Makətūbə̄ yā Mise 2
2
Ngé ko̰o̰ ɓē kə gōó aĺ gə̄
1Ngé gə̄ ń ndɔ̄ɔ́ anī
a əndān̄ i dɔ yá̰á̰ kə́ gōtə́ aĺ
danaá yā rāā ō,
a nómə̄n̄ i rāā yá̰á̰ kə́ majaĺ ō ní,
yá̰á̰ kə́ to kum kaȳ aĺ i tām̄ yādə́ tə́!
Dan nəkɔ́ ń mbang əɓa anī,
nin̄ rāān̄ yá̰a̰ gə̄ ní,
loo ń nin̄ aw̄n̄ kə tɔ́gə rāān ní.
2Ré ndɔr̄ yā madə̄də́ gə̄
sə̄ngā kumdə́ anī,
nin̄ taān̄ ndɔr̄ ní ō,
ré gḛyn̄ i kújə yādə́ gə̄ anī,
nin̄ táān̄ kújə gə̄ ní ō.
Nin̄ ḭḭn̄ gúu dɔ de kə́ dəngam gə̄ tə́ ō,
dɔ kojə yādə́ gə̄ tə́ ō,
dɔ kɔ́ɔ̄ yá̰a̰ gə̄ tə́ ō,
táān̄ yá̰a̰ kənge yādə́ gə̄ dɔ gúú tə́ ō.
3I tām̄ yá̰á̰ ń noō tə́ n
Kɔ́ɔ̄ɓē əda najə̄ toō ní:
M-ə̄ndā dɔ yá̰á̰ kógə̄ḿ
kə́ to kum kaȳ aĺ danaá,
yā rɔ̄ɔ̄ń kə de gə̄
kə́ dan ɓūtə̄ yāsí gə̄ tə́.
Sḭḭ̄ ā ásiī teē kum tə́ karī alé,
ā ɔ̄rī dɔsí dɔɔ́ yā njə̄rań to̰ alé.
A̰á̰ā̰, kum mbang ń
a reē ní, i kum mbang yā
yá̰á̰ kə́ to kum kaȳ aĺ.
4Kum mbang ngeé ń noō tə́ ní,
de gə̄ a ənīn̄ pā ń toō sesí,
a ənīn̄ pā yo ń toō:
Táān̄ yá̰a̰ yājí gə̄ malang kɔ̄ɔ́.
Gír deē yājí gə̄ aw̄n̄
kə dɔ nang to̰ alé.
Ngé kɔy yá̰a̰ yājí gə̄
dɔ gúú tə́, kēgə̄n̄ naā
ndɔr̄ yājí gə̄ dɔ dáńdə́ tə́.
Nin̄ táān̄ yá̰a̰ yājí gə̄
malang kɔ̄ɔ́ i najə̄ rí tə́?
5I beé ní, dan ń
gír de gə̄ yā Kɔ́ɔ̄ɓē
a télən̄ yā nə̄ɓō de gə̄
dɔ nang gogə́ rang anī,
de kə́ dɔ dáńsí tə́ kə́ yā
kənge dɔ nang ní a gətóo.
Ngé tɔ́sə̄ najə̄ yā nge koō ta kə̄ ndágá gə̄
6De kə́rēý gə̄ ɔrə̄n̄ najə̄
seḿ, ədamə̄n̄ na:
Asiī najə̄ yāí gə̄ ń noō.
Kəda na a əlan̄ rɔ̄sɔl̄ dɔjí tə́
rɔ̄kum ní, nge ń noō
i najə̄ kə́ yā kɔr̄ alé.
7Ndɔ̄lə́n̄ kojə yā Jakob a?
Kɔ́ɔ̄ɓē i de kə́ nge tə́gā tan alé a?
Jī bēl̄ loo rāā yá̰a̰ yān i tītə̄ ń noō a?
Mā m-ɔ̄r̄ najə̄ i yā kadə̄ rāā majə
kə de kə́ súmūú gēé.
8Banī Kɔ́ɔ̄ɓē ədasí sḭḭ̄ na:
Háĺ ń sḭḭ̄ ā ī-rāāī kə́ gír deē yāḿ gēé ní,
i tītə̄ yā madə̄ ba̰ā̰ gə̄.
Ngé gə̄ ń télən̄ ta rɔ̄ɔ̄ tə́ ō,
njə̄rān̄ loo yādə́ kanjə̄ sōl̄ yá̰á̰ kógə̄ḿ ō ní,
sḭḭ̄ ī-táāī kūbə̄ yādə́ gə̄ kə́ dɔ madə̄ gə̄ tə́.
9Sḭḭ̄ ī-tə̄ɓāī dəyá̰ gə̄
kə́ dan gír deē yāḿ gə̄ tə́ kɔ̄ɔ́
kem kújə gə̄ ń nel̄də́ tə́ ní.
Kii ń m-íí ngáńdə́ gə̄ ní,
sḭḭ̄ ī-taāī jīdə́ tə́ kɔ̄ɔ́, kə́ njɔ́ḿ gə̄ tə́.
10Ḭ́ḭī dɔɔ́ ba āwī!
I kum mbang kə́ yā kadə̄
sḭḭ̄ ɔ̄rīiń koō n toó alé!
Ɓē yāsí téĺ ɓē kə́ yḛr kɔ̄ɔ́
sɔɔ̄ ń mān̄ dɔ *ndū najə̄ yāsí gə̄.
I tām̄ najə̄ ń noō tə́ n
ā á̰a̰ī tápə̄ ngá̰ý ní.
11Tá de kə́rēý gə̄ ɔrə̄n̄
najə̄ kə́ sor̄ gə̄, ədan̄ na:
Ā ā̰yī kasə *nduú ō,
kasə kə́ ngan̄g ō.
Tá ngé kɔr̄ najə̄ wa gə̄ ngeé ń toō ədan̄ ɓáý to̰ na:
Israel gə̄ ń teēn̄ ta yo tə́ ní, Nə́ɓā a ɔsə njadə́ kə̄ naā tə́.
12Mā Kɔ́ɔ̄ɓē, m̄-ndigə
kɔsə nja kojə yā Jakob kə̄ naā tə́.
A̰á̰ā̰, de gə̄ malang kə́
dan gír de gə̄ yā *Israel tə́ ń
teēn̄ ta yo tə́ ní,
m̄-ndigə ɓoodə́ naā tə́.
M-ā m̄-kán̄də́ loo kógə̄ḿ
kem gong yādə́ gə̄ tə́ tītə̄ batə̄ gə̄ beé,
tītə̄ ɓūtə̄ yá̰a̰ kul̄ gə̄
kə́ ran̄ loo kəsa mu yādə́ tə́ beé.
Nin̄ a télən̄ kósə de gə̄
kə́ kōōdə́ ɓār̄ ngá̰ý.
13Nge njar róbə a njə̄rā kété nosí tə́.
Əya̰n̄sí dɔɔ́ adə̄ í-mānī
ta róbə́ tə́ ō, ī-teēī ndágá ō.
I Kɔ́ɔ̄ɓē ń i mban̄g
yāsí ní n i nge kɔr nosí ní.
Currently Selected:
Makətūbə̄ yā Mise 2: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad