Baruku 3
3
1“ ‘We HOSI ya matimba hinkwawo, Xikwembu xa Israele, hi huwelela eka wena hi moya lowu nge nhlomulweni ni mbilu leyi karhaleke. 2Yingisa we HOSI, u hi twela vusiwana hikuva hi ku dyoherile. 3Wena u fuma hilaha ku nga heriki, kambe hina ha lova hi fambela makumu. 4We HOSI ya matimba hinkwawo, Xikwembu xa Israele, sweswi yingisa xikhongelo xa hina Vaisraele, hikuva ha fa hileswi hi nga vana va lava ku dyoheleke, lava nga yingisangiki rito ra wena HOSI Xikwembu xa vona; kutani hi weriwile hi makhombo hikwalaho ka swona. 5U nga tsundzuki ku homboloka ka vatata wa hina, kambe hi nkarhi lowu wa ku kayakayeka, tsundzuka matimba ya wena ni vito ra wena. 6Hikuva hi wena HOSI Xikwembu xa hina, naswona hi lava ku dzunisa wena ntsena, we HOSI. 7U endlile leswaku timbilu ta hina ti ku chava, hi tlhela hi ku vitana. Hi ta ku dzunisa hi ri evukhumbini, hikuva hi tshikile ku homboloka ka vatata wa hina lava va ku dyoheleke. 8Vona, namuntlha hi le vukhumbini laha u hi hagalaseleke kona, kutani ha soriwa, ha rhukaniwa ni ku biwa hikwalaho ka ku homboloka ka vatata wa hina lava va ku fularheleke, wena HOSI Xikwembu xa hina.’ ”
Ta ku dzunisa ka vutlhari
9 #
Swiv. 4:20-22
We Israele, yingisa milawu ya vutomi; rhiya ndleve, u dyondza vutlhari!
10We Israele, hikwalaho ka yini u kumeka u ri etikweni ra valala va wena,
u dyuhalela etikweni rimbe.
Hikwalaho ka yini u nyamisiwa ni vafi
11u hlayiwa ni lava nge xivandleni xa vafi?
12U fularhele xihlovo xa vutlhari.
13Loko ingi a wu lo famba endleleni ya Xikwembu,
a wu ta tshama eku rhuleni hilaha ku nga heriki.
14Dyondza laha ku nga ni vutlhari,
laha ku nga ni matimba,
laha ku nga ni ku twisisa,
leswaku u ta kota ni ku vonisisa
laha ku nga ni ku leha ka masiku ni vutomi,
laha ku nga ni ku vonakala ni ku rhula.
15 #
Yob. 28:12,20 Xana i mani la kumeke laha vutlhari byi nga kona ke?
I mani la nga nghena etindlwini ta byona ta vuhlayiselo ke?
16Xana ti kwihi tihosi ta matiko,
ni lava fumaka swiharhi swa misava?
17Xana va kwihi lava titsakisaka hi tinyanyana ta tilo,
lava hlengeletaka silivhere ni nsuku,
swi nga leswi vanhu va swi tshembaka,
va nga tshikiki ku swi lava?
18Xana va kwihi lava kungelaka ku kuma silivhere, va hisekelaka yona,
lava migingiriko ya vona yi nga riki na mpimo?
19Va nyamalarile va rhelela exivandleni xa vafi,
ku humelela van'wana, va teka ndhawu ya vona.
20Lavantshwa va vonile ku vonakala ka siku,
va tshamile emisaveni;
kambe na vona a va yi tivanga ndlela ya vutivi,
hambi ku ri ku twisisa tindlela ta byona,
kumbe ku byi kuma.
21Vana va vona va xinuna va lahlekile kule
ni ndlela ya byona.
22EKanana a byi twiwanga,
hambi ku ri ku voniwa eTemani a byi voniwanga.
23Vana va xinuna va Hagara, lava lavaka ku twisisa emisaveni
vaxavisi va le Merani ni va le Temani,
vagaringeti ni valavi va ku twisisa
a va yi tivanga endlela yo kuma vutlhari,
a va ehleketanga magondzo ya byona.
24We Israele, a hi ku kula ka yindlu ya Xikwembu!
A hi ku anama ka mfumo wa xona!
25I wukulu, wu hava makumu;
wu tlakukile, a wu pimeki.
26Swihontlovila swi velekeriwe kona, swi nga leswi dumeke khale,
tona tinghwazi leti leheke swinene.
27Xikwembu a xi swi hlawulanga,
a xi swi kombanga ndlela yo kuma vutivi.
28Hikwalaho ka ku pfumala vutlhari swi lovile,
swi nyamalala hikwalaho ka vuphukuphuku bya swona.
29Xana i mani la tlhandlukeleke etilweni, ku ya teka vutlhari?
La xikeke na byona hi le mapapeni i mani ke?
30I mani la fambeke henhla ka lwandle ku ya byi kuma,
loyi a nga byi xavaka hi nsuku lowu tengeke?
31Ku hava la tivaka ndlela yo byi kuma,
la lavisisaka gondzo ro ya eka byona.
32Kasi loyi a tivaka swilo hinkwaswo, wa byi tiva,
ú byi kumile hi ku twisisa ka yena.
Hi yena la lulamiseke misava, yi va kona hilaha ku nga heriki,
ú yi tata hi swivumbiwa swa milenge ya mune.
33Hi yena la rhumaka timboni, kutani ti famba;
loyi a ti vitanaka, ti n'wi yingisa hi ku chava.
34Tinyeleti a ti vangama etindhawini ta tona, ti tsakile;
ú ti vitanile, kutani ti ku: “Hi hina lava!”
Ti vangamile, ti tsakela loyi a ti endleke.
35Hi xona xi nga Xikwembu xa hina;
ku hava loyi a nga ringanisiwaka na xona!
36Xona xi kumile ndlela hinkwayo ya vutivi,
xi byi nyika nandza wa xona Yakobo,
a nga Israele loyi xi n'wi rhandzeke.
37Endzhaku ka sweswo vutlhari byi humelerile emisaveni,
byi tshama exikarhi ka vanhu.
Currently Selected:
Baruku 3: TSO89
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1989. Used with permission. All rights reserved.