ᓴᒧᐃᓕ ᓯᕗᓪᓖᑦ 2
2
ᕼᐋᓇᐅᑉ ᑐᒃᓯᐊᕐᖕᓂᖓ
1 #
ᓘᑲᓯ 1:46-55. ᕼᐋᓇ ᑐᒃᓯᐊᓚᐅᖅᐳᖅ ᐅᖃᖅᓗᓂ:
“ᐊᑕᓂᐅᑉ ᐆᒻᒪᑎᒐ ᑕᑕᑎᑉᐹ ᖁᕕᐊᓱᖕᓂᕐᖕᒥᒃ;
ᐱᔪᓐᓇᕐᖕᓂᕋ ᐊᑕᓂᐅᑉ ᖁᕝᕙᖅᑎᑉᐹ.
ᐊᑭᕋᖅᑐᖅᑎᒃᑲ ᖁᖓᑦᔪᑎᒋᔪᓐᓇᓕᖅᐸᒃᑲ;
ᖁᕕᐊᓱᒻᒪᕆᓕᖅᐳᖓ ᒎᑎᐅᑉ ᐱᐅᓕᓚᐅᕐᖕᒪᖓ!
2ᐃᑦᔪᕐᖕᓁᑦᑐᖃᓐᖏᓚᒃ ᐊᑕᓂᖅᑐᑦ ᐃᑦᔪᕐᖕᓁᑦᑐᒥᒃ;
ᓇᓪᓕᐊᓐᓂᒡᓘᓐᓃᑦ ᐊᑦᔨᖃᓐᖏᓚᑎᑦ;
ᕾᖅᑐᖅᑕᖃᓐᖏᓚᕐᓗ ᒎᑎᑦᑎᑐᑦ ᓴᐳᑦᔨᔪᓐᓇᖅᑎᒋᔪᒥᒃ.
3ᐱᐅᔪᕆᓗᓯ ᐅᖃᓪᓚᒍᓐᓃᕆᑦᓯ,
ᐱᐅᔪᕆᓂᕐᖕᒥᒃ ᖃᓂᑦᓯᓐᓂᑦ ᐊᓂᔪᖃᕈᓐᓃᖅᓕᑦ;
ᐊᑕᓂᖅ ᒎᑎᐅᖕᒪᑦ ᑖᓐᓇ ᖃᐅᔨᒪᔪᖅ,
ᑖᑦᓱᒪᓪᓗ ᐱᓂᐊᕐᖕᓃᑦ ᖃᐅᔨᓴᖅᐸᒃᐰᑦ.
4ᐱᔪᓐᓇᖅᑐᕐᔪᐊᑦ ᐅᓇᑕᖅᑏᑦ ᖃᕐᔪᖏᑦ ᓯᖁᒥᑉᐳᑦ,
ᓴᓐᖐᑦᑐᓪᓕ ᓴᓐᖏᒃᑎᑉᐳᑦ.
5ᐃᓄᐃᑦ ᓂᕆᑦᓯᐊᖅᐸᓚᐅᖅᑐᑦ ᐃᖅᑲᓁᔭᓕᖅᐳᑦ ᓂᕿᑖᕈᒪᒧᑦ,
ᑳᒃᐸᓚᐅᖅᑐᑦ ᑳᒍᓐᓃᖅᐳᑦ.
ᕿᑐᕐᖏᓱᐃᑦᑐᖅ ᕿᑐᕐᖓᖅᑖᖅᐳᖅ 7ᓂᒃ,
ᕿᑐᕐᖓᖃᖅᑐᓪᓕ ᐅᓄᖅᑐᓂᒃ ᓄᖑᕈᑎᕗᖅ.
6ᐊᑕᓂᖅ ᑐᖁᑦᓯᕗᖅ ᐃᓅᓯᑕᖅᑎᑦᓯᓪᓗᓂᓗ;
ᐃᓄᖕᓂᒃ ᑐᖁᖓᔪᑦ ᐃᓂᖓᓄᐊᖅᑎᑦᓯᕗᖅ ᒪᑭᑎᑦᓯᓪᓗᓂᓗ.
