TOBI 13
13
Pā yā Tobi
1Anī Tobi əda na:
2Ādə̄ de gə̄ ɓōkə́n̄ Nə́ɓā ń ndi kə kumneé ní tɔ̄ȳ mbóńg kə̄ no tə́!
Ādə̄ de gə̄ ɔsən̄ go̰n kṵ ɓē yān!
I ni n i nge kənda deē tām̄ majaĺ yān tə́ ō, nge ka̰a̰ kum tō ndoō yān ō ní.
Ni i nge kaw̄ kə deé ɓádá
lo kə́ ɗúú ngá̰ý kə́ gíŕ nángāá tə́ ō,
gō tə́ anī, ni i nge teē seneé tū tə́ kɔ̄ɔ́ ō.
Yá̰á̰ kógə̄ḿ kə́ yā teē ta jīn tə́ ka̰ȳ gətóo.
3Ngáń Israel gə̄, ɔ́siī go̰nən ta kum gíŕ nápar de kə́ rang gə̄ ń
ni tə̄ndā tḭ̄ḭ̄sí dandə́ tə́ ní.
4Ni ɔjəsí kadə̄ ni i de kə́ bo lo ń nuū tə́.
Ɔ́siī go̰nən ta kum de gə̄ malang ń ndin̄ kə kumdə́ ní tə́,
tɔdɔ̄ ni i Kɔ́ɔ̄ɓē yājí ō, Nə́ɓā yājí ō, Bɔbə̄jí ō.
Ni i Nə́ɓā kə́ ndi ngándáńg kə dɔ ɓāl̄ gə̄.
5Ni əndasí i tām̄ yá̰a̰ rāāsí kə́ gōtə́ aĺ ngá̰ý gə̄ tə́,
banī a a̰a̰ kum tō ndoō yāsí sḭḭ̄ malang,
adə̄ a ɔysí kɔ̄ɔ́ dan gíŕ nápar de gə̄ malang ń
ni tə̄ndā tḭ̄ḭ̄sí dandə́ tə́ ní.
6Ndɔ̄ ń sḭḭ̄ ā ī-téliī yā reē rɔ̄n tə́
kə ngarā̰ kemsí gēé malang ō, kə rɔ̄sí malang ō,
yā rāań yá̰á̰ kə́ rɔ̄kum ta kumən tə́ ní,
ndɔ̄ ń nuū tə́ ni a tél yā reē rɔ̄sí tə́ ō, a ɓɔ̄ɔ̄sí ta kumən tṵ aĺ ō.
7Ngɔlaā ní, á̰a̰ī yá̰á̰ ń ni rāā tām̄ yāsí tə́ ní,
ba úniī ndūsí kə̄ dɔɔ́ ɔ́siīń go̰nən.
Ī-tɔ̄yī Kɔ́ɔ̄ɓē nge rāā yá̰á̰ kə́ gōtə́ ō,
ɔ́siī go̰n mban̄g kə́ ndi kə dɔ ɓāl̄ gə̄ ō.
8Kə́ tām̄ yāḿ mā tə́ ɓáa, m-ɔ́sə go̰nən dɔ nang ń əhɔ aw̄n̄ seḿ tū tə́ dɔ gúú tə́ ní.
M-ɔ́jə́ gíŕ nápar de kə́ ngé rāā majaĺ gə̄ tɔ́gən ō, boon ō.
Ngé rāā majaĺ gə̄, ī-tél ī-reēī, ī-rāāī yá̰á̰ kə́ gōtə́ ta kumən tə́:
i náā n ger̄? Majə aĺ anī ni a rāā kem majə sesí ō,
a a̰a̰ kum tō ndoō yāsí ō.
9M-ɔ́sə go̰n Nə́ɓā yāḿ ō,
rɔ̄ḿ nelə̄m̄ ngá̰ý najə̄ yā Mban̄g kə́ dɔ rā̰ tə́ ō.
10Ādə̄ de gə̄ malang ənīn̄ mbēr̄ boon ō,
ɔsən̄ go̰nən kem ɓē kə́ Jerusalem tə́ ō!
Jerusalem, ɓē kə́ táĺ,
Nə́ɓā əndaī i najə̄ kəla rāā ngání gə̄ tə́,
banī ni a tél yā ka̰a̰ kum tō ndoō yā ngán de kə́ súūmú gə̄ ɓáý.
11Ɔ́sə go̰n Kɔ́ɔ̄ɓē tītə̄ ń majə kadə̄ ɔ́səń go̰nən ní ō,
ī-rāā Mban̄g kə́ nge ndi kə dɔ ɓāl̄ gə̄ kə́ra ō.
Yā kadə̄ tél rāānəń kújə tandā yān gogə́ kə rɔ̄nelé.
12Ādə̄ Kɔ́ɔ̄ɓē rāā adə̄ de gə̄ malang ń aw̄n̄ sedə́ dɔ ɓē kə́ rang tə́ ní, əngen̄ rɔ̄nel̄ ō,
ādə̄ ni táŕ ngé rɔ̄ tō ndoō gə̄
kə dɔ gír kojə gə̄ malang ń a reēn̄ ɓáý ní ō.
13Lo kunjə̄ kə́ bo ngá̰ý a unjə̄ bátə́ ta ngóy dɔ nang tə́.
Gíŕ nápar de kə́ sa̰y ngá̰ý gə̄ kə́ ɓūtə̄də́ i ngá̰ý ō,
de gə̄ kə́ ta ngóy dɔ nang gə̄ tə́ malang ō,
a reēn̄ kə̄ rɔ̄í ḭ̄ Jerusalem ń i ɓē kə́ táĺ ní tə́,
kə yá̰a̰ ndējə̄ gēé jīdə́ tə́ tām̄ yā Mban̄g kə́ dɔ rā̰ tə́ tə́.
Gír kojə kə́ ndɔ̄ń tə́ gə̄ ń a reēn̄ ní, a adīn̄ rɔ̄nel̄
kə́ al̄naā kə gō naá ō,
Jerusalem ń i ɓē kə́ gə̄rā ní, rīn a to tām̄ yā gír kojə gə̄ ń a reēn̄ ɓáý tə́ ní ō.
14De gə̄ malang ń a ɔrə̄n̄ najə̄ kə́ majə aĺ seí ní,
ndɔ̄ĺ i dɔdə́ tə́!
De gə̄ malang ń a nujən̄ seí ō,
a mbə́rēn̄ ndogə̄ mbal̄ yāí gə̄ a tə́nin̄ kɔ̄ɔ́ ō,
a tétə̄n̄ kújə yāí kə́ ngāl̄ kə̄ dɔɔ́ gə̄ nang tə́ ō,
a tə́lan̄ hor dɔ kújə gə̄ tə́ ō ní, ndɔ̄ĺ i dɔdə́ tə́!
Banī de gə̄ malang ń a ɓōlíīn̄ ní, ādə̄ tɔ́r̄ ta i dɔdə́ tə́ kə́ njɔ́ḿ gə̄ tə́!
15Āw̄, ḭ́ḭ bal walya najə̄ yā ngán de kə́ súūmú gə̄ tə́,
tɔdɔ̄ a ɔsən̄ dɔdə́ naā tə́, yā kadə̄ a rāān̄ Kɔ́ɔ̄ɓē kə́ ndi kə dɔ ɓāl̄ gə̄ kə́ra.
Rɔ̄nel̄ i kə ngé gə̄ ń táriīn̄ ní!
Rɔ̄nel̄ i kə ngé gə̄ ń rāān̄ rɔ̄nel̄ najə̄ yā lɔm yāí tə́ ní!
16Rɔ̄nel̄ i yā ngé gə̄ malang ń əhɔn̄ ndoō tām̄ ndéý kə́ əndaīn̄ tə́ ní!
Ndi majə yāí i ndi majə yādə́ nin̄ ō,
nin̄ a əngen̄ rɔ̄nel̄ kə ta kūlīí mbóńg kə̄ no tə́ ō.
Kɔ́ɔ̄ɓē ń i Mban̄g kə́ bo ní, m̄-ndigə ɓokə́n tɔ̄ȳ.
17Tɔdɔ̄ a télən̄ yā rāā ɓē kə́ Jerusalem gogə́ rang ō,
kújə yā Kɔ́ɔ̄ɓē a ra kemeé kə dɔ ɓāl̄ gə̄ ō.
Ré gotə de kə́ gír kaa yāḿ tə́ gə̄ a̰a̰n̄ kɔsə go̰n yān ō,
rāān̄ rɔ̄nel̄ Mban̄g kə́ dɔ rā̰ tə́ ō anī, rɔ̄ḿ a nelə̄m̄.
A rāān̄ bápə gə̄ kə́ ta róbə yān gə̄ tə́ i kə mbal̄ Sapir ō,#13.17 Sapir: Á̰a̰ī Teē 24.10. Emerodə ō.
A əndān̄ ndogə̄ mbal̄ yāí gə̄ malang i kə mbal̄ gə̄ kə́ gātə̄də́ i ngá̰ý.
A rāān̄ kújə yāí kə́ ngāl̄ kum kə̄ dɔɔ́ gə̄ i kə lɔ́rɔ́ ō,
lo kə́ tū tə́ gə̄ kə́ yā kəra gidə tə́ rɔ̄ɔń gə̄ ní, i kə lɔ́ŕ kə́ unjə̄ njáý njáý ō.
A rāān̄ róbə kɔsə yāí gə̄ i kə mbal̄ rubis ō, mbal̄ kə́ majə ngá̰ý gə̄ ō kə́ Opir.
18Pā rɔ̄nel̄ gə̄ a ɓārə̄n̄ ta róbə gə̄ kə́ yā kudəń Jerusalem tə́ ō,
de gə̄ malang kə́ kemeé gə̄ a ənīn̄ pā ń toō ō:
Aleluya! Ādə̄ kɔrta i dɔ Nə́ɓā yā Israel tə́!
Anī ngé gə̄ malang ń Kɔ́ɔ̄ɓē a tɔ́r̄ tān dɔdə́ tə́ ní,
a tɔ̄ȳn̄ rī kə́ táĺ ta kə́ jóo.
Currently Selected:
TOBI 13: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.