JUDITƏ 1
1
Nabukodonosor tetə Arpaksad rɔ̄ɔ̄
1Dan ngeé ń nuū tə́ ní, Nabukodonosor ṵṵ ɓē ɓāl̄ kutə gidə i jōó dɔ Asiri gə̄ kə́ Ninibə tə́. Ninibə i ɓē kə́ bo. Kem ndɔ̄ gə̄ ngeé ń nuū tə́ ní, Arpaksad ṵṵ ɓē dɔ Medə gə̄ tə́ kem ɓē kə́ Ekəbatan tə́. 2Arpaksad əndā ndogə̄ mbal̄ kə́ tɔ́sə̄ kadə gə̄ gidə ɓē ní tə́. Laa mbal̄ kógə̄ḿ i métər kógə̄ḿ kə núsə ō, ngālən i métər mətá ō. Ngāl̄ ndogə̄ mbal̄ ní kə́ kum kə̄ dɔɔ́ i métər kutə mətá gidə i mí, ba laan i métər kutə jōó gidə i mí. 3Ni rāā kújə́ kə́ ngāl̄ ɓururu gə̄ ta róbə gə̄ tə́ yā kudəń kə̄ kem ɓē ní tə́. Ngāl̄də́ kə́ kə̄ dɔɔ́ i métər kutə mí, banī laa ngəradə́ kə́ nang tə́ i métər kutə mətá. 4Ta róbə gə̄ ní ngāl̄də́ kə́ kə̄ dɔɔ́ i métər kutə mətá gidə i mí, ba ngāl̄də́ kə́ kə̄ nang tə́ i métər kutə jōó, yā kadə̄ ɓūtə̄ ngé rɔ̄ɔ̄ yān gə̄ mānə̄n̄ tū tə́ kə yá̰a̰ rɔ̄ɔ̄ gēé ō, ɓūtə̄ áskar yān kə́ ngé njə̄rā kə njadə́ gə̄ njə̄rān̄ kə njadə́ mānə̄n̄ tū tə́ kə gō naá ō.
5Kem ɓāl̄ kṵ ɓē kə́ nge kṵ kutə gidə i jōó yā Nabukodonosor tə́ anī, Nabukodonosor reē ənī mban̄g Arpaksad rɔ̄ɔ̄ kum kubə kə́ Rago tə́. 6De kə́ mbalá gə̄ malang ō, kə́ dɔ gɔ́sə bā Opəratə tə́ gə̄ ō, Tigər tə́ gə̄ ō, Hidaspə tə́ gə̄ ō, reē ɓoon̄ rɔ̄də́ tū yā Nabukodonosor tə́, naā tə́ kə de kə́ kum kubə tə́ gə̄ ń əlan̄ dɔdə́ gíŕ tɔ́gə yā Ariyok mban̄g kə́ Elimayis tə́ ní. Adə̄ i de gə̄ kə́ kem ɓē gə̄ kə́ gíŕdə́ i ngá̰ý tə́ n reē əndān̄ rɔ̄də́ naā tə́ kə de kə́ Babilon gə̄ a rɔ̄ɔ̄nəń ní.
7Nabukodonosor, mban̄g kə́ Asiri, əla de gə̄ kə̄ lo gə̄ tə́: dām̄ kə́ gír ɓē tə́ i kə̄ rɔ̄ Persə gə̄ tə́ ō, dām̄ kə́ no ɓē tə́ i kə̄ rɔ̄ Silisi gə̄ tə́ ō, əla de gə̄ kə̄ Damas tə́ ō, kə̄ Libā̰a̰ tə́ ō, kə̄ A̰ti-Liba̰ tə́ ō, əla de gə̄ Ekəbatan#1.7 Ekəbatan: Kété ní i ɓē bo yā Medə gə̄. Ɓōólaā a ɓārə́n̄ na i Hamadan, dɔ nang kə́ Ira̰ tə́. dɔ nang kə́ Ira̰ tə́, adə̄ aw̄n̄ bátə́ ugə̄n̄ kadə bā Mediterane tə́ ō. 8Ni əla de gə̄ kə̄ rɔ̄ de gə̄ ń ndin̄ kadə mbal̄ Karmel tə́ ō, kə̄ rɔ̄ de gə̄ kə́ dɔ nang kə́ Galaad tə́ ō, kə̄ rɔ̄ de gə̄ kə́ dɔ nang kə́ Galile kə́ kḭḭ kə̄ dɔɔ́ tə́ ō, kə̄ rɔ̄ de gə̄ kə́ kum kubə kə́ bo kə́ Jisreyel tə́ ō. 9Ngámbang kəla gə̄ yā mban̄g Nabukodonosor aw̄ əngen̄ de gə̄ kə́ kem ɓē gə̄ kə́ Samari tə́ ō, de kə́ gō nang kə́ gidə bā Jurdḛ kə́ dām̄ kə́ nú tə́ ō, aw̄n̄ bátə́ Jerusalem ō, Betane ō, Kelus ō. Gō tə́ anī, aw̄ ugə̄n̄ lo ń man̄ dɔ mbal̄ a nūgə́ tū tə́ á rāā rɔ̄n i dɔ nin̄ ɓē kə́ Ejiptə ní tə́ ō, aw̄ ugə̄n̄ sa̰y kem ɓē kə́ Tapanes tə́ ō, Ramses tə́ ō, gō nang malang kə́ Gosen tə́ ō. 10Nin̄ aw̄n̄ kə̄ kété sa̰y ɓáý kə̄ gidə ɓē gə̄ kə́ Tanis tə́ ō, Mempis tə́ ō, gotə dɔ nang malang kə́ Ejiptə ń nay ní, nin̄ aw̄n̄ tū tə́ ō, aw̄n̄ bátə́ ugə̄n̄ dɔ nin̄ dɔ nang kə́ Etiyopi tə́ ō. 11Banī de gə̄ kə́ gō nang gə̄ ngeé ń nuū tə́ malang ní, usədə́ dɔ najə̄ yā Nabukodonosor mban̄g kə́ Asiri tə́ alé. Nin̄ mbātə́n̄ tetə rɔ̄də́ gōn tə́ yā rɔ̄ɔń. Nin̄ ɓōlə́n̄ mban̄g alé, tām̄ yādə́ nin̄ tə́ ɓáa mban̄g i de kə́ karī ngóy. Nin̄ tə̄ɓān̄ ngámbang kəla yān gə̄ adə̄ tél aw̄n̄ jīdə́ karī, kə rɔ̄sɔl̄ kə́ ngá̰ý. 12Lo ń nuū tə́ wūn̄g rāā Nabukodonosor ngá̰ý kə gír de gə̄ ń nuū malang. Adə̄ ni túbə kə kōmbēr̄ ngār yāneé, yā dal ba̰ā̰ dɔ de gə̄ kə́ kem ɓē gə̄ ngeé ń nuū tə́ malang. Ni gír̄ tɔ̄l̄ de gə̄ kə́ Silisi tə́ ō, Damas ō, Siri ō, ni gír̄ tɔ̄l̄ Moab gə̄ ō, Amon gə̄ ō, de gə̄ kə́ Jude tə́ ō, kə́ Ejiptə ō. Ni gír̄ tɔ̄l̄ de gə̄ kə́ kadə bā Mediterane tə́ bátə́ gāngəń dɔ de gə̄ kə́ kadə bā bo tə́. 13Kem ɓāl̄ kə́ nge kṵ kutə gidə i sīrí ń Nabukodonosor ndiń mban̄g tə́ ní, ni ɔy ngé rɔ̄ɔ̄ yān gə̄ aw̄ ənīń mban̄g Arpaksad rɔ̄ɔ̄, ba tetən rɔ̄ɔ̄. Ngé rɔ̄ɔ̄ gə̄ malang yā Arpaksad, adə̄ i ngé kal̄ sə́nda yān gə̄ ō, púsə rɔ̄ɔ̄ yān gə̄ malang ō, télən̄ dɔ tə́. 14Nabukodonosor taā ɓē gə̄ yā mban̄g yā Medə gə̄ ō, aw̄ ugə̄ Ekəbatan ō. Ni taā kújə́ kə́ ngāl̄ ɓururu gə̄ kə́ loo ngeé ń nuū tə́ ō, nujə yá̰a̰ gə̄ ndágə lo gə̄ tə́ kɔ̄ɔ́ ō, əla rɔ̄sɔl̄ kə́ ngá̰ý dɔ ɓē kə́ majə ngá̰ý ngeé ń toō tə́ ō. 15Ni əhɔ Arpaksad mbo̰ō̰ mbal̄ gə̄ kə́ Rago tə́, ba tɔ́sən kə nəngaá tɔ́sə̄ tɔ̄lən. Ni nujə tɔ́gə Arpaksad kɔ̄ɔ́ kə́ njɔ́ḿ gə̄ tə́ i tītə̄ ń nuū. 16Ni tél dɔ tə́ reē gogə́ Ninibə kə ngé rɔ̄ɔ̄ yān gə̄ kə́ kutədə́ i ngá̰ý. Nin̄ malang ɔrə̄n̄ koō ō, rāān̄ rɔ̄nel̄ kem ɓēé ndɔ̄ ɓú kə kutə jōó ō.
Currently Selected:
JUDITƏ 1: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.