JOB 29
29
Job tūr̄ əda na: Á, ndɔ̄ kə́ kété jóo gə̄ majən̄ ngá̰ýa̰á̰!
1Job na̰y kə̄ loo kɔr̄ najə̄ tə́ kə míndə́ kə́ kə gōsōó ɓáý, əda na:
2I náā n a rāā kadə̄ m̄-tél m̄-ndi tītə̄ ń m̄-ndiń kété kem nāā gə̄ ń mānə̄n̄ kɔ̄ɔ́ tə́ ní?
Kem ndɔ̄ gə̄ ngeé ń noō tə́ ní, Nə́ɓā ngɔ̄mə̄m̄.
3Hor lámba yān unjə̄ dɔḿ tə́ ō,
m-á̰a̰ loo ndɔ̄ɔ́ i kə ta kūl̄ loo yān kə́ unjə̄ kow n m-ā m̄-njə̄rań ní ō.
4Dan ngeé ń noō tə́ ní mā i de kə́ tɔgə nājə̄ ō,
Nə́ɓā ngɔ̄m̄ kújə yāḿ tɔdɔ̄ ni i madə́ḿ ō.
5Nə́ɓā kə́ tɔ́gən i ngá̰ý i naā tə́ seḿ ō,
ngánə́ḿ kə́ dəngam gə̄ gīrə̄n̄ gidəḿ ō,
6Dan ngeé ń noō tə́ ní m̄-ndi i dan yá̰a̰ kəngeé ō,
yibə̄ a̰ȳ ngá̰ý loo mbə́rē yibə̄ yāḿ tə́ ō.
7Ré m̄-teē m-ā-m-āw̄ kə̄ loo gān̄g sarya kə́ kem ɓēé tə́,
ré m-ə̄ndā kāgə̄ ndi yāḿ ndágə loo kə́ kem ɓēé tə́,
8ba balsáa gə̄ a̰a̰mə̄n̄ anī, sində̄n̄ lim kɔ̄ɔ́ ō,
de kə́ tɔgə ɓə́ga gə̄ ḭḭ ran̄ kə njadə́ dɔɔ́ ō.
9Asə de kə́ bo gə̄ kɔr̄ najə̄ yādə́ ba əndān̄ jīdə́ tadə́ tə́ ɔgə̄nəń de gə̄ kɔr̄ najə̄ ō.
10Ngār gə̄ télən̄ kə ndūdə́ kə̄ nang tə́ ō, tél ndin̄ tadə́ mbóo ō.
11Ngé gə̄ ń oōn̄ najə̄ kɔrə̄ḿ ní ɓōkə́mə̄n̄ tɔ̄ȳ ō.
Ngé gə̄ ń kumdə́ a̰a̰m̄ ní, ədan̄ najə̄ yāḿ kə́ majə ō.
12Tɔdɔ̄ m-ájə nge ndoō ń nōō kə̄ dɔḿ tə́ ní ō,
m-ájə ngōn̄ hal ń de kə́ nge rāā seneé gətóó ní ō.
13Deē ń to i kə̄ ta yo tə́ ní, tɔ́r̄ tan dɔḿ tə́ ō,
m̄-rāā adə̄ rɔ̄nel̄ tél reē gogə́ kem dəyá̰ kə́ ngaa koy tə́ ō.
14Kūbə̄ ko̰ō̰ḿ i yá̰á̰ kə́ gōtə́.
Yá̰á̰ kə́ súmūú i kūbə̄ jī yāḿ ō, i kūbə̄ kənda dɔ yāḿ ō.
15Mā m̄-tél i kum nge kum tɔ̄ɔ̄ ō,
mā i nja nge nja nujə ō.
16De gə̄ ń rɔ̄də́ tō ndoō ngá̰ý ní, mā m̄-tél i bɔbə̄də́ ō,
deē ń m̄-gerə̄n aĺ ní, m̄-ndēr̄ gír najə̄ yān m-ādə̄ unjə̄ ō.
17Banī de kə́ nge rāā yá̰a̰ gōtə́ aĺ ní, m̄-tétə̄ səlēn kɔ̄ɔ́ ō,
m̄-rāā adə̄ dā̰ kəhɔn teē ta ngāngən tə́ əsō ō.
18M-ə́da kə̄ kemḿ tə́ na:
Dan ń m-ā m-óy kem kújə yāḿ tə́ tītə̄ yel̄ Penikəs kə́ oy kem ɓēn tə́ beé anī,
m-ā m̄-rāā kadə̄ ndɔ̄ḿ gə̄ ojən̄ naā ngá̰ý.
19m̄-to tītə̄ kāgə̄ kə́ əla ngəran kum man̄ tə́ beé ō,
tal əhɔ dɔ ta jīḿ gə̄ tə́ ndɔ̄ɔ́ bátə́ loo tīī ō.
20De gə̄ a rɔȳmə̄n̄ kanjə̄ kəya̰ ta ō,
tɔ́gə́ḿ a to kijə ngándáńg tītə̄ ga̰ gərā kə́ kɔr gō majə ō.
21Dan ngeé ń noō tə́ ní, de gə̄ oōn̄ najə̄ yāḿ ō, ngóōn̄ tam̄ ō.
De gə̄ ndin̄ tadə́ mbóo oōn̄neé kɔjə̄ yāḿ gə̄ ō.
22Dan ń m-ɔ̄r̄ najə̄ gír gān̄g anī, deē əda yá̰á̰ kə́ rang dɔ tə́ alé.
Najə̄ yāḿ tə́sō ɗḛy ɗḛy dɔdə́ tə́ tītə̄ tal beé.
23De gə̄ ngóōn̄ taḿ tītə̄ loo ngóō man̄ kə́ kadə̄ a edə beé.
Nin̄ teēn̄ tadə́ tītə̄ kə́ a taānəń i man̄ ndī yel̄ beé.
24Nin̄ sāān̄ ka̰a̰ ké dɔ kumḿ majə wa.
Dan ń m̄-mūŕ kəgō sedə́ anī, nin̄ taān̄ kem alé.
25Mā i so̰ nodə́, nge kɔjədə́ róbə.
m̄-ndi sedə́ i tītə̄ mban̄g kə́ ndi dan áskar yān gə̄ tə́ beé,
i tītə̄ nge sɔl̄ kem ngé wur kɔl gə̄ beé.
Currently Selected:
JOB 29: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.