KUM KEDƏ̄ 1
1
Mēr̄ naā rāā yá̰á̰ kə́ gōtə́
1Sḭḭ̄ gə̄ ń ṵ́ṵ̄ī ɓē dɔ nang tə́ ní, ādī yá̰a̰ rāā kə́ gōtə́ nel̄sí.
Ādī gír̄ yāsí gə̄ kə́ dɔ Kɔ́ɔ̄ɓē tə́ i gír̄ kə́ súūmú gə̄.
Ī-sāāin̄ kə kemsí kə́ kanjə̄ kɔjə rɔ̄ɔ́.
2Tɔdɔ̄ deē ń nāā Kɔ́ɔ̄ɓē aĺ ní, Kɔ́ɔ̄ɓē a əya̰ rɔ̄n kadə̄ ni a əngen.
Deē ń taā kemən ní, ni a ɔjə rɔ̄n kə̄ ndágá ta kumən tə́.
3Gír̄ kə́ súūmú aĺ gə̄ a kēgə̄n̄ deē naā tə́ kə Nə́ɓāá ō,
tɔ́gə yā Nə́ɓā ń deē nāan ní, əla rɔ̄sɔl̄ dɔ de kə́ mbóo gə̄ tə́ ō.
4Kum kedə̄ a udə kem de kə́ kemən majaĺ tə́ alé,
ni a ndi kem de kə́ majaĺ ṵṵ ɓē dɔn tə́ alé.
5Tɔdɔ̄ ndíĺ kə́ táĺ ń i nge kɔjə̄ deē ní, ni i nge ka̰ȳ de kə́ kemən i jōó jōó,
ni ɔr̄ rɔ̄n kɔ̄ɔ́ kadə gír̄ kə́ to mbóo gə̄ tə́.
Dan ń yá̰a̰ rāā kə́ gōtə́ aĺ teē hɔy anī, ni əsō kɔ̄ɔ́.
6Kum kedə̄ i ndíĺ kə́ nge rāā majə kə deé,
deē ń tan a ɔr̄ najə̄ kə́ majaĺ gə̄ ní, ni a əndan ba a əya̰n karī alé.
Tɔdɔ̄ Nə́ɓā ger̄ kəla rāan kə́ majaĺ gə̄ ō,
əndā ma̰ȳ gír̄ kə́ kemən tə́ kə gō najə̄ kə́ rɔ̄kum ō,
nēl̄ mbīn oōń najə̄ kə́ teē tan tə́ ō.
7A̰á̰ā̰, Ndíĺ Kɔ́ɔ̄ɓē taā lo dɔ nang tə́ malang.
Ba tītə̄ ń dɔ rā̰ ō, dɔ nang ō, ton̄ i kemən tə́ ní, ni ger̄ ndū yá̰a̰ gə̄ kógə̄ḿ kógə̄ḿ.
8Adə̄ náā nəkɔ́ ń najə̄ kə́ to kem ndul teē tan tə́ ní, a mān̄ dāȳn tə́ aĺ ō,
yá̰a̰ rāā kə́ gōtə́ ń i nge kəndā najə̄ dɔ deē tə́ ní, a əya̰n aĺ ō.
9Deē ń i nge rāā yá̰a̰ gō yā Nə́ɓā tə́ aĺ ní, i gáŕ kadə̄ a ndəlen̄ gíŕ yá̰á̰ ń ni a sāā rāā ní.
Kōō najə̄ kɔrə̄n gə̄ a aw̄ bátə́ yā kugə̄ rɔ̄ Kɔ́ɔ̄ɓē tə́,
yā kɔjəń kadə̄ ni rāā yá̰á̰ kə́ gōtə́ aĺ gə̄ rɔ̄kum.
10Mbī kə́ atə ngá̰ý oō yá̰a̰ malang,
najə̄ kə́ kɔtə́ nang tə́ jəke gə̄gē ní, kə́ mān̄ dāȳn tə́ gətóo.
11I beé ní, ī-lōōī yṵ́r̄ najə̄ kə́ kanjə̄ kumən.
Ī-ngɔ̄mī ta ndo̰o̰sí bā ī-lōōī tām̄ kə de gé,
tɔdɔ̄ najə̄ kə́ kɔr̄ lo mundə̄ tə́ ní, gotə a to karī aĺ ō,
deē ń tan a tétə̄ najə̄ ní, tan a tɔ̄lən ō.
12Ī-lōōī rāā yá̰a̰ kə̄ nuú sāań ta yo ō,
ndɔ́r̄ yá̰á̰ kə́ nujə sák sák kə jīsí reēń dɔsí tə́ ō.
13Nə́ɓā rāā yo aĺ ō,
koy deē nelə̄n aĺ ō.
14Tɔdɔ̄ ni əndā yá̰a̰ gə̄ malang i yā kadə̄ ndin̄ kə kumdə́ ō,
yá̰a̰ malang ń ni rāā dɔ nang tə́ ní, i kadə̄ gír kaa gə̄ ojənə̄ń naā kum kə̄ kété ō.
Yá̰a̰ malang ń a ojə naā kum kə̄ kété ní, i yá̰á̰ kə́ a yḛl deē aĺ ō,
lo kə́ ɓádá ṵṵ ɓē dɔ nang tə́ aĺ ō.
15Tɔdɔ̄ yá̰a̰ rāā kə́ gōtə́ i yá̰á̰ kə́ a oy alé.
Najə̄ kɔr̄ ngé rāā yá̰a̰ kə gō kem ndigə yā Nə́ɓāá aĺ gə̄
16Banī de kə́ ngé rāā yá̰a̰ kə gō kem ndigə yā Nə́ɓāá aĺ gə̄ ɓārə́n̄ lo kə́ ɓádá kə ta kūl̄ yá̰a̰ rāādə́ gə̄ ō, najə̄ kɔr̄də́ gə̄ ō.
Ngur lo kə́ ɓádá asədə́ nák, adə̄ nin̄ ənīn̄ ndūdə́ adə̄nən̄ əhɔnə̄ń madə̄ naā seneé.
A̰á̰ā̰, majə ngá̰ý kadə̄ nin̄ i deē yān gə̄ rɔ̄kum.
Currently Selected:
KUM KEDƏ̄ 1: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.