Yahya 2
2
Tanda ajaib mula ade yaboat ling Isa
1Dua ano kasuda nan ada pangantan pang kota Kana, pang wilaya Galilea, ke inaʼ Isa ada pang nan. 2Isa ke tau-tau turit Diri yaundang si ampo ko pangantan nan. 3Muntu aiʼ anggur kamo boe, inaʼ Isa beling lako Diri, "Taunan kamo boe aiʼ anggur."
4Beling Isa lako inaʼ, "Inaʼ, kakuda bua sia bada luk nan lako Kaji? Nopoka dapat waya Kaji."
5Beling inaʼ Isa lako pelayan-pelayan, "Boat mo apa bae ade yasuru ling Nya lako nene."
6Pang nan ada enam kodeng patinang ade ka yapina kalis batu. Patinang nan yasadia umin tau sabersi diri mara adat tau Yahudi.#2:6 sabersi diri mara adat tau Yahudi: Aiʼ nan yakenang ling tau Yahudi kusus umin sabersi diri mara adat istiadat taunan, ke siong umin sabersi bae mara tubiso diritu ke sabung. Adat ta nongka yatulis pang dalam peraturan hukum Taurat. Saruntung patinang bauʼ yaisi ke aiʼ balu pulu jangka saratis dua pulu liter. 7Beling Isa lako pelayan-pelayan nan, "Isi mo patinang ta ke aiʼ." Teris taunan yaisi mo patinang-patinang nan ke aiʼ jangka lempo. 8Karing beling Isa lako taunan, "To ta sedok mo sakedi ke bawa mo lako tau baeng jampang boat pangantan nan." Teris taunan yabawa mo aiʼ nan. 9Muntu tau baeng jampang nan yarasa aiʼ ade kamo dadi aiʼ anggur nan, nya yakelek pangantan salaki. Nya nongka yato me ka kalis aiʼ anggur nan, konang pelayan-pelayan nan yato luk nan. 10Teris nya beling lako pangantan salaki nan, "Kamiasa tau-tau, sakatu tau ke aiʼ anggur ade lebe balong dunung, ke lamin kamo sarea tau puas inum, nan po yabeang ade biasa. Konang sia jangka to ta masi sadia aiʼ anggur ade paling balong."
11Luk nan tanda ajaib mula ade yaboat ling Isa, ke yaboat pang kota Kana, pang wilaya Galilea. Ola luk nan Diri sanyata kamulia Diri, ke tau-tau turit Diri dadi nyadu lako Diri.
12Kasuda nan Isa lalo ko kota Kapernaum barema-rema ke inaʼ Diri, sanak sawai salaki Diri ke tau-tau turit Diri. Teris taunan tedu pang ana sale pida-pida ano bae.
Isa yasua tau-tau ade badagang ke tukar pipis kalis Balaʼ Alatala
13Muntu ya roa mo dapat waya Hari Raya Ano Saliwat#2:13 Ano Saliwat yanansi hari raya tau Israil umin yatotang muntu Alatala yabawa lis tau Israil kalis Tana Mesir, pang taunan yasanadi ulin. Pang waya nan Alatala yasamate sarea anak salaki manusia ade paling rea, ke sarea anak salaki binatang ade mula pang Tana Mesir. Konang Alatala yasaliwat bale-bale tau Israil, apaling ada tanda geti doma ade ka yaera pang bao boa lawang taunan. tau Yahudi, Isa lalo ko kota Yerusalem. 14Pang siding Balaʼ Alatala yadapat ling Diri tau-tau ade muntu jual sampi, doma ke pio darapati,#2:14 jual sampi, doma ke pio darapati: Tau ade datang ko Bala Alatala beli binatang nan dadi pameang ade yasamele umin Alatala. ke tau-tau ade muntu tokal tukar pipis.#2:14 tukar pipis: Tau tukar pipis ada pang nan umin tukar pipis Romawi ke pipis Yahudi ade yakenang kusus bayar pajak umin Bala' Alatala. Apaling pipis Romawi ade ada gambar raja atawa gambar-gambar ade lin, yapelang kenang bayar pajak umin Bala' Alatala. 15Teris Diri pina cambuk kalis tali ke yasua sarea taunan kalis Balaʼ Alatala nan, barema-rema ke sarea doma ke sampi taunan. Diri ampo yasawir sarea pipis tau-tau ade tukar pipis nan, ke yasalangkap mejang-mejang taunan. 16Karing beling Diri lako tau-tau ade jual pio darapati nan, "Bawa lalo sarea deta, naʼ nene pina Balaʼ Bapak-Ku dadi amat." 17Waya nan si tau-tau turit Isa yatotang pang dalam Kitab Suci ada ayat ade beling ta seda, "O Alatala, Kaji sayang Balaʼ Sia, ke panyayang nan mara amir api ade saboe ate Kaji."#2:17 Yaete kalis Zabur 69:9.
18Ling kalangan rea Isa yasua tau-tau badagang nan, pemimpin-pemimpin tau Yahudi yatentang Isa, ta seda, "Tanda ajaib apa ade bauʼ Muboat umin Musangita lako kami luk ada hak-Mu sua taunan kalis ta?"
19Nyamung Isa lako taunan, "Sareba mo Balaʼ Alatala ta, ke ya Kaji samanang kabali pang dalam telu ano."
20Teris beling pemimpin-pemimpin tau Yahudi nan, "Empat pulu enam tin le Balaʼ Alatala yasamanang. Ba me luk ya Musamanang dalam telu ano?" 21Konang Balaʼ Alatala ade yamaksud ling Isa nan yanansi parana Diri. 22Beru kasuda Isa telas kabali kalis kamate, nan po tau-tau turit Diri totang luk Diri ka kadu beling nan luk. Teris taunan nyadu lako Kitab Suci ke apa ade yasanapat ling Isa.
Isa yato isi ate sarea tau
23Muntu Isa ada pang Yerusalem sale Hari Raya Ano Saliwat, peno tau nyadu lako Diri apaling taunan kamo yagita sarea tanda ajaib ade ka yasangada ling Diri. 24Konang Isa no bauʼ sadu diri lako taunan apaling Diri to benar sai taunan. 25Ke Diri no si perlu yabada ling sai-sai luk manusia, apaling Diri yato isi ate sarea tau.
Currently Selected:
Yahya 2: SMW
Highlight
Share
Copy
Want to have your highlights saved across all your devices? Sign up or sign in
©️2025 The Seed Company