Baruku 4
4
1 #
Sir. 24:23
Vutlhari i buku ya swileriso swa Xikwembu,
i nawu lowu tshamaka hilaha ku nga heriki.
Hinkwavo lava khomelelaka eka byona va ta hanya.
Kasi lava va byi fularhelaka va ta lova.
2Hundzuluka, we Yakobo, u byi amukela;
kongoma ku vonakala ka byona.
3U nga nyiketi ku dzuneka ka wena eka un'wana,
ni swifundzho swa wena eka vanhu vambe.
4Ha tsaka hina Vaisraele,
hikuva hi tiva leswi tsakisaka Xikwembu!
Ta ku chavelela Yerusalema
5Tiyani nhlana, va ka hina,
n'wina swihluke swa Israele!
6A ku nga ri ku mi herisa loko mi xavisiwa eka vamatiko;
mi nyiketiwile eka valala va n'wina hikuva mi karihisile Xikwembu.
7Mi sandzile loyi a mi vumbeke
hi ku ya gandzela mademona ku nga ri xona Xikwembu.
8Mi rivele Xikwembu lexi nga heriki, lexi xi mi kuriseke,
mi hlunamise Yerusalema la mi wundleke.
9Yerusalema ú vonile vukari lebyi mi weleke byi huma eka Xikwembu,
kutani ú te:
“Yingisani n'wina miti leyi vandzakaneke na mina Siyoni,
Xikwembu xi ehlisile gome lerikulu ehenhla ka mina;
10hikuva ndzi vonile vukhumbi bya vana va mina va xinuna ni va xisati,
lebyi tisiweke eka vona hi Loyi-a-hanyaka-hilaha-ku-nga-heriki.
11Ndzi va wundlile hi ntsako,
kambe hi swirilo ni gome ndzi va hlongorile.
12Ku nga vi ni loyi a tsakaka ha mina,
mina noni la feriwaka hi lavo tala;
Ndzi siyiwile enhlomulweni hikwalaho ka swidyoho swa vana va mina,
hikuva va fularhele nawu wa Xikwembu.
13A va vanga na mhaka ni swileriso swa xona;
a va fambanga hi milawu ya xona
a va khomanga tindlela ta xona loko xi va laya hi ku lulama.
14“Tanani n'wina vaakelani va mina Siyoni;
tsundzukani ku khomiwa ka vana va mina va xinuna ni va xisati,
loku vangiweke hi Loyi-a-hanyaka-hilaha-ku-nga-heriki.
15Ú va nyiketile eka tiko ro huma kule,
tiko ro pfumala tingana, ra ririmi rimbe,
leri a ri nga xiximi lava dyuhaleke, ri nga tweli n'wana evusiwana.
16Va byisile vana va mina va xinuna lava rhandzekaka,
va ndzi tekela vana va mina va xisati ndzi sala ndzi ri ndzexe kukotisa noni.
17“Kambe xana ndzi nga mi pfunisa ku yini,
n'wina vana va mina xana?
18Loyi a mi tiseleke makhombo lawa,
hi yena ntsena la nga ta mi kutsula etikweni ra valala va n'wina.
19Fambani, vana vanga, fambani,
hikuva ndzi siyiwile enhlomulweni.
20Eku kombeleni ka mina ndzi hluvurile nguvu ya ku rhula,
ndzi ambala nguvu yo khwaxa,
ndzi ta huwelela eka Loyi-a-hanyaka-hilaha-ku-nga-heriki
masiku hinkwawo ya ku hanya ka mina.
21“Tiyani nhlana, vana vanga,
huwelelani eka Xikwembu,
xi ta mi kutsula emavokweni ya matimba
ya vaiala va n'wina.
22Ndzi vekile ku tshemba ka mina eka Loyi-a-hanyaka-hilaha-ku-nga-heriki leswaku a mi ponisa.
Ntsako wo huma eka Muhlawuleki wu tile eka mina,
hikuva tintswalo ti ta mi tela ku nga ri khale,
ti huma eka Muponisi wa n'wina, Loyi-a-hanyaka-hilaha-ku-nga-heriki.
23Ndzi mi tshikile mi ri ni gome ni swirilo,
kambe Xikwembu xi ta mi tlherisela eka mina hi ntsako lowukulu lowu nga heriki.
24Tanihi laha vaakelani va mina Siyoni va voneke ku khomiwa ka n'wina,
ku nga ri khale va ta vona hilaha Xikwembu xi mi ponisaka hakona.
Leswi swi ta mi tela hi ku dzuneka lokukulu
ni vukulukumba bya Loyi-a-hanyaka-hilaha-ku-nga-heriki.
25Vana vanga, tiyiselani vukari
lebyi Xikwembu xi mi endleke ha byona.
Valala va n'wina va mi xanisile,
kambe ku nga ri khale mi ta vona ku herisiwa ka vona
mi ta va tshama etinhan'wini.
26Vana vanga lava rhandzekaka, mi fambile hi ku xaniseka;
mi byisiwile tanihi ntlhambi lowu phangiweke hi valala.
27“Tiyani nhlana vana vanga, mi huwelela eka Xikwembu,
hikuva mi ta tsundzukiwa hi yena, loyi a mi tiseleke leswi.
28Tanihi laha mi nga tihlawulela hakona ku va kule ni Xikwembu,
tlhelani mi xi lava hi nkhinkhi.
29La nga mi vangela makhombo lawa
ú ta mi tisela ntsako lowu nga heriki siku leri a nga ta mi ponisa ha rona.”
Ta ku pfuna Yerusalema
30Tiya nhlana we Yerusalema,
hikuva loyi a ku thyeke vito ú ta ku khongotela.
31Khombo eka lava va ku xaniseke
ni ku tsakela ku wa ka wena.
32Khombo eka miti leyi vana va wena va tirheke eka yona va ri makhumbi;
khombo eka muti lowu amukeleke vana va wena.
33Tanihi leswi wu tsakeke eku weni ka wena ni le ku herisiweni ka wena,
wu ta vaviseka ekhombyeni ra wona.
34Ndzi ta herisa ku tinyungubyisa ka wona eka nhlayo leyikulu ya vanhu va wona,
ndzhukano wa wona wu ta hundzuka ku vaviseka.
35Ndzilo wu ta xikela ehenhla ka wona masiku yo tala
wu huma eka Loyi-a-hanyaka-hilaha-ku-nga heriki,
kutani mademona ma ta tshama eka wona nkarhi lowo leha.
36Languta evuxeni we Yerusalema,
vona ntsako lowu taka eka wena, wu huma eka Xikwembu.
37Vona, vana va wena lava a wu va rhumele ekule, va vuya.
Va vuya, va hlengeletana va huma evuxeni ni le vupeladyambu
hi rito ra Muhlawuleki,
va tlangela eku dzunekeni ka xona Xikwembu.
Currently Selected:
Baruku 4: TSO89
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1989. Used with permission. All rights reserved.