2 Kronikas 2
2
Salaman ba Tiro kingka Hiram ba wal lâ daukan
(1 Ki 5.1-18; 7.13-14)
1Salaman#Naha borska nani 4.1-23 na bors. wala 3.33—4.17 ra kli baku ulban sa, baku Hibru nani ulbanka baku sa. ba wilin takan tempel watla kum Dawan ra mâki yabaia, bara baku sin king watla kum. 2Bara baha dukiara upla nani 70,000 ridi daukan diara twatwilkra nani, bara 80,000 waitna nani walpa babaikra nani, bara 3,600 wark pura kakaira nani.
3Baha ningkara Salaman bui Hiram Tiro kingka ra ai bîla blikan wiaia: “Yang aisiki Debit wal aisi lâ daukram ba baku yang ra dauks. Man yalam dusa nani klaki witin ra blikram, king watla mâki bahara iwaia. 4Man kaiks, yang Dawan Gâdki tempelka mâkaisna, bahara witin ra mayunra yabaia, kîa yamni nani angki brit nani painka ra tibil ra kahbaia bara ai piua kat Dawan ra tingki wiaia, titan ra bara tutni ra, daiwanka aiska angkaia ris yua#Ris yua: baha sika ris yua ba. nani ra, kati raya bara yua wala nani ra sin wan Dawan ra mayuni kulkaia, Israel luhpia nani tilara dauki ba baku. 5Yang tempel watla mâkaisna ba tara kaia sa, kan wan Gâdka ba tara sa, gâd wala nani ba wal. 6Ban sakuna, ¿ya pali ba sip sa tempel watla kum mâkaia,#1 Ki 8.27; 2 Kr 6.18. kasbrika purara ai yahpika wal sip alki briras? ¿Bara yang na ya sna, tempel kum mâkaia ban kra kîa yamni angki kulkaia baman dukiara? 7Bamna ai blîks waitna kum sip sa kaka gul, silbar, bras bara ayan warkka daukaia; baku sin kwala balianta, pauni bara paura sasipra kaka, witinka sin sip kabia lilka sâtka nani paskaia, papaskra nani yang brisna ba wal, witin nani Juda bara Jerusalem ra ba, yang aisiki Debit bui wark yan nani ba. 8Líbano wina sin yang ra yalam tatka, saiprus dusa nani bara dus lalahni kîa painkira nani ai blîks. Kaikisni uplikam nani ba Líbano dusa nani ba klakaia lan sa. Bara yang upliki nani ba man uplikam nani ra hilp munbia, 9dus nani ailal ridi daukaia dukiara, kan tempel watla mâkaisna ba tara kaia sa, bara diara aihka painkira kabia. 10Sakuna man naha bîla kaiki bas plun blikaisna ba, dus tara nani klaki wark taki nani ba dakakaia: 4,400,000 batil plawar, barli mâ sin 4,400,000 batil, 440,000 batil wain, baha purara sin batana laya ba sim numbika.”
11Bara Hiram Tiro kingka ba pana wauhkataya kum ulbi, Salaman ra naku win: “Dawan ba ai uplika nani ra latwan kaikisa, bahamna man ra king mai mangkan, ai uplika Israel luhpia nani tilara.” 12Bara witin kau pura praki win: “¡Dawan ba yamni pali kabia, witinka Israel Gâdka ba, kasbrika pura bara tasba sin paskan ba, bara king Debit ra luhpa kum yan ba sins lâka tara bri ba, diara sut tânkira dadaukra ba bara witin Dawan tempelka ba mâkaisa baku sin king iwaia watla ba! 13Waitna kum diara paskaia lan ba mai blikisni, baku diara tânka sut pali bri ba: witin sika Hiram. 14Witin ba Dan kiamka wina mairin kum luhpia waitna, aisika ba Tiro wina, witin gul ni diara paskaia lan, bara sin silbar, bras, ayan bara walpa ni diara daukaia lan pali, baku sin dus wina diara sâtka nani paskaia sip sa, kwala mapla painkira balianta, linin, kwala pauni sipaia lan, baku sin lilka sâtka daukaia sip sa, bara natka sât sât utla mâkaia mapka daukaia sip sa. Witin bui uplikam wark tatakra nani ra dauki yabia, man aisikam Debit daukaia bri kata ba sut sin dauki yabia. 15Bamna nanara blîks, dawanki, dukiam dadaukra nani plawarka, barlika mâ, batana laya bara wain sin man baku wiram ba. 16Bara yang nani Líbano ra dus nani want sma ba klakamni, bara rap dauki kabu bâk bri balamni Jope kat. Ningkara man bui baha wina Jerusalem kat brih wama.”
17Bara Salaman upla tringsar nani Israel ra iwi kan ba sut kulki kaikan, pat ai aisa Debit kulki kaikan kata ba; baku bamna, tringsar nani ba 153,600 Israel ra bâra kan. 18Baha nani tila wina 70,000 ba diara twilkaia uplika nani sakan, 80,000 nani ba walpa klaklakra nani, bara 3,600 ba wark dauki nani ba pura kakaira nani.
Currently Selected:
2 Kronikas 2: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua