JOB 28
28
Kum kedə̄ i yá̰á̰ kə́ loo gerə̄n ngan̄g ngá̰ý
1Gerēn̄ bəlo ń a ndērə̄n̄ gində̄ arjā̰a̰ tū tə́ a ɔrə̄n̄ ní ō,
gerə̄n̄ loo gə̄ ń a tə́gon̄ lɔ́r tū tə́ ní ō.
2A ndērə̄n̄ gində̄ kə́ karī i nang tə́ n a ɔrə̄n̄ ō,
gində̄ nə̄ngá kasə a teē i tū mbal̄ kə́ yḛḛ̄ tə́ ō.
3De gə̄ ndērə̄n̄ bəlo kə́ ɗúú ngá̰ý
ba risən̄ kemeé kə hor lámbá sāānəń mbal̄ gə̄ ní.
4De gə̄ ndērə̄n̄ bəlo gíŕ nángāá sa̰y rɔ̄ ɓē tə́,
loo kə́ deē asə kaw̄ tū tə́ aĺ tə́.
Ngé ndēr̄ bəlo gə̄ ní əhɔn̄ kəlā ń aw̄ sedə́ kə̄ kété gə̄gē, tél sedə́ kə̄ gogə́ gə̄gē ní adə̄ ngan̄g
5Dɔ nang ń yá̰a̰ kəsa a teē tū tə́ ní, kemən i kə́ nujə sák sák kɔ̄ɔ́
tītə̄ kə́ i hor kógə̄ḿ n o̰o̰ kemən ní beē.
6A əngen̄ mbal̄ sapir i tū mbal̄ gə̄ kə́ dɔ nang tə́ ō,
a əngen̄ lɔ́r i tū nán̄g kə́ dɔ nang tə́ ō.
7Róbə́ kə́ gíŕ nángāá gə̄ ń noō māl̄ bal mojə ger̄ alé.
Kum yel̄ kə́ nge kəsa madə̄n gə̄ a̰a̰ nja kógə̄ḿ alé.
8Dā̰ ngān̄g gə̄ unən̄ róbə́ ń noō aĺ ɓáý ō,
ɓɔl əndā njan tū tə́ aĺ ɓáý ō.
9De gə̄ ənīn̄ mbal̄ kə́ ngan̄g ngá̰ý ń i mbal̄ silekəs ní rɔ̄ɔ̄ ō,
ndērə̄n̄ mbal̄ bo bátə́ ugə̄n̄ gír ngəran tə́ nang tə́ ō.
10Mbutən̄ róbə́ kə́ tə́la naā ngá̰ý gə̄ kem mbal̄ bo tə́ ō,
yá̰a̰ malang kə́ gātə̄n i ngá̰ý ní, kum deē a̰ā̰ ō.
11Rāān̄ adə̄ ta kəɓa man̄ bā gə̄ iīn̄ kɔ̄ɔ́ malang ō,
yá̰á̰ ń kété to loo ɓɔ̄ɔ̄ tə́ ní, teēnəń ndágá ō.
12Banī deē a ənge kum kedə̄ i rá? Ger̄ yá̰a̰ ndi i loo kə́ rá tə́?
13Deē ndul gə̄ gerə̄n̄ gātə̄n aĺ ō,
deē a əngen ɓē yā ngé ndi kə kumdə́ gēé tə́ aĺ ō.
14Bəlo loo kə́ lú ngá̰ý əda na gətóo kemən ni tə́ ō,
bā bo əda na gətóo looneé ō.
15Deē a mbél̄ gírən kə lɔ́ŕ kə́ unjə̄ njáý njáý alé,
deē a mangən kə gində̄ arjā̰a̰ kə́ mbɔ̄jə́ kɔȳn alé.
16Lɔ́ŕ kə́ Opir ō,
kornalin ń i mbal̄ kə́ gātə̄n i ngá̰ý ní ō,
mbal̄ sapir ō ní, gātə̄də́ əndā gō yān tə́ alé.
17Lɔ́r əndā gō gātə̄n tə́ aĺ ō,
yá̰a̰ rāā wér əndā gō gātə̄n tə́ aĺ ō,
jóó kə́ rāā kə lɔ́ŕ kə́ unjə̄ njáý njáý ní, deē asə kun taāń aĺ ō.
18Yā kómbár̄ nin̄ kə kəristal#28.18 Kəristal: I yá̰á̰ kə́ to tītə̄ bətēl̄ beé, ba gātə̄də́ ngá̰ý. tā anī i kə́ yā kaw̄ gō tə́ alé.
Sāā kum kedə̄ i só tə́ tɔȳ sāā məde kɔ̄l̄.
19Gātə̄ mbal̄ topajə kə́ Etiopi tə́ əndā gō yān tə́ alé.
Gātə̄ lɔ́ŕ kə́ unjə̄ njáý njáý gə̄gē ní, asə yá̰a̰ gōn tə́ alé.
20Ba kum kedə̄ ḭḭ i rá n reē ní? Ger̄ yá̰a̰ ndi i loo kə́ rá tə́?
21De gə̄ malang ń ndin̄ kə kumdə́ ní,
ni ɓɔ̄ɔ̄ rɔ̄n kɔ̄ɔ́ adə̄ kumdə́ a̰a̰n alé.
Yel̄ gə̄ ń ḭḭn̄ bɔ̄gə̄ aw̄n̄ no rā̰ tə́ ní a̰a̰nən̄ aĺ ō.
22bəlo kə́ bo ō, yo ō, ədan̄ na mbīdə́ na oō lūlūn.
23Banī i Nə́ɓā n ger̄ róbə kum kedə̄.
Ni ger̄ loo ń ni-ndi tū tə́ ní.
24I ni n a̰a̰ loo bátə́ ta kaw̄ kə̄ ta ngóy dɔ nang tə́ ō,
a̰a̰ yá̰a̰ malang kə́ gír dɔ rā̰ tə́ ō ní.
25Tɔdɔ̄ i ni n adə̄ néĺ tɔ́gə ō, mbɔ̄jə́ man̄ ō,
26ɔjə dɔ nin̄ loo adə̄ man̄ kə́ edə dɔɔ́ ō,
njar róbə adə̄ man̄ kə́ ndang ō ní.
27I dan ngeé ń noō tə́ n Nə́ɓā a̰a̰ń kum kedə̄ ō, ɔjəń gātə̄n ō ní.
Ni-a̰a̰ gerə̄n ō, sāā ka̰a̰ gātə̄n ō.
28Gō tə́ anī əda deē ndul na: Yá̰á̰ ń i kum kedə̄ ní, i ɓōĺ ndíĺ Kɔ́ɔ̄ɓē!
Yá̰á̰ ń i ger̄ yá̰á̰ ní, i ka̰a̰ yá̰á̰ kə́ majaĺ a ka̰ȳ kɔ̄ɔ́ ta tə́!
Currently Selected:
JOB 28: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.