Lucas 3
3
Jeso'me chiláxanataxanaxaic Juan d'aqtaxaatapeelégue di'me totelégue 'aléua
(Mateo 3.1-12; Marcos 1.1-8; Juan 1.19-28)
1Qana'chi joca'li ma'le ỹivi't saua' quince 'uóidi da' l'onataxanaxac jeso'me let'a na' net'alpi lenaxat Tiberio, qana'chi jeso' Poncio Pilato ỹilo'ogue di' Judea, qataxa jeso' Herodes qamqaa'me ỹilolégue di' Galilea, qataxa jeso' laqáỹa Felipe qamqaa'me ỹilolégue di' Iturea qataxa Traconite, qataxa jeso' Lisanias ỹilolégue di' Abilinia. 2Qana'chi huétooue jeso'me nolo' joca'li jeso' Anás qataxa jeso' Caifás maliaxa lasoxola'te na' letaxaỹáxanaxanecpi na' siỹaxadipi da' qodetaxaỹapégue' ñi' Dios, joca'li ñi' Dios 'enapéga jeso' Juan 'me lec'óxot jeso' Zacarías joca'li hualégue jeso'me totelégue 'aléua. 3Ỹim, qana'chi jec da' coleelégue ỹima di'me sa qaỹáaque so' ñáchi Jordán da' d'aqtaxanem so' siỹaxadipi da' ỹigue'm naua' loico qataxa qonachiláxan, tetoqo' na' loicpi qoỹapalaxat. 4Qana'chi dójo' ỹipaquíchiỹi da' l'aqtac so' l'aqtáxanaxanec ñi' Dios joca'li ỹidíñi da' l'aqtac, 'eet'oi:
'Uo qomle ga' siỹaxaua chimqátapeelégue ga' totelégue 'aléua, 'eet'oi da' liỹáxanaxac:
“Ỹa 'auqátaxañiita't ga' naq'aic ñi' qadesaliaxanec,
ỹátaqta 'au'ouáchiit'egue ga' ladic.
5Ỹima na' c'amai'nỹi ỹátaqta saqáchiỹi qoỹin,
qataxa ỹima jen' qasoxonaxa qataxa na' comadáxapi ỹátaqta qonaloqchíichiiñi,
jen'me naq'aicpi 'me namaqaicpi, qaláxasa chimqáteegue qoỹin,
qataxa na' nadicpi 'me pelca'ỹague jen' 'aléua, qaláxasa qonaloqteet'a't,
6tetoqo' ỹima na' siỹaxadipi ỹilá'a da' nec'alaxa 'me ỹan ñi' Dios.”
7Qana'chi so' siỹaxadipi joca'li ỹic'átee'ga so' Juan da' sétaaque da' qonachiláxan, qana'chi so'me 'enapéga 'eet'oi:
—¡'Ami nanaic lec'óqo'tepi! ¿Jái'chogamaxa 'ami d'aqtaxanema, tetoqo' 'auasoỹeỹi'sop da' lichic 'me nadíiteuo? 8Ỹátaqta 'analoxóñiito' qomle tetoqo' qoỹilá'a da' ỹátaqta 'eesa da' ỹímta 'aviimi' naua' 'adoicódii', qataxa sa tátapiỹi 'adai'lídii' da' 'oñiit'oi: “Qo'mi, mai'chi qo'mi lec'óqo'te so' Abraham”, qá'a jaỹim 'ami senapegalo da' ñi' Dios ỹañoxot da' ỹachiỹoxotáaue jen'me qa' ga' lec'óqo'tepi jeso' Abraham. 9Jaga' qachipe sóxote ỹimeta't da' ỹiquesoxoi'ñot jan' 'epaqpi, qana'chi ỹima jan' 'epaqpi 'me sa nó'in jan' jala, jan'me qoỹiquesoq, ỹim, qana'chi qoỹasaxánỹi ga' dóle'.
10Qana'chi na' siỹaxadipi denataxan, 'eet'oi:
—¿Hua'ago' ga' sauoqo?
11Qana'chi so' Juan 'enaaco':
—Qomle ga' dos gaua' nesomaxaqui', qana'chi ỹanem ga' 'oonolec ga'me qaỹa 'te nesomaxaqui; qataxa ga' 'uo ga' jaloq, qaa'le ỹachit ga'me qaỹa 'te jaloq.
12Ỹim, qataxa jen'me ỹaconapeeguet jan' neseeténaqte ga'me net'a, jen'me janac da' sétaaque da' qonachiláxan. Qana'chi qoỹinatétac so' Juan, qoỹíitapega:
—'Am 'me paxaguenataxanaxaic, qo'mi ¿hua'ague ga' sauoqo?
13Qana'chi so' Juan 'enaaco':
—Qomle 'anaqachiỹíiỹi jaga' leseeténaxanaqte na' siỹaxadipi, qaláxasa sa 'te da' napacalégue 'aviñii jañi' ỹiỹáxanaaque ga' net'a.
14Nataq'en janac jeso' nesoxonaqapi so' net'a, qana'chi qoỹinatétaco' so'me, qoỹíitapega:
—Qataxa qo'mi, ¿hua'ago' ga' sauoqo?
Qana'chi so' Juan 'enaaco':
—'Ena't qomle da' 'uo ga' 'aneuódii, qataxa 'ena't da' 'uo ga' 'auadíñiitalégue, nataq'en sa 'te da' 'uo ga' 'chi 'auasaqáitapeelégue ga' lasouaxaset. Jañi'me 'adaso'vii, na'chañíta 'aviỹamaxadíñiita.
15Qana'chi na' siỹaxadipi ỹátaqta ỹoqochi, demalaqtaxana't da' 'uootaxa so' Juan qoỹipétetapega da' na'chiso jeso' qonamaq net'a 'me qadec'alaxaqui. 16Qaláxasa so' Juan 'enapéga ỹima so' siỹaxadipi, 'eet'oi:
—Jaỹim 'eesa da' 'ami ñachiláxanỹilo naỹi na' noxop, qaláxasa 'uo na' jaỹim nec'átetalégue, jena'me 'ami nachiláxanỹilo qomle ga' Espíritu Santo qataxa ga' dóle'. Qá'a jen'me ỹátaqta ỹágueegue da' l'añaxac, jaỹim sa sená'am, qataxa jaỹim sa saiỹet da' ñaqa't naua' lapela'te leque'te. 17Jena'me lasóqot'a na' lichiỹoxosóxonaxat, tetoqo' nichiỹoxoñi na' trigo da' ỹiỹotái'ỹa jan' jala qataxa jen' lóvi. Ỹim, qana'chi ỹiỹotái'ỹa jan' jala na' trigo da' ỹacháiỹi ga' lai't. Qaláxasa jen'me lóvi qaamaxa ỹigóoue, ỹasaxánỹi ga'me dóle' 'me sa 'om.
18Naqaida da' 'éeta da' letaxaỹaxac, qataxa jalcote na' laỹi laqátaxacpi 'me ỹan so' Juan joca'li ỹ'axátetapeguem ỹima na' siỹaxadipi da' 'ónaxaic lipí'ic. 19Jeso' Juan nataq'en ỹivídaxatet'ot jeso' net'a Herodes ỹasouaxat da' 'uoneguet jaso' Herodías 'me loua so' laqáỹa Felipe, qataxa nataq'en ỹasouaxat so'me laỹi ỹí'etpi 'me sa nó'in, 20qaláxasa so' Herodes sa 'te da' ỹalaq. Na'chidáta da' nichíỹaxadesaiỹi da' ỹí'et da'me sa nó'in joca'li ỹicoñi' so' Juan, ỹanáaue jaso' cointáxanaxaqui.
Da' nachiláxanataguec so' Jesús
(Mateo 3.13-17; Marcos 1.9-11)
21Joca'li maliaxa sa qoỹicoñi' so' Juan, qana'chi jeso'me nachiláxatac ỹima so' siỹaxadipi, qaama'le nataq'en janac so' Jesús da' qonachiláxan. Jeso'me joca'li maliaxa netaméetac, qana'chi na' piỹem sega'me n'ouáteegue. 22Qana'chi so' Espíritu Santo naỹá'ña jeso'me, 'ená'am jen' doqoto' ỹátaqta di'ỹoqóta. Ỹim, qana'chi chimaqpecot di' piỹem so' n'aqtac, 'eet'oi:
—'Am 'me mai'chi'am ỹalémaxaset ỹalcolec, 'am ỹauotaxat, jaỹim ỹátaqta 'am ñitóotapeec.
So' chiỹoxoguet let'alpi so' Jesucristo
(Mateo 1.1-17)
23So' Jesús ma'le ỹovi't saua' treinta 'uóidi joca'li 'ecot da' l'onataxanaxac. So'me qoỹíitapega lec'óxot so' José; so' José na'chi let'a so' Elí; 24so' Elí na'chi let'a so' Matat; jeso' Matat na'chi let'a so' Leví, jeso'me lec'óxot so' Melqui; so' Melqui na'chi let'a jeso' Jana, jeso'me lec'óxot so' José; 25so' José na'chi let'a so' Matatías; so' Matatías na'chi let'a so' Amós; so' Amós na'chi let'a so' Nahúm; so' Nahúm na'chi let'a so' Esli, jeso'me lec'óxot so' Nagai; 26so' Nagai na'chi let'a so' Maat; so' Maat na'chi let'a so' Matatías; jeso' Matatías na'chi let'a so' Semei; jeso' Semei na'chi let'a so' José, jeso'me lec'óxot so' Judá; 27so' Judá na'chi let'a so' Joana; so' Joana na'chi let'a so' Resa; so' Resa na'chi let'a so' Zorobabel; jeso' Zorobabel na'chi let'a so' Salatiel, jeso'me lec'óxot so' Neri; 28so' Neri na'chi let'a so' Melqui; so' Melqui na'chi let'a so' Adi; jeso' Adi na'chi let'a so' Cosam; so' Cosam na'chi let'a so' Elmodam, jeso'me lec'óxot so' Er; 29jeso' Er na'chi let'a so' Josué; so' Josué na'chi let'a so' Eliezer; so' Eliezer na'chi let'a so' Jorim, so'me lec'óxot so' Matat; 30so' Matat na'chi let'a so' Leví; so' Leví na'chi let'a so' Simeón; qataxa so' Simeón na'chi let'a so' Judá; so' Judá na'chi let'a so' José; so' José na'chi let'a so' Jonán, so'me lec'óxot so' Eliaquim; 31so' Eliaquim na'chi let'a so' Melea; so' Melea na'chi let'a so' Mainán; so' Mainán na'chi let'a so' Matata, so'me lec'óxot so' Natán; 32so' Natán na'chi let'a so' David; so' David na'chi let'a so' Isaí; so' Isaí na'chi let'a so' Obed; so' Obed na'chi let'a so' Booz; so' Booz na'chi let'a so' Salmón, so'me lec'óxot so' Naasón; 33so' Naasón na'chi let'a so' Aminadab; so' Aminadab na'chi let'a so' Aram; so' Aram na'chi let'a so' Esrom; so' Esrom na'chi let'a so' Fares; so' Fares na'chi let'a so' Judá; 34so' Judá na'chi let'a so' Jacob; qataxa so' Jacob na'chi let'a so' Isaac; so' Isaac na'chi let'a so' Abraham; so' Abraham na'chi let'a so' Taré; so' Taré na'chi let'a so' Nacor; 35so' Nacor na'chi let'a so' Serug; so' Serug na'chi let'a so' Ragau; so' Ragau na'chi let'a so' Peleg; so' Peleg na'chi let'a so' Heber, so'me lec'óxot so' Sala; 36so' Sala na'chi let'a so' Cainán; so' Cainán na'chi let'a so' Arfacsad; so' Arfacsad na'chi let'a so' Sem; so' Sem na'chi let'a so' Noé, jeso'me lec'óxot so' Lamec; 37so' Lamec na'chi let'a so' Matusalén; so' Matusalén na'chi let'a so' Enoc; so' Enoc na'chi let'a so' Jared; so' Jared na'chi let'a so' Mahalaleel; so' Mahalaleel na'chi let'a so' Cainán; 38so' Cainán na'chi let'a so' Enós; so' Enós na'chi let'a so' Set; so' Set na'chi let'a so' Adán, jeso'me lec'óxot ñi' qan'étoqo't.
Currently Selected:
Lucas 3: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.