ESTER KƏ TA GƏREK G
G
4 Najə̄ ń Mardose a əda dejə ní n toó: Yá̰a̰ gə̄ ń nuū malang ń rāān̄ yá̰á̰ ní, i kəla rāā Nə́ɓā. 5 Tām̄ əga kemḿ dɔ nīī ń rāām̄ tə́ ní. Yá̰á̰ kógə̄ḿ kə́ tū nīī ní tə́ kə́ əya̰n̄ kɔ̄ɔ́ gətóo, yá̰a̰ gə̄ ní rāān̄ yá̰a̰ malang.
6 M-á̰a̰ ta kəɓa man̄ kógə̄ḿ kə́ dūú ngá̰ý kə́ tél bā. Gō tə́ anī, i lo kə́ unjə̄ kow ō, mbang ō, man̄ kə́ ngá̰ý ō. Bā ní i Ester ń mban̄g taān adə̄ tél mban̄g kə́ dəyá̰ ní. 7 Dā̰ kə́ jōó gə̄ kə́ majən̄ aĺ ngá̰ý ní, i Haman ō, mā ō. 8 Gíŕ nápar de gə̄ i ngé gə̄ ń ɔsən̄ dɔdə́ naā tə́ yā nujə rī Jipə gə̄ kɔ̄ɔ́ ní. 9 Gíŕ nápar de gə̄ ń i nápar deē yāḿ gə̄ ní, i Israel, adə̄ i ngé gə̄ ń əgan̄ kɔŕ kə̄ dɔ Nə́ɓā tə́ ō, ajən̄də́ ō ní. Kɔ́ɔ̄ɓē ajə gír deē yān gə̄! Yá̰á̰ kə́ to kum tō ndoō gə̄ malang ń nuū ní, Kɔ́ɔ̄ɓē ɔr̄jí kum tə́ kɔ̄ɔ́! Nə́ɓā rāā yá̰á̰ kə́ yā kɔjəń yá̰a̰ gə̄ ō, yá̰á̰ kə́ majə to ɓōĺ ngá̰ý gə̄ ō. De gə̄ ń taān̄ kem Nə́ɓā aĺ ní, Nə́ɓā rāā yá̰a̰ gə̄ ní kem ɓē yādə́ tə́ alé! 10 I tām̄ najə̄ ń toō tə́ n ni əndā dɔ yá̰a̰ danaá gír i jōó kadə̄ rāā de gə̄ ní: kógə̄ḿ i tām̄ yā gíŕ de gə̄ yā Nə́ɓā tə́ ō, kə́rēý i tām̄ yā de gə̄ malang ń taān̄ kem Nə́ɓā aĺ ní tə́ ō. 11 Tá yá̰á̰ kə́ gír jōó gə̄ ń nuū rāān̄ yá̰a̰ i kem ndɔ̄ kógə̄ḿ ō, kum mbang ō, dɔ kāgə̄ lo ō ń Nə́ɓā ɔjə yā gān̄gəń sarya dɔ gíŕ nápar de gə̄ malang tə́ ní. 12 Əga kem Nə́ɓā dɔ gír deē yān gə̄ tə́ ō, ni gān̄g sarya adə̄də́ ō. 13 I tām̄ najə̄ ń toō tə́ n majə kadə̄ nin̄ rāān̄ nāā ndɔ̄ jōó kem nāā Adar tə́ ní, adə̄ i kə ndɔ̄ nāā kə́ nge kṵ kutə gidə i sɔ́ ō, kutə gidə i mí ō. Nin̄ a kánə̄n̄ naā ta kum Nə́ɓā tə́ yā rāā rɔ̄nel̄. Gír kojə gə̄ malang yā gír de gə̄ yā Nə́ɓā a rāān̄ nāā ngeé ń toō ngándáńg.
Yá̰á̰ kə́ kəndā maȳ ka̰ā̰ ta tɔ̄l̄ ta tə́
14 Kem ɓāl̄ kṵ ɓē kə́ nge kṵ sɔ́ tə́ yā mban̄g Pətoleme nin̄ kə nəyá̰n ní, Dositos əda na ni na i nge tun̄ yá̰a̰ ō, ngōn̄ Lebi ō. I nin̄ kə ngōnən ń rīn na i Pətoleme ní n reēn̄ kə makətūbə̄ ń j-ɔrī najə̄n kété laā ní. Nin̄ ədān̄ na makətūbə̄ ní na i makətūbə̄ kə́ dɔ rāā nāā Purim gə̄ tə́ rɔ̄kum ō, na i Lijimak kə́ ngōn̄ Pətoleme ń i de kógə̄ḿ kə́ Jerusalem ní n na tūr̄ kum najə̄ gə̄ kə́ kem makətūbə̄ ní tə́ ní ō.
Currently Selected:
ESTER KƏ TA GƏREK G: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.