JEJU TEĒ KUM JA̰A̰ 3
3
Makətūbə̄ ń ndang adə̄n̄ Egəlijə kə́ Sardə ní
1Ī-ndang najə̄ ń toō ādə̄ de kə́ dɔ rā̰ tə́ yā Egəlijə kə́ Sardə.
Najə̄ ń deē ń ndíĺ kə́ sīrí gə̄ yā Nə́ɓā ō, tə́yō̰ kə́ sīrí gə̄ ō i jīn tə́ əda ní n toó: m̄-ger̄ kəla rāāī gə̄, ḭ̄ i de kə́ rīí ɓār̄ kadə̄ na ī-ndi kə kumií, banī ḭ̄ i de kə́ koy kɔ̄ɔ́. 2Á̰á̰ já̰já̰ dɔ rɔ̄í tə́, ba gotə gə̄ ń na̰yn̄ á a rāān̄ yā koy ngɔr ní, ādə̄də́ tɔ́gə. Tɔdɔ̄ kəla yāí ń ī-rāā ta kum Nə́ɓā yāḿ tə́ ní, mā m-á̰a̰ kadə̄ majə ɔtə̄ kə taá alé. 3Loo koō najə̄ ń ōō ō, loo taā ń ī-taā ō ní, ādə̄ əga kemií dɔ tə́. Ī-ngɔ̄m̄ najə̄ ní ba ī-tūr̄ hálí. Ré ī-ndi dɔ rɔ̄í tə́ aĺ anī, m-ā m̄-reē tītə̄ nge ɓogə beé, kanjə̄ kadə̄ ā ī-ger̄ kum mbang ń m-ā m̄-reē yā kəhɔīneé dɔ jīí tə́ ní. 4Ɓá tā ba ḭ̄ āw̄ kə de kə́rēý gə̄ Sardə noó, nin̄ i ngá̰ý alé, banī rāān̄ adə̄ yá̰á̰ kə́ majaĺ tákə̄ kūbə̄ yādə́ alé. Nin̄ a o̰ō̰n̄ kūbə̄ kə́ ndaa yā njə̄rań seḿ, tām̄ nin̄-asən̄.
5Adə̄ deē ń tetə rɔ̄ɔ̄ ní, a əlan̄ kūbə̄ kə́ ndaa rɔ̄n tə́ ō, m-ā m̄-kūsə́ rīn kɔ̄ɔ́ kem makətūbə̄ ndi kə kumuú tə́ aĺ ō, m-ā m-ə́da ta kum Bɔbə́ḿ nin̄ kə deē yān gə̄ kə́ dɔ rā̰ tə́ gə̄ tə́ na ni i deē yāḿ ō.
6Deē ń i kə mbīneé anī, ādə̄ oō yá̰á̰ ń Ndíl əda Egəlijə gə̄ ní.
Makətūbə̄ ń ndang adə̄n̄ Egəlijə kə́ Piladelpi ní
7Ī-ndang najə̄ ń toō ādə̄ de kə́ dɔ rā̰ tə́ yā Egəlijə kə́ Piladelpi:
Najə̄ ń de kə́ táĺ, kə́ rɔ̄kum ń lakélé yā Dabid i jīn tə́ adə̄ teē ta róbə anī de kə́ yā kutə̄ a gətóo ō, utə̄ anī de kə́ yā teē a gətóo ō əda ní n toó: 8m̄-ger̄ kəla rāāí gə̄. Á̰a̰ā̰, m-ə́ya̰ ta róbə́ kógə̄ḿ adə̄ ra kə wōyōó noí tə́, ba deē kógə̄ḿ kə́ asə kutə̄ gətóo, tɔdɔ̄ tɔ́gí i ngá̰ý alé, ba ī-ngɔ̄m̄ najə̄ yāḿ ō, ī-mbātə́ rīḿ aĺ ō. 9Á̰a̰ā̰, de gə̄ kə́ kem kújə ndi Sətan tə́ ní, m-ādī sedə́. Nin̄ i ngé gə̄ ń ədan̄ na nin̄ na i Jipə gə̄, banī nin̄ i Jipə gə̄ aĺ ní. Tɔdɔ̄ nin̄ i ngé sor̄ gə̄. Á̰a̰ā̰, m-ā m̄-rāā kadə̄ a reēn̄ yā kɔsə nodə́ nang tə́ njaí tə́ ō, a gerə̄n̄ kadə̄ mā m̄-táriī ō. 10Ḭ̄ ī-tə́gā taí ba ī-ngɔ̄m̄ najə̄ yāḿ ní, mā m-ā m̄-ngɔ̄mī kum mbang ń yá̰a̰ nāā a reē ń dɔ de gə̄ malang tə́ yā nāań de kə́ dɔ nang tə́ gə̄ ní ō. 11M-ā m̄-reē ngɔr. Yá̰á̰ ń āwń ní, ə́hɔ́ sásáp na sōgə́ deē kógə̄ḿ taā jākā mbang yāí kɔ̄ɔ́.
12Deē ń a tetə rɔ̄ɔ̄ ní, m-ā m̄-rāā kadə̄ ni a tél kāgə̄ nga dan kújə yā Nə́ɓā yāḿ. Ni a teē kɔ̄ɔ́ kemeé aĺ i kə́ bátə́ gə̄ tə́. M-ā m̄-ndang rī Nə́ɓā yāḿ dɔn tə́ ō, rī ɓē yā Nə́ɓā yāḿ ń i Jerusalem kə́ kijə kə́ ḭḭ dɔ rā̰ tə́ rɔ̄ Nə́ɓā yāḿ tə́ a risə kə̄ nang tə́ ní, m-ā m̄-ndang dɔn tə́ ō, m-ā m̄-ndang rīḿ kə́ kijə dɔn tə́ ō.
13Deē ń i kə mbīneé anī, ādə̄ oō yá̰á̰ ń Ndíl əda Egəlijə gə̄ ní.
Najə̄ ń ɔrə̄n̄ kə Egəlijə kə́ Laodise ní
14Ī-ndang najə̄ ń toō ādə̄ de kə́ dɔ rā̰ tə́ yā Egəlijə kə́ Laodise:
Najə̄ ń deē ń i Amen ō, ni i de kə́ kum tə́ kə́ nge ra dɔ ndūn tə́ ō, ni i de kə́ rɔ̄kum ō, Nə́ɓā əndā yá̰a̰ malang i kə ta kūl̄neé ō əda ní n toó: 15m̄-ger̄ kəla rāāí gə̄, adə̄ ḭ̄ i de kə́ ī-sɔl̄ aĺ ō, ī-təngā aĺ ō. Ba majə kadə̄ ī-sɔl̄, aláa ī-təngā tá. 16Adə̄ dan ń ḭ̄ ɔ̄bə̄ bumbə́ru, ba ī-sɔl̄ aĺ ō, ī-təngā aĺ ō ní, m-ā m̄-tōmbī kɔ̄ɔ́. 17Tām̄ ḭ̄ ə́da na ə́ngé yá̰á̰ ngá̰ý ō, na ī-kán̄ yá̰a̰ kənge kə̄ dɔ naā tə́ ō, ndoō yá̰á̰ kógə̄ḿ na rāāī aĺ ō, ba ī-ger̄ kadə̄ ḭ̄ i de kə́ rɔ̄í tō ndoō aĺ ō, kumií to ndoō aĺ ō, ī-ndoō aĺ ō, kumií a̰a̰ loo aĺ ō, rɔ̄í i karī aĺ ō ní, 18m-ɔ̄jī kadə̄ ī-mang lɔ́ŕ kə́ nō horoó jīḿ tə́ tá kadə̄ ī-téləń de kə́ nge kənge yá̰a̰ ō, ī-mang kūbə̄ kə́ ndaa jīḿ tə́ ə́la rɔ̄í tə́, tá kadə̄ rɔ̄í sɔlīneé najə̄ yā rɔ̄í kə́ karī tə́ aĺ ō, ī-mang dáwá kum jīḿ tə́ úr kumií tə́ tá kadə̄ á̰a̰ń loo ō. 19De gə̄ malang ń mā m̄-táŕdə́ ní, m̄-gɔŕyɔ̄də́ ō, m-ə́ndádə́ m-ɔ́jəńdə́ yá̰a̰ ō. I beé ní ī-təngā ba ī-tūr̄ hálí. 20Á̰a̰ā̰, m̄-ra ta róbə́ kújə́ tə́ ba m̄-gógə̄ ta kújə. Ré deē kógə̄ḿ oō ndūḿ ba teē ta kújə́ anī, m-ā m-údə gōn tə́ ō, m-ā m-ə́sá yá̰a̰ seneé ō, ni a əsa yá̰a̰ seḿ ō.
21Deē ń a tetə rɔ̄ɔ̄ anī m-ā m-ādə̄ a ndi seḿ dɔ kōr̄ kāgə̄ mbang yāḿ tə́, tītə̄ ń mə̄kɔ́ m̄-tetəń rɔ̄ɔ̄ á m̄-ndiń kə Bɔbə́ḿ dɔ kōr̄ kāgə̄ mbang yān tə́ ō ní.
22Deē ń i kə mbīneé anī, ādə̄ oō yá̰á̰ ń Ndíl əda Egəlijə gə̄ ní.
Currently Selected:
JEJU TEĒ KUM JA̰A̰ 3: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.