7ᐊᑕᓂᐅᑉ ᐊᒃᓗᔪᑦ ᐊᒃᓗᐃᑦᑐᕈᖅᑎᑉᐰᑦ;
ᐃᓚᖏᑦ ᒥᑭᒡᓕᑎᑉᐰᑦ, ᐊᓯᖏᓪᓗ ᐊᖏᔪᕈᖅᑎᓪᓗᒋᑦ.
8ᐊᒃᓗᔪᑦ ᒪᑭᑎᑉᐰᑦ ᓄᓇᐅᑉ ᐳᔪᕋᖓᓂᑦ;
ᐃᑲᔪᖅᑕᐅᔭᕆᐊᓖᓪᓗ ᖁᕝᕙᖅᑎᑉᐰ ᐊᕐᔭᓕᓂᕐᖕᓂᑦ,
ᐊᖓᔪᖅᑳᕐᔪᐊᓪᓗ ᐃᕐᖕᓂᖏᓐᓂ ᐃᒃᓯᕙᐅᑕᖅᑖᖅᑎᑉᐰᑦ
ᑭᖑᕐᖑᑦᔨᑎᑉᐰᓪᓗ ᐃᒃᓯᕙᐅᑕᕐᔪᐊᕐᖕᒥᒃ ᐱᓐᓇᕐᖕᓇᖅᑐᒥᒃ.
ᓄᓇᕐᔪᐊᑉ ᑐᓐᖓᕕᖏᑦ ᐊᑕᓂᐅᑉ ᐱᒋᕔᑦ;
ᖄᖓᓄᓪᓗ ᓯᓚᕐᔪᐊᖅ ᐃᓕᓯᒪᕚ.
9ᓴᐳᑎᓯᒪᓂᐊᖅᐰᑦ ᓱᖁᓯᔪᐃᑦᑐᖁᑎᖏᑕ ᐃᓅᓯᖏᑦ,
ᐱᐅᖏᑦᑐᓪᓕ ᐊᓯᐅᕗᑦ ᑖᖅᑐᕐᔪᐊᕐᖕᒥ;
ᐃᓄᒃ ᐱᔪᓐᓇᕐᖕᓂᕐᖕᒥᓄᑦ ᓵᓚᖃᕐᖕᓂᐊᓐᖏᓚᖅ.
10ᐊᑕᓂᐅᑉ ᐊᑭᕋᖅᑐᖅᑎᖏᑦ ᐊᓯᕈᖅᑕᐅᒻᒪᕆᒍᒫᖅᐳᑦ;
ᐱᒋᐊᕈᒫᖅᐰᑦ ᑲᓪᓕᕐᕕᐅᑎᓪᓗᒋᑦ ᕿᓚᖕᒥᑦ.
ᐊᑕᓂᐅᑉ ᓄᓇᕐᔪᐊᕐᖕᒥᐅᓕᒫᑦ ᐃᖅᑲᖅᑐᕈᒫᖅᐰᑦ;
ᐊᖓᔪᖅᑳᕐᔪᐊᖁᑎᓂᓗ ᐱᔪᓐᓇᕐᖕᓂᕐᖕᒥᒃ ᑐᓂᓯᕕᒋᕚ,
ᐱᔪᓐᓇᕐᖕᓂᕐᖕᒥᒡᓗ ᓂᕈᐊᖅᓯᒪᔭᓂ ᐱᑖᖅᑎᑉᐹ.”
11ᐃᐅᓪᑳᓇᓗ ᐅᑎᖅᐳᖅ ᐊᖏᕐᕋᒥᓄᑦ ᕌᒪᒧᑦ, ᓱᕈᓯᕐᓕ ᓴᒧᐃᓕ ᐅᓂᒃᐳᖅ, ᐊᑕᓂᕐᓗ ᐱᔨᑦᓯᖅᐹ ᐃᓔᒧᑦ ᑐᓂᕐᕈᓯᖅᑎᑦᓯᔨᒧᑦ ᑲᒪᒋᔭᐅᓪᓗᓂ.
