YouVersion Logo
Search Icon

Yohanē 17

17
i Yēsu kiyanun kana temakesi
1a piya marengay i Yēsu kananni na ngay, zi teme'ang piyaitras, marengay: <<Ama a, meredek lra na tuki, kiyamiya ku kannu pulihui nannu Alrak, maruwaya pulihu kannu nannu Alrak. 2nu tuluzanay lra na kezang kana demikes i punapunan kana trau, maruwaya i intaw veray za munayun na uwavaawan kanannu i patalru kantaw na trau. 3malrazam kannu maw a sasa tatena' na Viruwa, pawnung malrazam kanannu pinazuwa i Yēsu Kiristo, i ini mawna munayun na uwavaawan. 4pulihu ku lra kannu kani i dare'; piya ku lra kanannu i patalru kaninku na rilreng. 5Ama a, harem kiyami ku kannu kazu i ngawayan kannu pulihu kaninku, verayay ku kanizu na parevuwa' kani punapunan a pakangawayan i inku zi i innu ta inukasayan pa'inava na lihu mu!
6<<ku pakurena'uwaw u lra kanazu nannu pinalimi' i kani punapunan na ipatalru kaninku na trau. a maw ziya muravakan lra kannu nazu, nu verayanay kaninku nazu; zi miturus lra kanannu ngay nazu. 7harem, malrazam nazu mapiya, nannu iveray kaninku mu, maw kemay kannu mapiya. 8nannu iveray na vati kaninku mu ku verayanay lra kanazu, zi kituluz lra nazu. patulre'ay malrazam nazu za zuwa ku kemay kannu, kemazu pakutatena' za maw i inu na pazuwa kaninku lra.
9<<kiyanun ku kanazu; 'azi ku kiyanun kana trau i punapunan, a maw na kiyanun kana kanannu iveray kaninku na trau, 'alrana muravak kannu nazu. 10na ulra ziyan kaninku mu, maw ninu mapiya; na ulra ziya kannu, kuwazu maw ninku mapiya, nanku lihu makalrang kanazu zi kurena'u. 11makuwa ku harem kannu i kazu, 'azi lra uwavilin kani punapunan, mawmu kazu i punapunan nazu. na Vangesar i Ama a! kiyami kannu pakalrangan kanannu ngadan, mawna nannu iveray kaninku na ngadan, 'atripu nazu#17.11 <<kiyami kannu pakalrangan kanannu ngadan, mawna nannu iveray kaninku na ngadan, 'atripu nazu>> zuma ulra pidaya awatranan lulun vinavalray za <<kiyami kannu pakalrangan kanannu ngadan tu kezang, 'atripu lra kanannu iveray kananku na trau>>., maruwaya mukasa mutu saya nazu, kamawan za i inu zi i inku mukasa ta mutu saya. 12a mukasa ku kanazu mu, pakalrang ku kanannu ngadan, mawna nannu iveray kaninku na ngadan, 'atripaw nazu#17.12 <<pakalranganay zanu ngadan, izu na i veray kaninku na ngadan, 'atripu nazu>> zuma ulra pidaya awatranan lulun vinavalray za <<pakalranganay zanu ngadan za kezang, 'atripu zannu i veray kaninku kanazu>>.. iya'elaw ku kanazu, kanazu i savakan mawmau na kinuret patrepuen izu na trau a pakazuma mu, iniyan za sasa za uwalremes; i ini marepauwa pula'esi kanantu vati na Sēsiyo. 13harem, mukuwa ku kannu i kazu, a kazu ku ziyan i punapunan marengay kananni na ngay, maruwaya matemuy kanantu anger kananku semangalan. 14ku verayanay lra nannu vati kanazu, mawmu na trau i punapunan awiles kanazu, 'alrana 'azi muravak i punapunan nazu, penauwa kamawan kaninku za 'azi muravak i punapunan. 15'azi ku kiyami kannu kemay i punapunan murung kanazu muveruk, mawmu kiyami ku kannu puwadayu nazu kanizu na pimamelri kuwaatrengan. 16penauwa kamawan kaninku za 'azi muravak i punapunan, zi nazu 'azi muravak i punapunan. 17kiyami kannu pakalrangan kana tatena' vati maruwaya semunan kantaw nazu veray kannu; nu ngay maw tatena' vati. 18penauwa kamawan kannu za pakarun kaninku zuwa i punapunan, zi pakarun ku kanazu zuwa i punapunan. 19muramawan kanantu nirekudayan nazu, ku sunananay veray kannu i inku, maruwaya tematena' nazu semunan veray kannu.
20<<'azi ku mawmau muramawan kanazu kiyanun, zi muramawan kanazu na kituluz kanantu vati zi pakutena' kaninku na trau kiyanun, 21kiyalriman kanazu mapiya mukasaya mutu saya. Ama a, kiyalriman kanazu kazu kananiyam uwavaawan; kamawan za kazu u kananku uwavaawan, kamawan za kazu ku kanannu uwavaawan. kiyalriman kanazu mapiya mukasaya mutu saya, muramawan kana trau i punapunan maruwaya pakutatena' kaninku za maw nannu pinakarun. 22nu iveray na lihu kaninku, zi veray ku lra kanazu, muramawan kanazu za maruwaya mukasa mutu saya, kamawan kanta za mukasa mutu saya. 23kazu ku kanantu uwavaawan nazu, zi kazu u kananku uwavaawan, muramawan kanazu za maruwaya mukasa patulre'ay mutu saya, malrazama na trau i punapunan za pakarun u kaninku, zi malrazama za lraman u kanazu, kamawan za lraman u kaninku.
24<<Ama a, nu verayanay lra nazu kaninku; nu kazu ku i iyan mu, kiyalriman kanazu za kurelrang mukasa kaninku i kazu, muramawan za mena'uwa kanannu iveray kaninku na lihu, 'alrana a pakangawayan parevuwa' i punapunan mu, lraman u kaninku lra. 25na paresaresan penatezelr i Ama a, na trau i punapunan 'azi malrazam kannu, mawmu malrazam ku kannu, zi nanni na trau malrazam za i inu na pakarun kaninku. 26ku pakurena'uwaw u lra kanazu; uri patrutru ku kemani kemakuda, muramawan kanannu lramanan kaninku mu ma'izanga kanatu uwavaawan nazu, zi kazu ku kanantu uwavaawan nazu.>>

Currently Selected:

Yohanē 17: TPN

Highlight

Share

Copy

None

Want to have your highlights saved across all your devices? Sign up or sign in