JUDITƏ 2
2
Əlan̄ Holoperən kadə̄ aw̄ rāā de gə̄ yá̰á̰ kə́ tōr̄ tām̄ yá̰a̰ rāādə́ kə́ majaĺ tə́
1Kem ɓāl̄ kə́ nge kṵ kutə gidə i sɔ́sɔ́ ń Nabukodonosor ndiń mban̄g dɔ ɓē kə́ Asiri tə́ ní, kem nāā kə́ ta kəga dɔ tə́, kə ndɔ̄ nāā kə́ nge kṵ kutə jōó anī, de gə̄ ɔrə̄n̄ najə̄ kə́ dɔ ndū ń mban̄g un yā daləń ba̰ā̰ rɔ̄n dɔ de gə̄ malang kə́ dɔ nang tə́ ní, kem ndogə̄ yā mban̄g tə́. 2Nabukodonosor ɔsə dɔ ngol áskar yān gə̄ malang naā tə́ ō, ɔsə dɔ de kə́ bo yān gə̄ naā tə́ ō, ba ədadə́ yá̰á̰ kə́ to lo mundə̄ tə́ ń ni sāā rāā ní, adə̄ i najə̄ nujə gō nang gə̄ malang kɔ̄ɔ́. 3Ngé kadə̄ Nabukodonosor kɔjə̄ gə̄ ndigən̄ najə̄ gōn tə́: gír de gə̄ ń mbātə́n̄ yá̰á̰ ń ni ədadə́ kadə̄ rāān̄ ní, i gáŕ kadə̄ nujə sedə́ kɔ̄ɔ́. 4Dan ń oōn̄ naā oy anī, Nabukodonosor ɓāŕ Holoperən ń i ngol ngé rɔ̄ɔ̄ yān gə̄ ō, i deē kə́ kem ɓē kṵ tə́ kə́ nge kṵ jōó ń utə̄ gō mban̄g ní ō, ba ədan na: 5Mā mban̄g kə́ bo, kɔ́ɔ̄ dɔ nang malang, m-ə́daī kadə̄ ī-rāā yá̰á̰ ń toō: āw̄ ɔ́sə dɔ de kə́ nin̄ gerə̄n̄ gō tɔ́gə́də́ majə gə̄ kə̄ naā tə́. Ɔ́ý ngé rɔ̄ɔ̄ kə́ ngé njə̄rā kə njadə́ gə̄ dūbú ɓú kə kutə jōó ō, ngé kal̄ sə́nda gə̄ deē dūbú kutə gidə i jōó ō, 6ba āw̄ ə̄nī ɓē kə́ no ɓē tə́ gə̄ malang rɔ̄ɔ̄. Tɔdɔ̄ nin̄ mbātə́n̄ rāā yá̰a̰ gə̄ ń m-ə́dádə́ kadə̄ rāān̄ ní. 7Ī-dəje de kə́ kemeé gə̄ kadə̄ adə̄mə̄n̄ dɔ nang ō, man̄ ō, yā kɔjəń kadə̄ n-oōn̄ taḿ. Dan ń wūn̄g rāām̄ ní, m-ā m̄-rɔ̄ɔ̄də́. M-ā m-ādə̄ ngé rɔ̄ɔ̄ yāḿ gə̄ kadə̄ taān̄ loo dɔ nang yādə́ gə̄ tə́ malang ō, m-ā m-ə́ládə́ kem jī ngé rɔ̄ɔ̄ yāḿ gə̄ tə́ kadə̄ ɔyn̄ yá̰a̰ kənge yādə́ gə̄ malang kɔ̄ɔ́ ō. 8Ngé kənge do gə̄ a rosən̄ lo kum wól loo gə̄ tə́ ō, de kə́ koy gə̄ a rāān̄ kadə̄ man̄ dɔ mbal̄ gə̄, kə man̄ bā gə̄ a rə̄ɓān̄ kem kār̄də́ gə̄ tə́ kə̄ ndágá ō. 9M-ā m-ɔ́y dəngáy gə̄ yā kaw̄ sedə́ bátə́ ta ngóy dɔ nang tə́. 