Yahya 1
1
Firman ade kamo dadi manusia
1Pang waya ade mula, sanopoka dunia yasanadi, Diri ade yasepan Firman kamo ada. Firman nan ada barema-rema ke Alatala, ke Firman nan yanansi Alatala. 2Pang waya ade mula nan, Firman nan barema-rema ke Alatala.
3Sarea luk yasanadi ola Diri ade yasepan Firman nan, ke kalis sarea ade ada, nonda sanompo luk ade nongka yasanadi ola Diri. 4Diri nan asal katelas, ke Diri mo ade beang mengas lako manusia. 5Mengas nan selis caya pang dalam ungkap, ke ungkap nan no bauʼ sapeda mengas nan.
6Ada sopo tau ade ka yautus ling Alatala basingin Yahya. 7Nya datang dadi saksi umin sajelas sai mengas nan, mabau ola nya, sarea tau nyadu lako Diri, yanansi mengas nan. 8Nabi Yahya nan siong si mengas nan, konang nya yautus umin sarungan luk mengas nan. 9Mengas ade tutu-tutu nan kamo datang ko dalam dunia, yanansi Diri ade yasepan Firman nan ade samengas sarea manusia.
10Diri ada pang dalam dunia, konang manaling dunia yasanadi ola Diri, dunia no to rua Diri. 11Diri datang ko negeri Diri, konang nongka yatarima ling bangsa Diri. 12Konang sarea tau ade tarima Diri, yanansi tau-tau ade nyadu lako Diri, yabeang hak ling Diri umin dadi anak-anak Alatala. 13Taunan dadi anak-anak Alatala siong kewa cara paranak biasa, atawa siong ling karoa manusia, ke siong ling karoa tau salaki, konang Alatala mo ade pina taunan dadi anak-anak Diri.
14Diri ade yasepan Firman nan kamo dadi manusia, ke tedu pang tenga-tenga kita. Ke kamo tugita kamulia Diri ade ka yatarima ling Diri, apaling Diri Anak mesa ade datang kalis Bapak. Diri sangita kabalong Alatala ade yabeang kewa ora-ora ke sarea ade benar luk Alatala.
15Nabi Yahya yasarungan luk sai Diri ade yasepan Firman nan, ke beling kewa seda ade keras, "Ta nya tau ade ka kadu kusanapat muntu kubeling, 'Diri ade ya datang kasuda aku, lebe tingi kawasa kalis aku, apaling Diri kamo ada sanopoka aku.'" 16Kalangan rea kabalong Diri ade teris-teris yabeang kewa ora-ora, kita sarea kamo tutarima berka ade no boe-boe. 17Kitab Suci Taurat yabeang ola Nabi Musa, konang kabalong Alatala ade yabeang kewa ora-ora, ke apa ade benar luk Alatala yasanyata ola Isa Al Masih. 18Nonda sanompo tau ade ka kadu gita Alatala, konang Anak ade sopo-sopo nan ade ada teris-teris barema ke Bapak, Diri mo ade sanyata lako kita sai Alatala nan.
Nabi Yahya yasanapat luk sai diri
19Pemimpin-pemimpin Yahudi kalis Yerusalem yautus pida-pida imam ke tau-tau Lewi#1:19 tau-tau Lewi yanansi tau kalis suku Lewi, sala sopo suku kalis bangsa Israil. Tau Lewi enti boat tulung imam sangada ibada pang Balaʼ Alatala pang kota Yerusalem. lako Nabi Yahya umin bakatoan lako diri, "Sai kau sabenar?"
Deta ade yasanapat ling Nabi Yahya. 20Diri yaakuʼ kewa ruris rora, ta ling, "Aku siong Raja Basalamat Ade Yajangiʼ Ling Alatala."
21Teris taunan bakatoan lako diri, "Lamin nan luk sai kau? Kau Nabi Ilyas#1:21 Nabi Ilyas: Peno tau Yahudi nyadu luk Nabi Ilyas ya datang kabali umin sasiap manusia umin kanatang Raja Basalamat Ade Yajangiʼ Ling Alatala. Baca mo Maleakhi 4:5. ke?"
Nyamung diri, "Siong!"
"Kau ke nabi ade tuarap#1:21 nabi ade tuarap: Alatala ka sanapat ola Nabi Musa luk pang ano mudi Alatala yaangkat sopo nabi kalis tenga-tenga tau Israil, mara Alatala kamo yaangkat Nabi Musa diri, ke sarea tau mesti yamenong nabi nan (Kitab Ulangan 18:15-19). Pang saman Nabi Yahya tau-tau Yahudi masi yaarap kanatang nabi nan. nan?"
Nyamung diri, "Siong!"
22Teris taunan beling lako diri, "Dadi sai kau? Kami mesti tusamada lako tau ade kabaeng utus kami. Dadi sai sabenar kau?"
23Nyamung diri, "Aku ta mo tau ade ka yasepan ling Nabi Yesaya dunung, muntu diri beling ada tau ade beling kewa seda ade keras pang padang gurun, 'Saruris mo ola tawa Alatala!'"#1:23 Ayat ta ka yaete kalis Kitab Nabi Yesaya 40:3.
24Kalis tau-tau ade ka yautus nan ada pida-pida tau Farisi.#1:24 tau Farisi yanansi tau-tau kalis sopo golongan agama tau Yahudi ade rea pengaruh. Tau-tau Farisi keras taat lako hukum-hukum agama kalis Kitab Suci Taurat ade ka yatulis ling Nabi Musa, ke lako adat istiadat balo tolo ke peraturan-peraturan ade ka yatamba lako hukum-hukum Nabi Musa nan. 25Taunan bakatoan lako Nabi Yahya, "Lamin kau siong si Raja Basalamat, siong Nabi Ilyas, ke siong si Nabi ade tuarap nan, kakuda bua mupaning tau dadi tanda tobat?"
26Nyamung Nabi Yahya lako taunan, "Aku kupaning tau ke aiʼ, konang pang tenga-tenga nene ada manang Diri ade no nene to rua, 27yanansi Diri, ade datang kasuda aku. Kubuka tali sendal bae no kupantas."
28Sarea luk nan dadi pang desa Baitani pang ola ano siup Berang Yordan, pang Yahya paning tau dadi tanda tobat.
Nabi Yahya sanapat luk Isa Anak Doma Alatala
29Marang nawar Nabi Yahya gita Isa datang tata pang diri, ke beling Nabi Yahya, "Gita! Nan nya Diri, Anak Doma Alatala#1:29 Anak Doma Alatala yanansi anak doma ade yasadia ling Alatala umin yasamele mabau dosa manusia yaampin. ade baeng sangilang dosa dunia ta. 30Diri nan ade ka kusepan muntu kubeling, 'Kasuda aku ya datang sopo tau ade lebe tingi kawasa kalis aku, apaling Diri kamo ada sanopoka aku.' 31Sanopoka ta, aku diri nongka to luk Diri nan Raja Basalamat Ade Yajangiʼ Ling Alatala, konang kudatang paning tau ke aiʼ dadi tanda tobat mabau Diri yasanyata lako tau Israil."
32Teris Nabi Yahya sanapat luk apa ade kamo yagita ling diri diri lako tau-tau ade ada pang nan, ta ling, "Kamo kugita Ruh Alatala#1:32 Ruh Alatala: Mara ling Kitab Suci, Alatala ada Ruh, dadi Ruh Alatala nan yanansi Alatala diri, siong ruh ade lin atawa ruh ade yautus ling Alatala. Ruh Alatala nan balong apaling Alatala balong. turin kalis bao awan mara pio darapati, ke Ruh nan tedu pang bao Diri. 33Ke sanopoka luk nan dadi, aku diri nongka kuto luk Diri nan Raja Basalamat Ade Yajangiʼ Ling Alatala. Konang Alatala ade ka utus aku umin paning tau ke aiʼ dadi tanda tobat, kamo bafirman lako aku, 'Lamin mugita Ruh-Ku turin ko bao sopo tau ke tedu pang Diri, Diri mo ade ya paning tau ke Ruh-Ku.'" 34Karing beling Nabi Yahya ampo, "Kamo kugita Diri ke kusanyata luk Diri mo Anak kalis Alatala."
Tau-tau turit Isa ade mula
35Marang nawar, Nabi Yahya ada pang nan kabali barema ke dua tau-tau turit diri. 36Muntu Nabi Yahya gita Isa liwat, diri beling, "Gita mo Anak Doma Alatala!" 37Muntu yamenong Nabi Yahya beling nan luk ling sadua tau turit diri, lalo mo sadua taunan turit bungkak Isa.
38Isa mengo ko bungkak teris yagita taunan muntu turit Diri. Karing bakatoan Diri lako taunan, "Apa ade nene buya?"
Taunan nyamung, "Rabi, me pang Sia tedu?" (Rabi nan bategas Guru.)
39Beling Diri lako taunan, "Ma mo ke gita mo." Teris sadua taunan lalo ke yagita katokal pang Diri tedu. Waya nan kira-kira jam empat rawi. Pang ano nan taunan tedu basaiʼ ke Diri.
40Sala sopo kalis sadua tau ade ka menong pangkeling Nabi Yahya ke teris turit Isa yanansi Andreas, sanak salaki Simon Petrus. 41Kewa lema-lema Andreas lalo buya Simon, sanak salaki nya, ke beling, "Kamo kami temung Mesias!" (Tegas Mesias yanansi Raja Basalamat Ade Yajangiʼ Ling Alatala. Lamin dalam basa Yunani 'Al Masih'). 42Karing Andreas yabawa mo Simon lako Isa.
Isa yapaniat Simon ke beling, "Singin kau Simon, bapakmu basingin Yahya. Mudi kau yasasingin Kefas ling tau-tau." (Tegas singin Kefas sama tegas ke singin Petrus yanansi batu).
43Marang nawar, Isa saputis umin lalo ko wilaya Galilea. Diri lalo batemung ke Filipus ke beling lako nya, "Turit mo Aku!" 44Filipus tau kota Baitsaida, sama kota ke Andreas ke Petrus.
45Karing Filipus lalo batemung ke Natanael ke beling lako nya, "Kamo kami batemung ke tau ade ka yasanapat ling Nabi Musa pang dalam Kitab Suci Taurat#1:45 tau ade ka yasanapat ling Nabi Musa pang dalam Kitab Suci Taurat yanansi Raja Basalamat Ade Yajangiʼ Ling Alatala., ke ling nabi-nabi. Diri yanansi Isa kalis desa Nazaret anak Yusuf."
46Teris bakatoan mo Natanael lako nya, "Ba bauʼ ke luk ade balong datang kalis desa Nazaret?"#1:46 Nazaret yaanggap desa ade nongka penting.
Beling Filipus lako nya, "Ma mo ke gita mo."
47Muntu Isa yagita Natanael datang lako Diri, beling mo Isa luk nya, "Ingo mo, nya nan tau Israil ade tutu-tutu pantas tukelek tau Israil, nya tau nongka bola celo!"
48Beling Natanael lako Isa, "Guru, ba meluk bua bauʼ Sia to kaji?"
Beling Isa lako nya, "Sanopoka Filipus kelek kau, kamo Kugitamu pang anok puin ara."
49Beling kabali Natanael lako Diri, "Iye Guru, Sia nan Anak kalis Alatala, Sia nan Raja Israil."
50Nyamung Isa lako nya, "Munyadu ling ka Kubeling luk ka Kugitamu pang anok puin ara. Ya mugita luk-luk ade lebe rea kalis luk nan." 51Isa beling ampo lako nya, "Tutu-tutu si Kubeling lako kau, ya mugita awan kabuka ke malaikat-malaikat Alatala entek turin ko angkang Anak Manusia."#1:51 Anak Manusia yanansi gelar umin Raja Basalamat Ade Yajangiʼ Ling Alatala, ke gelar ta yakenang ling Isa dadi panyepan diri. Gelar ta mula-mula yakenang pang dalam kitab Daniel 7:13-14 ke yasanapat luk Raja Basalamat ade ya datang mudi.
Currently Selected:
Yahya 1: SMW
Highlight
Share
Copy
Want to have your highlights saved across all your devices? Sign up or sign in
©️2025 The Seed Company