PĀ GƏ̄ 17
17
Nə́ɓā m̄-reē kə sarya yāḿ rɔ̄í tə́
1Ndɔ̄ȳ yā Dabid.
Kɔ́ɔ̄ɓē, ī-nēl̄ mbīí ōoń nōō yāḿ.
Ōō yá̰á̰ kə́ gōtə́ ń m̄-dəjeī ní,
2Majə kadə̄ i ḭ̄ n ī-gān̄g sarya yāḿ ní.
Yá̰á̰ kə́ gōtə́ i dām̄ yā náā tə́ anī īkɔ́ ə̄ndā ma̰ȳ á̰a̰ā̰.
3Ḭ̄ ī-reē dan ndɔ̄ɔ́ ə̄ndā ma̰ȳḿ ō, i-nāām̄ ō,
banī ə́nge najə̄ kə́ yā kəda dɔḿ tə́ alé.
Mā m̄-tə́da najə̄ dɔ yá̰a̰ rāā deē tə́ alé.
4M-á̰á̰ yá̰a̰ rāā de gə̄ anī,
m̄-rā dɔ najə̄ yāí tə́,
m̄-ngɔ̄m̄ rɔ̄ḿ najə̄ róbə yā ngé dɔ́nɔ gə̄ tə́.
5M-ə́hɔ rɔ̄ḿ tɔgə dɔ róbə́ kə́ kunən tōr̄ ngá̰ý tə́.
Njaḿ tɔ̄ɔ̄ sḛ́ý dɔ róbə́ ń ə́da na kə m-úń ní tə́ alé.
6Ngɔlaā ní m̄-reē kə sarya yāḿ rɔ̄í tə́ kadə̄ ī-gān̄g kə gōó.
Tɔdɔ̄ ḭ̄ i Nə́ɓā kə́ deē ɓāríī anī ā ī-ndigən.
Ī-nēl̄ mbīí kə̄ rɔ̄ḿ tə́, ōō yá̰á̰ ń m-ə́dá ní.
7Ḭ̄ ń ájə́ ngé namī gə̄ jī ngé rɔ̄ɔ̄də́ gə̄ tə́ kə jī ko̰í ní,
ɔ́jəm̄ kem majə yāí.
8Ī-ngɔ̄mə̄m̄ tītə̄ loo ngɔ̄m̄ njár̄ kumií beē.
Ī-ɓɔ̄ɔ̄m̄ gír bɔ̄gīí tə́,
9sa̰y rɔ̄ ngé kem ndul gə̄ ń ɔyn̄ yá̰a̰ yāḿ malang kɔ̄ɔ́ dɔ gúú tə́ ní ō,
sa̰y rɔ̄ madə̄ ba̰ā̰ḿ gə̄ ń gīr̄mə̄n̄ yā tɔ̄lə̄m̄ tə́ ní ō.
10Nin̄ ndāngə́n̄ ō,
gángə̄n̄ rɔ̄də́ ō.
11Njadə́ i gōḿ tə́ ngɔr, i nin̄ n gīr̄mə̄n̄ toó, a ngḛymə̄n̄ yā kəsō seḿ.
12Nin̄ ton̄ tītə̄ ɓɔl kə́ ngóō ta dā̰ sḛḛ yā rə́yā̰n naā tə́ beē,
ton̄ tītə̄ balsáa ɓɔl kə́ ɓɔ̄ɔ̄ rɔ̄n kem túpə́ kámbə́ tə́ beē.
13Kɔ́ɔ̄ɓē, ḭ́ḭ dɔɔ́!
Ī-tā̰ madə̄ ba̰ā̰ḿ gə̄ rɔ̄ɔ̄, ə̄sō sedə́ nang tə́,
ī-taām̄ jī ngé kem ndul gə̄ tə́ kə kaskar yāí.
14Ī-tɔ̄l̄də́ kə kaskar yāí ādə̄ gətóon̄ kɔ̄ɔ́ dan de gə̄ tə́.
Ī-tɔ̄l̄də́ kə jīí!
Ādə̄ yá̰a̰ kəndā nja yādə́ i kadə̄ gətóon̄ kɔ̄ɔ́ dɔ nang tə́!
Ī-rāā ādə̄ a̰ȳn̄ man̄ kə́ katə̄ kárárá ń ī-ngɔ̄m̄ tām̄ yādə́ tə́ ní.
ādə̄ ngáńdə́ gə̄ a̰ȳ ndānə̄n̄
ba əya̰n̄ gotə əndān̄ ngán kaadə́ gə̄!
15Ba mā m-ā m-á̰a̰ kumií, tɔdɔ̄ i yá̰á̰ kə́ gōtə́.
Dan ń m-ā m̄-ndól̄ dɔ ɓīī tə́ anī, m-ā m-á̰á̰ ndílí kadə̄ tɔ̄l̄ ɓōḿ.
Currently Selected:
PĀ GƏ̄ 17: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.