Makətūbə̄ kə́ nge ko̰ jōó ń Piyer ndang ní 2
2
Ngé ndóō de gə̄ yá̰á̰ kə́ rɔ̄kum aĺ gə̄
(Á̰a̰ī Jud 4-13)
1Ngé koō ta kə́ rɔ̄kum aĺ gə̄ ton̄ dan gír de gə̄ yā Nə́ɓā tə́ kété, adə̄ ngé ndóō de gə̄ yá̰á̰ kə́ rɔ̄kum aĺ gə̄ a ton̄ dɔ dáńsí tə́ ō. Nin̄ a udən̄ dansí tə́ yā ndóō de gə̄ yá̰á̰ kə́ rɔ̄kum aĺ gə̄ ō, yá̰á̰ kə́ majaĺ ngá̰ý gə̄ ō, loo mundə̄ tə́ jəke. Ngoldə́ ń gān̄g dɔdə́ ní gə̄gē nin̄-aw̄n̄ bátə́ mbātə́nən̄ kɔ̄ɔ́. Nin̄-ndɔ́rə̄n̄ kudə kɔ̄ɔ́ reēn̄neé dɔ rɔ̄də́ nin̄ kɔ́ gə̄ tə́, ba kudə kɔ̄ɔ́ yādə́ ní a ɔr bā̰ā̰ alé. 2Ba de gə̄ ngá̰ý a unən̄ gōdə́ loo rāā háĺ kə́ majaĺ gə̄ tə́ ō, de gə̄ tə́dan̄ najə̄ dɔ gō róbə yā najə̄ kə́ rɔ̄kum tə́ sɔɔ̄ń yá̰a̰ rāādə́ ō. 3Sɔɔ̄ń rāā ta nar kə́ kemdə́ tə́ ní, ngé ndóō de gə̄ yá̰á̰ kə́ rɔ̄kum aĺ gə̄ ngeé ń toō, a ndóōn̄sí najə̄ kə́ tūr̄ gidə kɔ̄ɔ́ kə kum kedēé gə̄ yā kəsańsí. Banī a gāngə̄n̄ sarya dɔdə́ tə́ ngɔr ō, a nujən̄ sedə́ sák sák ngɔr ō.
4Tɔdɔ̄ *de kə́ dɔ rā̰ tə́ gə̄ ń rāān̄ majaĺ ní, Nə́ɓā əya̰də́ karī alé, banī ɓōkə́də́ loo kə́ yá̰á̰ kə́ tōr̄ a rāādə́ tū tə́ tə́. Tó̰ō̰n̄də́ kə súĺ ba ngōmə̄n̄də́ loo ngeé ń noō tə́ kum til tə́, yā ngóoń ndɔ̄ gān̄g sarya. 5Dɔ nang kə́ kété jóo ń de kə́ ngé rāā yá̰a̰ gō yā Nə́ɓā tə́ aĺ gə̄ ndin̄ tū tə́ ní, Nə́ɓā əya̰ karī alé, ba rāā adə̄ man̄ un dɔ malang kɔ̄ɔ́. I Noe nge kɔjə yá̰á̰ kə́ gōtə́ ngóy n ni-ajən ní ō, ni-ajə de kə́ rang gə̄ sīrí ō.
