JEREMI 52
52
Nabukodonosor əhɔ Sedekias
(Á̰a̰ī Jer 39.4-7; 2 Mba 24.18—25.7)
1Dan ń Sedekias ndi mban̄g ní, ɓālə̄n i kutə jōó gidə i kógə̄ḿ. Ni-o̰o̰ ɓē ɓāl̄ kutə gidə i kógə̄ḿ kem ɓē kə́ Jerusalem tə́. Rī kó̰o̰n na i Hamutal, ni i ngōn̄ Irmeya kə́ Libəna. 2Sedekias rāā yá̰á̰ kə́ majaĺ ta kum Kɔ́ɔ̄ɓē tə́ tītə̄ yā Joakim. 3I wōn̄g n ndḛḛ̄ Kɔ́ɔ̄ɓē rāā kadə̄ yá̰á̰ kə́ majaĺ gə̄ ń noō reēn̄ dɔ ɓē kə́ Jerusalem tə́ ō, kə́ Juda tə́ ō ní. Ta tɔ̄l̄ ta anī, ni-tə̄ɓā de kə́ kemeé gə̄ əndādə́ sa̰y kɔ̄ɔ́ rɔ̄n tə́.
Sedekias mbātə́ kəla dɔn gír tɔ́gə yā mban̄g kə́ Babilon tə́. 4Kem ɓāl̄ ko̰o̰ ɓē yā Sedekias kə́ nge ko̰ ndōhó tə́ ní, kə nāā kə́ nge ko̰ kutə, kə ndɔ̄ kə́ nge ko̰ kutə kógə̄ḿ yā nāā anī, Nabukodonosor, mban̄g kə́ Babilon reē kə́ ɓūtə̄ áskar yān gēé malang yā rɔ̄ɔń ɓē kə́ Jerusalem. Ni-əndā gérger yān adə̄ sɔɔ̄ ta ɓē. De kə́ Babilon gə̄ ndērə̄n̄ bəlo adə̄ gīr̄ gidə ɓē. 5Nin̄ utə̄n̄ ɓē bátə́ ugə̄ ɓāl̄ ko̰o̰ ɓē yā Sedekias kə́ nge ko̰ kutə gidə i kógə̄ḿ tə́.
6Ɓō i ngá̰ý kem ɓēé. De gə̄ əngen̄ yá̰á̰ kə́ yā kəsa to̰ alé. Kə ndɔ̄ kə́ nge ko̰ ndōhó yā nāā kə́ nge ko̰ sɔ́ anī, 7Kalde gə̄ tetən̄ dām̄ ndogə̄ mbal̄ kógə̄ḿ kə́ gidə ɓē kə́ Jerusalem tə́ nang tə́. Nin̄ gīrə̄n̄ gidə ɓē əlan̄ ta naā tə́ ɓá tā banī ndɔ̄ɔ́ anī, ngé rɔ̄ɔ̄ kə́ Juda gə̄ a̰ȳn̄ naā malang kə ta róbə́ kə́ mbənā ndogə̄ mbal̄ kə́ jōó gə̄ tə́, kadə ndɔr̄ yā mban̄g tə́. Ngé ka̰y naā gə̄ unən̄ i róbə́ kə́ ndágə mbō tə́. 8Banī ɓūtə̄ ngé rɔ̄ɔ̄ kə́ Kalde gə̄ sōngə̄n̄ gō mban̄g aw̄ əngenən̄ kum ndágə mbō kə́ Jeriko tə́. Ngé rɔ̄ɔ̄ yān gə̄ əya̰nən̄ malang ba a̰ȳn̄ naā kɔ̄ɔ́. 9Kalde gə̄ əhɔn̄ mban̄g Sedekias aw̄n̄ seneé Ribəla, gō nang kə́ Hamat tə́, rɔ̄ mban̄g kə́ Babilon tə́, adə̄ mban̄g ədan yá̰á̰ ń ni gír̄ dɔn tə́ ní. 10Mban̄g kə́ Babilon mēr̄ tə́jā míndə́ ngán Sedekias gə̄ ta kumən tə́. Ni adə̄ tə́jān̄ míndə de kə́ bo gə̄ malang kə́ Juda tə́ Ribəla tə́ ō. 11Gō tə́ anī, Nabukodonosor tɔ́sə̄ kum mban̄g Sedekias tɔ̄ɔ̄ ō, do̰ō̰n kə súĺ gində̄ nə̄ngá kasə kə́ ɓír̄ gidə naā tə́ jōó ō. Mban̄g kə́ Babilon adə̄ aw̄n̄ seneé Babilon tə́ ō, ənīn dəngáyá bátə́ kadə̄ oyń ō.
Nebujaradan tɔ̄l̄ ta nujə kə ɓē kə́ Jerusalem
(Á̰a̰ī Jer 39.8-10; 2 Mba 25.8-21)
12Kem ɓāl̄ kə́ nge ko̰ kutə gidə i ndōhó ń Nabukodonosor ndiń mban̄g Babilon tə́ ní, kə ndɔ̄ kə́ nge ko̰ sīrí yā nāā kə́ nge ko̰ mí anī, Nebujaradan ngol ngé ngɔ̄m̄ mban̄g gə̄ ń i nge kəla yā mban̄g kə́ Babilon ní, udə kem ɓē kə́ Jerusalem tə́. 13Ni-əla hor dɔ kújə yā Kɔ́ɔ̄ɓē tə́ ō, kújə yā mban̄g tə́ ō, dɔ kújə gə̄ malang kə́ kem ɓē kə́ Jerusalem tə́ tə́ ō. Mandang ní, ni tə́la hor i dɔ kújə yā de kə́ bo gə̄ tə́. 14Ngol ngé ngɔ̄m̄ dɔ mban̄g un ndūn adə̄ ɓūtə̄ áskar gə̄ malang kə́ Kalde tə́ gə̄ adə̄ tɔ̄ɔ̄n̄ ndogə̄ mbal̄ kə́ gidə ɓē kə́ Jerusalem tə́ kɔ̄ɔ́.
15Gō tə́ anī, Nebujaradan ɔy gotə de gə̄ ń na̰yn̄ kem ɓēé ní ō, ngé gə̄ ń a̰ȳn̄ ta rɔ̄ɔ̄ tə́ á reē namə̄n̄ mban̄g kə́ Babilon ní ō, gotə kɔdə̄ gə̄ ō, aw̄ sedə́ Babilon. 16Banī əya̰ ngé ndoō gə̄ kə́ kem ɓēé kadə̄ ndɔrə̄n̄ kem kāgə̄ nduú gə̄ ō, kadə̄ ndɔrə̄n̄ ndɔr̄ kə́ rang gə̄ ō.
17De kə́ Kalde tə́ gə̄ tɔ̄ɔ̄n̄ gində̄ nə̄ngá kasə kə́ ngāl̄ gə̄ kə́ ta kújə yā Kɔ́ɔ̄ɓē tə́ kɔ̄ɔ́ ō, tétə̄n̄ púsə gə̄ ō, tɔ̄ɔ̄n̄ bay kə́ bo kə́ rāā kə gində̄ nə̄ngá kasaá ō, kə́ ta ndágə́ kújə yā Kɔ́ɔ̄ɓē tə́ ō kɔ̄ɔ́, ba ɔyn̄ gində̄ nə̄ngá kasə gə̄ ń rāān̄neé yá̰a̰ gə̄ ń noō ní aw̄n̄neé Babilon. 18Nin̄ ɔyn̄ səmbē kə́ rúu gə̄ ō, ngáń gájə́ yá̰a̰ rāā kəla gə̄ kə́ rāān̄ kə gində̄ nə̄ngá kasaá yā rāań kəla kə́ kem kújə yā Kɔ́ɔ̄ɓē tə́ malang ō aw̄n̄neé. 19Ngol ngé ngɔ̄m̄ dɔ mban̄g ní ɔy bay gə̄ ō, ganán gə̄ ō, səmbē gə̄ kə́ yā tə́teń yá̰a̰ ō, jóó nánjə̄ gə̄ ō, ɗəra hor gə̄ ō, kópə gə̄ ō, ngán bay kə́ dūú gə̄ ō, yá̰a̰ malang kə́ rāā kə lɔ́rɔ́ ō, kə gində̄ arjā̰a̰á̰ ō aw̄ń.
20Banī gində̄ nə̄ngá kasə kə́ ngāl̄ kə́ jōó gə̄ ō, bay kə́ bo kə́ rāā kə gində̄ nə̄ngá kasaá ní ō, man̄g kə́ kutə gidə i jōó gə̄ ń rāān̄də́ kə gində̄ nə̄ngá kasaá kadə̄ əhɔn̄ bay kə́ bo ń mban̄g Salomo̰ rāā kem kújə yā Kɔ́ɔ̄ɓē tə́ ní dɔɔ́ ō ní, deē asə mbɔ̄jə́ kɔy gində̄ nə̄ngá kasə ń rāān̄neé ní aĺ ō, ń rāān̄neé ngáń gájə́ yá̰a̰ rāā kəla gə̄ ní aĺ ō. 21Gində̄ nə̄ngá kasə gə̄ kə́ ta kəga dɔ ní, ngālə̄n kə́ kə̄ dɔɔ́ i kíl deē kutə gidə i sɔ́sɔ́ ō, gangā tan asə kíl deē kutə gidə i jōó ō, nderə̄n̄ asə ta ngán jī deē sɔ́ ō, kemən ra wōȳ hoo ō. 22Rāān̄ yá̰á̰ súūn kə gində̄ nə̄ngá kasaá dɔ tə́ dɔɔ́, adə̄ ngālən asə kíl deē mí ō, gīrə̄n̄ gidə kə yá̰a̰ gə̄ kə́ ton̄ tītə̄ réng gə̄ ō, tītə̄ kan̄ kāgə̄ gərenadə gə̄ ō, rāān̄də́ kə gində̄ nə̄ngá kasaá ō. Ngāl̄ gində̄ nə̄ngá kasə kə́ nge ko̰ jōó asən̄ naā kə nge kə́ kété ō, i kan̄ kāgə̄ gərenadə kə́ kógə̄ḿ beē gə̄ n gīrə̄n̄neé gidə ō ní. 23Tə́ndān̄ kan̄ kāgə̄ gərenadə gə̄ kutə ndōhó gidə i mehḛ́ kə̄ ta tə́ ndágá. Tó̰ō̰n̄ kan̄ kāgə̄ gərenadə gə̄ ɓú kógə̄ḿ ta réng gə̄ tə́.
24Ngol ngé ngɔ̄m̄ dɔ mban̄g ní, əhɔ Seraya kə́ ngol ngé tun̄ yá̰a̰ gə̄ ō, Sepania ń ni i nge tun̄ yá̰á̰ kə́ nge ko̰ jōó ní ō, ngé ngɔ̄m̄ ta róbə gə̄ mətá ō.
25Ni-əhɔ deē kógə̄ḿ kə́ i de kə́ bo yā áskar gə̄ ō, de kə́ dəngam gə̄ sīrí kə́ nin̄ i ngé kil̄ gidə mban̄g ō. Əhɔ nge ndang makətūbə̄ yā nge kɔy de gə̄ áskaraá naā tə́ kə de kə́ dəngam gə̄ kutə mehḛ́ kə́ əngen̄də́ kem ɓēé ō. 26Nebujaradan, ngol ngé ngɔ̄m̄ dɔ mban̄g gə̄ əhɔdə́ aw̄ sedə́ Ribəla rɔ̄ mban̄g kə́ Babilon tə́. 27Mban̄g kə́ Babilon tɔ̄l̄də́ Ribəla, dɔ nang kə́ Hamat tə́. I beé n ɔyn̄neé de kə́ Juda gə̄ dɔ nang yādə́ tə́ aw̄n̄ sedə́ sa̰y kɔ̄ɔ́ ní.
28Kutə de gə̄ ń Nabukodonosor əhɔdə́ aw̄ sedə́ kə ɓāl̄ kə́ nge ko̰ sīrí ní n toó: Juda gə̄ i deē 3 023.
29Kem ɓāl̄ kə́ nge ko̰ kutə gidə i sɔ́sɔ́ ń Nabukodonosor o̰o̰ń ɓē tə́ ní, ni-əhɔ de gə̄ 832 Jerusalem tə́ aw̄ sedə́.
30Kem ɓāl̄ ko̰o̰ ɓē yān kə́ nge ko̰ kutə jōó gidə i mətá tə́ ní, Nebujaradan, ngol ngé ngɔ̄m̄ dɔ mban̄g əhɔ Juda gə̄ i deē 745 aw̄ sedə́. Adə̄ de gə̄ malang ń əhɔn̄də́ aw̄n̄ sedə́ Babilon ní, i de gə̄ 4 600.
Mban̄g kə́ Babilon rajə Joakin
(Á̰a̰ī 2 Mba 25.27-30)
31Əhɔn̄ Joakin, mban̄g kə́ Juda aw̄n̄ seneé Babilon. Ni rāā ɓāl̄ kutə mətá gidə i sīrí Babilon. Kem ɓāl̄ kə́ nge ko̰ kutə mətá gidə i sīrí tə́, kə ndɔ̄ kutə jōó gidə i sīrí yā nāā kə́ nge ko̰ kutə gidə i jōó anī, Ewil Merodak, mban̄g kə́ Babilon rajən ba ɔrə̄n dəngáyá kem ɓāl̄ ń ndiń mban̄g tə́ ní. 32Ni ɔr̄ najə̄ seneé kə kemən kə́ majaá ō, adə̄n kōr̄ kāgə̄ mban̄g kə́ bo tɔȳ yā mban̄g kə́ rang gə̄ ń ndin̄ Babilon tītə̄ yān ní ō. 33Ni adə̄n ta róbə kɔr̄ kūbə̄ dəngáy rɔ̄n tə́ kɔ̄ɔ́. Adə̄ əla gír ndɔ̄ ń noō tə́ ní, Joakin a əsa yá̰a̰ i ta kum mban̄g kə́ Babilon tə́. 34I beé n mban̄g adə̄ń Joakin yá̰a̰ kəsa kə dɔ ndɔ̄ gə̄ malang ń Joakin ndiń kə kumneé ní, bátə́ kadə̄ oyń.
Currently Selected:
JEREMI 52: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.