TOBI 14
14
1Najə̄ gə̄ ń Tobi ɔr̄ rāań Nə́ɓā kə́rá ní, ta tɔ̄l̄ tadə́ i tītə̄ ń nuū.
Tobi oy
2Tobi rāā ɓāl̄ ɓú kə kutə kógə̄ḿ kə kalən kə́ jōó pá tá oy kə kem sɔlɔ́ ō, dubə̄nən̄ i dubə̄ kə́ to rī ɓār̄ kem ɓē kə́ Ninibə tə́ ō. Ni aw̄ i kə ɓāl̄ kutə mehḛ́ gidə i jōó n kumən a̰a̰ń lo aĺ ní. Dan ń kumən tél a̰a̰ lo gogə́ ní, ni ndi i dan yá̰a̰ kənge kə́ ngá̰ý tə́ ō, adə̄ ngé ndoō gə̄ kadə̄ karī ō, nay kə̄ lo kənī pā tə́ ɓōkə́nń Nə́ɓā tɔ̄ȳ ō, kə̄ lo kənī mbēr̄ kəda na Nə́ɓā i de kə́ bo tə́ ō.
3Dan ń a rāā yā koy ngɔr anī, ɓāŕ ngōnən Tobiyas ba ɔjən yá̰a̰ gə̄ ń toō, ədan na: Ngōnə̄ḿ, ɔ́ý ngání gə̄ āwń, 4āw̄ láẃ dɔ nang kə́ Medi tə́, tɔdɔ̄ najə̄ kə́ dɔ ɓē kə́ Ninibə tə́ ń Nə́ɓā əndā ta Nahum tə́ adə̄ əda ní, m̄-taā kem: yá̰a̰ malang a reē yā kudə gíŕ kə́ rɔ̄ tə́ ō, a əsō dɔ ɓē kə́ Asur tə́ ō, Ninibə tə́ ō. Ngé koō taa kə́ Israel tə́ gə̄ ń Nə́ɓā əladə́ ní, yá̰a̰ malang ń nin̄ ədan̄ ní, a reē yā kudə gíŕ kə́ rɔ̄ tə́. Najə̄ gə̄ malang ń nin̄ ɔrə̄n̄ ní, nge kógə̄ḿ kə́ yā kɔr̄ tū tə́ kɔ̄ɔ́ a gətóo, a reēn̄ yā kudə gíŕ kə́ rɔ̄ tə́ kə kum mbang yādə́ gēé malang. Deē a ndi dɔ nang kə́ Medi tə́ kə lɔmɔɔ́ tɔȳ kəndi dɔ nang kə́ Asiri tə́ ō, Babilon tə́ ō. Tɔdɔ̄ m̄-ger̄ ō, m̄-taā kem ō, kadə̄ yá̰a̰ malang ń Nə́ɓā əda ní, a rāā yá̰a̰ ō, a reē yā kudə gíŕ kə́ rɔ̄ tə́ ō: najə̄ gə̄ ń Nə́ɓā əndā ta ngé koō taa gə̄ tə́ ní, kógə̄ḿ kə́ yā kəsō kɔ̄ɔ́ a gətóo. Ngákṵ́ṵ́jí gə̄ ń ndin̄ dɔ nang kə́ Israel tə́ ní, a tə́dan̄ kutədə́ malang ō, a ɔyn̄də́ dɔ gúú tə́ yā kaw̄ sedə́ sa̰y kɔ̄ɔ́ rɔ̄ nang kə́ majə ń toō tə́ ō. Dɔ nang kə́ Israel malang a tél dəla lo ō, ɓē kə́ Samari nin̄ kə ɓē kə́ Jerusalem, a télən̄ dəla lo ō, a əlan̄ hor dɔ kújə yā Nə́ɓā tə́ ō, ni a nujə sák sák kum mbang kógə̄ḿ tə́ ō. 5Banī Nə́ɓā a tél yā ka̰a̰ kum tō ndoō yādə́ ɓáý tṵ ō, a tél yā reē sedə́ gogə́ dɔ nang kə́ Israel tə́ ō. Nin̄ a télən̄ yā rāā kújə yān gogə́, banī a to tītə̄ nge kə́ kété alé, bátə́ kadə̄ kum mbang ń ɔjən̄ ní asəń. Gō nge ń nuū tə́ anī, nin̄ a ḭḭn̄ lo gə̄ ń ɔyn̄də́ aw̄n̄ sedə́ tū tə́ dɔ gúú tə́ ní, yā tél reē gogə́ malang ō, a télən̄ yā rāā ɓē kə́ Jerusalem gogə́ kadə̄ majə ngá̰ý ō. A télən̄ yā rāā kújə yā Nə́ɓā gogə́ kemeé, kə gō ń ngé koō taa gə̄ kə́ Israel tə́ ədanə̄ń ní. 6De gə̄ malang kə́ dɔ nang tə́ a télən̄ kə̄ rɔ̄ Nə́ɓā tə́ ō, a ɓōlə́n̄ ndílən kə́ rɔ̄kum gə̄ tə́ ō. De gə̄ malang a əya̰n̄ ɓesə̄ yādə́ gə̄ ń a gólə̄n̄ lo ní kɔ̄ɔ́, adə̄ i ɓesə̄ yādə́ gə̄ ń rāān̄də́ adə̄ nin̄ ndúmə̄n̄ sɔɔ̄ń yá̰a̰ rāādə́ kə́ gōtə́ aĺ gə̄ ní, ba a rāān̄ Nə́ɓā kə́ ndi kə dɔ ɓāl̄ gə̄ kə́ra kə ta kūl̄ yá̰a̰ rāādə́ kə́ gōtə́. 7Ngán Israel gə̄ malang ń a ajən̄də́ kem ndɔ̄ gə̄ ngeé nuū tə́ ní, a əga kemdə́ dɔ Nə́ɓā tə́ rɔ̄kum. Nin̄ a ɔsən̄ dɔdə́ naā tə́ ba a télən̄ yā reē gogə́ Jerusalem. Dɔ nang yā Abəraham ń a adə̄n̄də́ ní, nin̄ a ndin̄ tū tə́ ngándáńg, yá̰á̰ kógə̄ḿ a rāādə́ tū tə́ alé. Ngé gə̄ ń tárən̄ Nə́ɓā rɔ̄kum ní, nin̄ i kə rɔ̄nelé, banī ngé rāā majaĺ gə̄ ō, yá̰á̰ kə́ gōtə́ aĺ gə̄ ō ní, a gətóon̄ kɔ̄ɔ́ dɔ nang tə́.
8-9Ngɔlaā ní, ngánə́ḿ gə̄, á̰a̰ī yá̰á̰ ń m-ɔ́jə́sí ní: ī-rāāī kəla ādī Nə́ɓā kə́ rɔ̄kum tə́ ō, ī-rāāī yá̰á̰ kə́ nelə̄n ō. Ī-ndóōī ngáńsí gə̄ lo rāā yá̰á̰ kə́ gōtə́ ō, lo kadə̄ ngé ndoō gə̄ kadə̄ karī gə̄ ō. Ādə̄ əga kemdə́ dɔ Nə́ɓā tə́ ō, ādə̄ ɓōkə́n̄ rī Nə́ɓā tɔ̄ȳ tū yá̰a̰ gə̄ malang ń a rāān̄ yá̰á̰ tə́ ní kə najə̄ kə́ rɔ̄kum ō, kə tɔ́gə́də́ malang ō. Ba ḭ̄ ngōnə̄ḿ tā anī, ə́ya̰ ɓē kə́ Ninibə ba āw̄, ī-lōō kəndi laā. Lo ń ré ā ī-dubə̄ kṵ́ṵ́í kadəḿ tə́ oy anī, ī-lōō kadə̄ lo ndɔ̄ɔ̄ dɔí tə́ ndɔ̄ kógə̄ḿ ɓáý tṵ nja lo kə́ kem ɓē ń toō tə́. Tɔdɔ̄ m-á̰a̰ā̰ kadə̄ yá̰a̰ rāā kə́ gōtə́ aĺ i ngá̰ý kemeé ō, de gə̄ gólə̄n̄ lo kə̄ nja naā tə́ kemeé i kanjə̄ rɔ̄sɔl̄ ō. 10Ngōnə̄ḿ á̰á̰ yá̰a̰ malang ń Nadan rāā kə bɔbə̄n Ahikar ń i nge kətōn ní: ni əlan i kə kumneé gíŕ nángāá aĺ a? Banī Nə́ɓā rāā adə̄ əgā kə̄rā yá̰a̰ rāan kə́ to rɔ̄sɔl̄ ō, kə́ majə aĺ ngá̰ý ō ń nuū ta kum deē ń ni rāan majə aĺ tə́ ní: Ahikar tél reē gogə́ kum lo kunjə̄ tə́, banī Nadan udə kum lo kə́ risə til ngándáńg tə́, tɔdɔ̄ ni sāā tɔ̄l̄ Ahikar. Ahikar teē kum gūmbə̄ kə́ a tɔ̄l̄ deē ń Nadan əyā non tə́ ní, i tām̄ kadə̄ kə́ ni adə̄ ngé ndoō gə̄ kadə̄ karī tə́, banī Nadan əsō kum réńg kə́ a tɔ̄l̄ deē tə́ adə̄ réńg ní tḭ̄ḭ̄ tan. 11Adə̄ i beé ní, ngánə́ḿ gə̄, á̰a̰ī yá̰a̰ ń kadə̄ karī a rāā ní ō, yá̰á̰ ń yá̰á̰ rāā kə́ gōtə́ aĺ a reēń ní ō. Yá̰a̰ rāā kə́ gōtə́ aĺ a reē i kə yoó dɔ deē tə́. Á̰a̰ī, ń toō m-ā m-óy i mbée. Ənīnən̄ dɔ tə̄rá yān tə́, anī oy. Dubə̄nən̄ i dubə̄ kə́ to rī ɓār̄.
Tobiyas oy
12Dan ń kṵ́ṵ Tobiyas oy ní, Tobiyas dubə̄n i kadə bɔbə̄n tə́. Gō tə́ anī, ni aw̄ kə nə̄yá̰neé dɔ nang kə́ Medi tə́, ba aw̄ ndi rɔ̄ mumən Raguwel tə́, kem ɓē kə́ Ekəbatan tə́. 13Ni a̰a̰ gō mumən gə̄ dɔ ɓə́gádə́ tə́ ō, rɔȳdə́ ō. Ni dubə̄də́ Ekəbatan dɔ nang kə́ Medi tə́. Gō tə́ anī, ni ənge yá̰a̰ ndəbā kə́ gotə Raguwel tə́ ō, kə́ gotə bɔbə̄n Tobi tə́ ō. 14Dan ń ni oy ní, ɓālən i ɓú kə kutə kógə̄ḿ kə kalən kə́ sīrí ō, de gə̄ rɔȳnən̄ ō. 15Pá tá kadə̄ oy ní, oō kadə̄ nujən̄ ɓē kə́ Ninibə kɔ̄ɔ́ ō, a̰a̰ de kə́ Ninibə gə̄ ń Siyakəsar mban̄g kə́ Medi ɔydə́ dɔ gúú tə́ reē sedə́ dɔ nang kə́ Medi tə́ ní ō. Ni ɓōkə́ Nə́ɓā tɔ̄ȳ tām̄ yá̰a̰ malang ń Nə́ɓā rāā kə de kə́ Ninibə gə̄ ō, kə́ Asur gə̄ ō ní. Tobiyas rāā rɔ̄nel̄ yá̰á̰ ń teē dɔ ɓē kə́ Ninibə tə́ ní pá tá oy ɓáý ō, rāā Kɔ́ɔ̄ɓē Nə́ɓā kə́ ndi kə dɔ ɓāl̄ gə̄ ɓāl̄ gə̄ kə́ra ō. Amen.
Currently Selected:
TOBI 14: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.