Rom 3
3
De kïdenesew goto
1Îla i titbe a ne, ði Juip tøin de'n ger Luwah al a? Gaj kïja ye kara i ði a? 2I soot ngãi kad m'ørrsï girra m'ad oon. Dasabang, i Juipg la Luwah la ta lon jidt ye. 3Îla Juip madg adïn kamd Luwah al ye, kadkam al lod a øg kad Luwah ðanyakïro oo? 4Ãã, i be al. Maj kad i gerïn nya 'nten: Luwah i Ngerota, na deg tube în ngékeltakïbal. Kïtø maktub kïkunjðang elta dan dø Luwah an: î Luwah, takeli i goðobat, na lon aw lo gangtat a ne, naj i loi. 5Na îla nya ða kïdenesew al loj ndï ad deg gerïn Luwah i ngeðanya kïdenesew a ne, kaa j'an ði? Kaa j'an Luwah ða nya kïdenesew al lon ad wong lon son døjt e? (M'ndï m'elta tit takel deg be). 6Ãã, i be al. Îla Luwah i ngeðanya kïdenesew al a ne, titbãi hã a gangïn ne ta dø degt kï døningt a? 7Na îla takïbal lom ða ad rota lo Luwah tee kï tïga unj tøi kï kete, kïta køsïgon loa ad deg gerïna a ne, kïtøði gangïn ne ta dømt tit mî ngeða majal be a? 8Deg madg ndï lan ta køjt anan j'elta 'nten: Ad kï ðan majal kïtakad maj teen, ye asï kad Luwah gangta dø degt'n non.
De kïdenesew goto nõ Luwaht
(Nge 7:20; Job 15:14 teen 16; Gal 3:22)
9Kaa j'an ði? Jî Juipg kïmaj kï tøi ndeg deg e? Ãã, i be al bat. M'elta dø Juipgt kï deg'n gerïn Luwah al kete woi, m'an în tu în girr tøg majalt. 10Kïgo tat'n ndangïn kam maktubt kïkunjðang: De kïdenesew goto nõ Luwaht, kïkïða kaa ne goto. 11De kï ngégoosï goto, de kï ngesah Luwah goto. 12În tube ndomïn, tube telïn nya kï kara goto, de kï ngeðamaj goto, kïkïða kaa goto. 13Køød i tit døþad kï ða tag, elïn ta kï to de pepe, ndon ne deg. Wong yir i girr kïngakïladt. 14Tad ðoosï kï yo kï la deg, kï ta kïkatbang. 15Þan nja ngød kad ün ne mosï kø. 16Nuj kø kï dangt i dø ðob kawdt. 17Gerïn ðob lapia al, 18Þool Luwah goto kamdt. 19Na tajigla kï ger kad nya tube'n mberkïnda el, ndï el deg'n ndïn girr tøg mberkïndat, kïtakad deg oon ne ta kï a elïn al, na kï ta kï gang hø deg kï døningt tube nõ Luwaht. 20Kïtø 'nten de kï Luwah a ørr ta døat kïtakul kïlag lo mberkïnda goto. Kïtø mberkïnda ndï ndoo deg kad gerïn majal koon.
Ðob'n Luwah a ørrïn ta dø det
21Na tajigla Luwah tel deg denesew nõnt kï ðob kï kij, kïkanj mberkïnda. Mberkïnda lo Moij, kï ngékelta kï ta Luwaht man naj dø ðobt kï kij'n non kete woi. 22Kïtakul ðob'n non Luwah telïn deg denesew nõnt kïtakul kadkam'n adïn Krist. Luwah ad ðob'n non deg tube'n adïn kamd Jeju, kørr de dene goto. 23Kïtø deg tube ðan majal ad køsïgon lo Luwah nald. 24Na Luwah ørr ta dø degt kari kïtakul kamkë lon kï lo badøt'n Krist Jeju ba. 25Luwah laa kadkarit kad mosa ørr majal lo deg kïtakul kadkam koia. Titbe la Luwah øjïn ðob lon kad telïn deg denesew nõnt kïta Luwah nyàgo majal kï ða lo deg kete, un kumïn døt kaglo ndïdøt lon. 26Na kam kaglot kï tajigla Luwah ndï øj ðob lon kad'n telïn deg denesew nõnt. Kï ðob'n non Luwah øj'jïn kad nî denesew, na deg'n adïn kamd Jeju, Luwah ndï teld denesew nõnt tø. 27Kïtø 'nten, nya kï kad de gan buro i ða a? Nya mad goto bat. Kïtakul mberkïnda kï ða hã goto'n a? Kïtakul kadkam la buro kïga goto'n ye. 28Kïtø kï gaa j'oo kad Luwah ndï ørr ta dø det kïtakul kadkam, na kïtakul kïla ða kïgo mberkïndat al. 29Ad m'ndïjesï m'oo: Luwah ye i Luwah lo Juipg koon, na i Luwah lo girrdeg kïdangdang ale? Ãã, i Luwah lo girrdeg kïdangdang ho. 30Kïtø Luwah i kïðabe; î la a ørr ta dø Juipgt kïtakul kadkam, na a ørr ta dø girrdegt kïdangdang kïtakul kadkam ho ye. 31Ad kïtakul kadkam ye, ndï kï j'ørrïn mberkïnda lo Moij køø? Be al. Na kï ndï kï j'ad ndaa mberkïnda to lo tont.
Currently Selected:
Rom 3: MB80
Highlight
Share
Copy
Want to have your highlights saved across all your devices? Sign up or sign in
BIBLE MBAÏ © 1980 Alliance Biblique du Tchad.