6Nə́ɓā gān̄g sarya dɔ ɓē gə̄ kə́ Sodom tə́ ō, Gomor tə́ ō, ba nujə ɓē gə̄ ní kɔ̄ɔ́ kə horoó. I yá̰á̰ ń kadə̄ a rāā ngé kem ndul gə̄ ní n ni-rāā yá̰á̰ ń noō ɔjəńdə́ kadə̄ gerə̄n̄ ní. 7Lot ń i de kə́ nge rāā yá̰á̰ kə́ gō tə́ ní, ni-ɔrə̄n kum tə́ kɔ̄ɔ́. Háĺ kə́ majaĺ yā de kə́ usədə́ yá̰a̰ aĺ gə̄ kə́ ɓāl̄ yā Lot tə́ ɔr̄ wur Lot. 8Tɔdɔ̄ de kə́ nge rāā yá̰á̰ kə́ gō tə́ ń toō ń ndi dandə́ tə́ ní, a̰a̰ i yá̰á̰ kə́ beé gə̄ ō, oō i yá̰á̰ kə́ beē gə̄ ō, kə dɔ ndɔ̄ gə̄. Adə̄ yá̰a̰ rāādə́ kə́ majaĺ gə̄ ní, ɔrə̄n̄ wurən ni ń i de kə́ gōtə́ ní. 9Kumən na Kɔ́ɔ̄ɓē asə kɔr̄ de kə́ ngé rāā yá̰a̰ kə gō ń ni-ndigə ní gə̄ kum yá̰a̰ nāā tə́ ō, asə ngɔ̄m̄ de kə́ gōtə́ aĺ gə̄ yā rāādə́ yá̰á̰ kə́ tōr̄ ndɔ̄ gān̄g sarya tə́ ō. 10Ba kə́ bo ngá̰ý ɓáa i ngé kun gō ngur yá̰á̰ kə́ yḛr gə̄ kə́ rāādə́ ba mbātə́nń kadə̄ Nə́ɓā o̰o̰ ɓē dɔdə́ tə́ gə̄.
Ngé ndóō de gə̄ yá̰á̰ kə́ rɔ̄kum aĺ gə̄ ngeé ń toō ní, nin̄ i de kə́ ngé ɓōĺ yá̰a̰ aĺ gə̄ ō, ngé ndájə̄ najə̄ gə̄ ō. *De kə́ dɔ rā̰ tə́ kə́ to *kɔsə gɔndə́ gə̄ ní, nin̄-ɓōlə́n̄ ndíĺdə́ alé, banī tájə̄n̄də́. 11De kə́ dɔ rā̰ tə́ gə̄ ń ngan̄g tɔyn̄ ngé ndóō de gə̄ yá̰á̰ kə́ rɔ̄kum aĺ gə̄ ngeé ń toō ō, tɔ́gə́də́ tɔȳ yādə́ ō ní, gāngə̄n̄ sarya tájə̄n̄neé *de kə́ dɔ rā̰ tə́ kə́ to kɔsə gɔn gə̄ ní ta kum Kɔ́ɔ̄ɓē tə́ alé. 12Banī ngé ndóō de gə̄ yá̰á̰ kə́ rɔ̄kum aĺ gə̄ ngeé ń toō a rāān̄ yá̰a̰ i kanjə̄ gír̄ yá̰a̰, tītə̄ yā dā̰ kə́ bembeé gə̄ ń ojən̄də́ i kə rī kəhɔ tɔ̄l̄də́ ní beē. Nin̄-tájə̄n̄ yá̰á̰ ń nin̄-gerə̄n̄ aĺ ní. Nin̄ a oyn̄ i yo kə́ tītə̄ yā dā̰ kə́ bembeé gə̄ beé. 13Yá̰á̰ kə́ tōr̄ ń a rāādə́ ní, a əndānəń i njadə́ tām̄ yā yá̰á̰ kə́ gōtə́ aĺ ń nin̄-rāān̄ tə́ ní. Nin̄-əngen̄ rɔ̄nel̄ yādə́ loo rāā yá̰á̰ kə́ majaĺ gə̄ ń ngurən i kemdə́ tə́ ní. Dan ń nin̄-əsan̄ yá̰a̰ yāsí gə̄ sesí ō, rɔ̄nel̄ yādə́ i gól̄ loo ō ní, ndidə́ nin̄ sesí ta yá̰a̰ kəsa tə́ i yá̰á̰ kə́ to rɔ̄sɔl̄ ō, i yá̰á̰ kə́ to wōn̄g ngá̰ý ō. 14Kumdə́ a ndəle i dəyá̰ kə́ ngé rāȳ gə̄ ō, asədə́ rāā yá̰á̰ kə́ majaĺ aĺ bátə́ ō. Nin̄-əyān̄ gūmbə̄ əhɔn̄neé de kə́ tɔ́gə́də́ gətóo gə̄ ō. Yá̰á̰ ń i rāā ta nar ní, nin̄-gerə̄n̄ ngá̰ý ō. Ndɔ̄ĺ yā Nə́ɓā i dɔdə́ tə́! 15Nin̄-əya̰n̄ róbə́ kə́ súmūú kɔ̄ɔ́ adə̄ ndúmə̄n̄. Nin̄-unən̄ róbə́ ń Balam kə́ ngōn̄ Bosor un ní. Balam ngeé ń toō gḛy nar kə́ kadə̄ adə̄nən̄ gíŕ yá̰a̰ rāān kə́ gō tə́ aĺ tə́. 16Banī gɔŕyɔ̄nən̄ najə̄ tām̄ dum̄ naā yān tə́. Tɔdɔ̄ kó̰o̰ kərō ń i dā̰ kə́ a ɔr̄ najə̄ aĺ ní, ɔr̄ najə̄ kə́ deē tə́ seneé, adə̄ *nge koō ta lōō gír rāā yá̰á̰ kə́ to mbóó ń ni-əla gíŕ ní tə́.
17Ngé ndóō de gə̄ yá̰á̰ kə́ rɔ̄kum aĺ gə̄ ngeé ń toō ton̄ i tītə̄ ta kəɓa man̄ kə́ man̄ gətóo tū tə́ beē ō, ton̄ i tītə̄ kil̄ man̄ gə̄ kə́ nél man̄ ɔr̄də́ kɔ̄ɔ́ beé ō. Nə́ɓā ngɔ̄m̄ loo kə́ risə til nding tām̄ yādə́ tə́. 18Najə̄ kɔr̄də́ i najə̄ kə́ to kɔjə rɔ̄ gə̄ ō, i mbóo najə̄ gə̄ ō. Yá̰á̰ kə́ majaĺ gə̄ ń ngurən i kemdə́ tə́ ní, nin̄-əyān̄ gūmbə̄ kə yá̰a̰ gə̄ ní əhɔn̄neé ngé teē jī ngé rāā yá̰a̰ gō tə́ aĺ gə̄ tə́ ngɔr ɓáý gə̄. 19Nin̄-ənīn̄ ndūdə́ adə̄n̄də́, ədan̄də́ na a teēn̄ ɓəloó, banī nin̄ kɔ́ gə̄ i ɓəlo gə̄ yā háĺ gə̄ kə́ a aw̄n̄ kə deé a əlanən̄ ta yo tə́. Tām̄ deē i ɓəlo yā yá̰á̰ kə́ dum̄ tɔ́gən. 20Tɔdɔ̄ ngé gə̄ ń teēn̄ kɔ̄ɔ́ kum yá̰á̰ kə́ yḛr gə̄ kə́ dɔ nang tə́, kə ta kūl̄ ger̄ Jeju *Kərist ń i Kɔ́ɔ̄ɓē yājí ō, nge kajəjí ō ní, ré tél əya̰n̄ rɔ̄də́ adə̄ yá̰á̰ kə́ yḛr gə̄ ní ɓírə̄n̄də́ gogə́ ō, o̰o̰n̄ ɓē dɔdə́ tə́ gogə́ ō anī, ndidə́ kə́ ta tɔ̄l̄ ta tə́ ní majaĺ ngá̰ý tɔȳ kə́ kété ɓáý. 21Kə́ só tə́ yādə́ i kadə̄ gerə̄n̄ róbə rāā yá̰á̰ kə́ gōtə́ alé, tɔȳ kadə̄ gerə̄n̄ pá tá tūrə̄n̄ gidədə́ kɔ̄ɔ́ ta gō míndə́ Nə́ɓā ń adə̄n̄də́ tə́ ní. 22Yá̰á̰ ń rāādə́ ní ɔjə kadə̄ gōsə̄ najə̄ əda i yá̰á̰ kə́ rɔ̄kum, əda na:
Bísə́ tél kə̄ ta tōmbən tə́ gogə́ əsa ō,
kó̰o̰ bor̄ ń ndogə̄nən̄ man̄ ní, tél aw̄ ɓɔ́ɓə̄lɔ̄ rɔ̄n gogə́ bɔrɔɔ́ ō.
Currently Selected:
Makətūbə̄ kə́ nge ko̰ jōó ń Piyer ndang ní 2: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad