᐳᖅ, ᕼᐋᓇᓕ ᕿᑐᕐᖓᖃᓚᐅᓐᖏᓚᖅ. 3ᐊᕐᕌᒍᑕᒫᓪᓕ ᐃᐅᓪᑳᓇ ᐂᕙᓚᐅᖅᐳᖅ ᕌᒪᒥᑦ ᓮᓗᐊᒧᑦ ᑐᓂᕐᕈᓯᕆᐊᖅᑐᖅᓗᓂ ᑐᒃᓯᐊᕆᐊᖅᓗᓂᓗ ᐊᑕᓂᕐᖕᒧᑦ ᐊᔪᒐᖃᖏᑦᑐᒧᑦ, ᕼᐅᐱᓂ ᐱᓂᕼᐋᓯᓗ ᐃᓔᑉ ᐃᕐᖕᓂᖏᒃ ᐃᓚᒋᒡᓗᒋᒃ, ᑖᒃᑯᐊᒃ ᑐᓂᕐᕈᓯᖅᑎᑦᓯᔨᐅᔫᒃ ᐊᑕᓂᕐᖕᒧᑦ. 4ᑍᒪᓐᖓᑦ ᐃᐅᓪᑳᓇ ᑐᓂᕐᕈᓯᕌᖓᒥ, ᐂᑦᑐᐃᕙᓚᐅᖅᐳᖅ ᑐᓂᔭᒥᑕ ᐃᓚᖓᓂᒃ ᐱᓃᓇᒧᑦ ᕿᑐᕐᖓᖏᓐᓄᓪᓗ. 5ᕼᐋᓇᒧᓪᓕ ᑐᓂᓯᕙᒃᐳᖅ ᐊᑕᐅᓯᖅᓯᐅᑎᒥᒃ, ᓇᒡᓕᒋᒻᒪᕆᒃᑲᓗᐊᖅᓗᒍ ᕼᐋᓇ, ᐊᑕᓂᐅᑉ ᒪᑐᓯᒪᓚᐅᕐᖕᒪᒍ ᐃᒡᓕᐊᖓ. 6ᐱᓃᓇᓗ, ᑖᑦᓱᒧᖓ ᐸᒡᕕᓵᖃᑕᐅᕙᓚᐅᖅᐳᖅ ᑲᓐᖑᓱᒃᑎᓪᓗᒍᓗ, ᐊᑕᓂᕐᖕᒧᑦ ᐃᒡᓕᐊᖓ ᒪᑐᔭᐅᓯᒪᓂᖓ ᐱᑦᔪᑎᒋᓪᓗᒍ. 7ᑍᒤᓕᐅᖃᑦᑕᓚᐅᖅᐳᖅ ᐊᕐᕌᒍᑕᒫᑦ; ᑍᒪᓐᖓᑦ ᐊᑕᓂᐅᑉ ᐃᒡᓗᖓᓄᐊᕌᖓᒥᒃ, ᐱᓃᓇᐅᑉ ᖁᕕᐊᓱᒍᓐᓃᖅᑎᑉᐸᓚᐅᖅᐹ. ᑍᒤᒻᒪᑦ ᕼᐋᓇ ᕿᐊᓕᓚᐅᖅᐳᖅ ᓂᕆᔪᒪᔪᓐᓃᖅᓗᓂᓗ. 8ᐅᐃᖓᑕ ᐃᐅᓪᑳᓇᐅᑉ ᐊᐱᕆᕚ, “ᕼᐋᓇ, ᓱᖕᒪᑦ ᕿᐊᕖᑦ? ᓱᖕᒪᓪᓗ ᓂᕆᔪᒪᓐᖏᓚᑏᑦ? ᓱᖕᒪᑦ ᐆᒻᒪᑎᖕᓂ ᕿᒃᓵᒃᐲᑦ? ᐱᐅᓂᖅᓴᐅᓐᖏᓚᖔ ᐃᕐᖕᓂᓂᑦ 10ᓃᑦ?”
ᕼᐋᓇᓗ ᐃᓔᓗ
9ᓂᕆᔭᕇᕋᒥᒃ ᐃᒥᕇᕋᒥᒡᓗ ᐊᑕᓂᐅᑉ ᐃᒡᓗᖓᓂ ᓮᓗᐊᒥ, ᕼᐋᓇ ᒪᑭᑉᐳᖅ. ᐃᓔᓕ ᑐᓂᕐᕈᓯᖅᑎᑦᓯᔨ ᐃᒃᓯᕙᓚᐅᖅᐳᖅ ᐃᒃᓯᕙᐅᑕᕐᖕᒥ ᐊᑕᓂᐅᑉ ᑐᐱᖓᑕ ᐃᑎᖅᑕᕐᕕᖓᑕ ᓴᓂᐊᓂ. 10ᕼᐋᓇ ᐅᖁᒤᒃᓴᒻᒪᕆᒃᓗᓂ ᑐᒃᓯᐊᖅᐳᖅ ᐊᑕᓂᕐᖕᒧᑦ, ᕿᐊᓪᓗᓂᓗ. 11#ᒨᓯᓯ ᓯᑕᒪᖏᑦ 6:5.ᐊᖏᒻᒪᕆᒡᓗᓂᓗ ᐅᖃᖅᐳᖅ, “ᕿᓚᖕᒥᐅᒐᓴᒡᔪᐃᑦ ᐊᑕᓂᖓ, ᑕᑯᔪᓐᓇᕈᕕᐅᒃ ᐊᑲᐅᓐᖏᓕᐅᕈᑎᒋᔭᕋ, ᐃᖅᑲᐅᒪᓚᐅᓐᖓ, ᐳᐃᒍᖅᑍᓕᓗᓐᖓ, ᐃᕐᖕᓂᖅᑖᖅᑎᓚᐅᓐᖓ, ᐊᖏᒻᒪᕆᒃᐳᖓ ᐃᓕᖕᓄᑦ ᐊᑕᓃᖅ ᐃᓅᓯᓕᒪᖓ ᑐᓂᔪᒫᖅᐸᕋ, ᓄᔭᖏᓪᓗ ᑭᑦᔭᖅᑕᐅᓚᐅᖅᓯᒪᒐᔭᓐᖏᓚᑦ.”
12ᕼᐋᓇ ᑲᔪᓯᓪᓗᓂ ᑐᒃᓯᐊᖅᑎᓪᓗᒍ ᐊᑕᓂᕐᖕᒧᑦ, ᐃᓔ ᑕᑯᓐᓇᖅᐳᖅ ᖃᓂᖓᓂᒃ. 13ᕼᐋᓇᓕ ᑐᒃᓯᐊᖅᓗᓂ ᓂᐱᖃᖏᒻᒪᑦ; ᖃᓂᖓ ᐊᐅᓚᒐᓗᐊᖅᑎᓪᓗᒍ, ᓂᐱᖓ ᑐᓴᖅᓴᐅᓚᐅᖏᒻᒪᑦ; ᑍᒤᒻᒪᑦ ᐃᓔ ᐃᓱᒪᓕᖅᐳᖅ ᑖᓐᓇ ᐊᕐᖕᓇᖅ ᐋᖓᔮᕋᓱᒋᓪᓗᒍ. 14ᐃᓔᓪᓗ ᐅᖃᐅᑎᕚ, “ᖃᓄᖅ ᐊᑯᓂᐅᑎᒋᔪᖅ ᐋᖓᔮᕐᖕᓂᐊᖅᐲᑦ? ᐃᒥᐊᓗᒍᓐᓃᕆᑦ ᐋᖓᔮᕈᓐᓂᖅᓗᑎᓪᓗ.”
15ᕼᐋᓇᓕ ᑭᐅᕗᖅ, “ᐊᖓᔪᖅᑳᒃ, ᐋᖓᔮᓐᖏᓚᖓ, ᐃᒥᐊᓗᓚᐅᕐᖕᓇᖓᓗ ᕔᓂᒥᒃ ᓴᓐᖏᔪᒥᒡᓘᓐᓃᑦ, ᐃᓗᖏᖅᓱᒻᒪᕆᒡᓗᖓᓕ ᑐᒃᓯᐊᖅᐳᖓ; ᐅᖁᒤᒃᓴᐅᑎᒋᔭᒃᑲ ᑕᕐᖕᓂᓐᓂ ᑐᓂᕙᒃᑲ ᐊᑕᓂᕐᖕᒧᑦ. 16ᐱᔩᑦ ᓱᓇᐅᖏᑦᑑᓇᓱᒋᓂᐊᕐᖕᓇᒍ, ᑍᒫᒃ ᑐᒃᓯᐊᓚᐅᖅᐳᖓ ᐊᖏᔪᒥᒃ ᐊᑲᐅᖏᑦᔪᑎᖃᕋᒪ ᕿᒃᓵᕕᒡᔪᐊᖅᓗᖓᓗ.”
17ᑕᕝᕙ ᐃᓔᑉ ᑭᐅᕚ, “ᐃᓱᒫᓗᖏᓪᓗᑎᑦ ᐊᓂᓕᕆᑦ, ᐃᓴᕆᐊᓕᒥᐅᑦ ᒎᑎᖓᑕ ᑐᓂᓯᕕᒋᓕᑎᑦ ᑖᑦᓱᒪᓐᖓᑦ ᐱᔪᒪᔭᕐᖕᓂᒃ.”
18ᕼᐋᓇ ᑭᐅᕗᖅ, “ᐱᔩᑦ ᖁᕕᐊᒋᓗᒍ ᐃᓱᒪᒋᑦᓯᐊᕈᒃ,” ᑕᕝᕙ ᐊᕐᖕᓇᖅ ᑕᕝᕙᓐᒐᑦ ᐊᓂᒐᒥ ᓂᕆᓕᓚᐅᖅᐳᖅ, ᑮᓇᖓᓗ ᖁᕕᐊᓱᖏᓐᓂᕐᖕᒧᑦ ᑕᑯᑦᓱᓇᕈᓐᓃᖅᓗᓂ.
ᓴᒧᐃᓕᐅᑉ ᐃᕐᖕᓂᐊᖑᓂᖓ ᑐᓂᕐᕈᑕᐅᓂᖓᓗ
19ᖃᐅᑎᓪᓗᒍ ᐅᓪᓛᒻᒪᕆᒃᑯᑦ ᒪᑭᑉᐳᑦ ᐊᑕᓂᕐᖕᒧᓪᓗ ᑐᒃᓯᐊᖅᐳᑦ; ᑭᖑᓂᖓᒍᑦ ᐅᑎᖅᐳᑦ ᐊᖏᕐᕋᒧᑦ ᕌᒪᒧᑦ. ᐃᐅᓪᑳᓇᐅᓪᓗ ᕼᐋᓇ ᓄᓕᐊᓂ ᐱᖃᑎᒋᖕᒪᒍ, ᑐᒃᓯᐊᕐᖕᓂᖓ ᐊᑕᓂᐅᑉ ᐃᖅᑲᐅᒪᓚᐅᖅᐹ. 20ᑕᒪᑐᒪ ᑭᖑᓂᖓᒍᑦ ᕼᐋᓇ ᓄᑕᕋᒃᓴᖅᑖᖅᐳᖅ, ᕿᑐᕐᖓᖅᑖᕐᕕᒃᓴᖓᓗ ᓇᓪᓕᐅᑎᖕᒪᑦ ᐃᕐᖕᓂᖅᑖᖅᐳᖅ, ᐊᑦᓯᖅᐹᓗ ᓴᒧᐃᓕᒥ, ᐅᖃᖅᓗᓂ, “ᐊᑕᓂᖅ ᕿᓄᕕᒋᓚᐅᕋᒃᑯ ᑖᑦᓱᒥᖓ.”
21ᐃᐅᓪᑳᓇᐅᓪᓗ ᐃᓚᓕᒫᖏᑕᓗ ᐊᐅᓪᓚᕐᕕᒃᓴᖓ ᓮᓗᐊᒧᑦ ᓇᓪᓕᐅᑎᖕᒪᑦ ᑐᓂᕐᕈᓯᕆᐊᖅᑐᖅᐳᖅ ᐊᑕᓂᕐᖕᒧᑦ ᐊᕐᕌᒍᑕᒫᖅᓯᐅᑎᒥᒃ ᑐᓂᕐᕈᓯᕆᐊᖅᑐᖅᓗᑎᒃ, ᐊᖏᕈᑎᒋᓯᒪᔭᒥᓂᒡᓗ ᑐᓂᕐᕈᓯᕆᐊᖅᑐᖅᓗᓂ. 22ᕼᐋᓇᓕ ᑍᑦᓱᒪᓂ ᐱᖃᑕᐅᓚᐅᓐᖏᓚᖅ, ᐅᐃᓂᓗ ᐅᖃᐅᑎᓚᐅᖅᐹ, “ᓱᕈᓯᖅ ᐃᒻᒥᓂᒃ ᐱᔪᓐᓇᖅᓯᑐᐊᖅᐸᑦ, ᐊᑕᓂᐅᑉ ᐃᒡᓗᖓᓄᐊᕈᑎᔪᒫᖅᐸᕋ, ᐊᑕᓂᐅᑉ ᓵᖓᓄᑦ ᓴᖅᑭᑎᑦᓱᒫᕋᒃᑯ, ᑍᑲᓂᓗ ᐃᓂᖃᓕᕈᒫᕐᖕᒪᑦ ᐃᓅᓯᓕᒫᒥᓂ.”
23ᐅᐃᖓᑕᓗ ᐃᐅᓪᑳᓇᐅᑉ ᐅᖃᐅᑎᕚ, “ᐃᓕᖕᓄᑦ ᐱᐅᔫᓇᓱᒋᔭᕐᖕᓂᒃ ᐊᑐᓕᕆᑦ, ᐅᑕᖅᑭᓕᕆᑦ ᑖᓐᓇ ᐃᒻᒥᓂᒃ ᐱᔪᓐᓇᖅᓯᓚᐅᖏᓐᓂᖓᓂ; ᐊᑕᓂᐅᓪᓕ ᐅᖃᐅᓯᕆᓯᒪᔭᓂ ᓱᓕᑎᓪᓕᐅᒃ.” ᑍᒤᒻᒪᑦ ᕼᐋᓇ ᐊᖏᕐᕋᖅᓯᒪᓕᓚᐅᖅᐳᖅ ᐃᕐᖕᓂᓂ ᑲᒪᒋᓪᓗᓂᐅᒃ, ᐃᒻᒥᓂᒃ ᐱᔪᓐᓇᖅᓯᓚᐅᖏᓐᓂᖓᓂ.
24ᐃᕐᖕᓂᖓᓗ ᐃᒻᒥᓂᒃ ᐱᔪᓐᓇᖅᓯᖕᒪᑦ, ᓮᓗᐊᒧᑦ ᐂᑦᔪᑎᕚ, ᓇᒃᓴᖅᓗᓂ ᐱᖓᓱᓂᒃ ᐊᕐᕌᒍᓕᖕᒥᒃ ᐃᒻᒧᒃᓯᐅᒊᑦ ᐸᖕᓂᖓᓂᒃ, ᐃᕕᐅᔭᕐᖕᒦᑦᑐᒥᒡᓗ ᓂᐊᖂᔭᒥᒃ, ᕿᓯᖕᒥᒡᓗ ᕔᓂᒥᒃ ᑕᑕᑦᑐᒥᒃ; ᓴᒧᐃᓕᓗ ᒥᑭᔫᒐᓗᐊᖅᑎᓪᓗᒍ; ᐊᑕᓂᐅᑉ ᐃᒡᓗᖓᓄᐊᕈᑎᕚ ᓮᓗᐊᒧᑦ. 25ᐸᖕᓃᕐᓗ ᑐᖁᑕᐅᑎᒌᕋᒥᐅᒃ, ᑕᕝᕙ ᓱᕈᓯᖅ ᐃᓔᒧᐊᕈᑎᕚ. 26ᕼᐋᓇᓗ ᐅᖃᖅᐳᖅ, “ᐊᖓᔪᖅᑳᒃ! ᐃᖅᑲᐅᒪᕕᖔ? ᑖᓐᓇᐅᕗᖓ ᐊᕐᖕᓇᖅ ᑕᕝᕙᓃᑎᓪᓗᑎᑦ ᑕᑯᓚᐅᖅᓯᒪᔧᑦ ᑕᒫᓂ ᓇᖏᖅᑎᓪᓗᖓ, ᑐᒃᓯᐊᖅᑎᓪᓗᖓ ᐊᑕᓂᕐᖕᒧᑦ. 27ᑐᒃᓯᐊᕐᕕᒋᓚᐅᖅᐸᕋ ᑖᑦᓱᒥᖓ ᓱᕈᓯᕐᖕᒥᒃ; ᐊᑕᓂᐅᓪᓗ ᑐᓂᓚᐅᖅᐹᖓ ᕿᓄᑦᔪᑎᒋᓚᐅᖅᑕᓐᓂᒃ ᑖᑦᓱᒧᖓ. 28ᑍᒤᒻᒪᑦ ᑐᓂᓕᖅᐸᕋ ᐊᑕᓂᕐᖕᒧᑦ; ᐃᓅᓯᖓ ᓈᓗᒍ ᐊᑕᓂᐅᑉ ᐱᒋᓂᐊᖅᐹ.”
ᑕᕝᕙᓂᓗ ᐊᑕᓂᕐᖕᒥᒃ ᓂᖅᑐᐃᓪᓗᑎᒃ ᑐᒃᓯᐊᖅᐳᑦ.
Currently Selected:
ᓴᒧᐃᓕ ᓯᕗᓪᓖᑦ 1: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.