JUDITƏ 3
3
Holoperən i ngɔr kə dɔ nang kə́ Jude
1Ngé gə̄ ń ndin̄ kə gō kadə bāá ní, əlan̄ de gə̄ rɔ̄ Holoperən tə́ kə najə̄ lápə́ya ń toō: 2Jḭḭ i ngé kəla gə̄ yā Nabukodonosor, mban̄g kə́ bo. Jḭḭ i kem jīí tə́, ī-rāājí yá̰á̰ ń kemií ndigə ní. 3J-adī ɓē yājí gə̄ ō, dɔ nang yājí gə̄ ō, j-əya̰ ndɔr̄ gémē yājí gə̄ j-adī ō, j-adī ɓūtə̄ batə̄ yājí gə̄ ō, ɓūtə̄ man̄g yājí gə̄ ō, j-adī géŕ ger yājí gə̄ malang kadə̄ ī-rāań yá̰á̰ ń kemií ndigə ní. 4Ɓē bo yājí gə̄ i tām̄ yāí tə́ ō, de kə́ kemeé gə̄ i ɓəlo yāí gə̄ ō. Ī-reē ba ī-rāādə́ yá̰á̰ ń kemií ndigə ní. 5Ngámbang kəla gə̄ reē ugə̄n̄ rɔ̄ Holoperən tə́, ba ədanən̄ najə̄ ní.
6Holoperən aw̄ dɔ gɔ́sə bā tə́ kə ngé rɔ̄ɔ̄ yān gēé. Ni tə́ndā ngé ngɔ̄m̄ loo gə̄ kem ɓē kə́ ngan̄g ngan̄g gə̄ tə́, ba ɔy de kə́ ngan̄g tɔȳ madə̄də́ gə̄ kə́ kem ɓē ngeé ń nuū tə́ kadə̄ ɔsən̄ kíĺ áskar yān gə̄. 7De gə̄ əhɔnən̄ kə̄ rɔ̄də́ tə́ loo ngeé ń nuū tə́ ō, kə gō ngán ɓē gə̄ malang kə́ kə gō gidə lo ngeé ń nuū ō, i kə jākā hútə̄ kāgə̄ gēé dɔdə́ tə́ ō, i kə ndāmāá non tə́ kə gō ndū kɔdɔɔ́ ō. 8Banī Holoperən nujə dɔ nang yādə́ gə̄ kɔ̄ɔ́ malang. Ni tə́gā kāgə̄ ɓesə̄ yādə́ gə̄ kɔ̄ɔ́ kə gō ń ədanə̄ń kadə̄ rāā ní ō, adə̄ nujən̄ yá̰á̰ kə́ tɔ́sə̄ kum gotə Nə́ɓā kɔ̄ɔ́ ō. Tām̄ i gáŕ kadə̄ gír de gə̄ kə́ ta yādə́ i tayā tayā gə̄ malang ō, gír ɓē gə̄ malang ō, a rɔȳn̄ i Nabukodonosor kal kógə̄ḿ beē ō, i gáŕ kadə̄ a ndɔ̄ȳnən̄ i tītə̄ lo ndɔ̄ȳ Nə́ɓā beé ō. 9Gō tə́ anī, Holoperən reē ugə̄ ta Jisreyel tə́, ngɔr kə̄ Dota̰, ta mbal̄ kə́ ngāl̄ ngá̰ý gə̄ kə́ Jude tə́. 10Ni ndi nuú ndɔ̄ɔ́ dɔ dán ɓē bo gə̄ kə́ Gebay tə́ ō, Sitopolis tə́ ō. Ni ndi loo ngeé ń nuū tə́ nāā kógə̄ḿ. I kum mbang ngeé ń nuū tə́ n ni ɔsəń dɔ sádə̄ gə̄ malang naā tə́, tām̄ yā ngé rɔ̄ɔ̄ yān gə̄ tə́ ní.
Currently Selected:
JUDITƏ 3: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.