Matay 22
22
na paruwalruwan kana semasaharan
(Luka 14.15-24)
1i Yēsu masalr ziya paruwalru marengay kanazu: 2<<na kanatal i itras kamawan za sasa a yawan penadang semasaharan pakaetim kanantu alrak na ma'inayan. 3pakarun i intaw kana pakarunan mukuwa hemelrahelra pazuwa kana dinaulr ziyan na lavang kurelranga kana pakaetim semasaharan, mawmu 'azi muwai zuwa nazu. 4i intaw masasalr ziya pauwa za zuma na pakarunan, patalru kanazu marengay kana lavang: <nanku aekanen na pakaetim mu inayar lra, na ukang zi na semameveran na vinaaw mu trinuwak lra, pinadang lra peniya, 'alrazi alamu kana semasaharan.> 5mawmu, nazu na dinadaulr na lavang 'azi melali'i, mavangavang kurisaesa: na sasa mu mukuwa i 'uma, na sasa mu mukuwa mena'uwa kanantu tiyam, 6na zuma mu 'emevang kanazu na pakarunan, kemelreveng tremapi'i, pinatray kanazu lra. 7ka'ilremesan na yawan, zi pakarun kana hitay mukuwa tremepuwa kanazu na malalemuwan, venatri' kanantu kazekalran nazu. 8zi marengay kana pakarunan: <nanku aekanan kana semasaharan mu inayar lra, mawmu na dinaulr a pakangawayan na trau mu 'azi kirepa'uwa kipalrang pa'inava. 9harem uwa i inmu kana ma'izang na daladalan, arelrayu mapapiya na niretrevungan na trau pazuwa kana semasaharan.> 10kemazu zi na pakarunan mukuwa i dadalan, na nina'uwan na trau mu, na 'inava lra na kuwatreng lra mu arelrayaw mapiya, patemuyay pakayan na lavang kana semasaharan.
11<<na yawan a mupatraran kiyatrevung kana lavang mu, mena'u za sasa a trau 'azi mikavang kana kavang nu semasaharan, 12zi kiyumalr kantaw: <ali, zuwa u i kani kemuda zi 'azi u mikavang kana kakavang nu semasaharan ziyamaw?> izu na trau 'azi temuvang za sayasaya. 13zi na yawan patalru kana pakarunan: <dadikusu nantu lima zi na kuy, 'atelran i patraran kana 'aremengan. kazu i kazu, tratrangis i intaw, pakakaratr za walri.> >> 14talikuzakuzan, marengay i Yēsu: <<na kidaulr pazuwa na trau mu kazuwan, mawmu na mupalimi' na trau mu kaytayan!>>
na kiyaumalran kana puwasatayan kani Hongti i Roma
(Maruko 12.13-17; Luka 20.19-26)
15mupatraran na Palisay na trau, mazayazayar za kuwadakudayan miya' za ngangay kemay kanantu ngay ni Yēsu zuwa pakakuwatrenga kantaw. 16pakarun kanantu temakesi nazu, mararelrang kanantu sevang ni Hērodē mukuwa kirepana'uwa kani Yēsu, kiyumalr kantaw: <<sinsi, malrazam mi za maw u a penatezelr na trau; nu kemuda lra mianger na trau mu, kemazu u marayas penatezelr panadam kana trau kanantu vati na Viruwa i itras, 'alrana 'azi u menana'u za pinimudingan. 17'alrazi rengayaw mi kanannu kiniyaanger: 'alrazi rengayaw mi, pusata veray kani Kaysa na Hongti i Roma mu veneliyas kananta kuret aulranay?>>
18i Yēsu malrazam kanantu piniangeran na kuwatreng, zi marengay: <<na kitu'inavanava na trau a, kemuda zi maranger kemuwatreng kaninku? 19elak za saya kana puwasata na ginpiya veray pana'u kaninku a!>>
veray kantaw za saya a ginpiya nazu. 20kiyumalr i Yēsu kanazu: <<ini na sasing i itras zi na ngadan mu ni eman?>>
21temuvang nazu: <<maw na Hongti i Roma.>>
kemazu zi marengay i Yēsu kanazu: <<nu kemazu mu, tu eman na Hongti i Roma mu verayan kana Hongti i Roma, tu eman na Viruwa i itras mu verayan kana Viruwa i itras.>>
22a kinger nazu kanini na ngay mu, pasalaw maherareher, zi muwaday kantaw muveruk lra.
na kiyaumalran kana marevaaw
(Maruko 12.18-27; Luka 20.27-40)
23maresan kanizu na wari, ulra a 'azi pakutatena' kana marevaaw na lremak na Satukay na trau zuwa kirepana'uwa kani Yēsu, kiyumalr kantaw: 24<<sinsi, panadam i Mosē kaniyam, nu minatray lra a trau, iniyan za alrak, i waditaw na ma'inayan 'azika'azi mi'azin kani kuravaktaw na inavangulr, venulas kani vautaw tremungulr mialrak. 25a aziyu ziyan, kaniyam i kani ulra maruwadiyadi a papitu, na marama'izang mu mi'azin lra, minatray lra, iniyan za alrak, muvilin na inavangulr putu 'azin kani waditaw; 26na pukazuwa, na pukatelu maw kemani, palru kana pukapitu, mararesan kemani. 27talikuzakuzan mu, izu na vavayan mu minatray lra. 28'alrazi kiyumalra ku ziya, anu maw kemani mipini'azinan mapiya kantaw nazu, kazu kana karevavaawan na wari, ni eman 'azin lra i intaw?>>
29temuvang i Yēsu kanazu: <<pamelri mu lra! 'azi mu patulre'ay malrazam kana Sēsiyo, zi 'azi malrazam kanantu kezang na Viruwa i itras. 30nu marevaaw na minatray na trau mu, mararesan kana tēnsi i itras nazu, 'azi mi'a'azin 'azi musavak. 31na kireeman kana minatray na trau za marevaaw na lremak mu, 'azi mu ziya miip kana Viruwa i itras tu pakalrazam kanmu na ngay ziyamaw? 32marengay na Viruwa i itras: <maw ku na Viruwa i itras ni Aburaham, na Viruwa i itras ni Isak, na Viruwa i itras ni Yakob.> ini na pauwayan mu maw marengay, na Viruwa i itras maw tu Viruwa i itras na vaaw na trau, amelri tu Viruwa i itras kana minatray na trau.>>
33kinger na zinekalranan kana kemani na panadam mu, salaw mare'alav mapiya.
na marama'iza'izang na kuret
(Maruko 12.28-31; Luka 10.25-28)
34na Palisay na trau kinger kani Yēsu penetut kanantu udung na Satukay na trau, zi mi kasa muwazuwazuk. 35i savakan kanazu a sasa sinsi kana kuret marenger melak za saya kiyaumalran pakakuwatreng kani Yēsu. 36kiyumalr i intaw: <<sinsi, kanantu kuret ni Mosē i savakan, maw na iyaiyan na marapazangazangal na kuret?>>
37marengay i Yēsu: << <peniya nu anger, peniya nu ikalraman, peniya nu nirangeran sahar kani Luzu -- nannu Viruwa i itras.> 38ini mu maw na pukaisa, a maw na marapazangazangal na kuret. 39na pukazuwa mu mararesan pazangal: <kalramanu na 'udar, kamawan za lraman u kannu i inu.> 40tu kuret ni Mosē peniya zi tu ipanadam na patralritralri mu maw initurus kanini na zuzuwaya na kuret.>>
na kireeman kani Kiristo na kiyaumalran
(Maruko 12.35-37; Luka 20.41-44)
41a kazu muwazuk na Palisay na trau mu, kiyumalr i Yēsu kanazu: 42<<kemudakuda nanmu iyana'u kani Kiristo? ni eman temuwan i intaw?>>
temuvang nazu: <<intaw maw temuwan ni Davidē.>>
43marengay i Yēsu: <<nu kemazu mu, kemuda zi na Vangesar Lu'em puanger kani Davidē zi venina kantaw <Luzu> kema awa? marengay i Davidē:
44i Luzu marengay kananku Luzu:
kayan kaninku i tarawalran i inu,
ngangara kaninku za puilusaw nannu 'alra kanannu kuy i makalusu.
45nu <Luzu> kema i Davidē kantaw, i Kiristo kemuda zi maw nintaw temuwan ni Davidē ziyamaw?>>
46iniyan za trau maruwa marengay saya za ngay temuvang kanantu kiyaumalran ni Yēsu. kemay kanizu na wari, iniyan lra za trau malemu masasalr pupana kana kakuwalengan na kiyaumalran kantaw.
Currently Selected:
Matay 22: TPN
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2023
Matay 22
22
na paruwalruwan kana semasaharan
(Luka 14.15-24)
1i Yēsu masalr ziya paruwalru marengay kanazu: 2<<na kanatal i itras kamawan za sasa a yawan penadang semasaharan pakaetim kanantu alrak na ma'inayan. 3pakarun i intaw kana pakarunan mukuwa hemelrahelra pazuwa kana dinaulr ziyan na lavang kurelranga kana pakaetim semasaharan, mawmu 'azi muwai zuwa nazu. 4i intaw masasalr ziya pauwa za zuma na pakarunan, patalru kanazu marengay kana lavang: <nanku aekanen na pakaetim mu inayar lra, na ukang zi na semameveran na vinaaw mu trinuwak lra, pinadang lra peniya, 'alrazi alamu kana semasaharan.> 5mawmu, nazu na dinadaulr na lavang 'azi melali'i, mavangavang kurisaesa: na sasa mu mukuwa i 'uma, na sasa mu mukuwa mena'uwa kanantu tiyam, 6na zuma mu 'emevang kanazu na pakarunan, kemelreveng tremapi'i, pinatray kanazu lra. 7ka'ilremesan na yawan, zi pakarun kana hitay mukuwa tremepuwa kanazu na malalemuwan, venatri' kanantu kazekalran nazu. 8zi marengay kana pakarunan: <nanku aekanan kana semasaharan mu inayar lra, mawmu na dinaulr a pakangawayan na trau mu 'azi kirepa'uwa kipalrang pa'inava. 9harem uwa i inmu kana ma'izang na daladalan, arelrayu mapapiya na niretrevungan na trau pazuwa kana semasaharan.> 10kemazu zi na pakarunan mukuwa i dadalan, na nina'uwan na trau mu, na 'inava lra na kuwatreng lra mu arelrayaw mapiya, patemuyay pakayan na lavang kana semasaharan.
11<<na yawan a mupatraran kiyatrevung kana lavang mu, mena'u za sasa a trau 'azi mikavang kana kavang nu semasaharan, 12zi kiyumalr kantaw: <ali, zuwa u i kani kemuda zi 'azi u mikavang kana kakavang nu semasaharan ziyamaw?> izu na trau 'azi temuvang za sayasaya. 13zi na yawan patalru kana pakarunan: <dadikusu nantu lima zi na kuy, 'atelran i patraran kana 'aremengan. kazu i kazu, tratrangis i intaw, pakakaratr za walri.> >> 14talikuzakuzan, marengay i Yēsu: <<na kidaulr pazuwa na trau mu kazuwan, mawmu na mupalimi' na trau mu kaytayan!>>
na kiyaumalran kana puwasatayan kani Hongti i Roma
(Maruko 12.13-17; Luka 20.19-26)
15mupatraran na Palisay na trau, mazayazayar za kuwadakudayan miya' za ngangay kemay kanantu ngay ni Yēsu zuwa pakakuwatrenga kantaw. 16pakarun kanantu temakesi nazu, mararelrang kanantu sevang ni Hērodē mukuwa kirepana'uwa kani Yēsu, kiyumalr kantaw: <<sinsi, malrazam mi za maw u a penatezelr na trau; nu kemuda lra mianger na trau mu, kemazu u marayas penatezelr panadam kana trau kanantu vati na Viruwa i itras, 'alrana 'azi u menana'u za pinimudingan. 17'alrazi rengayaw mi kanannu kiniyaanger: 'alrazi rengayaw mi, pusata veray kani Kaysa na Hongti i Roma mu veneliyas kananta kuret aulranay?>>
18i Yēsu malrazam kanantu piniangeran na kuwatreng, zi marengay: <<na kitu'inavanava na trau a, kemuda zi maranger kemuwatreng kaninku? 19elak za saya kana puwasata na ginpiya veray pana'u kaninku a!>>
veray kantaw za saya a ginpiya nazu. 20kiyumalr i Yēsu kanazu: <<ini na sasing i itras zi na ngadan mu ni eman?>>
21temuvang nazu: <<maw na Hongti i Roma.>>
kemazu zi marengay i Yēsu kanazu: <<nu kemazu mu, tu eman na Hongti i Roma mu verayan kana Hongti i Roma, tu eman na Viruwa i itras mu verayan kana Viruwa i itras.>>
22a kinger nazu kanini na ngay mu, pasalaw maherareher, zi muwaday kantaw muveruk lra.
na kiyaumalran kana marevaaw
(Maruko 12.18-27; Luka 20.27-40)
23maresan kanizu na wari, ulra a 'azi pakutatena' kana marevaaw na lremak na Satukay na trau zuwa kirepana'uwa kani Yēsu, kiyumalr kantaw: 24<<sinsi, panadam i Mosē kaniyam, nu minatray lra a trau, iniyan za alrak, i waditaw na ma'inayan 'azika'azi mi'azin kani kuravaktaw na inavangulr, venulas kani vautaw tremungulr mialrak. 25a aziyu ziyan, kaniyam i kani ulra maruwadiyadi a papitu, na marama'izang mu mi'azin lra, minatray lra, iniyan za alrak, muvilin na inavangulr putu 'azin kani waditaw; 26na pukazuwa, na pukatelu maw kemani, palru kana pukapitu, mararesan kemani. 27talikuzakuzan mu, izu na vavayan mu minatray lra. 28'alrazi kiyumalra ku ziya, anu maw kemani mipini'azinan mapiya kantaw nazu, kazu kana karevavaawan na wari, ni eman 'azin lra i intaw?>>
29temuvang i Yēsu kanazu: <<pamelri mu lra! 'azi mu patulre'ay malrazam kana Sēsiyo, zi 'azi malrazam kanantu kezang na Viruwa i itras. 30nu marevaaw na minatray na trau mu, mararesan kana tēnsi i itras nazu, 'azi mi'a'azin 'azi musavak. 31na kireeman kana minatray na trau za marevaaw na lremak mu, 'azi mu ziya miip kana Viruwa i itras tu pakalrazam kanmu na ngay ziyamaw? 32marengay na Viruwa i itras: <maw ku na Viruwa i itras ni Aburaham, na Viruwa i itras ni Isak, na Viruwa i itras ni Yakob.> ini na pauwayan mu maw marengay, na Viruwa i itras maw tu Viruwa i itras na vaaw na trau, amelri tu Viruwa i itras kana minatray na trau.>>
33kinger na zinekalranan kana kemani na panadam mu, salaw mare'alav mapiya.
na marama'iza'izang na kuret
(Maruko 12.28-31; Luka 10.25-28)
34na Palisay na trau kinger kani Yēsu penetut kanantu udung na Satukay na trau, zi mi kasa muwazuwazuk. 35i savakan kanazu a sasa sinsi kana kuret marenger melak za saya kiyaumalran pakakuwatreng kani Yēsu. 36kiyumalr i intaw: <<sinsi, kanantu kuret ni Mosē i savakan, maw na iyaiyan na marapazangazangal na kuret?>>
37marengay i Yēsu: << <peniya nu anger, peniya nu ikalraman, peniya nu nirangeran sahar kani Luzu -- nannu Viruwa i itras.> 38ini mu maw na pukaisa, a maw na marapazangazangal na kuret. 39na pukazuwa mu mararesan pazangal: <kalramanu na 'udar, kamawan za lraman u kannu i inu.> 40tu kuret ni Mosē peniya zi tu ipanadam na patralritralri mu maw initurus kanini na zuzuwaya na kuret.>>
na kireeman kani Kiristo na kiyaumalran
(Maruko 12.35-37; Luka 20.41-44)
41a kazu muwazuk na Palisay na trau mu, kiyumalr i Yēsu kanazu: 42<<kemudakuda nanmu iyana'u kani Kiristo? ni eman temuwan i intaw?>>
temuvang nazu: <<intaw maw temuwan ni Davidē.>>
43marengay i Yēsu: <<nu kemazu mu, kemuda zi na Vangesar Lu'em puanger kani Davidē zi venina kantaw <Luzu> kema awa? marengay i Davidē:
44i Luzu marengay kananku Luzu:
kayan kaninku i tarawalran i inu,
ngangara kaninku za puilusaw nannu 'alra kanannu kuy i makalusu.
45nu <Luzu> kema i Davidē kantaw, i Kiristo kemuda zi maw nintaw temuwan ni Davidē ziyamaw?>>
46iniyan za trau maruwa marengay saya za ngay temuvang kanantu kiyaumalran ni Yēsu. kemay kanizu na wari, iniyan lra za trau malemu masasalr pupana kana kakuwalengan na kiyaumalran kantaw.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2023