Marcos 3
3
So' siỹaxaua 'me qaqáta so' louaq
(Mateo 12.9-14; Lucas 6.6-11)
1So' Jesús ỹitaxa ỹinoxonóoue so' lemáxaqui na' judiopi, qana'chi 'uo so' siỹaxaua 'me qaqáta so' louaq. 2Qaa'le 'uo so' 'chi nauáatac so' Jesús da' 'uootaxa n'óota 'en so'me siỹaxaua so'me nolo' 'me mataxaqui, qaidi na'chiso huasoilégue qoỹin so'me. 3Qana'chi so' Jesús 'enapéga so'me siỹaxaua 'me qaqáta so' louaq, 'enaac:
—Ỹa 'oñíseguem, 'anchaatánỹi na' laiñi.
4Ỹim, qaama'le denataxan, 'enaac:
—¿Jái'chi ga'me qodasenataxát'em da' qoỹí'et di' nolo' mataxaqui, da' ỹiỹamqáchiiñi, 'uootaxa sa nó'in? ¿Qonec'alaxatéegue ga'me siỹaxaua, 'uootaxa qoỹalaat?
Qaláxasa so' siỹaxadipi ỹátaqta n'emáxaden. 5Chan'eesa so' Jesús dalemataỹi da' lec'atenaxanaxac joca'li, qataxa nachoxodénaac, qá'a sa demachíỹaac so' siỹaxadipi. Qana'chi 'enapéga so' siỹaxaua 'me qaqáta so' louaq, 'enaac:
—'Anodéegue na' 'adouaq.
Qana'chi so'me nodéegue so' louaq, na'chi n'óota. 6Huá'a, qana'chi so' fariseopi jec da' ỹic'áta na'me quétapegue' so' Herodes da' qodosápiỹi ga'me lasoxoc, qaidi qoỹalaat so' Jesús.
Jalcote so' siỹaxadipi huét'a so' loxogue jaso' peróna
7Qaláxasa so' Jesús jec, náicapee'to saua' lasoxoñii's tadaxasó'ma so' loxogue jaso' peróna. Qana'chi jalcote so' siỹaxadipi ỹic'atetalégue so'me, chiỹoqóchii'ña di' Galilea. 8Qana'chi ca'li qodip'iỹi'ỹa't naa'me sa lec'oqtolqa 'me ỹ'e't so'me, qana'chi ỹátaqta nesouóqot'a jeso'me na' chiỹaqá'a di' Judea, qataxa Jerusalén, qataxa di' Idumea, qataxa da' lasego so' ñáchi Jordán 'me p'aiỹi da' néte' liiséguem, qataxa di' 'aléua Tiro qataxa Sidón. 9Chan'eesa so' Jesús huaqátoovlo saua' lasoxoñii's, da'me ỹaqátaxatrapiỹe't jaga' 'oonole licota, qaidi sa ỹipataxa't na' siỹaxadipi jeso'me. 10Qá'a so'me ỹátaqta jalcote na' n'óxota qa'en, qaa'le ỹátaqta ỹima nepataqta't na' leuaxaicpi, nasonapée'uo so' Jesús da' sétaaque da' 'chi ỹipoteuó'o. 11Qataxa jen' né'ecpi naale ỹilo'ot jeso'me, qana'chi ỹisóidiñi naua' liliictel, qataxa ỹ'alaq, 'enaac:
—¡'Am na'chi'am lec'óxot ñi' Dios!
12Qaláxasa so' Jesús ỹátaqta sa ỹalá'ac da' huaqáta na' né'ecpi da'me sa ỹichoxot so'me.
So' Jesús ỹauo'oi saua' doce lamaxa's
(Mateo 10.1-4; Lucas 6.12-16)
13Joca'li ỹim dójo', qana'chi so' Jesús tasée'mec so' qasoxonaxa, qana'chi huá'a joca'li ỹauo'oi saua' ỹiỹáxanalo, saa'me quetelóo'te lauel. Qana'chi jesaa'me nec'ádeta so'me. 14Qana'chi ỹimata'a'salo saua' doce jesaa'me, qaidi na'chi 'eeta't da' huetaavlo so'me, qataxa qaidi lamaxa's saa'me da' ỹ'axáteegue da' n'aqtac. 15Nataq'en ỹanema saa'me da' lañoqtaxanaxa'j ỹima na' napite'napi, qataxa da' ỹ'odédaiỹi na' né'ec nataqtáqaicpi. 16Qana'chi náajo' naa'me lenaqa'te saua' doce: so' Simón jeso'me ỹanec so' Jesús da' Pedro; 17qataxa so' Jacobo qataxa so' mai'chi laqáỹa Juan, c'óqo'te so' Zebedeo, saa'me ỹanaỹilo so' Jesús da' Boanerges, da'me 'enáacjo': 'uañaxaiqa 'ena'ama da' lalimáxa jan' qasoxonaxa; 18qataxa so' Andrés, Felipe, Bartolomé, Mateo, Tomás, Jacobo so'me c'óxot so' Alfeo; Tadeo, Simón 'me huétaaue na' judiopi 'me sétaaque da' ỹ'odáiỹi jen' Roma lé'ecpi, 19qataxa so' Judas Iscariote, 'me ỹaneuó'o jocalia'cho' so' nep'aguénoqo't so' Jesús.
So'me Jesús qoỹíitapega nataqtáqaic ga'me lé'ec
(Mateo 12.22-32; Lucas 11.14-23; 12.10)
Joca'li ỹim, qana'chi so' Jesús ỹinoxonóoue so' 'emec, qataxa saua' lasoxoñii's. 20Qana'chi ỹitaxa jalcote na' ỹima'alo na' siỹaxadipi, ỹivíd'a da' ỹátaqta sa qoỹiqui'ỹáxa'n saa'me. 21Mané'e joca'li dip'iqui so' laỹi so' Jesús, qana'chi janac so'me da' sétaaque ỹauec. Qá'a qoỹíitapega ma'le jaláxaic.
22Nataq'en 'uo na' janac na' dapaxaguenataxanapeec na' naqátaxacpi 'me chiỹaqá'a di' Jerusalén. Qana'chi jen'me 'enapega't:
—Dójo' siỹaxaua, da'me nétaaue ñi' qadó'o paiỹac Beelzebú ñi'me lasoxola' na' né'ecpi nataqtáqaicpi. Qana'chi na'chida 'me d'onataxana da' loiquiaxac da' ỹ'odáiỹi na' né'ecpi.
23Qana'chi so' Jesús ỹiỹáxanaaue so' siỹaxadipi, qana'chi ỹa'uo so' daloqtenaxana, 'enaac:
—¿'Te hua'ague ga' 'éeta ga' lasoxoc da' so' paiỹac Satanás mai'chi nichiỹodela't? 24Ga' net'a da' ỹodapecachi na' nesoxonecpi, qataxa mai'chi p'aỹa't da' deloiỹa't, qana'chi jega'me net'a, ga'me sa 'eeta't. 25Qataxa ga' mai'chi n'emeelaséỹaxaua da' mai'chi nep'aguena't, qana'chi jega'me nataq'en sa 'eeta't. 26Na'chi 'éeta so' Satanás da' mai'chi nep'agueela't, qataxa colaxaỹi da' l'añaxac, qana'chi so'me sa 'eeta't. Huá'a, qana'chi palỹi.
27Qaỹa 'te ỹaqanatet taa'le 'chi ỹinoxonáaue ga' l'emec ga' siỹaxaua 'uañaxaic da' neuótec na' leuoxosetpi, da' sa ỹ'áta da' ỹicoñi'. Da' 'éet'ec da'me dójo', ma'le ỹaqanatet da' neuótec na' leuoxosetpi.
28Ỹátaqta 'eesa dójo' 'ami s'axatema naỹi, jen'me siỹaxadipi ỹima qoỹaqanatet da' qoỹapalaxa't naua' loico, qataxa ỹiméda naua' l'énaxaco 'me nasaqádapegueegue. 29Qaláxasa ga'me ỹasaqapeelóo'te naua' l'énaxaco so' Espíritu Santo, ga'me ỹátaqta sa nichoxodénatac qomle. Na'chidáta da'me qaỹa 'te loiquiaqa' qoỹin ga' lasouaxaset.
30Qana'chi naq'áita jeda'me l'aqtac so'me Jesús, qá'a so' siỹaxadipi 'éetapega 'uo ga' lé'ec nataqtáqaic so'me.
Jaso' lat'e qataxa saua' laqáỹa' so' Jesús
(Mateo 12.46-50; Lucas 8.19-21)
31Huá'a, qana'chi nivídeuo jaso' lat'e qataxa saua' laqáỹa' so' Jesús. Qaláxasa 'chi lesecai'ỹalo saa'me, qana'chi qodamaxasóxone'uo jeso'me. 32Qana'chi so' siỹaxadipi 'me ñíchiiñi dasot'ot so' Jesús 'me 'enaac:
—Jada'me 'adat'e qataxa daua' 'adaqáỹa' huetrai'idi, 'am nimitétraaque.
33Qaláxasa so'me 'enáacjo':
—¿Jái'chi jaga'me ỹat'e, qataxa gaua' ỹaqáỹa'?
34Ỹim, qana'chi ỹilápegooue so'me ñíchiiñi 'me dasot'aguet, qana'chi 'enáacjo':
—Jénjo' jen'me 'ená'am jaga' ỹat'e qataxa gaua' ỹaqáỹa'. 35Qá'a jega'me ỹ'e't naua' 'éetapeeque ñi' Dios, na'chiga 'me 'ená'am ga' ỹaqáỹa qataxa jaga' ỹaqáỹa qataxa jaga'me ỹat'e.
Currently Selected:
Marcos 3: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.