10Ḭ̄ Holoperən, ún rīḿ āw̄ ī-ndiń dɔ ɓē yādə́ gə̄ tə́. Nin̄ a əya̰n̄ rɔ̄də́ kem jīí tə́, banī ī-ngɔ̄m̄də́ ādə̄m̄ tām̄ yā ndɔ̄ ń a rāān̄nəńdə́ yá̰á̰ kə́ tōr̄ kə́ tām̄ yā yá̰a̰ rāādə́ kə́ majaĺ tə́ ní. 11Ngé gə̄ ń mbātə́n̄ sɔl̄ dɔdə́ ní, ī-tɔ̄l̄də́ kanjə̄ ka̰a̰ kum tō ndoō yādə́ ō, ādə̄ ɔyn̄ yá̰a̰ kənge yādə́ gə̄ dɔ nang tə́ malang kɔ̄ɔ́ ō. 12Tɔdɔ̄, tītə̄ ń m̄-ndiń kə kumḿ ō, tɔ́gə kṵ ɓē yāḿ toń ō nuú, m̄-túbə kadə̄ yá̰á̰ ń m-ə́dá ní jīḿ a rāā. 13Ba ḭ̄ Holoperən, yá̰a̰ gə̄ ń m-ə́da kadə̄ yā rāā ní, ī-lōō rāā nge kógə̄ḿ jingling, ba ī-rāā kə gō ń m-ə̄ndań dɔí tə́ kadə̄ ī-rāā ní ō, ī-rāā láẃ ō, tām̄ mā i mban̄g yāí.
14Holoperən teē kɔ̄ɔ́ ndogó mbangaá. Ni ɓāŕ ngār gə̄ malang ō, go̰ rɔ̄ɔ̄ gə̄ ō, ngol áskar gə̄ kə́ Asiri tə́ ō. 15Tītə̄ ń mban̄g əndāń dɔn tə́ ní, ni ɔsə dɔ de kə́ dəngam kə́ ger̄ rɔ̄ɔ̄ majə gə̄ naā tə́: ngé rɔ̄ɔ̄ kə́ ngé njə̄rā kə njadə́ gə̄ i deē dūbú kutə kə dūbú jōó ō. 16Ni tə́ndā ɓūtə̄ áskar gə̄ kə jī lo rɔ̄ɔ́, tītə̄ ń a rāān̄nəń kə ɓūtə̄ ngé rɔ̄ɔ̄ kə́ ngá̰ý gēé ní. 17Ni ɔy jámbal gə̄ ngá̰ý ō, kərō gə̄ ō, kərō rapáy#2.17 Kərō rapáy: I kərō kə́ bɔbə̄n i sə́nda. gə̄ ō, kadə̄ ətōn̄ yá̰a̰. Ni ɔy batə̄ gə̄ ō, man̄g gə̄ ō, bə̄yā̰ gə̄ ō, kadə̄ ngé rɔ̄ɔ̄ yān gə̄ əsan̄. Nin̄ i ngá̰ý, adə̄ deē asə tə́da kutədə́ alé. 18Nin̄ ɔyn̄ sádə̄ ngá̰ý kə dɔ áskar gēé kógə̄ḿ kógə̄ḿ. Mōȳ yá̰a̰ kənge yā mban̄g i ngá̰ý, adə̄ lɔ́r i ngá̰ý ō, gində̄ arjā̰a̰ i ngá̰ý ō, yā kəgāń áskar gə̄ ní. 19Holoperən əsō róbó kə ngé rɔ̄ɔ̄ gə̄ ń nuū malang. Ni aw̄ kété yā kaw̄ kəndā dɔ reē Nabukodonosor danaá ō, yā kaw̄ taā lo malang kə́ no ɓē tə́ kə púsə rɔ̄ɔ̄ yān gēé ō, ngé rɔ̄ɔ̄ kə́ ngé njə̄rā kə njadə́ gə̄ kə́ jīdə́ atə tɔȳ madə̄də́ gə̄ ō. 20De gə̄ ngá̰ý aw̄n̄ sedə́. Kutədə́ i ngá̰ý tītə̄ kutə yḭm̄ gə̄ beé, aláa tītə̄ kutə nán̄g ngárə̄ḿnjēý kə́ dəla loo tə́ beē, adə̄ deē asə tə́da kutədə́ alé. 21Nin̄ teēn̄ kɔ̄ɔ́ kem ɓē kə́ Ninibə tə́ ba aw̄n̄ sa̰y, njə̄rān̄ ndɔ̄ mətá kum kə̄ kum kubə kə́ Bekətiletə tə́. Gō tə́ anī, ḭḭn̄ Bekətiletə aw̄ əndān̄ géŕ ger yādə́ nja mbal̄ bo gə̄ ń deē ra Silisi kə́ dɔɔ́ tə́ anī, i kə̄ dām̄ mbɔ́r ɓē kə́ kṵṵ́ tə́ ní. 22Holoperən taā loo kə́ gō nang kə́ mbalá kə ngé rɔ̄ɔ̄ yān gēé malang, adə̄ i kə ngé rɔ̄ɔ̄ kə́ ngé njə̄rā kə njadə́ gə̄ ō, kə sə́nda gə̄ ō, kə púsə rɔ̄ɔ́ gə̄ ō. 23Ni tetə Pud gə̄ ō, Lud gə̄ ō rɔ̄ɔ̄. De gə̄ kə́ gír kaa yā Rasis tə́ ō, Ismayel tə́ ō ń ndin̄ kə gō kadə loo kə́ dəla loo tə́ ń deē ra Keleyon anī i kə̄ dām̄ mbɔ́r ɓē kə́ geleé tə́ ní, ni ɔy yá̰a̰ kənge yādə́ gə̄ kɔ̄ɔ́ malang. 24Ni teē bā Opəratə kə̄ gidə kə́rēý tə́, ba ənda dan ɓē kə́ Mesopotami gān̄g. Ɓē gə̄ kə́ kəndā ndogə̄ mbal̄ gidə tə́ gə̄ ń ran̄ kə gō kadə man̄ Abərona ní, ni nujəń kɔ̄ɔ́ malang ba aw̄ bátə́ ugə̄ kadə bā bo tə́. 25Ni taā ɓē kə́ Silisi ō, tɔ̄l̄ de kə́ tū tə́ gə̄ kə́ ngé mbātə́ tan gə̄ ō. Gō tə́ anī aw̄ bátə́ ugə̄ dɔ nang yā Jape tə́, kum kə̄ dām̄ mbɔ́r ɓē kə́ geleé tə́, loo ń ra sɔɔ̄n̄ ta naā kə dɔ nang yā Arabə gə̄ ní tə́. 26Ni ɔy ngé rɔ̄ɔ̄ yān gə̄ adə̄ gīrə̄n̄ gidə Madian gə̄. Ni əla hor dɔ géŕ ger yādə́ tə́, ba ɔy ɓūtə̄ yá̰a̰ kul̄ yādə́ gə̄ aw̄ń. 27Ni aw̄ kum kubə kə́ Damas tə́, dan yā sāā kōō gə̄ tə́. Əla hor dɔ ndɔr̄ gémē gə̄ tə́ malang ō, tɔ̄l̄ ɓūtə̄ batə̄ gə̄ ō, man̄g gə̄ ō. Ɔy yá̰a̰ kənge gə̄ kə́ kem ɓē bo gə̄ tə́ ō, nujə ngán ɓē gə̄ sák sák kɔ̄ɔ́ ō, balsáa gə̄ malang kə́ kem ɓēé ní, ni tɔ̄l̄də́ kɔ̄ɔ́ kə kaskaraá ō. 28De gə̄ malang ń ndin̄ kə gō kadə bā Mediterane ní, ɓōĺ rāādə́ adə̄ ndewn̄: i de gə̄ kə́ kem ɓē gə̄ kə́ Sido̰ tə́ ō, Tir tə́ ō, Sur tə́ ō, Okina tə́ ō, Jamniya tə́ ō. De kə́ Asdodə gə̄, kə de kə́ Askalo̰ gə̄ ní ɓōĺ rāādə́ ngá̰ý ō.
Currently Selected:
JUDITƏ 2: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.