Makətūbə̄ kə́ nge ko̰ jōó ń Piyer ndang ní 3
3
Kɔ́ɔ̄ɓē ənī míndən əda na n-a n tél yā reē
1Kó tár gə̄, ń toō i makətūbə̄ kə́ nge ko̰ jōó n m̄-ndang m-ə́lań m-ādə̄sí toō. Ba kem makətūbə̄ gə̄ ngeé ń toō tə́ jōó mbak ní, m̄-sāā i ndól̄ gír̄ kə́ gō tə́ gə̄ ń ton̄ kemsí tə́ ní yā terə̄ń kemsí dɔ yá̰a̰ ndóō gə̄ tə́. 2Ādə̄ əga kemsí dɔ najə̄ gə̄ ń *ngé koō ta kə́ *táĺ gə̄ ədan̄ kété ní tə́ ō, dɔ gō míndə́ Kɔ́ɔ̄ɓē ō nge kajə de gə̄ ō ń ngámbang kəla yāsí gə̄ ndóōn̄sí ní tə́ ō. 3Yá̰á̰ ń kadə̄ ī-gerī kété ní n toó: Kem ndɔ̄ gə̄ kə́ ta ngóy tə́ anī, de kə́ ngé rāā yá̰á̰ kə́ ngurən i kemdə́ tə́ gə̄ a teēn̄ yādə́. Nin̄ a mbóon̄ sesí, 4a ədan̄ na:
Ni-ənī míndən əda na n-a n tél yā reē aĺ a? Ní, ni i rá tā? Kaají gə̄ oyn̄ kɔ̄ɔ́, ba yá̰a̰ malang to i kum gotən nəkɔ́ ń rāān̄neé yá̰a̰ gə̄ kété jóo ta kəla gír rāā yá̰a̰ gə̄ tə́ ní. 5Yá̰á̰ ń dɔdə́ ndígə̄nal ní n toó: Kété jóó ní Nə́ɓā rāā dɔ rā̰ ō dɔ nang ō i kə ta kūl̄ najə̄ kə́ tan tə́. Dɔ nang teē i kum man̄ tə́ ō, rāān̄ dɔ nang i kə maná ō. 6Tá i man̄, adə̄ i man̄ kə́ un dɔ dɔ nang malang kété jóo n nujə yá̰a̰ gə̄ ń Nə́ɓā əndādə́ kété ní. 7Banī dɔ rā̰ kə́ ngɔr ń toō tə́ ō, dɔ nang kə́ ngɔr ń toō tə́ ō ní, najə̄ yā Nə́ɓā kə́ kógə̄ḿ beē nəkɔ́ ń toō ngɔ̄m̄də́ i tām̄ yā hor tə́, yā kadə̄ hor nujəń kɔ̄ɔ́. Ngɔ̄mə̄n̄də́ i tām̄ yā ndɔ̄ ń a gāngə̄n̄neé sarya dɔ ngé kem ndul gə̄ tə́ ō, a nujən̄neé sedə́ kɔ̄ɔ́ ō ní tə́.
8Ɓá tā ba kó tár gə̄, yá̰á̰ kógə̄ḿ to noó kə́ majə kadə̄ dɔsí ndígə̄nal alé.Yá̰á̰ ni n toó: Tām̄ yā Kɔ́ɔ̄ɓē tə́ ɓáa ndɔ̄ kə́ kógə̄ḿ beē i tītə̄ ɓāl̄ kə́ dūbú beé ō, ɓāl̄ kə́ dūbú i tītə̄ ndɔ̄ kə́ kógə̄ḿ beē beé ō. 9Kɔ́ɔ̄ɓē ɔr bā̰ā̰ loo rāā yá̰á̰ ń ni-ənī míndən yā rāā tə́ ní alé. Ba de kə́rēý gə̄ ədan̄ na ni na ɔr bā̰ā̰ ngá̰ý, tá ni tə́gā i tan tām̄ yāsí tə́. Tɔdɔ̄ ni gḛy kadə̄ de kə́rēý gə̄ udən̄ kɔ̄ɔ́ alé, ba kadə̄ de gə̄ malang tūrə̄n̄ gidədə́ kɔ̄ɔ́ ta yá̰á̰ kə́ majaĺ tə́.
10Ndɔ̄ yā Kɔ́ɔ̄ɓē a reē i tītə̄ nge ɓogə beé. Ndɔ̄ ngeé ń noō tə́ ní, dɔ rā̰ a hində̄ lim kə kōō yá̰á̰ kógə̄ḿ kə́ ɓār̄ to ɓōĺ ngá̰ý ō, yá̰a̰ gə̄ ń Nə́ɓā əndādə́ á hor i tū tə́ ní a nujən̄ kɔ̄ɔ́ ō, dɔ nang kə yá̰a̰ malang kə́ tū tə́ a gətóo kɔ̄ɔ́ ō. 11Dan ń a nujən̄ yá̰a̰ malang i tītə̄ ń noō ní, háĺ ń kadə̄ ī-ndiīneé ní sḭḭ̄ ī-gerī majə! Majə kadə̄ háĺsí i háĺ kə́ kɔr̄ kam̄ tām̄ yā Nə́ɓā tə́ ō, i háĺ kəhɔ gō Nə́ɓā ō, 12tá kadə̄ ī-ndi ī-ngóōīneé ndɔ̄ yā Nə́ɓā ō, ə́hɔīneé rɔ̄sí tɔgə ī-rāāīneé kadə̄ ndɔ̄ ní reē láẃ ō. Ndɔ̄ ngeé ń noō tə́ ní a nujən̄ dɔ rā̰ i kə horoó ō, yá̰a̰ gə̄ ń Nə́ɓā tə́ndādə́ dɔɔ́ ní kəngā hor a yḛḛ̄də́ kɔ̄ɔ́ ō.
13Tá jə-ndi j-a jə-ngóōī i yá̰á̰ ń ni-ənī míndən najə̄n tə́ ní, adə̄ i dɔ rā̰ kə́ kijə ō, dɔ nang kə́ kijə ō ń yá̰á̰ kə́ gōtə́ a to tū tə́ ní.
14Kó tár gə̄, i tām̄ najə̄ ń noō tə́ n majə kadə̄ ə́hɔī rɔ̄sí tɔgə kadə̄ majaĺ tákə̄sí aĺ ō, kadə̄ najə̄ gətóo dɔsí tə́ ta kum Nə́ɓā tə́ ō, kadə̄ ī-ndiī kə kem kə́ sɔl̄ lɔmɔɔ́ ō, pá tá kadə̄ ndɔ̄ ní ugə̄ ɓáý ní. 15Majə kadə̄ ī-rāāī tə́gā ta kə́ dan i ngá̰ý yā Kɔ́ɔ̄ɓē yājí i ta róbə́ kə́ kadə̄ ájiīneé tə́! Ngōkó̰ó̰jí kə́ kó tár yājí ń i Pol ní, ndang adə̄sí kə gō kum kedə̄ ń Nə́ɓā adə̄n ní i tītə̄ ń noō ō. 16I yá̰á̰ ń toō n ni ndang kem makətūbə̄ gə̄ malang ń ni-ɔr̄ najə̄ ń toō kemeé tə́ ní. Makətūbə̄ gə̄ ń ni ndang ní, loo ger̄ kum najə̄ kə́rēý gə̄ kə́ tū tə́ ngan̄g ngá̰ý. Adə̄ de kə́ ger̄ yá̰a̰ aĺ gə̄ ō, kə́ ngəradə́ əhɔ nang aĺ gə̄ ō, tūrə̄n̄ gír kɔ̄ɔ́, tītə̄ ń nin̄ a rāān̄neé kə gotə makətūbə̄ kə́ rang gə̄ yā Nə́ɓāá ní. Nin̄-nujən̄ kə rɔ̄də́ nin̄ kɔ́ gɔ̄ɔ́ i tītə̄ ń noō.
17Kó tár gə̄, kə́ tām̄ yāsí tə́ tā anī, ngɔlaā ní tāān̄sí kɔ̄ɔ́ ɓá. Adə̄ ī-ndiī dɔ rɔ̄sí tə́, ba ī-lōōī kəya̰ kadə̄ yá̰a̰ rāā kə́ gōtə́ aĺ gə̄ yā de kə́ usədə́ yá̰a̰ aĺ gə̄ ndúm̄ sesí ō, ī-lōōī tḭ̄ḭ̄ ta loo yāsí ń ī-raī ngan̄g tū tə́ ní ō. 18Banī āwī kum kə̄ kété kété tū kem majə yā Nə́ɓā tə́ ō, tū ger̄ Jeju *Kərist ń i Kɔ́ɔ̄ɓē yājí ō nge kajəjí ō ní tə́ ō. *Kɔsə gɔn i yān ngɔr ń toō tə́ ō, bátə́ kə̄ no tə́ ō! *Adə̄ i tītə̄ ń noō.
Currently Selected:
Makətūbə̄ kə́ nge ko̰ jōó ń Piyer ndang ní 3: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad