JEJU TEĒ KUM JA̰A̰ 2
2
Makətūbə̄ ń ndang adə̄n̄ Egəlijə kə́ Epejə ní
1Ī-ndang najə̄ ń toō ādə̄ de kə́ dɔ rā̰ tə́ yā Egəlijə kə́ Epejə. Najə̄ ń nge ń əhɔ tə́yō̰ kə́ sīrí gə̄ jī ko̰n tə́ ō, a njə̄rā dan ɗəra hor gə̄ kə́ rāādə́ kə lɔ́rɔ́ tə́ ō əda ní n toó:
2m̄-ger̄ yá̰a̰ rāāí gə̄ ō, kəla kə́ ngan̄g gə̄ ń ī-rāā ní ō, kəhɔ rɔ̄ tɔgə yāí ō, m̄-ger̄ kadə̄ ásə́ tə́gā taí dɔ ngé kem ndul gə̄ tə́ aĺ ō, ngé gə̄ ń ədan̄ na nin̄ na i ngámbang kəla gə̄ ba nin̄ i ngámbang kəla gə̄ aĺ ní, ḭ̄ ī-nāādə́ ba á̰a̰ā̰ kadə̄ nin̄ i ngé sor̄ gə̄ ō. 3Ḭ̄ i de kə́ ə́hɔ rɔ̄í tɔgə ngá̰ý. Yá̰á̰ kə́ tōr̄ rāāī najə̄ yāḿ tə́ banī tɔ́gí ur̄ wak kɔ̄ɔ́ alé. 4Ba yá̰á̰ ń m̄-mbātə́ gōí tə́ ní, i kəya̰ ń ə́yá̰ tár yāí kə́ ta kəla gíŕ tə́ kɔ̄ɔ́ ní. 5I beé ní, ādə̄ əga kemií dɔ loo ń ḭ́ḭ tū tə́ ə̄sō ní tə́, ba ī-tūr̄ hálí ō, ī-rāā yá̰a̰ gə̄ ń ī-rāādə́ kété ní ō. Ré ī-tūr̄ haĺí aĺ anī, m-ā m-āw̄ yā kun ɗəra hor yāí loo ń əndānən̄ tū tə́ ní tə́ kɔ̄ɔ́. 6Ba yá̰a̰ yāí kə́ só tə́ n toó, nelī kə kəla rāā Nikolaitə gēé aĺ bátə́ tītə̄ ń nel̄məń mā aĺ ngá̰ý ní ō.
7Deē ń i kə mbīneé anī, ādə̄ oō yá̰á̰ ń Ndíl əda Egəlijə gə̄ ní.
Deē ń tetə rɔ̄ɔ̄ anī m-ā m-ādə̄n kan̄ kāgə̄ ndi kə kumuú ń ra loo kə́ majə yā Nə́ɓā tə́ ní kadə̄ əsa.
Makətūbə̄ ń ndang adə̄n̄ Egəlijə kə́ Səmirnə ní
8Ī-ndang najə̄ń toō ādə̄ de kə́ dɔ rā̰ tə́ yā Egəlijə kə́ Səmirnə:
Najə̄ ń deē ń ni i ta kəla gíŕ yá̰a̰ ō, ta tɔ̄l̄ ta yá̰a̰ ō, oy tá ndól̄ ō ní, əda ní n toó: 9m̄-ger̄ yá̰a̰ nāā kə́ ngan̄g ń teē dɔí tə́ ní ō, m̄-ger̄ ndoō yāí ō, banī yá̰a̰ kənge yāí i ngá̰ý. Tá najə̄ kə́ majaĺ gə̄ ń de gə̄ ń ədan̄ na nin̄ na i Jipə gə̄ banī nin̄ i Jipə gə̄ alé ədan̄ dɔí tə́ ní, m̄-ger̄ ō. Nin̄ i kújə ndi Sətan. 10Ī-lōō ɓōĺ najə̄ yá̰á̰ kə́ tōr̄ gə̄ ń a rāān̄ yā rāāī ní tə́. Á̰a̰ā̰, diabəl a ɓōkə́ de kə́rēy gə̄ dɔ dáńsí tə́ dəngáyá yā nāańsí bátə́ ndɔ̄ kutə. Ī-ra dɔ ndūí tə́ bátə́ óyń. Loo ń noō tə́ m-ā m-ādī jākā mbang ń i ndi kə kumuú ní.
11Deē ń i kə mbīneé anī, ādə̄ oō yá̰á̰ ń Ndíl əda Egəlijə gə̄ ní.
Deē ń tetə rɔ̄ɔ̄ anī, a a̰a̰ tápə̄ yā yo kə́ ko̰ jōó alé.
Makətūbə̄ ń ndang adə̄n̄ Egəlijə kə́ Pergam ní
12Ī-ndang najə̄ ń toō ādə̄ de kə́ dɔ rā̰ tə́ yā Egəlijə kə́ Pergam:
Deē ń aw̄ kə kəyā kə́ ta lēmbə̄ ba kumən atə dām̄ jōó ní, najə̄ ń əda ní n toó: 13Loo ń ī-ndi tū tə́ ní, m̄-ger̄, i loo ń kōr̄ kāgə̄ mbang yā Sətan i tū tə́ ní. Banī ḭ̄ ə́hɔ gō rīḿ mā adə̄ ngan̄g. Ī-nējə̄ ndūí alé, ə́da na ī-taā kemḿ mā aĺ alé. Ndɔ̄ ń tɔ̄l̄nəń A̰tipas ń i de kə́ kum tə́ yāḿ kə́ nge ra dɔ ndūn tə́ ní. Ba ndɔ̄ ń tɔ̄l̄nən̄neé tə́ ɓēé loosí, loo ń Sətan ndi tū tə́ ní gə̄gē, ḭ̄ ī-nējə̄ najə̄ ə́da na ī-taā kemḿ aĺ alé. 14Ba yá̰á̰ ń mā m̄-mbātə́ gōí tə́ sḛ́ý ní, i de kə́rēý gə̄ kə́ ɓēé looí kə́ əhɔn̄ gō yá̰á̰ ndóō yā Balam. Tɔdɔ̄ Balam ɔjə Balak kadə̄ əyā gūmbə̄ no ngán Israel gə̄ tə́ yā səlāńdə́ kadə̄ əsan̄ dā̰ kə́ tɔ̄l̄ ba tun̄ kadə̄ ɓesə̄ gə̄ ō, kadə̄ rāān̄ ájə́ba ō. 15Tá ɓáý to̰ ní, ngé ndóō yá̰a̰ yā Nikolaitə tə́ gə̄ i ɓēé looí ō. 16I beé ní, ī-tūr̄ hálí. Ré ī-tūr̄ hálí aĺ anī, m-ā m-āw̄ looí ngɔr ń toō tə́ yā rɔ̄ɔ̄də́ kə kəyā kə́ taḿ tə́.
17Deē ń i kə mbīneé anī, ādə̄ oō yá̰á̰ ń Ndíl əda Egəlijə gə̄ ní.
Deē ń tetə rɔ̄ɔ̄ anī, m-ā m-ādə̄n mána kə́ to loo ɓɔ̄ɔ̄ tə́ ō, m-ā m-ādə̄n mbal̄ kə́ ndaa kə́ ndangən̄ rī kə́ kijə dɔ tə́ ō. I deē ń a ənge mbal̄ ní ngóy n a ger̄ rī ní, ba de kə́ rang a ger̄ alé.
Makətūbə̄ ń ndang adə̄n̄ Egəlijə kə́ Tiyatir ní
18Ī-ndang najə̄ ń toō ādə̄ de kə́ dɔ rā̰ tə́ yā Egəlijə kə́ Tiyatir.
Najə̄ ń ngōn̄ Nə́ɓā ń kumən to tītə̄ ta ndo̰ hor ō, njan to tītə̄ gində̄ nə̄ngá kasə ō, əda ní n toó: 19m̄-ger̄ kəla rāāí gə̄ ō, tár yāí ō, taā kem yāí ō, kəla yāí ō, kəhɔ rɔ̄ tɔgə yāí ō, m̄-ger̄ kadə̄ kəla rāāī kə́ gogə́ laā tɔȳ nge kə́ ta kəla gíŕ tə́ ō. 20Banī yá̰á̰ ń m̄-mbātə́ gōí tə́ ní, i kəya̰ ń ə́ya̰ Jesabel ní. Ni i dəyá̰ ń əda na ni na i nge koō ta banī ni i nge rāā kadə̄ ngé kəla yāḿ gə̄ ndúmə̄n̄ ní, tɔdɔ̄ ni-ndóōdə́ rāā ájə́ba kə́ yā ndɔ̄yń ɓesə̄ ō, kəsa dā̰ kə́ tɔ̄l̄ ba tun̄ kadə̄ ɓesə̄ gə̄ ō. 21M-ə́ya̰ kum mbang m-ādə̄n kadə̄ tūrəń hálən, banī ni-gḛy tūr̄ hálən ń i hál rāā ájə́ba kə́ yā ndɔ̄yń ɓesə̄ ní alé. 22Ń toō ɓáa m-ā m-ə̄nān dɔ tə̄rá wur kɔl tə́, naā tə́ kə madə̄n gə̄ ń a rāȳn̄ seneé ní ō. Ba ré nin̄-lōōn̄ gíŕ yá̰á̰ ndóō yān tə́ anī, m-ā m-ə̄nādə́ dɔ tə̄rá ní tə́ alé. 23Tá ɓáý to̰ ní, m-ā m̄-rāā kadə̄ ngánən gə̄ a oyn̄. Loo ń noō tə́ Egəlijə gə̄ malang a gerə̄n̄ kadə̄ mā i nge ger̄ gír̄ kə́ kem deē tə́ ō, nge ger̄ yá̰a̰ gə̄ ń kem deē gḛy ní ō. Yá̰á̰ ń m-ā m̄-rāā sesí kógə̄ḿ kógə̄ḿ ní, i kə gō kəla rāāsí gēé.
24Ba sḭḭ̄ gotə de kə́ Tiyatir gə̄ ń ī-ndigiī yá̰á̰ ndóō ń noō aĺ ō, ī-gerī yá̰á̰ kə́ to loo mundə̄ tə́ yā Sətan tītə̄ ń nin̄-ədanneé ní aĺ ō ní, m-ə̄ndā yá̰á̰ kə́ rang kə́ kɔȳ dɔsí tə́ alé. 25Ba yá̰á̰ ń sḭḭ̄ āwīneé ɓá ní, ə́hɔī sásáp bátə́ kadə̄ m-ūgəń.
26Deē ń tetə rɔ̄ɔ̄, adə̄ kəla rāāḿ gə̄ ní ni-əndā kumən gírí ba rāā anī, m-ā m-ādə̄ a o̰o̰ ɓē dɔ nápar de gə̄ tə́. 27Ni a o̰o̰ ɓē dɔdə́ tə́ i kə ndéy gindīí. Ni a tɔ̄ɔ̄də́ i tītə̄ loo tɔ̄ɔ̄ jóó nánjə̄ beé. 28Tītə̄ ń bɔbə́ḿ adə̄m̄neé tɔ́gə́ ní, mā m-ā m-ādə̄ deē ní dɔgə́ loo tīī ō.
29Deē ń i kə mbīneé anī, ādə̄ oō yá̰á̰ ń Ndíl əda Egəlijə gə̄ ní.
Currently Selected:
JEJU TEĒ KUM JA̰A̰ 2: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.