1 Korint 1
1
Lakula bîla
1Yang Pal, Gâd kupia lâka mita Jisas Kraist apastilka kaia ai paiwan sa. Yang bara wan muihni Sóstenes ba wal, 2Korint tawanka ra wan muihni nani, Gâd sertska uplika nani ba ra ulbisna,#Ap St 18.1. witinka nani Kraist Jisas wal asla ba mita Gâd uplika holi takan ba. Gâd bui man nani ba holikira nani kaia mai paiwan sa, ani anira wan Dawan Jisas Kraist nina mâki, witin ra wini uplika nani ba aikuki, witinka lika baha nani Dawanka bara yawan Dawanka sin ba. 3Gâd wan Aisa bara Dawan Jisas Kraist mita sin, man nani ra yamnika nani bara kupia kumi lâka sin maikbia.
Yamnika nani Kraist wina aula ba
4Piu bani man nani dukiamra Gâd ra tingki wisna, Kraist Jisas bâk man nani ra, witin ai kupia yamni lâka maikan ba. 5Kan man nani lika Jisas wal asla sma ba mita, Gâd mita diara sut mapa ra yuyakira nani mai daukan sa, bîla nani aisisma ba mapa ra bara diara tânka nani kakaira sma ba mapa ra sin. 6Baku bamna, Kraist dahra aisin kata ba, man nani mampa ra kasak aihwa takan sa. 7Baku mika, man nani ba wan Dawan Jisas Kraist latan bal takaia yua nani ba bîla kaikisma ba ra, Gâd mita yabi dukia nani ba luha apia sma. 8Gâd, witin bui man nani ra tnata kat ban bapi bûi kaia mai bri kabia, bara baku mika wan Dawan Jisas Kraist balbia ba ra, upla kumi sin man nani wina pât kumi sin sâkbia apia. 9Gâd lika ai pramiska nani dauki ba kat kasak sa, bara witin sika man nani ra mai paiwan ba, ai Luhpia Jisas Kraist wan Dawan ba wal aikuki asla iwaia.
Serts ra tar baiwan lâka nani ba
10Muihki nani, wan Dawan Jisas Kraist nina ra man nani ra makabisni: diara nani aisisma ba mapa ra aikuki kupia kumi asla taks, bara baku mika, man nani tilamra dakwi takan lâka nani âpu kabia; sut aikuki asla pali banhwi bas, kupiam lukanka kumi brih, bara dîa daukaia lukisma ba mapa ra sin kumi kaia. 11Muihki nani, naha na mai wisna, Cloe watla uplika nani mita man nani tilamra unsaban nani bâra sa ai win ba mita. 12Tânka mai wisna ba lika, man nani kumi bani diara aihka aisisma; kum kum bila wisa: “Yang lika Pal uplika sna”; wala bila: “Yang lika Apolos uplika”;#Ap St 18.24. wala bila: “Yang lika Pita uplika”; bara wala bila: “Yang lika Kraist uplika sna.” 13¿Sakuna Kraist ba tar baikan sa ki? ¿Pal ba man nani tâmwan dus prihni ra saban kata ki? ¿Man nani ba Pal nina ra tahbi mai daukan kata ki? 14Yang bui Gâd ra tingki wisna, man nani wina kumi ra sin tahbi mai daukras kapri ba mita, Crispo#Ap St 18.8. bara Gayo#Ap St 19.29; Ro 16.23. wal baman lika. 15Baku bamna, upla kumi sin sip aisabia apia, witin ba yang nini ra tahbi daukan. 16Estéfanas watla uplika nani sin yang bui tahbi daukatna;#2 Ko 16.15. sakuna ani wala tahbi daukri sapa lika, yang sip kupi krawras sa. 17Kraist upla tahbi daukaia ai blikras. Witin ai blikan ba lika, sturi yamni ba aisi smalkamna dukiara, sakuna sinskira nani bîla nani aisi ba baku lika apia, kan baku daukamna kaka, Kraist dus prihni ra pruan karnika ba tânka âpu baku kabia.
Kraist, Gâd karnika bara sinska lâka ba sin
18Kraist dus prihni ra pruan sturka ba lika, tanis tiwi nani ba mapa ra sins âpu tânka baku sa; sakuna yawan swaki sakan lâka mata auya na wan mapa ra lika, bîla na Gâd karnika sa.#Ro 1.16. 19Kan Ulbanka ra wisa:
“Sinskira nani sinska lâka ba yang bui sauhki tikamna,
bara tânka kakaira nani tânka lâka ba tnaya ra laki swimna.”#Ais 29.14.
20Baku bamna, ¿anira sa sins lâka kakaira ba, bara smasmalkra ba,#Job 12.17; Ais 19.12; 33.18. bara baha nani naha tasba dukia nani ra blahwi aisaia lan ba? ¡Gâd mita bahki lakan sa naha tasba sinska lâka ba!#Ais 44.25. 21Gâd ba ai sinska lâka mita, tasba uplika nani ai sinska lâka ni witin ra kakaira taki banhbia ba want apia kan. Sakuna, Gâd yamni lukan, ai bîla ba ni kasak luki nani ba swaki sakaia, bîla na upla wala nani mapa ra sins âpu tânka baku kabia sakuna.
22Ju nani ba sain diara aihka tara nani kaikan daukisa, Grik nani lika sins lâka plikisa; 23sakuna yang nani lika Kraist dus prihni ra pruan sturka ba aisi smalkisna. Sturka yamni na, Ju nani mapa ra swira dukia sa, bara Ju apia nani ba lika sins âpu dukia baku kulki banhwisa; 24sakuna Gâd paiwan uplika nani ba lika, Ju nani apia kaka, Grik nani kabia kaka, Misaya ba Gâd karnika bara sinska lâka sika. 25Bamna, upla nani mita, Gâd sins âpu lâka baku kulki dukia ba, baha lika upla sinska lâka purkara kau sins lâka kakaira ba uplika dukia sa; bara Gâd swapnika baku ba lika, upla karnika purkara kau karnika brisa. 26Muihki nani, nanara damra walisma, man nani ba Gâd mai paiwan bara dîa banhwi kapram ba. Tasba tânka mapa ra man nani wina kum kum baman sinskira kapram, bara tila nani baman sin karnika bri upla tara taika nani wiria man katma. 27Tasba uplika nani sins lâka kakaira baku kulki uplika nani ba, Gâd mita bâk sakan sa, sins lâka kakaira nani ba swira daukaia wisi; bara tasba uplika nani mita swapnikira baku kulki nani ba, witin mita bâk sakan sa, karnakira nani swira daukaia dukiara. 28Tasba uplika nani mita mâyara kulki nani bara bahki kulki nani ba sin, Gâd mita bâk sakan sa; tânka ba lika, diara apia nani ba, tara nani ba sauhki tikaia dukiara. 29Baha tânka ba lika wisa, upla kumi sin Gâd mawanra aimayunaia sip apia sa. 30Sakuna Gâd pali mita man nani ba Kraist Jisas wal asla mai prakan sa, bara baku sin daukan Kraist ba wan sinska lâka kabia, yawan na pâtkas wan kulkan kabia, sunu kaia bara swak takan lâka sin bri kaia. 31Baku bamna, Ulbanka ra wi ba baku: “Ani uplika aimayunan daukisa kaka, Dawan mita daukan ba dukiara aimayunaia sa.”#Jir 9.23-24.
Currently Selected:
1 Korint 1: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua