JEREMI 51
51
1Najə̄ ń Kɔ́ɔ̄ɓē əda ní n toó:
M-ā m̄-rāā kadə̄ néĺ kə́ nge nujə loo əla dɔ Babilon tə́ ō,
dɔ de kə́ Kalde gə̄ tə́ ō.
2M-ā m-ə́la kə tə̄rā gēé
kadə̄ tə̄ndā tḭḭ̄n̄ de kə́ Babilon gə̄ kə̄ loo gə̄ tə́, tītə̄ loo tóo təsá beé ō.
kadə̄ nujə de kə́ kem ɓēé gə̄ malang kɔ̄ɔ́ ō.
A teēn̄ kə̄ rɔ̄də́ tə́ rétə́ gēé kə̄ ta loo gə̄ tə́,
ndɔ̄ yá̰á̰ kə́ to kum kaȳ aĺ tə́.
3Ādə̄ áskar kə́ nge kur gərā ō,
kə́ nge rāā rɔ̄nel̄ kem kūbə̄ gində̄ yān tə́ ō,
balsáá kə́ ngé rɔ̄ɔ̄ yān gə̄ ō oyn̄.
Ī-tɔ̄lī ngé rɔ̄ɔ̄ yān gə̄ malang ādə̄mī.
4Ādə̄ ngé gə̄ ń əngen̄ do kə́ asə yodə́ ní, tə́sōn̄ kem ɓē yā Kalde gə̄ tə́ ō,
ngé gə̄ ń tɔ́sə̄n̄də́ kə nəngaá ní, tə́sōn̄ kum kə̄lá róbə gə̄ kə́ Babilon tə́ ō.
5Tɔdɔ̄ kem ɓē yādə́ tə́ ní, nin̄ rāān̄ yá̰á̰ kə́ gōtə́ aĺ ngá̰ý kə kə́ táĺ yā Israel.
Banī Nə́ɓā yā Israel ō, yā Juda ō ń i
Kɔ́ɔ̄ɓē kə́ bo kə́ tɔ́gən i ngá̰ý ní, oy tadə́ tə́ alé.
6Ī-teē ā̰yī naā kɔ̄ɔ́ Babilon,
ādə̄ náā nəkɔ́ ɓáa njan adə̄n.
Ré i beé aĺ anī, ā óyiī
dan ń a əndanən̄neé najə̄ yá̰a̰ rāān kə́ gotə aĺ gə̄ tə́ ní.
I kum mbang dal ba̰ā̰ yā Kɔ́ɔ̄ɓē.
Ni əgān i kərā yá̰a̰ gə̄ ń rāā ní.
7Kopə lɔ́r ń Kɔ́ɔ̄ɓē əhɔ kem jīn tə́ ní, i Babilon.
Kasə kə́ kemeé rāā de gə̄ malang kə́ dɔ nang tə́.
Nápar de gə̄ a̰ȳn̄ kasə nduú yān,
bátə́ adə̄ gerə̄n̄ kum najə̄ to̰ alé.
8Ba Babilon teē əsō gidə kógə̄ḿ ō, tétə̄ rárák ō.
Ī-nōōī najə̄ yān tə́, ī-rāāī bəto kāgə̄ ta don tə́,
na majanī do ní a edə̄.
9Jə-nāā rāā kadə̄ do Babilon edə̄, ba dum̄ kedə̄.
Ɔ́tiī tan tə́, ādə̄ náā nəkɔ́ ɓáa tél aw̄ ɓē yān tə́.
Tɔdɔ̄ najə̄ yān aw̄ bátə́ ɔtə̄ dɔ rā̰ tə́ ō,
ugə̄ dɔ kil̄ man̄ gə̄ tə́ ō.
10Kɔ́ɔ̄ɓē rāā adə̄ kajə yājí to kə̄ ndágá wáńg.
Ī-reēī, j-ənī gotə kəla ń Kɔ́ɔ̄ɓē Nə́ɓā yājí rāā ní Siyo̰ tə́.
11Ɔ́liī ta kum gərā gə̄ ādī atə, Ɔ́yiī der gə̄ ō. Kɔ́ɔ̄ɓē ndól̄ ángal mban̄g gə̄ kə́ Medə tə́. A̰á̰ā̰, ni núm̄ rāā ń toō kə Babilon: I nujə seneé sák sák. I dal ba̰ā̰ yā Kɔ́ɔ̄ɓē, i dal ba̰ā̰ kə́ dɔ rā̰ tə́.
12Ə́laī dərapóo rɔ̄ɔ̄ kum kə̄ dɔ ndogə̄ mbal̄ kə́ Babilon tə́,
ī-rēēī kə ngé ngɔ̄m̄ loo gēé dɔ madə̄ tə́ ɓáý,
ī-tə́ndāī ngé ngɔ̄m̄ loo gə̄ ō, ngé ngān̄g róbə gə̄ ō, loo ndadə́ gə̄ tə́.
A̰á̰ā̰, yá̰á̰ ń Kɔ́ɔ̄ɓē əda dɔ de kə́ Babilon gə̄ tə́ ní,
i yá̰á̰ kə́ ni gír̄ dɔ tə́ ō, rāā ō.
13Ḭ̄ ń ī-ndi ngɔr kadə man̄ kə́ ngá̰ý gə̄ tə́ ō,
ḭ̄ ń yá̰a̰ kənge yāí i ngá̰ý ō ní,
ndɔ̄í asə, tɔdɔ̄ yá̰a̰ gə̄ malang ń ī-sāā ní, ənge ādə̄ ɔdə jīí kɔ̄ɔ́ ɓáa.
14Kɔ́ɔ̄ɓē kə́ bo kə́ tɔ́gən i ngá̰ý túbə əda na:
M-ā m̄-bə̄gā de kə́ kutədə́ i ngá̰ý tītə̄ yim̄ gə̄ beé dɔí tə́,
nin̄ a əgan̄ kɔŕ tetə dɔí tə́ tītə̄ ngé kəja kan̄ kāgə̄ nduú gə̄ beé.
15Ni-rāā dɔ nang kə ta kūl̄ tɔ́gəneé ō,
əndā yá̰a̰ gə̄ malang kə kum kedə̄ yānneé ō,
teē kem dɔ rā̰ kə̄ gogə́ kə gō ger̄ yá̰a̰ yānneé ō.
16Dan ń ndūn ɓār̄ anī, man̄ gə̄ ɔsən̄ dɔdə́ naā tə́ dɔ rā̰ tə́,
ni-rāā adə̄ kil̄ man̄ gə̄ ḭḭn̄ i ta ngóy dɔ nang tə́.
Ni-rāā adə̄ man̄ tel̄ yā kadə̄ man̄ edəń. Ni-rāā adə̄ nél teē kem loo ɓɔ̄ɔ̄ rɔ̄ yān tə́.
17De gə̄ malang télən̄ de kə́ mbóo gə̄ sɔɔ̄ń yá̰a̰ ger̄ yādə́,
rɔ̄ ngé rāā kəla lɔ́r gə̄ sɔl̄də́ najə̄ ɓesə̄ yādə́ tə́.
Ɓesə̄ yādə́ kə́ tɔ́sə gə̄ i yá̰a̰ kə́ rɔ̄kum alé, koō gətóo kemdə́ tə́.
18Nin̄ i yá̰á̰ kə́ kanjə̄ kumən gə̄, i yá̰a̰ kəgō yā de gə̄.
Nin̄ a gətóon̄ kɔ̄ɔ́, dan ń kum mbang kə́ kadə̄ əngen̄ń ndéy ugə̄ ní.
19Nə́ɓā yā Jakob to tītə̄də́ alé. I ni n i nge rāā yá̰a̰ malang ō,
Israel i gír ɓē ń i yá̰a̰ kənge yān ní ō.
Rīn na i Kɔ́ɔ̄ɓē kə́ bo kə́ tɔ́gən i ngá̰ý.
Mbēr̄ yo ɓē kə́ Babilon
20Kété ní ī-rāā rɔ̄í i rə̄ngō yāḿ tə́, i yá̰a̰ rɔ̄ɔ̄ yāḿ tə́.
M-úniī m̄-tə̄ndāń nápar de gə̄ ō, m̄-nujəń ɓē ko̰o̰ gə̄ ō.
21M-úniī m̄-tə̄ndāń sə́nda gə̄ ō,
ngé kaldə́ gə̄ ō.
M-úniī m̄-tə̄ndāń púsə rɔ̄ɔ̄ gə̄ ō,
ngé kal̄ kemeé gə̄ ō.
22M-úniī m̄-tə̄ndań de kə́ dəngam gə̄ ō, de kə́ dəyá̰ gə̄ ō,
de kə́ tɔgə ɓə́ga gə̄ ō, balsáa gə̄ ō,
ngáń kə́ dəngam gə̄ ō, ngáń kə́ dəyá̰ gə̄ ō.
23M-úniī m̄-tə̄ndań ngé kul̄ yá̰a̰ gə̄ ō, yá̰a̰ kul̄ yādə́ gə̄ ō,
ngé ndɔr̄ gə̄ ō, man̄g ndɔr̄ yādə́ gə̄ ō, kɔsə ndɔr̄ yādə́ gə̄ ō,
ngé ko̰o̰ ɓē gə̄ ō, ngé rāā sarya gə̄ ō.
24Yá̰á̰ kə́ majaĺ gə̄ malang ń Babilon ō,
de gə̄ malang kə́ Kalde tə́ ō rāān̄ Siyo̰ ní,
m-a m̄-tél yā rāā sedə́ ta kumsí tə́.
Najə̄ ń Kɔ́ɔ̄ɓē əda ní n noó.
25Mbal̄ kə́ nge nujə loo gə̄,
ḭ̄ ń ī-nujə dɔ nang kə taá malang ní, m-ə́hɔī ɓōólaā tā!
M-ə́la jīḿ kə̄ dɔí tə́, m̄-rāāī adə̄ ī-ndūbə̄rū dɔ mbal̄ gə̄ tə́ ī-teē ə̄sō ō,
m̄-rāāī adə̄ ī-tél dūbə̄ yā̰l̄ hor kə́ ajə ying ō. Najə̄ ń Kɔ́ɔ̄ɓē əda ní n noó.
26Deē a sāā mbal̄ kə́ yā kəndā kíĺ kújə,
aláa ngəra kújə looí to̰ alé.
Ā ī-tél loo kə́ nujə kɔ̄ɔ́ kə́ njɔ́ḿ gə̄ tə́. Najə̄ ń Kɔ́ɔ̄ɓē əda ní n noó.
27Údiī dərapóo rɔ̄ɔ̄ ādī ra dɔɔ́, ī-kɔ̄ríī tōw̄ dan nápar de gə̄ tə́.
Ɔ́siī dɔ nápar de gə̄ naā tə́ ādə̄ ənīnən̄ rɔ̄ɔ̄.
Ī-ɓāríī ɓē ko̰o̰ gə̄ kə́ Ararat ō, Mini ō, Asəkenas ō, ādə̄ rɔ̄ɔ̄nən̄.
Ī-tə́ndāī ngé kɔy de gə̄ áskaraá gə̄ ādə̄ ɔyn̄ de gə̄ rɔ̄ɔ̄nəń ɓē kə́ Babilon.
Ɔ́siī dɔ sə́nda gə̄ naā tə́,
ādə̄ ran̄ kadə naā tə́ meje meje tītə̄ yim̄ gə̄ beé.
28Ɔ́siī kə nápar de gēé ādə̄ ənīnən̄ rɔ̄ɔ̄:
Mban̄g kə́ Medə tə́ gə̄ ō, ngé sarya yādə́ gə̄ ō,
ngé ko̰o̰ ɓē yādə́ gə̄ ō, ɓē gə̄ malang ń i gíŕ tɔ́gə yādə́ tə́ ní ō.
29Dɔ nang ndebə̄ ō, ndām̄ ngin ngin ō,
dan ń Kɔ́ɔ̄ɓē rāā yá̰á̰ ń ni núm̄ yā rāā kə Babilon ní.
N rāān adə̄ téĺ ndágə loo kə́ to kum ko̰ ō,
kə́ deē gətóo tū tə́ ō.
30Go̰ rɔ̄ɔ̄ kə́ Babilon tə́ gə̄ lōōn̄ gír rɔ̄ɔ̄ tə́ kɔ̄ɔ́.
Nin̄ ɓɔ̄ɔ̄n̄ rɔ̄də́ gə́lé kújə gə̄ tə́, tɔ́gə́də́ kə́ ngá̰ý ní gətóo kɔ̄ɔ́.
Nin̄ sɔlə̄n̄ yélélé tītə̄ de kə́ dəyá̰ beē.
De gə̄ əlan̄ hor dɔ kújə gə̄ kə́ Babilon tə́ ō,
tétə̄n̄ gində̄ kutə̄ ta róbə́ kə́ tū tə́ gə̄ kɔ̄ɔ́ ō.
31Nge a̰ȳ ngɔ̄də̄ anī, ni-ənge nge kaw̄ kəla madə̄n,
kɔdə̄ mbēr̄ aw̄ ənge kɔdə̄ mbēr̄ madə̄n,
kadə̄ aw̄ ədan̄ mban̄g Babilon na taān̄ ɓē kə taá malang kɔ̄ɔ́.
32Ādə̄ de gə̄ taān̄ kum róbə gə̄ malang ō,
ādə̄ hor o̰o̰ loo kə́ dang gə̄ i tū tə́ ō,
ādə̄ áskar gə̄ a̰ȳn̄ naā kə̄ loo gə̄ tə́ ō.
33Kɔ́ɔ̄ɓē kə́ bo kə́ tɔ́gən i ngá̰ý, Nə́ɓā yā Israel ɔr̄ najə̄ i tītə̄ ń toō beé:
Babilon ń i dəyá̰ kə́ mandə ní, to tītə̄ gár̄ kə́ deē teē kemən kə̄ gogə́ kadə̄ laa beé.
Sḛ́ý to̰ anī, kum mbang sāā kōō a ugə̄ tām̄ yān tə́.
Nə́ɓā nəkɔ́ a dal ba̰ā̰ gír deē yān gə̄
(Israel əda na)
34Nabukodonosor,
mban̄g kə́ Babilon, rə́yā̰m̄ naā tə́ ō, əsam̄ ō.
Ni rāām̄ ādə̄ m̄-tél səmbē kə́ tō̰ń kem kɔ̄ɔ́.
Ni urəm̄ kemən tə́ tītə̄ dā̰ kə́ bo kə́ to ɓōĺ ngá̰ý beē.
Ni njúū yibə̄ kə́ kəngāḿ tə́ adə̄ ndān̄ kemən ba əya̰m̄ kɔ̄ɔ́.
35Ādə̄ tápə̄ yāḿ gə̄ ō, yá̰á̰ kə́ to kum kaȳ aĺ yāḿ gə̄ ō tél əsōn̄ dɔ Babilon tə́.
De kə́ Siyo̰ gə̄ asən̄ kəda najə̄ ń noō.
Ādə̄ mósə́ḿ tél əsō dɔ Kalde gə̄ tə́. Jerusalem asə kəda najə̄ noō.
36I tāmə̄n̄ ń toō tə́ n Kɔ́ɔ̄ɓē ɔr̄ najə̄ tītə̄ ń toō beé ní:
M-ā m-ə̄ndā rɔ̄ḿ ta najə̄ yāí tə́ ō, m-ā m̄-dal ba̰ā̰í ō.
M-ā m̄-rāā kadə̄ bā bo kə́ Babilon tə́ tél loo kə́ tutə kɔ̄ɔ́ ō,
kadə̄ kəɓa man̄ yān iī kɔ̄ɔ́ ō.
37Babilon a tél yā to tītə̄ mbal̄ kə́ kán̄ dɔ naā tə́ ō,
tītə̄ loo ra tal̄ gə̄ ō,
yá̰á̰ kə́ to kum ko̰ kə́ de gə̄ a əgan̄ kɔŕ ɓōĺ dɔ tə́ ō.
De kə́ kemeé gə̄ a gətóon̄ malang kɔ̄ɔ́.
38Dan ń nin̄ ra a nōōn̄ naā tə́ tītə̄ balsáa ɓɔl gə̄ ō,
a tṵ́ṵ̄n̄ rɔ̄ɔ̄ tītə̄ ngán ɓɔl gə̄ ō,
39rɔ̄də́ a əɓa təngā ō anī,
m-ā m-ə̄ndā dɔ yá̰a̰ kəsa kə́ ngá̰ý naā tə́ tām̄ yādə́ tə́,
m-ā m-ādə̄də́ kasə kadə̄ rāādə́ ngá̰ý ō,
nin̄ a ɓīīn̄ ɓīī kə́ njɔ́ḿ gə̄ tə́ ō,
a ndólə̄n̄ to̰ aĺ bátə́ ō. Najə̄ ń Kɔ́ɔ̄ɓē əda ní n noó.
40M-āw̄ sedə́ loo tɔ̄l̄ dā̰ gə̄ tə́ tītə̄ bal batə̄ gə̄ beé ō,
tītə̄ kó̰o̰ batə̄ gə̄ naā tə́ kə bal bə̄yā̰ gēé ō.
Pā nōō Babilon
41I ba̰ý á taān̄ ɓē kə́ Sesak#51.41 Sesak: I rī kə́ rang kə́ əndān̄ dɔ Babilon tə́. ō, ndin̄ kemeé ō, ni ń i ɓē kə́ rīn ɓār̄ taā gō dɔ nang malang ní?
I ba̰ý á ɓē kə́ Babilon tél loo i kə́ to kum ko̰ dáń ɓē gə̄ yā nápar de gə̄ tə́ ní?
42Bā bo un dɔ Babilon,
bəngál man̄ kə́ ngá̰ý gə̄ taān̄ dɔn.
43Ɓē yān gə̄ télən̄ i loo kə́ to kum ko̰ gə̄ ō,
i loo gə̄ kə́ man̄ əhɔ laa tū tə́ ō, kə̄sā gə̄ i tū tə́ ō,
deē ndi tū tə́ aĺ ō,
deē mān̄ tū tə́ aĺ ō.
44m̄-nujə ɓesə̄ Bel kɔ̄ɔ́ kem ɓē kə́ Babilon tə́ ō,
m̄-taā yá̰á̰ ń ni a əsa ní tan tə́ kɔ̄ɔ́ ō.
Nápar de gə̄ a teēn̄ kə̄ ta loo gə̄ tə́ yā kaw̄ rɔ̄n tə́ to̰ alé.
ndogə̄ mbal̄ kə́ Babilon tə́ gə̄gē əsō kɔ̄ɔ́.
45Sḭḭ̄ ń i gír deē yāḿ gə̄ ní, ī-teēī kɔ̄ɔ́ kem ɓēé,
ādə̄ náā nəkɔ́ ɓáa njan adə̄n.
Tɔdɔ̄ wōn̄g yā Kɔ́ɔ̄ɓē ḭḭ seneé kə ngangá ngá̰ý.
46Ādə̄ tɔ́gə́sí ur̄ wak aĺ ō, ī-ɓōlíī najə̄ kə́ ɓār̄ sow kə́ ɔsə gō naā kə dɔ ɓāl̄ gə̄ kem ɓēé aĺ ō. Yá̰á̰ kə́ rāā kə dɔ́nɔ́ taā kem ɓē ō, nge ko̰o̰ ɓē kə́ rāā de gə̄ majaĺ tə̄ɓā madə̄n ba o̰o̰ń ɓē gotən tə́ ō.
47Ká ré i beé gə̄gē anī, ndɔ̄ gə̄ a reēn̄ noó
kadə̄ m-ā m̄-nujə ɓesə̄ gə̄ kə́ Babilon ō,
rɔ̄ ɓē kə taá malang a sɔlən̄ najə̄ yá̰á̰ ní tə́ ō.
Deē yān gə̄ malang ń əngen̄ do kə́ asə yodə́ ní, a tə́sōn̄ ndágə loo yān gə̄ tə́ ō.
48Tā anī dɔ rā̰ ō, dɔ nang ō,
yá̰a̰ malang kə́ tū tə́ ō,
ənīn̄ pā tetə rɔ̄ɔ̄ dɔ Babilon tə́.
Tām̄ ngé nujə loo sák sák gə̄
ḭḭn̄ i mbɔ́r ɓē kə́ ko̰ó̰ tə́ n reēn̄ ní.
Najə̄ ń Kɔ́ɔ̄ɓē əda ní n noó.
(Nge koō ta)
49De gə̄ oyn̄ ngá̰ý dɔ nang tə́ malang kə taá najə̄ yā Babilon tə́.
Ní, i gáŕ kadə̄ Babilon əsō tām̄ yā de kə́ Israel tə́ gə̄ oyn̄ ní.
50Sḭḭ̄ ngé teē ta yo kaskar tə́ gə̄, ə̄sōī róbó āwī.
Ī-lōōī dəba.
Ī-gírī dɔ Kɔ́ɔ̄ɓē tə́
loo kə́ sa̰y nəkɔ́ ń ī-ndiī tū tə́ noō ō,
ādə̄ əga kemsí dɔ Jerusalem tə́ ō.
(Gír de gə̄ yā Nə́ɓā)
51Dan ń de gə̄ tájə̄n̄jí ō,
tə̄rā gə̄ reē udən̄ kem loo kə́ táĺ tə́
kem kújə yā Kɔ́ɔ̄ɓē tə́ ō ní,
rɔ̄jí nel̄jí aĺ ō, rɔ̄jí sɔl̄jí ō.
(Kɔ́ɔ̄ɓē)
52I tāmə̄n̄ ń toō tə́ n m-ā m̄-nujə ɓesə̄ yān gə̄
kem ndɔ̄ gə̄ ń a reēn̄ tə́ noō ní.
De gə̄ ń əngen̄ do kə́ asə yodə́ kem yān tə́ kə taá ní,
a to̰ō̰n̄ rus rus.
53Ká ré Babilon al̄ ndiń i dɔɔ́ dɔ rā̰ tə́, rāań loo kə́ ngan̄g utə̄ń gidən,
adə̄ deē asə kugə̄ gōn tə́ aĺ gə̄gē anī,
m-ā m-ə́lá ngé nujə loo gə̄ kadə̄ aw̄n̄ bátə́ ugə̄n̄ gōn tə́ yā nujə seneé.
Najə̄ ń Kɔ́ɔ̄ɓē əda ní n noó.
(Nge koō ta)
54De gə̄ ɓārə́n̄ yá̰a̰ Babilon tə́ kadə̄ yā dḭḭ̄də́,
ədan̄ na ɓē kə́ Kalde na nujə to ɓōĺ ngá̰ý.
55I Kɔ́ɔ̄ɓē n nujə kə ɓē kə́ Babilon ní.
Ni-rāā adə̄ asə de kə́ kemeé gə̄ kəga
kɔŕ kə́ al̄ naā gə̄,
ká ré ndūdə́ ɓār̄ tītə̄ bəngál man̄ kə́ ngá̰ý gə̄gē beé anī,
ni-rāā adə̄ tél ndin̄ tadə́ mbóo.
56A̰á̰ā̰, nge nujə loo reē i kənī Babilon rɔ̄ɔ̄ tə́.
Əhɔn̄ go̰ rɔ̄ɔ̄ yān gə̄ ō, tétə̄n̄ ga̰ gərā yādə́ gə̄ ō.
Kɔ́ɔ̄ɓē i Nə́ɓā kə́ ī-rɔ̄ɔ̄n a rɔ̄ɔ̄ī ō, ī-rāān yá̰á̰ kə́ majaĺ a téləń adī gogə́ ō.
57M-ādə̄ de kə́ bo yān gə̄ ō, kum kɔ̄ɔ́ yān gə̄ ō, ngé ko̰o̰ ɓē yān gə̄ ō, ngé rāā sarya yān gə̄ ō, go̰ rɔ̄ɔ̄ yān gə̄ ō, kasə nduú adə̄ rāādə́. Nin̄ a ɓīīn̄ ɓīī kə́ njɔ́ḿ gə̄ tə́ ō, a ndólə̄n̄ to̰ aĺ ō. I Mban̄g ń rīn na i Kɔ́ɔ̄ɓē kə́ bo kə́ tɔ́gən i ngá̰ý ní n əda najə̄ ń noō ní.
58Kɔ́ɔ̄ɓē kə́ bo kə́ tɔ́gən i ngá̰ý ɔr̄ najə̄ i tītə̄ ń toō beé:
Ndogə̄ mbal̄ kə́ ngāl̄ ngá̰ý gə̄ kə́ Babilon tə́ tə́sōn̄ ō,
hor o̰o̰ ta róbə yān gə̄ kə́ ngālə̄n̄ ngá̰ý kum kə̄ dɔɔ́ gə̄ ō.
Gír de gə̄ rāān̄ i kəla kə́ ndāńg karī ō,
nápar de gə̄ rāān̄ kəla adə̄ kɔr rāādə́ i tām̄ yā hor tə́ ngóy ō.
Ənīn̄ najə̄ yā Nə́ɓā kə́ ndang kum bā tə́
59-60Kété ní, Seraya kə́ ngōn̄ Neriya, kə́ ngōn̄ Maseya, i nge rāā kəla gə̄ kə́ ndogó mbangāá yā Sedekias, mban̄g kə́ Juda tə́. Ɓāl̄ ko̰o̰ ɓē kə́ nge ko̰ sɔ́ yā Sedekias tə́ anī, Seraya aw̄ seneé Babilon. Yá̰á̰ kə́ to kum kaȳ aĺ gə̄ malang ń i gáŕ kadə̄ reēn̄ dɔ ɓē kə́ Babilon tə́ ní ō, najə̄ gə̄ malang ń ɔrə̄n̄ dɔ ɓē ń toō tə́ ní, Jeremi ndangdə́ kem ndāŕ ndang najə̄ kə́ ɓír̄ gidə naā tə́ tə́. 61Jeremi əda Seraya na: Dan ń ā ūgə̄ Babilon ō, ā ə̄ndā kumií gír najə̄ gə̄ ń toō tə́ kə gōó kadə̄ ā ī-tə́dádə́ ō ní anī, 62ā ə́da na: Kɔ́ɔ̄ɓē, i īkɔ́ n ɔr̄ najə̄ kə́ sɔɔ̄ dɔ loo ń toō yā kadə̄ ī-nujəń sák sák kɔ̄ɔ́ ō, kadə̄ yá̰á̰ kə́ taā koō, adə̄ i deē, aláa i dā̰, kə ndiń kemeé to̰ aĺ ō, kadə̄ tél loo kə́ to kum ko̰ kə́ njɔ́ḿ gə̄ tə́ ō ní. 63Dan ń ā ī-tə́da makətūbə̄ ní təgā anī, ā ī-do̰ō̰ mbal̄ kógə̄ḿ tū tə́ ō, ā ə̄nīn kum bā Opəratə tə́ ō, 64gō tə́ anī ā ə́da na: Babilon a gətóo kɔ̄ɔ́ i tītə̄ ń noō ō, ni a ḭḭ dɔɔ́ kum yá̰á̰ kə́ to kum kaȳ aĺ gə̄ ń rāānən̄ ní tə́ to̰ aĺ ō. Nápar de gə̄ tə́sōn̄ sɔɔ̄ń kɔr kə́ rāādə́ ngá̰ý.
Ta tɔ̄l̄ ta Najə̄ yā Jeremi i loo ń toō tə́.
Currently Selected:
JEREMI 51: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.