Matai 10
10
Abatumigwa kalongo nababili
(Mar 3.12-19; Luk 6.12-16)
1Yesu alinkubabilikila abafundigwa bake kalongo na babili, alinkubapa amaka ga kusilambikila imbepo inyali nukusikaga, naga kubumbulukisya imbungo syosa nubonywa bosa. 2Isyene ingamu sya batumigwa kalongo na babili bala syosa isi: ugwa kwanda ali yo Simoni uyu batigi Peteri imbegwa, na Andrea unnuguna gwake, Yakobu unnya Zebedai na Yohani unnuguna gwake; 3Filipu na Bartolomai, Tomasi na Matai unsongesyasongo, Yakobu unnya Alifeyo na Tadeyo; 4Simoni ugwa nkaya kaKana na Yuda ugwa nkisu kya Karioti, uyu panyuma ambikaga Yesu mmaboko ga balugu.
Ukutumigwa kwa bandu bala kalongo na babili
(Mar 6.7-13; Luk 9.1-6; 10.1-12)
5Kalongo na babili bababa, Yesu alinkubatuma alinkubakomelesya alinkuti, “Mungabukaga munjila iya bapanja, komma nukwakwingila nkaya kabaSamaria; 6loli kununu mubukege kung'osi isi sisobile isya nyumba ya Israeli. 7#Luk 10.4-12Bo mukwenda mulumbililegelilya kuti, ‘Ubutwa bwa kumwanya busegelile.’ 8Mukabagangulege ababine, mukabasyusyege abafwe, mukabelusyege abambungo ya bukoma, mukasikagege nimbepo inyali; mwambilile itolo, nanumwemupege itolo. 9Komma ukwega indalama isya golide nisya siliva, nisya kikuba munyambi syinu. 10#1 Kor 9.14; 1 Tim 5.18Nalinga yo nyambi ya kubikilamo imbayo yamunjila, gyomma nimiselekesye mibili, fyomma nifilato, yomma ningili. Namanga umbombi kumbagile ukwambilila ifyakulya fyake. 11Nkaya kosa akakulumba pamo akanandi muno mukwakwingilangamo, mo mukandondege mumo uyu abagile, mukitugalege nagwe ukufika papo mukwakusokangamo. 12Bomukwingila nnyumba, mukayobege ukuti, ‘Ulutengano luyege nanugwe;’ 13lelo linga inyumba yiyo yibagile, po ulutengano lwinu lukayisilege. Loli linga yikabagila, po ulutengano lwinu lukabagomokelege. 14#Imbo 13.51Linga yumo atikubambilila pamo atikugapilikisya amasyu ginu, bo mukusokamo nnyumba yiyo pamo nkaya kako, mukakung'undege ulufumbi ulululi kusi kumalundi ginu. 15#Bwa 19.24-28; Mat 11.24Naloli nikubabula umwe nikuti, Pisikulya bulongelo, sisakuya hobofupo isya nkisu kya Sodomu nikya Gomora, ukukinda isya nkaya kala.
Ukufwimigwa uku kukwisa
(Mat 24.9-14; Mar 13.9-13; Luk 21.12-19)
16 #
Luk 10.3
“Keta, une nikubatuma bo ing'osi pakati pambumbi. Amuyege bakomu lelo bo si njoka, kangimuyege belu bo si ngunde.
17 #
Mar 13.9-11; Luk 12.11-12; 21.12-15 “Loli mwandege kubandu; namanga bisakubabikaga pabulongi, bisakubakomaga nnyumba syabo syakwiputilamo. 18Mwisakutwaligwaga nkyeni mbalindililakisu na mbanyafyale panongwa yangu, ukuti luyegelo lusisimikisyo kumyabo na kubapanja. 19Bo bikubatwala pabulongi, mungisakwiyayaga na muno mwisakuyobelaga; buno mwisakupegigwaga nkabalilo kako isi mwisakuyobaga. 20Namanga mukaya yo umwe mukuyoba, loli yo Mbepo gwa Gwisemwe uyu ikwakuyobaga nkati mmyinu. 21#Mar 13.12; Luk 21.16 Buno umundu isakumohelaga ugwamyabo ukuti afwege, ugwise isakumohelaga umwanake ukuti afwege, bope abana bisakubasambukilaga abapapi nukubagoga. 22#Mat 24.9,13; Mar 13.13; Luk 21.17Mwisakubengigwaga nabandu bosa panongwa ya ngamu yangu; loli uyu linga ikumilisya ukufika kubumalikisyo, yo isakupokigwaga. 23Lelo linga bikubafwima nkaya aka, mukayongelege nkaya akangi. Namanga naloli nikubabula umwe nikuti, mutisakumala utwaya tosa twa Israeli bo akisa Nnyamundu.
24 #
Luk 6.40; Yoh 13.16; 15.20 “Umfundigwa akankinda ummanyisi gwake ubukulumba, yope nuntumwa akankinda umalafyale gwake. 25#Mat 9.34; 12.24; Mar 3.22; Luk 11.15Kumfwene umfundigwa ukuya bo yu mmanyisi gwake, yope nuntumwa kumfwene ukuya bo yu malafyale gwake. Linga bambilikile umwenenyumba iya Belezebuli, po baleke ukukindilila kubannyumba yake!
Uyu fikutimuntilege
(Luk 12.2-9)
26 #
Mar 4.22; Luk 8.17 “Bunobuno lelo mungabatilaga, namanga kakayako kamo aka kikingile kako katisakukinguligwaga, naka kafisigwe kako katisakumanyigwaga. 27Isi linga nikubabula mungisi, mukasiyobege ndumuli; nisi mukuheheligwa mumbulukutu, syo mukafumusyege pamwanya panyumba. 28Mungabatilaga aba bikugoga umbili, aba bakamanya ukugoga umoyo; kununu muntilege uyu amenye ukugupyuta umoyo numbili mu Gehena. 29Ngimba utwa batundulu tubili tutikulisigwa pa ntengo gwa tambala yumo? Nakamo muli tututu katikufwa, bo akamanya uGwisemwe. 30Loli umwe syope na si nywili sya kuntu sibaligwe syosa. 31Komma lelo ukutila; umwe muli bapala ukutukinda twa batundulu tu twingi.
Ukumwitika nukunkana Kristi
(Luk 12.8-9)
32“Popapo lelo gwesa uyu linga ikunyitika une nkyeni mbandu, yo nanine nisakumwitikaga nkyeni mwa Tata uyu ali kumwanya. 33#2 Tim 2.12Loli uyu linga ikwikana kumyangu nkyeni mbandu, yo nanine nisakunkanaga nkyeni mwa Tata uyu ali kumwanya.
Lomma ulutengano loli bu bwite
(Luk 12.51-53; 14.26-27)
34“Munginogonaga ukuti nisile nkubika ulutengano nkisu; umma, ngisankubika ulutengano, loli bu bwite. 35#Mika 7.6 Namanga nisile nkubasomania umwana undumyana nugwise, yope undindwana nunna, unkamwana nunna gwa ndume; 36umundu, abannyumba yake bo bisakuyaga balugu bake. 37Uyu linga anganile ugwise pamo unna ukunginda une, yo akambagila; na uyu linga anganile umwanake undumyana pamo undindwana ukunginda une yo akambagila. 38#Mat 16.24; Mar 8.34; Luk 9.23Yope na uyu linga atikupimba ikipingika kyake nukungonga munyuma, yo akambagila. 39#Mat 16.25; Mar 8.35; Luk 9.24; 17.33; Yoh 12.25Uyu linga ikutimbwagile ubumi bwangu, yo abupesisye; loli uyu linga ikubutaga ubumi bwake panongwa yangu, yo isakubwagaga.
Ifihombigwa
(Mar 9.41)
40 #
Mar 9.37; Luk 9.48; 10.16; 13.20 “Uyu linga ikubambilila umwe, yo ikunyambilila une; kangi uyu linga ikunyambilila une, yo ikumwambilila uyu alindumile une. 41Uyu linga ikumwambilila unsololi papo nsololi, yo isakuhombigwaga ifihombigwa fya nsololi; yope uyu linga ikumwambilila ungolofu papo ngolofu, isakwambililaga ifihombigwa fya ngolofu. 42Kangi gwesa uyu linga ikunnwesya yumo mbanandi aba ikinwelo kimo kyamisi amatalalifu papo mfundigwa, naloli nikubabula une nikuti, atisakupondwa ifihombigwa fyake.”
Currently Selected:
Matai 10: NNBII
Highlight
Share
Copy
Want to have your highlights saved across all your devices? Sign up or sign in
BAIBULO INONGWA INUNU © Bible Society of Malawi, 2017.