Matai 9
9
Yesu ikumbumbulusya ugwambungo ya bukokonyale
(Mar 2.1-12; Luk 5.17-26)
1Popapo Yesu alinkwipaka mwiboti, alinkwambuka inyanja alinkwakufika nkaya kake. 2Keta, balinkuntwalila umundu gwa mbungo ya bukokonyale, uyu alambalele pakitala. Umwene Yesu bo alubwene ulwitiko lwabo, alinkumbula ugwa mbungo ya bukokonyale alinkuti, “Kibaga itolo mwanangu, imbibi syako siswegigwe.” 3Popapo abamanyandagilo bamo balinkwiyobesya mundammyabo balinkuti, “Umundu uyu ikuhelula.” 4Umwene Yesu bo asyagenie inyinogono syabo, alinkuyoba alinkuti, “Syo mukwinogona syaki imbibi mundumbula syinu? 5Ngimba lyo ipepe liliku, ilya kuti, ‘Uswegigwe imbibi syako,’ pamo ilya kuti, ‘Sumuka gwendege?’ 6Loli lilino mumanye ukuti Nnyamundu ali namaka ukuswa imbibi nkisu.” Popapo alinkumbula ugwa mbungo ya bukokonyale alinkuti, “Sumuka, gwitwikege ikitala kyako ubukege kumyako.” 7Umwene alinkusumuka alinkubuka kumyake. 8Abene abandu ikilundilo kyosa bo basibwene sisisi, po lulinkubaga ulutende, balinkuntufya Kyala uyu abapele abandu amaka bo aga.
Yesu ikumbilikila Matai
(Mar 2.13-17; Luk 5.27-32)
9Lelo Yesu bo ikukinda ukufuma papo, alinkumbona umundu yumo uyu ali yo Matai ingamu, bo itugesye pabusongelo isongo, alinkumbula alinkuti, “Ngongaga.” Popapo Matai alinkusumuka alinkunkonga. 10#Luk 15.1-2 Lelo bo Yesu atugesye ali pakulya nnyumba, popapo abasongesyasongo nabatulanongwa ba bingi balinkwisa, balinkwitugasania nagwe Yesu nabafundigwa bake. 11Abene abaFarisai bo basibwene, balinkubalalusya abafundigwa bake balinkuti, “Nongwa ya fiki ummanyisi gwinu ikulya nabasongesyasongo nabatulanongwa?” 12Loli umwene bo asipilike, alinkubamula alinkuti, “Bakaya bo bakafu aba bikundonda unganga, loli ba babine. 13#Mat 12.7; Hos 6.6Loli amubukege mukamanyile isilikusanusya ilisyu ili likuti, ‘Nikulonda ulupakisyo, gomma amakemo.’ Namanga ngisa kukubabilikila abagolofu, mma, loli ba batulanongwa.”
Isya kufipika ifyakulya
(Mar 2.18-22; Luk 5.33-39)
14Popapo balinkwisa kwa Yesu abafundigwa ba Yohani, balinkundalusya balinkuti, “Fiki apa uswe nabaFarisai tukufipika ifyakulya, loli abafundigwa bako batikufipika?” 15Umwene Yesu alinkubamula alinkuti, “Ngimba aba bali palusekelo lwa bwegi babagile ukusulumania akabalilo kosa aka ali nabo umwegankikulu? Loli gikwisaga amasiku bo bansosisyeko umwegankikulu kumyabo, po loli bisakufipikaga ifyakulya. 16Nayumo atikukatikapo ikigamba kyamwenda umpya pamwenda unkulu; buno ikigamba kikunyafulako umwenda, po gukongelelapo ukunyafuka. 17Kangi batikukusya ubwalwa bwamafilu ubuteta mfyakubikilamo ifikulu; buno linga bakusisyemo, ifyakubikilamo fikupufuka, po lelo ubwalwa bwa mafilu bukoneka, mfyakubikilamo fikonangika. Loli bikukusya ubwalwa bwa mafilu ubuteta mfyakubikilamo ifipya, po fyosafyo fibili fikuponaga.”
Umwana undindwana gwa nkulumba, nunkikulu uyu agupalamasisye umwenda gwa Yesu
(Mar 5.21-43; Luk 8.40-56)
18Lelo bo Yesu ali pakuyoba sisisi, popapo alinkwisa yumo unkulumba gwannyumba yakwiputilamo, alinkubunguluka alinkuyoba na Yesu alinkuti, “Umwanangu undindwana afwile lululu; loli isaga ukambikepo ikiboko kyako, po ikuyaga mumi.” 19Popapo Yesu alinkusumuka, alinkunkonga pamopene nabafundigwa bake. 20Lelo popapo unkikulu yumo uyu ali ninyibuko ya ilopa ifyinja kalongo nafibili, alinkusegelela kunyuma alinkukipalamasya ikipeto kya mwenda gwake. 21Namanga iyobesyaga mwene atigi, “Nalinga nikukipalamasya kikilundo kyake itolo nikuponaga.” 22Umwene Yesu alinkusyutuka, bo ambwene alinkumbula alinkuti, “Kibaga gwe mwanangu, ulwitiko lwako lukupokile.” Pakabalilo kako itolo unkikulu yula alinkupona. 23Umwene Yesu alinkufika panyumba ya nkulumba gwa nnyumba yakwiputilamo yula. Bo ababwene abakubamalonge nikilundilo kya bandu aba baywegaga, alinkubabula alinkuti, 24“Amusokepo; namanga akalindwana kakafwa, kagonile itolo utolo.” Abene balinkunseka. 25Lelo bo bakisosisye ikilundilo panja, popapo alinkwingila, alinkukakola ikiboko kyake; akalindwana kalinkusumuka. 26Popapo inongwa sisisi silinkufumuka mosa nkisu kila.
Yesu ikubabumbulusya abafwamaso babili
27Umwene Yesu bo ikukinda ukufuma papo, abafwamaso babili balinkunkonga, balinkukolela balinkuti, “Ulitupakisyaga, gwe nnya Davidi.” 28Lelo bo ingile nnyumba, abafwamaso bala balinkwisa kumyake; umwene Yesu alinkubalalusya alinkuti, “Bule mukwitika ukuti mbagile uku babumbulusya?” Abene balinkuti, “Ena Gwe Ntwa.” 29Popapo alinkubapalamasya amaso gabo alinkuti, “Sisege bo mumo luyilile ulwitiko lwinu.” 30Popapo amaso gabo galinkwenda nukwiguka. Umwene Yesu alinkubasoka fiyo alinkuti, “Mwandege mungambulaga nayumo inongwa sisisi.” 31Loli abene bo basokile, balinkusifumusya mosa nkisu kila inongwa sya Yesu.
Yesu ikumbumbulusya umundu uyu ali kinunu
32Lelo bo bikusokapo abandu bala, popapo balinkuntwalila umundu uyu ali kinunu, ugwa mbepo inyali. 33Bo ayisosisye imbepo inyali, uyu ali kinunu alinkwenda nukuyoba. Popapo ikilundilo kilinkuswiga kilinkuti, “Sikabonekamo siku mwa Israeli bo isi.” 34#Mat 10.25; 12.24; Mar 3.22; Luk 11.15Loli abaFarisai balinkuti, “Mmaka ga nkulu gwa mbepo inyali mo mumo ikusisokesya imbepo inyali.”
Ikisa kya Yesu kubandu
35 #
Mat 4.23; Mar 1.39; Luk 4.44 Popapo Yesu alinkusyungutila ntwaya tosa utukulumba nutunandi, alinkumanyisya nnyumba syabo syakwiputilamo, nukulumbilila inongwa inunu isya butwa; kangi alinkubumbulusya imbungo syosa nubonywa bosa. 36#Kuba 27.17; 1 Banyaf 22.17; 2 Syambu 18.16; Eze 34.5; Mar 6.34Bo afibwene ifilundilo, popapo ikisa kili nkumwaga, namanga bakatele, banyambanike itolo ukuti ng'osi isi sikaya nuntimi. 37#Luk 10.2Popapo alinkuyoba kubafundigwa bake alinkuti, “Untondolo go mwingi naloli, loli ababombi bo banandi. 38Amusumege lelo kumwenentondolo, ukuti abatumege ababombi muntondolo gwake.”
Currently Selected:
Matai 9: NNBII
Highlight
Share
Copy
Want to have your highlights saved across all your devices? Sign up or sign in
BAIBULO INONGWA INUNU © Bible Society of Malawi, 2017.