KUM KEDƏ̄ 2
2
1Tɔdɔ̄ nin̄ ɔrə̄n̄ najə̄ kə́ gōtə́ aĺ gə̄ dɔ dáńdə́ tə́ ədan na:
ndijí kə kumjí dan i ngá̰ý aĺ ō, to rɔ̄nel̄ aĺ ō.
Dan ń ndɔ̄ deē təgā kɔ̄ɔ́ ní, dáwán kə́ rang gətóo.
Tá tītə̄ ń jə-gerə̄ń ní, de kə́ oy aw̄ ɓádá tá tél reē gətóo.
2Jḭḭ̄ ní, ojən̄jí i rétə́ gēé ō,
gō tə́ ɓáa to tītə̄ kə́ jə-ndiī kə kumjí kété aĺ beé ō.
Koō kə́ kóńjí tə́ gə̄gē ní, to i tītə̄ saa beé.
Gír̄ yājí i hor kə́ ndɔ̄w̄ kə gō kújə́ mósə́jí kə́ ndigə ɗiw ɗiw.
3Ré gír̄ yājí oy anī, dā̰ rɔ̄jí a tél i bū,
koōjí a sində̄ kɔ̄ɔ́ tītə̄ néĺ kə́ əla pelele beé ō.
4Kə gō kum mbang ń a mānəń nuū ní, dɔ de gə̄ a ndígə̄nal i dɔ rījí tə́ ō,
a əga kem de gə̄ dɔ yá̰a̰ rāājí gə̄ tə́ tṵ aĺ ō.
Ndijí kə kumjí a mān̄ i tītə̄ kil̄ man̄ beé ō, deē a a̰a̰ gō tóon tṵ aĺ ō,
ni a sində̄ lim tītə̄ díḿsir
kə́ yḛŕ mbang tə̄ndā tḭ̄in kɔ̄ɔ́ beē ō,
kə́ kəngā mbang rāā adə̄ gətóo kɔ̄ɔ́ beē ō.
5Kum mbang ndijí kə kumjí to i tītə̄ ndíĺ kə́ a ndɔ́tə̄ beé ō,
ta tɔ̄l̄ ta ndɔ̄jí ní, deē a ndɔ́təń kə̄ kété aĺ ō,
tɔdɔ̄ i kə́ kɔr mbō̰ ta tə́ kɔ̄ɔ́, adə̄ deē a tél yā kun gír njan tṵ alé.
6I beé ɓá ní, ādə̄ jə-rāāī rɔ̄nel̄ tām̄ yā yá̰a̰ kənge gə̄ kə́ ta jījí tə́ gə̄ ń toō ō,
tītə̄ ń jə-rāāiń dan balsáájí tə́ ní,
ādə̄ j-əngeī yá̰a̰ tū yá̰a̰ malang ń Nə́ɓā rāā tə́ ní kə nja ngárāá ādə̄ rāā majə sejí ō.
7J-a̰yī kasə nduú kə́ nel̄ ādə̄ rāājí ō, jə-rāāī ítər kə́ otə majə rɔ̄jí tə́ ō,
jə-lōōī kadə̄ dɔjí ndígə̄nal sāā hútə̄ kāgə̄ kə́ ta kəga dɔ gə̄ ō.
8Jə-sétī hútə̄ kāgə̄ kə́ majə jə-rāāī jākā mbang tə́ j-əlaī dɔjí tə́ kété pá tá kadə̄ ndəlēn̄ ɓáý.
9Ādə̄ nja de kógə̄ḿ nay gogə́ lo rāā nāā yājí kə́ bo tə́ alé.
J-əya̰ī yá̰á̰ kə́ ɔjə dɔ rɔ̄nel̄ yājí kə̄ lo gə̄ tə́.
Tɔdɔ̄ i núsən yājí n nuū ō, i yá̰a̰ yājí ō.
10Nge ndoō ń i de kə́ nge rāā yá̰á̰ kə́ gōtə́ ní, ādə̄ jə-rāāin̄ yá̰á̰ kə́ tōr̄ ō,
dəyá̰ kə́ nge kəlā ndoō ní, ādə̄ j-əya̰in̄ karī aĺ ō,
ādə̄ usəjí dɔ de kə́ dɔn ndaa tə́ aĺ ō.
11Ba kə́ tām̄ yājí tə́ ɓáa tɔ́gə i ta róbə rāā yá̰a̰,
tɔdɔ̄ tɔ́gə gətóo i yá̰á̰ kə́ kanjə̄ kumən.
12Jə-gīrī de kə́ gōtə́ j-əhɔin̄, tɔdɔ̄ ni njə́ɓājí ngá̰ý ō,
mbātə́ yá̰a̰ rāājí gə̄ ō,
gákə̄jí najə̄ kḭḭ kə́ jḭḭ̄ bal dɔ ndū najə̄ gə̄ tə́ ō,
əndā najə̄ dɔjí tə́ əda na: Jə-raī dɔ kɔjə̄ ń j-əngeī tə́ ní aĺ ō.
13De kə́ gōtə́ əda na n-ger̄ Nə́ɓā mák mák ō,
əda na ni na i ngōn̄ Kɔ́ɔ̄ɓē ō.
14Ni tél i nge gákə̄jí dɔ gír̄ yājí gə̄ tə́ ō,
j-asə tə́gā tají lo ka̰a̰n tə́ aĺ ō.
15Tɔdɔ̄ yá̰a̰ rāan to tītə̄ yā madə̄n gə̄ aĺ ō,
hálən to tayā ngá̰ý ō.
16Ni rāājí i yá̰á̰ kə́ tūr̄ gidə kɔ̄ɔ́ tə́ ō,
ni gōn̄g róbə yājí gə̄ tītə̄ kə́ i yá̰á̰ kə́ yḛr gə̄ beé ō.
Ni əda na ta tɔ̄l̄ ta de kə́ gōtə́ gə̄ na to rɔ̄nel̄ ō,
ni ɔjə rɔ̄n əda na Nə́ɓā na i bɔbə̄n ō.
17Ādə̄ j-a̰a̰ī ké najə̄ kɔrə̄n gə̄ i najə̄ kə́ rɔ̄kum gə̄ wa ō,
ādə̄ j-əndāī ma̰ȳ j-a̰a̰ī ké ta tɔ̄l̄ tan a to i ba̰ý wa ō.
18Ré de kə́ gōtə́ i ngōn̄ Nə́ɓā anī, Nə́ɓā a reē yā dḭḭ̄n ō,
a taān jī madə̄ ba̰ā̰n gə̄ tə́ yā kəya̰n dɔɔ́ ō.
19Jə-tájīin̄ ō, jə-rāāin̄ yá̰á̰ kə́ tōr̄ ō,
jə-nāāinə̄ń
j-a̰a̰ī ké a tə́gā tan yā ndi jəke wa.
20Jə-gāngī sarya yo kə́ to rɔ̄sɔl̄ dɔn tə́,
tām̄ kem najə̄ kɔrə̄n gə̄ tə́ ní, ni əda na Nə́ɓā na a reē yā dḭḭ̄n.
21Ngé rāā yá̰a̰ kə gō kem ndigə yā Nə́ɓāá aĺ gə̄ a ɔrə̄n̄ najə̄ i tītə̄ ń nuū, banī nin̄ a gólə̄n̄ i rɔ̄də́.
Yá̰á̰ kə́ majaĺ gə̄ ń nel̄də́ rāā ní tɔ̄ɔ̄ kumdə́ kɔ̄ɔ́.
22Adə̄ yá̰á̰ kə́ to lo mundə̄ tə́ gə̄ ń Nə́ɓā núm̄ rāā ní, nin̄ gerə̄n̄ alé.
Nin̄ əndān̄ kemdə́ dɔ kənge yá̰a̰ kəndā nja ń ngé rāā yá̰a̰ gō yā Nə́ɓā tə́ gə̄ a əngen̄ ní alé.
Rɔȳ ń ngɔ̄mə̄n̄ tām̄ yā de gə̄ kə́ kanjə̄ najə̄ dɔdə́ tə́ gə̄ ní, nin̄ ndigən̄ alé.
23Tá Nə́ɓā əndā deē i yā kadə̄ deē oy aĺ ō,
ni rāan adə̄ teē i ngarā̰ kumən nəkɔ́ ō.
24Banī yo reē dɔ nang tə́ i kə ta kūl̄ kəndā nii yā ndíĺ kə́ nge gól̄ lo gə̄.
Adə̄ ngé gə̄ ń tetən̄ rɔ̄də́ gōn tə́ ní a oyn̄.
Currently Selected:
KUM KEDƏ̄ 2: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.