Marcos 2
2
So' Jesús n'óota qa'en so' sa d'añiiỹi
(Mateo 9.1-8; Lucas 5.17-26)
1Joca'li ma'le qaỹóxodachi saua' noloqo'te, qana'chi so' Jesús ỹitaxa v'iỹílaxa'uo di' noic Capernaum, joca'li 'chi qop'iỹíỹa da' néta'ña so' l'acháqa'. 2Qana'chi sa huaỹáloq da' ỹoqóictapega na' siỹaxadipi, cha ỹivíd'a da' qaỹa 'te nedáqa' so' som. Qaa'le so'me ỹ'axátet'ape naua' l'aqtaqa ñi' Dios. 3Qana'chi qonpená'uo ga' huét'a so' Jesús so' siỹaxaua 'me sa d'añiiỹi. Jeso'me nacóotraỹi saua' cuatro siỹaxa'u. 4Qaláxasa saa'me sa ỹivídede'uo ga' huét'a so' Jesús, qá'a da' sa cat'olec na' siỹaxadipi. Chan'eesa saa'me ỹ'ouáchidiñi so' lóvi' so' 'emec, qana'chi jeso'me n'ouatac, na'chi ta'nỹet qoỹin so' ỹilhuaac 'me huetalégue so' letala'. 5Joca'li ỹilá'a so' Jesús da' lip'iỹáxa'j jesaa'me, qaama'le 'enapéga so' ỹilhuaac, 'enaac:
—'Am ỹalcolec, naa'me 'adoico naỹi ỹima qoỹapalaxa't.
6Qaláxasa so'me dapaxaguenataxanapeec na' naqátaxacpi 'me ỹalquétauo ñíchiiñi, 'enapíi'ña lauel: 7“¿Tá'nooqo'chi da'me siỹaxaua, 'chi 'éet'ec da'me l'aqtac? Ỹisouéetac ñi' Dios, qá'a qaỹa 'te ỹañoxo't taa'le pa'l 'e'n naua' noico, 'oonolec ñi' Dios.” 8Qaláxasa so' Jesús, mai'chi ỹaỹáten da'me lauel so' siỹaxadipi. Qana'chi 'enáacjo':
—¿Tóoqo'chi 'adeenataxaquii dójo'? 9¿Jái'chogamaxa 'éeta ga'me sa qalaq da'me qoỹidolégue? ¿Na'chidáta jodamaxa 'enaac: “Naua' 'adoico ỹima qoỹapalaxa't,” 'uootaxa da' 'enaac: “'Oñíseguem, 'aunangue na' 'adetala', qana'chi 'oc?” 10Qaidi 'auaỹáchiñii, naỹi naloxonalo 'ami jen' siỹaxaua lec'óxot 'me 'uo da' 'enec jen' 'aléua da'me ỹapalaxa't naua' noico.
Qaama'le 'enapéga so' Jesús so' sa d'añiiỹi, 'enaac:
11—Naỹi 'am senapéga, 'oñíseguem, 'aunana't na' 'adetala', qana'chi 'auc'áta ga' 'ad'acháqa'.
12Qaama'le ñíseguem so' leuaxaic, qana'chi ỹinana't so' letala', cá'ai so' huét'a, ỹima da' qoỹauáachiỹi. Chan'eesa so' siỹaxadipi qaa'le ỹátaqta ỹoqo'chim, qaama'le ỹi'ỹoxodéetac ñi' Dios, 'enaac:
—Ỹátaqta 'uáat'a da'me sauanáqchiỹi ga' 'ená'am dójo'.
So' Jesús nepoda so' Leví
(Mateo 9.9-13; Lucas 5.27-32)
13Joca'li ỹim da'me dójo', qataxa taxasó'ma so' Jesús so' loxogue jaso' peróna. Qana'chi ỹima na' siỹaxadipi noqóictapega jeso'me, qana'chi ỹapaxaguéetac. 14Joca'li ỹitaxa jec, qaama'le ỹilá'a so' Leví 'me Alfeo lec'óxot, ñíchiiñi, nétaaue jaga' leseeténataxanaxaqui na' siỹaxadipi da' qoỹiseeten ga' net'a Roma lé'ec. Chan'eesa so' Jesús nepoda so'me, 'enaac:
—Jaỹim 'oquegue qomle.
Qaama'le ñíseguem so' Leví, na'chi 'equegue.
15So' Jesús joca'li cha'li de'quétac, nét'a ga' l'acháqa' so' Leví. Qataxa jalcote jen' ỹaconapeeguet jan' nemena 'me taỹapée'uo so' net'a Roma lé'ec, qataxa na' loicoló'olpi ñíchiiñi liqui'ỹáxaua so' Jesús, qataxa saua' lasoxoñii's, qá'a ỹátaqta jalcote so' quétapegue' so'me. 16Qaláxasa na' dapaxaguenataxanapeec na' naqátaxacpi qataxa na' fariseopi joca'li ỹilá'a so'me da' liqui'ỹáxaua ỹima so'me siỹaxadipi, qana'chi 'enapegalo saua' lasoxoñii's, 'enaac:
—¿Tóoqo'chi ñi' 'adasoxoládii 'chi de'quétac qataxa niỹómtac, ỹalquétaaue na'me ỹaconapeeguet jan' nemena 'me taỹapée'uo ga' net'a Roma lé'ec qataxa na'me loicoló'olpi?
17Qana'chi joca'li so' Jesús demachíỹa da'me dójo', qaama'le 'enáacjo':
—Sa ỹiuéetaaque ga' naỹoxola' jen'me qaỹa 'te 'uo qataxa jen'me n'óxota, na'chínata na' ỹilhuaac. Qá'a jaỹim sa ñic'áta da' siỹáxana ga' 'ónaxaicaloic, na'chigáta ga' loico ló'o.
Qoỹinatec so' Jesús da' noqouaqtela't ga' siỹaxaua
(Mateo 9.14-17; Lucas 5.33-39)
18'Uo so' nolo' da' noqouaqtela't na'me quétapegue' so' Juan qataxa na'me quétapegue' na' fariseopi. Qana'chi 'uo na' nec'áta so' Jesús, ỹinatétac, 'enaac:
—¿Tóoqo'chi noqouaqtela't jen' quétapegue' so' Juan qataxa jen' quétapegue' na' fariseopi, qalqo' na' 'adapaxaguenatacpi tóoqo'chi sa noqouaqtela't?
19Chan'eesa so' Jesús 'enáacjo':
—Jen'me siỹaxadipi 'me ỹalquéta'uo ga' n'onáxac, da' 'uootaxa maliaxa huet'aguet ga' jauonaxaua, jen'me ¿qo'li ỹaqanateto' da' noqouaqtela't? ¡'Ai'! Qá'a da' maliaxa 'uo ga' jauonaxaua, qana'chi jen' siỹaxadipi sa ỹaqanatet da' noqouaqtela't. 20Qaláxasa nata't ga'me nolo' da' qoỹauec ga'me. Huá'a qomle, qana'chi jen' siỹaxadipi ma'le noqouaqtela't.
21Qaỹa 'te ỹañoxot da' naula ga' noxot tóxoic da' naulalégue ga' dálaxaic. Qá'a da' v'iỹa't ga' 'uáloq lai dálaxaic, qana'chi ỹicolaxata'ague ga' tóxoic. Huá'a, qaa'le 'eesámataxa nichíỹaxadesaiỹi da' ỹicolaxata'ague. 22Qana'chi 'ená'am sa 'te qoỹachánỹi jaga' nota tóxoi ga' dálaxaic latáxa. Qá'a ga' latáxa dálaxaic colqa'ague qa'en jaga'me qomle. Huá'a, qana'chi huóco', qataxa jaga' nota sa nó'in. Chan'eesa qaa'le n'óota ga'me latáxa dálaxaic da' qoỹachánỹi jaga' dálaxaale nota.
Saua' lasoxoñii's so' Jesús napoquétra'ña jan' trigo jala so' nolo' mataxaqui
(Mateo 12.1-8; Lucas 6.1-5)
23'Uo so' nolo' mataxaqui, qana'chi so' Jesús ỹ'axasoxota so' nanaxanqa', chan'eesa saua' lasoxoñii's saa'me napoquétra'ña jaso' trigo jala. 24Chan'eesa so' fariseopi 'eetapego' so'me, 'enaac:
—Péga, ¿tá'nooqo'chi ỹauóte dójo' naa'me 'adasoxoñii's, qamaale sa qoỹisetaxat da' qoỹí'et di' nolo' 'me mataxaqui?
25Qaláxasa so' Jesús ỹ'iỹílaxateguet so' siỹaxadipi, 'enáacjo':
—¿Sa 'te 'autaxaỹaxañiiỹo' jodamaxa 'éeta so' qadet'a David, joca'li 'uo so' nolo' so'me qataxa saa'me liquiáxa'u 'uo da' leuénaxanqa' qataxa ỹoqoua't? 26Qana'chi táaue so' David so' l'emec ñi' Dios joca'li maliaxa lasoxola' so' Abiatar so' netaxaỹáxanaxanecpi da' qodosápegue' ñi' Dios. Qana'chi ỹalic jaso' pan 'me qoỹanot ñi' Dios, jaso'me nedot'a't so' netaxaỹáxanaxanecpi 'me ỹañoxot da' ỹalic. Qataxa so'me ỹaasa'ama saua' náictapee'to.
27So' Jesús nataq'en 'enáacjo':
—So' nolo' mataxaqui qoỹí'et joca'li qaidi nematéegue ga' siỹaxaua, qaláxasa sa qoỹí'et ga' siỹaxaua, ỹasouaxat di' nolo' mataxaqui. 28Chan'eesa 'éeta jen'me siỹaxaua lec'óxot, jen'me 'uo da' 'enec da' 'uo ga' damaxasoxolégue da' qoỹí'et di' nolo' mataxaqui.
Currently Selected:
Marcos 2: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.