ᐃᓔᑉ ᐃᕐᖕᓂᖏᑦ
12ᐃᓔᓪᓕ ᐃᕐᖕᓂᖏᑦ ᐱᐅᖏᑦᑐᓕᒻᒪᕆᓚᐅᖅᐳᑦ; ᐊᑕᓂᕐᖕᒥᒡᓗ ᐃᒃᐱᒍᓱᒐᑎᒃ. 13ᐊᖑᑦ ᑐᓂᕐᕈᓯᕆᐊᖅᑐᕐᖕᒪᑦ ᑐᓂᕐᕈᑎᒥᓂᒃ, ᑐᓂᕐᕈᓯᖅᑎᑦᓯᔨᐅᑉ ᐱᔨᖓ ᐅᐸᒍᑎᕙᓚᐅᖅᐳᖅ ᐱᐅᓯᕆᔭᐅᓪᓗᓂ ᑲᑭᐊᒃᔪᐊᓕᔭᖅᓗᓂ ᐱᖓᓱᓂᒃ ᑲᐴᑎᓕᖕᓂᒃ, ᓂᕿ ᓱᓕ ᐆᓐᓇᓱᐊᖅᑎᓪᓗᒍ. 14ᑲᑭᐊᒃᔪᐊᓂ ᐅᒃᑯᓯᐅᑉ ᐃᓗᐊᓄᐊᖅᐸᓚᐅᐹ ᑭᓱᑐᐃᓐᓇᒥᒡᓗ ᑲᑭᐊᒃᓯᑐᐊᕈᓂ ᑖᓐᓇ ᑲᑭᐊᒃᑕᖓ ᑐᓂᕐᕈᓯᖅᑎᑦᓯᔨᒧᐊᖅᑕᐅᔭᕆᐊᖃᖅᐸᓚᐅᖅᐳᑦ, ᐃᓴᕆᐊᓕᒥᐅᓕᒫᑦ ᑐᓂᕐᕈᓯᕆᐊᖅᑐᖅᑐᑦ ᓮᓗᐊᒧᑦ ᑍᒫᒃ ᐱᐅᓯᖃᕐᕕᐅᕙᓚᐅᖅᐳᑦ. 15ᓱᓕᓗ, ᑐᓐᓄᖓ ᐲᖅᑕᐅᓚᐅᖅᑎᓐᓇᒍ ᐃᑯᐊᓪᓚᒃᑕᐅᓚᐅᖅᑎᓐᓇᒍᓗ, ᑐᓂᕐᕈᓯᖅᑎᑦᓯᔩᑦ ᐱᔨᖏᑦ ᑐᓂᕐᕈᓯᕆᐊᖅᑐᖅᑐᒧᑦ ᐅᖃᖅᐸᓚᐅᖅᐳᑦ, “ᓂᕿᒥᒃ ᑐᓂᓯᕕᒋᓚᐅᓐᖓ ᑐᓂᕐᕈᓯᖅᑎᑦᓯᔨᐅᑉ ᓂᕿᓕᐅᕐᖕᓂᐊᖅᑕᖓᓂᒃ; ᓂᕿᒥᒃ ᐆᓯᒪᔪᒥᒃ ᐃᓕᖕᓂᑦ ᐱᔪᒪᖏᒻᒪᑦ, ᐆᓯᒪᖏᑦᑐᒥᒡᓕ.”
16ᐊᖑᑎᐅᓪᓕ ᑭᐅᒃᐸᒍ, “ᓈᒻᒪᒃᑐᒥᒃ ᐱᔭᕆᐊᓕᑦᑎᓐᓂᒃ ᐱᑬᓐᓇᖅᑕ ᑐᓐᓄᐊ ᐃᑯᐊᓪᓚᖅᑳᖅᓗᒍ; ᐱᔪᒪᔭᕐᖕᓂᒃ ᑭᖑᓂᐊᒍᑦ ᐱᓂᐊᖅᐳᑎᑦ,” ᑐᓂᕐᕈᓯᖅᑎᑦᓯᔩᑦ ᐱᔨᖏᑦ ᐅᖃᖅᐸᓚᐅᖅᐳᑦ, “ᐋᒃᑲ, ᒫᓐᓇ ᕾᑦᓯᓚᐅᕆᑦ; ᕾᓐᓂᐊᖏᑐᐊᕈᕕᐅᒃ ᐊᖅᓵᕐᖕᓂᐊᖅᐸᒋᑦ, ᐱᖁᔨᖏᒃᑲᓗᐅᕈᕕᑦ.”
17ᐃᓔᑉ ᐃᕐᖕᓂᖏᑕ ᐊᔪᖅᑐᓕᓂᖏᑦ ᐱᐅᖏᑦᑐᒻᒪᕆᐅᓚᐅᖅᐳᑦ ᐊᑕᓂᐅᑉ ᓵᖓᓂ; ᑐᓂᕐᕈᑎᒋᔭᐅᔪᓂᒃ ᐊᑕᓂᕐᖕᒧᑦ ᐃᒃᐱᒍᓱᑦᓯᐊᖏᓂᖏᑦ ᐱᑦᔪᑎᒋᓪᓗᒋᑦ.
ᓴᒧᐃᓕᐅᑉ ᓮᓗᐊᒧᐊᕐᖕᓂᖓ
18ᑍᒤᒃᑲᓗᐊᖅᑎᓪᓗᒋᓪᓕ ᓱᕈᓯᖅ ᓴᒧᐃᓕ ᑲᔪᓯᓚᐅᖅᐳᖅ ᐱᔨᑦᓯᖅᓗᓂ ᐊᑕᓂᕐᖕᒥᒃ, ᓵᓕᑕᕐᖕᒥᒃ ᖃᓪᓗᓈᖅᑕᒥᒃ ᐃᑦᔪᕐᖕᓁᑦᑐᒥᒃ ᐊᑐᖅᓗᓂ. 19ᐊᕐᕌᒍᑕᒫᑦ ᐊᓈᓇᖓᑕ ᓴᓐᓇᑎᕙᓚᐅᖅᐹ ᐊᓐᓄᕌᒥᒃ ᐊᑕᔪᕐᖕᒥᒃ, ᑐᓂᕙᓚᐅᖅᐹ ᐅᐃᓂ ᐱᖃᑎᒋᓪᓗᓂᐅᒃ ᑐᓂᕐᕈᓯᕆᐊᖅᑐᖅᑎᓪᓗᒍ ᑐᓂᕐᕈᑎᒥᓂᒃ ᐊᕐᕌᒍᑕᒫᖅᓯᐅᑎᒥᓂᒃ. 20ᐃᓔᓪᓗ ᓮᒻᒪᖅᑎᑉᐸᓚᐅᖅᐹ ᐃᐅᓪᑳᓇ ᓄᓕᐊᖓᓗ, ᐅᖃᖅᐸᒡᓗᓂᓗ ᐃᐅᓪᑳᓇᒧᑦ, “ᐊᑕᓂᐅᑉ ᕿᑐᕐᖓᖅᑖᖅᑎᒃᑲᓐᓂᖅᓕᓯᒃ ᐊᕐᖕᓇᒃᑯᑦ ᑖᑦᓱᒨᓇ ᑭᖑᕝᕕᖅᑕᐅᖁᓪᓗᒍ ᑐᓂᓚᐅᖅᑕᖓᓂᒃ ᐊᑕᓂᕐᖕᒧᑦ.”
ᐱᔭᕇᕋᖓᒥ ᐊᖏᕐᕋᖅᐸᓚᐅᖅᐴᒃ.
21ᐊᑕᓂᐅᑉ ᓮᒻᒪᖅᑎᓚᐅᖅᐹ ᕼᐋᓇ, ᐃᕐᖕᓂᖅᑖᖅᐳᕐᓗ ᐱᖓᓱᓂᒃ ᐸᓂᒃᑖᖅᓗᓂᓗ ᒪᕐᕉᖕᓂᒃ. ᓱᕈᓯᕐᓕ ᓴᒧᐃᓕ ᐱᕈᖅᐸᓪᓕᐊᓚᐅᖅᐳᖅ ᐱᔨᑦᓯᖅᓗᓂ ᐊᑕᓂᕐᖕᒥᒃ.
ᐃᓔᓗ ᐃᕐᖕᓂᖏᓪᓗ
22ᐃᓔᓕ ᐃᓄᑐᖃᒻᒪᕆᐅᓕᓚᐅᖅᐳᖅ, ᑐᓴᖃᑦᑕᖅᓗᓂᓗ ᐃᕐᖕᓂᖏᑕ ᐱᓂᐊᕐᖕᓂᕆᖃᑦᑕᖅᑕᖏᓐᓂᒃ ᐃᓴᕆᐊᓕᒥᐅᓕᒫᓄᑦ, ᐊᕐᖕᓇᓂᒡᓗ ᐱᖃᑎᖃᖃᑦᑕᕐᖕᓂᖏᓐᓂᒃ ᐊᑕᓂᐅᑉ ᓇᔪᒐᖓᑕ ᑐᐱᐅᑉ ᐃᑎᕆᐊᕐᕕᖓᓂ ᐱᓇᓱᐊᖅᑎᐅᔪᓂᒃ. 23ᐅᖃᐅᑎᕔᒡᓗ, “ᖃᓄᐃᒻᒪᑦ ᑍᒤᓕᐅᖃᑦᑕᖅᐱᓰ? ᐅᖃᐅᑦᔭᐅᓯᒪᒐᒪ ᐊᔪᖅᑐᓕᓂᕆᖃᑦᑕᖅᑕᓕᒫᑦᓯᓐᓂᒃ ᐃᓄᖕᓄᑦ. 24ᑍᒤᓕᐅᕈᓐᓃᕆᑦᑎᒃ ᐃᕐᖕᓂᒃᑳᒃ; ᑕᒪᓐᓇ ᐱᐅᖏᑦᑐᒻᒪᕆᐊᓗᒃ ᐊᑕᓂᐅᑉ ᐃᓄᖁᑎᖏᑕ ᐅᖃᐅᓯᕆᖃᑦᑕᓕᕐᖕᒪᑦᔪᒃ. 25ᐃᓄᒃ ᐊᔪᖅᑐᓕᒃᐸᑦ ᐃᓅᖃᑎᒥᓄᑦ, ᒎᑎᐅᑉ ᓴᐳᑎᔪᓐᓇᖅᐹ; ᐊᑕᓂᕐᖕᒧᓪᓕ ᐊᔪᖅᑐᓕᒃᐸᑦ, ᑭᓇᒧᑦ ᓴᐳᓐᓂᐊᖅᑕᐅᔪᓐᓇᖅᐹ?”
ᓈᓚᓚᐅᓐᖏᓚᓪᓕ ᐊᑖᑕᖓᑕ ᐅᖃᐅᓯᖏᓐᓂᒃ; ᑕᕝᕙ ᐊᑕᓂᐅᑉ ᑐᖁᑦᓱᒪᓕᓚᐅᖅᐰᑦ.
26 #
ᓘᑲᓯ 2:52. ᓱᕈᓯᕐᓕ ᓴᒧᐃᓕ ᑲᔪᓯᓪᓗᓂ ᐱᕈᖅᐸᓪᓕᐊᓚᐅᖅᐳᖅ ᐱᐅᒋᔭᐅᓕᖅᐸᓪᓕᐊᓪᓗᓂᓗ ᐊᑕᓂᕐᖕᒧᑦ ᐃᓄᖕᓄᓪᓗ.
ᐅᖃᐅᓰᑦ ᓇᓚᐅᑦᑍᓃᑦ ᐃᓔᑉ ᐃᓚᖏᑦ ᐱᓪᓗᒋᑦ
27ᒎᑎᐅᓪᓗ ᐅᖃᖅᑎᖓ ᐃᓔᒧᐊᖅᐳᖅ ᐅᖃᖅᓗᓂᓗ: “ᐊᑕᓂᖅ ᐃᒫᒃ ᐅᖃᖅᐳᖅ, ‘ᐅᕙᓐᓂᒃ ᖃᐅᔨᔭᑎᓚᐅᖅᐳᖓ ᓯᕗᓕᑦᓯᓐᓄᑦ ᐂᕉᓂᒧᑦ ᐄᑦᔨᑉᑎᒦᑎᓪᓗᒋᑦ ᐰᕉᒧᑦ ᐊᐅᓚᑕᐅᑎᓪᓗᒋᑦ. 28#ᒨᓯᓯ ᐂᑉᐸᖏᑦ 28:1-4; ᒨᓯᓯ ᐱᖓᔪᖏᑦ 7:35,36.ᑖᓐᓇ ᓂᕈᐊᓚᐅᖅᐸᕋ ᐃᓴᕆᐊᓕᒥᐅᓕᒫᓂᑦ ᑐᓂᕐᕈᓯᖅᑎᑦᓯᔨᐅᖁᓪᓗᒍ, ᑐᓂᕐᕈᓯᕐᕕᖁᑎᓐᓂ, ᐳᔪᕐᖕᒥᒃ ᐃᑯᐊᓪᓔᔨᐅᖁᓪᓗᒍ ᑎᐱᑦᓯᐊᕆᒃᑐᒥᒃ, ᓴᒡᕕᖕᒥᐅᑕᒥᒡᓗ ᐊᑐᖃᑦᑕᖁᓪᓗᒍ ᓵᓐᓂ; ᓯᕗᓕᓯᓗ ᐱᔪᓐᓇᖅᑎᓚᐅᖅᐸᕋ ᑐᓂᕐᕈᑏᑦ ᐃᑯᐊᓪᓚᒃᑕᐅᔪᑦ ᐃᓚᖏᓐᓂᒃ ᐃᓴᕆᐊᓕᒥᐅᓂᑦ ᑐᓂᕐᕈᓯᕐᕕᖕᒥᑦ ᐱᖃᑦᑕᖁᓪᓗᒍ. 29ᓱᖕᒪᓪᓕ, ᐱᔪᒪᑐᓗᐊᖃᑦᑕᓕᖅᐱᓯ ᑐᓂᕐᕈᑎᒋᔭᐅᔪᓂᒃ ᐱᓇᓱᐊᖅᑕᐅᖁᓯᒪᔭᓐᓂᒃ ᐃᓄᖁᑎᓐᓄᑦ? ᖃᓄᐃᒻᒪ ᐃᕐᖕᓂᑎᑦ ᐅᕙᓐᓂᑦ ᐅᐱᒋᓂᖅᓴᕆᕕᒋᑦ ᐃᒻᒥᖕᓂᒃ ᖁᐃᒃᓯᑎᑐᐃᓐᓇᓕᕐᖕᒪᑕ ᑐᓂᕐᕈᑎᒋᔭᐅᔪᑦ ᐱᐅᓂᖅᐹᖏᓐᓂᒃ ᐱᕙᒃᓗᑎᒃ ᑐᓂᕐᕈᑎᒋᔭᐅᔪᓂᒃ ᐅᕙᓐᓄᑦ?’ 30ᑍᒤᒻᒪᑦ ᐊᑕᓂᖅ ᐃᓴᕆᐊᓕᒥᐅᑉ ᒎᑎᖓ ᐃᒫᒃ ᓇᓗᓁᖅᓯᕗᖅ: ‘ᐅᕙᖓ, ᐊᑕᓂᖅ ᐃᓴᕆᐊᓕᒥᐅᑦ ᒎᑎᖓ, ᐊᖏᓚᐅᖅᐳᖓ ᑍᑦᓱᒪᓂ ᐃᓚᑎᑦ ᓯᕗᓕᑎᓪᓗ ᐱᔨᑦᓯᖅᑎᐅᖁᓪᓗᒋᑦ ᑐᓂᕐᕈᓯᖅᑎᑦᓯᔨᐅᓗᑎᒃ ᐃᓱᖃᖏᑦᑐᒧᑦ’; ᒫᓐᓇᓕ ᐊᑕᓂᖅ ᓇᓗᓁᖅᓯᓕᖅᐳᖅ: ‘ᑕᒪᓐᓇ ᑍᒤᓕᖓᓂᐊᕈᓐᓃᖅᐳᖅ; ᐃᒤᓕᖓᓂᐊᓕᖅᐳᕐᓕ, ᐅᕙᓐᓂᒃ ᐅᐱᒍᓱᒃᑐᑦ ᐅᐱᒋᓂᐊᖅᐸᒃᑲ, ᐅᕙᓐᓂᒡᓕ ᓇᕐᕈᔪᑦ ᓱᓇᐅᔪᓐᓃᖅᑎᓐᓂᐊᖅᐸᒃᑲ. 31ᑕᑯᒋᑦ, ᐅᓪᓗᐃᑦ ᓇᓪᓕᐅᑎᔪᒫᖅᐳᑦ, ᐱᔪᓐᓇᕐᖕᓃᑦ ᓇᑲᑦᓱᒫᖅᐸᕋ ᓯᕗᓕᕕᓪᓗ ᐃᒡᓗᖓᑕ ᐱᔪᓐᓇᕐᖕᓂᖏᑦ, ᐃᓚᖕᓂ ᐃᓄᑐᖃᖅᑕᖃᓛᕈᓐᓃᖅᐳᖅ. 32ᐅᖁᒤᑦᑐᒦᓪᓗᑎᑦ ᑕᑯᔪᒫᖅᐳᑎᑦ ᑐᓱᓗᑎᑦ ᒎᑎ ᐱᐅᔪᓂᒃ ᐱᓂᐊᕐᖕᓂᖃᖅᑎᓪᓗᒍ ᐃᓴᕆᐊᓕᒥᐅᓂ; ᐃᓄᑐᖃᕈᖅᑐᖃᕈᒫᕈᓐᓃᖅᐳᖅ ᐃᓚᖕᓂ ᐃᓱᖃᖏᑦᑐᒧᑦ. 33ᐃᓄᖁᑎᕕᓪᓕ ᐃᓚᖏᑦ ᑐᖁᓐᖏᑕᒃᑲ ᑐᓂᕐᕈᓯᕐᖕᕕᖁᑎᓐᓂ ᐃᔨᕕᑦ ᑕᑯᔪᒫᖅᐰᑦ ᐆᒻᒪᑎᕕᓪᓗ ᕿᒃᓴᐅᑎᒋᔪᒫᖅᐰᑦ; ᐃᓚᓕᒫᕕᓪᓗ ᑭᖑᕚᖏᑦ ᐃᓐᓇᕈᖅᑐᖃᖏᓪᓗᑎᒃ ᑐᖁᔪᒫᖅᐳᑦ. 34#ᓴᒧᐃᓕ ᓯᕗᓪᓖᑦ 4:11.ᐅᓇ ᓇᓗᓁᒃᑯᑕᐅᔪᒫᖅᐳᖅ ᐃᕐᖕᓃᒃᑭᒃ, ᕼᐅᐱᓂ ᐱᓂᕼᐋᔅᓗ, ᐃᓕᖕᓄᑦ ᓇᓗᓁᒃᑯᑕᐅᔪᒫᖅᐴᒃ; ᐅᓪᓗᕐᖕᒥ ᐊᑕᐅᓯᕐᖕᒥ ᑐᖁᔪᒫᖅᐴᒃ, ᐊᑕᐅᑦᓯᒃᑯᑦ. 35ᒪᑭᑎᑦᓯᔪᒫᖅᐳᖓ ᑐᓂᕐᕈᓯᖅᑎᑦᓯᔨᒥᒃ ᐅᒃᐱᕐᖕᓇᑦᓯᐊᖅᑐᒥᒃ ᐆᒻᒪᑎᒪ ᐊᑐᖁᔭᖏᓐᓂᒃ ᐃᓱᒪᒋᔭᓐᓂᒡᓗ ᐊᑐᕈᓐᓇᑦᓯᐊᖅᑐᒥᒃ; ᑖᓐᓇᓗ ᑭᖑᕚᖃᖅᑎᑦᓱᒫᖅᐸᕋ ᐱᐅᔪᓂᒃ, ᐃᓅᔪᒫᖅᐳᕐᓗ ᐃᑎᖃᑦᑕᖅᓗᓂ ᐊᓂᖃᑦᑕᖅᓗᓂᓗ ᓂᕈᐊᖅᓯᒪᔭᒪ ᓵᖓᓂ ᐃᓱᖃᖏᑦᑐᒧᑦ. 36ᓇᓪᓕᐊᑦ ᐃᒡᓗᖕᓂ ᐊᒥᐊᒃᑰᔪᖅ ᑖᑦᓱᒪ ᓵᖓᓄᑦ ᐹᒻᒪᒃᑎᕈᒫᖅᐳᖅ ᓯᐅᓪᕕᕆᒧᑦ ᐅᕝᕙᓗ ᓂᐊᖂᔭᒧᑦ ᐊᑕᐅᓯᕐᖕᒧᑦ, ᐅᖃᖅᓗᓂᓗ, “ᕿᓄᕗᖓ ᑐᓂᕐᕈᓯᖅᑎᑦᓯᔨᓄᑦ ᐃᓚᓕᐅᑎᓚᐅᓐᖓ, ᓂᐊᖂᔭᒥᒃ ᑐᓂᕐᕈᑕᐅᓯᒪᔪᓂᒃ ᓂᕆᔪᓐᓇᖁᓪᓗᖓ.”’”
Currently Selected:
ᓴᒧᐃᓕ ᓯᕗᓪᓖᑦ 2: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.