Makətūbə̄ yā Jonas 4
4
Jonas oō gíŕ yá̰á̰ ń rāā yá̰á̰ á Nə́ɓā a̰a̰ń kum tō ndoō yā de kə́ Ninibə gə̄ ní
1Rɔ̄ Jonas nelə̄n aĺ bátə́, kə́ rɔ̄kum tə́, rɔ̄n nelə̄n aĺ bátə́. Ni-rāā wōn̄g. 2Ni ndɔ̄ȳ Kɔ́ɔ̄ɓē tītə̄ ń toō beé əda na:
Ha̰, Kɔ́ɔ̄ɓē, m̄-ger̄ majə i dan ń mā i kem ɓē yāḿ tə́ nú ɓáý ní. m̄-ger̄ kadə̄ ḭ̄ i de kə́ majə ngá̰ý ō, kumií o̰ō̰ī ngá̰ý ō, ḭ̄ i de kə́ nge tə́gā taí dɔ deē tə́ ō, ḭ̄ i de kə́ táŕ ngá̰ý ō, ré ə́la ɓōĺ kem deē tə́ anī, ī-tél ā ī-ndə̄ngā rɔ̄í ō. 3Kɔ́ɔ̄ɓē, ngɔlaā ní ə́ya̰m̄ ādə̄ m-óy. A̰á̰ā̰, m̄-gḛy i yo ba i ndi kə kumuú alé. 4Kɔ́ɔ̄ɓē tūr̄ əda Jonas na:
Wōn̄g ń ī-rāā ní, najə̄ i yāí a? 5Jonas teē kɔ̄ɔ́ kem ɓēé, ba aw̄ dəba loo ń deē ra Ninibə anī i kə̄ dām̄ kə́ gír ɓē tə́ ní. Ni-rāā ndíĺ kógə̄ḿ ba ndi gírí loo ngeé ń noō tə́. Ni sāā ka̰a̰ yá̰á̰ ń a rāā yā rāā yá̰a̰ kem ɓēé ní. 6Loo ń noō tə́ Kɔ́ɔ̄ɓē Nə́ɓā rāā adə̄ kāgə̄ kógə̄ḿ əɓa nang tə́, ba tɔgə tɔȳ dɔ Jonas yā kadə̄ ni-əngeń ndíl ō, kadə̄ gír rɔ̄nelāĺ yān gāngəń ō. Rɔ̄ Jonas nelə̄n ngá̰ý najə̄ yā kāgə̄ ní tə́. 7Banī teē kə ndɔ̄ kə́ noō anī, kété pá tá kadə̄ mbang əɓa ní, Nə́ɓā əla kur̄ kógə̄ḿ adə̄ reē əsa kāgə̄ ní adə̄ oy. 8Ba dan ń mbang ḭḭ kə̄ dɔɔ́ anī, Nə́ɓā rāā adə̄ néĺ kógə̄ḿ kə́ təngā kə́ dūn̄ ɓē tə́ əla ō, mbang ɔsə dɔ Jonas ō, adə̄ na i ngɔr kadə̄ ni sitə̄ kɔ̄ɔ́. Loo ń noō tə́ Jonas ndə̄ngā yo, ni-əda na:
m̄-gḛy i yo banī i ndi kə kumuú alé. 9Nə́ɓā dəje Jonas na ké wōn̄g ń ni-rāā tām̄ yā kāgə̄ tə́ ní ké i gōtə́ wa. Anī Jonas tél ədan na:
A̰á̰ā̰, m̄-rāā wōn̄g i gōtə́ ō, m̄-ndə̄ngā yo i gōtə́ ō! 10Kɔ́ɔ̄ɓē ədan na:
Kāgə̄ ń toō ń ḭ̄ ī-rāā kəlan aĺ ō, ī-rāān adə̄ əɓa dɔ nang tə́ aĺ ō ní, kumií ḭ̄ o̰o̰ī tām̄ yān tə́. Ni tɔgə ndɔ̄ɔ́ ndɔ̄ kógə̄ḿ ō, oy ndɔ̄ɔ́ ndɔ̄ kógə̄ḿ ō. 11Ba ɓē kə́ Ninibə ń de kə́ kemeé gə̄ kə́ mānə̄n̄ 120 000 ń noō, gerə̄n̄ yá̰á̰ kə́ majə tām̄ yādə́ tə́ aĺ ō, dā̰ gə̄ i ngá̰ý kemeé ō ní, kə mā kə kumḿ kə o̰o̰m̄ tām̄ yān tə́ aĺ a?
Currently Selected:
Makətūbə̄ yā Jonas 4: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad