Makətūbə̄ yā Mise 1
1
1Kɔ́ɔ̄ɓē ɔr̄ najə̄ kə Mise ń i de kə́ kem ɓē kə́ Moreset tə́ ní. I dan ń Yotam ō, Akaj ō, gō tə́ anī i Ejekias ō, ndinə̄ń mban̄g dɔ nang kə́ *Juda tə́ ní. Yá̰á̰ kə́ sɔɔ̄ dɔ ɓē gə̄ kə́ Samari ō, Jerusalem ō, ń Kɔ́ɔ̄ɓē ɔjən adə̄ ger̄ kə ta kūl̄ yá̰á̰ kógə̄ḿ ń ni a̰ā̰ ní n toó.
Kɔ́ɔ̄ɓē əndā najə̄ dɔ gír deē yān gə̄ tə́.
2Sḭḭ̄ gír de gə̄ malang, ōōī!
Ḭ̄ dɔ nang ō, de kə́ dɔ nang tə́ gə̄ ō,
ī-nēlī mbīsí!
Kɔ́ɔ̄ɓē Nə́ɓā a ndi loo yān kə́ *táĺ tə́
yā kəndāń najə̄ dɔsí tə́.
3A̰á̰ā̰, Kɔ́ɔ̄ɓē teē loo ń
ni-ndi tū tə́ ní tə́.
Ni risə, ba njə̄rā dɔ loo ndɔ̄ȳ gə̄ tə́ dɔ nang tə́.
4Mbal̄ bo gə̄ yḛḛ̄n̄ gír njan tə́ ō,
wól loo gə̄ njarən̄ ō,
tītə̄ tībə̄ tejə kə́ deē əndā kadə
hor tə́ anī, yḛḛ̄ kɔ̄ɔ́ beē ō,
tītə̄ man̄ kə́ ḭḭ loo kə́ kḭḭ kə̄ dɔɔ́ tə́
a nūgə̄ kum kə̄ nang tə́ beē ō.
5Yá̰a̰ ń noō rāā yá̰a̰ i tɔdɔ̄
gír deē yā Jakob gə̄
mānə̄n̄ dɔ *ndū najə̄.
Tɔdɔ̄ ɓē ko̰o̰ kə́ *Israel tə́
ra dɔ ndūn tə́ alé.
I náā n i nge kɔsə kə
gír deē yā Jakob gə̄ ta
mān̄ dɔ *ndū najə̄ ní?
Má i ɓē kə́ Samari wa ḿ?
I náā i nge nge kɔsə kə gír deē yā *Juda gə̄
ta rɔȳ nə́ɓā kə́ rɔ̄kum aĺ gə̄ ní?
Má i ɓē kə́ Jerusalem wa ḿ?
6Kɔ́ɔ̄ɓē əda na:
Tām̄ najə̄ ń noō tə́ ní,
m-ā m̄-rāā ɓē kə́ Samari
kadə̄ a tél ndɔr̄
kə́ gájə́ yá̰a̰ gə̄ i tū tə́ ō,
dɔ nang kə́ i *kāgə̄ nduú tá
deē a asə ndɔr̄ tū tə́ ngóy ō.
M-ā m̄-rāā kadə̄ mbal̄ kə́ tū tə́ gə̄
ndūbə̄rūn̄ kum wól loo tə́ ō,
m-ā m-nujə yá̰á̰ ń
a ngɔ̄m̄ gír gisən ní kɔ̄ɔ́ ō.
7Yá̰a̰ malang kə́ nō horoó
rāā nə́ɓā yān kə́
rɔ̄kum aĺ gə̄ tə́ ní,
a tétə̄n̄ rárák kɔ̄ɔ́ ō,
yá̰a̰ malang ń ənge karī ní,
a ɓōkə́n̄ kum hor tə́ kɔ̄ɔ́ ō.
Yá̰a̰ gə̄ ń ni nōōdə́ horoó
rāādə́ nə́ɓā yān gə̄ tə́ ní,
m-ā m̄-tétə̄də́ kɔ̄ɔ́.
Tɔdɔ̄ Samari rāādə́ i kə
nar gíŕ dəyá̰ yān gə̄ kə́
ngé rāā ájə́ba gíŕ kújə ɓesēé.
Ba gində̄ kə́ tɔ̄ɔ̄ kɔ̄ɔ́ gə̄ ń
i gində̄ kə́ nō horoó
rāā nə́ɓā kə́ rɔ̄kum aĺ gə̄ tə́ ní,
i yā kɔy kadə̄ gíŕ ájə́ba kə́ rang gə̄ tə́.
Yá̰á̰ kə́ to kum kaȳ aĺ teē dɔ ɓē kə́ Jerusalem tə́.
8I tām̄ najə̄ ń toō tə́ n
m-ā m-ún pā yo ō,
m-ā m̄-nōō ō ní.
M-ā m̄-njə̄rā njaḿ
karī kanjə̄ sākə̄rā ō,
kanjə̄ kūbə̄ rɔ̄ḿ tə́ ō.
M-ā m̄-nōō tītə̄ tal̄ ō,
m-ā m̄-nōō tītə̄ burum ō.
9Tɔdɔ̄ ndéý ń ɔdə Samari ní,
dáwán gətóo.
Ɓē kə́ *Juda gə̄gē,
ndéý ní ɔdən ō,
ndéý ní ɔdə ta róbə́
kə́ Jerusalem ō,
loo ń gír deē yāḿ gə̄ ndin̄ tū tə́ ní.
10Juda gə̄, ī-lōōī kəda
gotə najə̄ ń toō
kem ɓē kə́ Gat tə́,
ī-lōōī nōō.
Ī-wángə̄lāī kum *bumbə́rú tə́
kem ɓē kə́ Bet Leapəra tə́,
ɔjiīń kadə̄ sḭḭ̄ ə́hɔī ndoō.
11Sḭḭ̄ de kə́ Sapir gə̄,
āwī dɔ ɓē kə́ rang tə́
kə rɔ̄sɔlɔ̄ɔ́ ō, rɔ̄sí karī ō.
De kə́ Saanan gə̄ gḛyn̄ teē
kɔ̄ɔ́ kem ɓē yādə́ tə́ alé.
De kə́ Bet Esel gə̄ ənīn̄ pā yo.
Ɓē bo ń toō asə rāā sesí alé.
12Ɓōĺ rāā de kə́ Marot gə̄
adə̄ ndewn̄ najə̄
yá̰a̰ kənge yādə́ tə́.
Tɔdɔ̄ yá̰á̰ kə́ to kum kaȳ aĺ ń
Kɔ́ɔ̄ɓē əlań ní,
reē ugə̄ ta róbə́ kə́ Jerusalem tə́.
13Sḭḭ̄ de kə́ Lakis gə̄,
ādə̄ sə́nda yāsí gə̄
unən̄ púsə rɔ̄ɔ̄.
Sḭḭ̄ ī-raī dɔ ndūsí tə́ alé
tītə̄ yā *Israel gə̄ ō,
de kə́ Jerusalem gə̄
ndájə̄n̄ yá̰a̰ rāāsí kə́ majaĺ gə̄ ō.
14I tām̄ najə̄ ń toō tə́ n
majə kadə̄ ɔ̄rī rɔ̄sí kɔ̄ɔ́
rɔ̄ de kə́ Moreset gə̄ tə́,
ngɔr kə̄ kadə ɓē kə́ Gat tə́ ní.
Adə̄ ɓē bo kə́ Akjib
a reē kə yá̰á̰ kógə̄ḿ yā
kɔsəń kíl mban̄g gə̄
kə́ dɔ gír de gə̄
yā *Israel tə́ alé .
15Sḭḭ̄ de kə́ Maresa gə̄,
Kɔ́ɔ̄ɓē a reē kə nge taā ɓē
kógə̄ḿ yā rɔ̄ɔńsí.
Ngār gə̄ kə́ *Israel tə́ ń
de gə̄ ɔsən̄ gɔndə́ ní,
a aw̄n̄ yā ɓɔ̄ɔ̄ rɔ̄də́ kem
bəlo mbal̄ kə́ Adulam tə́.
16Sḭḭ̄ de kə́ Jerusalem gə̄,
ī-ró̰yī nənga dɔsí gə̄ ō,
ī-dəsāī dɔsí ɔ́jiīń kadə̄ ə́hɔī ndoō,
najə̄ yā ngáńsí gə̄ kə́
ī-tariīdə́ ngá̰ý tə́!
Ādə̄ nənga gətóo dɔsí tə́
tītə̄ yā míndə māl̄ beé,
tɔdɔ̄ a ɔyn̄ ngáńsí gə̄ ngeé ń
toō yā kaw̄ sedə́ dɔ ɓē
kə́ rang tə́ dɔ gúú tə́, sa̰y rɔ̄sí tə́.
Currently Selected:
Makətūbə̄ yā Mise 1: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad